ಭಾರತಕ್ಕೆ ಬರುವ ಎಲ್ಲ ಅಂತಾರಾಷ್ಟ್ರೀಯ ಪ್ರಯಾಣಿಕರಿಗೆ ಏರ್‌ ಸುವಿಧಾ ಫಾರಂ ಕಡ್ಡಾಯ

ಎಬೋಲಾ ಸೋಂಕಿನ ಆತಂಕದ ಹಿನ್ನೆಲೆಯಲ್ಲಿ ಭಾರತಕ್ಕೆ ಆಗಮಿಸುವ ಎಲ್ಲ ಅಂತಾರಾಷ್ಟ್ರೀಯ ಪ್ರಯಾಣಿಕರು ಏರ್‌ ಸುವಿಧಾ ಸ್ವಯಂ ಘೋಷಣಾ ಫಾರಂ (Self-Declaration Form) ಭರ್ತಿ ಮಾಡುವುದು ಕಡ್ಡಾಯ ಎಂದು ವಲಸೆ ಇಲಾಖೆ (Bureau of Immigration) ಸೂಚಿಸಿದೆ. ಭಾರತೀಯ ಪಾಸ್‌ಪೋರ್ಟ್‌ ಹೊಂದಿರುವವರು, ಸಾಗರೋತ್ತರ ಭಾರತೀಯ ನಾಗರಿಕರು (OCI) ಹಾಗೂ ವಿದೇಶಿ ಪಾಸ್‌ಪೋರ್ಟ್‌ ಹೊಂದಿರುವವರು ಸೇರಿದಂತೆ ಎಲ್ಲರಿಗೂ ಈ ನಿಯಮ ಅನ್ವಯಿಸುತ್ತದೆ. ಪ್ರಯಾಣಿಕರ ಹಿಂದಿನ ಪ್ರಯಾಣದ ವಿವರ ಏನೇ ಇದ್ದರೂ ಫಾರಂ ಸಲ್ಲಿಸಬೇಕು.

ಭಾರತಕ್ಕೆ ಆಗಮಿಸುವ 24 ಗಂಟೆಗಳ ಒಳಗೆ ಆನ್‌ಲೈನ್‌ನಲ್ಲಿ ಫಾರಂ ಭರ್ತಿ ಮಾಡಬೇಕು. ವಿಮಾನ ಹತ್ತುವ ಮೊದಲು, ಸಾಧ್ಯವಾದರೆ ವೆಬ್‌ ಚೆಕ್‌ಇನ್‌ ಸಮಯದಲ್ಲೇ ಈ ಪ್ರಕ್ರಿಯೆ ಪೂರ್ಣಗೊಳಿಸುವಂತೆ ಸೂಚಿಸಲಾಗಿದೆ. ಪಾಸ್‌ಪೋರ್ಟ್‌, ವೀಸಾ (ಅನ್ವಯಿಸಿದರೆ), ವಿಮಾನ ಟಿಕೆಟ್‌, ಭಾರತದಲ್ಲಿ ತಂಗುವ ವಿಳಾಸ, ಕಳೆದ 21 ದಿನಗಳ ಪ್ರಯಾಣದ ವಿವರ, ಸಂಪರ್ಕ ಸಂಖ್ಯೆ ಮತ್ತು ಇಮೇಲ್‌ ವಿಳಾಸ ಸಿದ್ಧವಾಗಿಟ್ಟುಕೊಳ್ಳಬೇಕು. ಮೊಬೈಲ್‌ ಅಥವಾ ಇಮೇಲ್‌ಗೆ ಬರುವ OTP ಮೂಲಕ ಪರಿಶೀಲನೆಯೂ ನಡೆಯುತ್ತದೆ.

ಫಾರಂನಲ್ಲಿ ಎಬೋಲಾ ಸೋಂಕಿಗೆ ಒಳಗಾಗಿರುವ ಸಾಧ್ಯತೆ, ಸಂಪರ್ಕದ ವಿವರ ಹಾಗೂ ಸಂಬಂಧಿತ ಆರೋಗ್ಯ ಲಕ್ಷಣಗಳ ಕುರಿತು ಮಾಹಿತಿ ನೀಡಬೇಕು. ಸಲ್ಲಿಸಿದ ಬಳಿಕ ದೊರೆಯುವ ದೃಢೀಕರಣ ಪ್ರತಿಯನ್ನು ಡೌನ್‌ಲೋಡ್‌ ಮಾಡಿಕೊಂಡು ಪ್ರಯಾಣದ ವೇಳೆ ಇಟ್ಟುಕೊಳ್ಳಬೇಕು. ಭಾರತಕ್ಕೆ ಬಂದಾಗ ವಿಮಾನ ನಿಲ್ದಾಣದ ಅಂತಾರಾಷ್ಟ್ರೀಯ ಪ್ರಯಾಣಿಕರ ಆರೋಗ್ಯ ವಿಭಾಗ ಅಥವಾ ವಲಸೆ ಕೌಂಟರ್‌ನಲ್ಲಿ ಇದನ್ನು ತೋರಿಸಬೇಕಾಗಬಹುದು. ಅಗತ್ಯವಿದ್ದಲ್ಲಿ ಆರೋಗ್ಯಾಧಿಕಾರಿಗಳು ಹೆಚ್ಚುವರಿ ತಪಾಸಣೆ ನಡೆಸಲಿದ್ದಾರೆ.

ಈ ಕ್ರಮವು ಕಾಂಗೋ ಪ್ರಜಾಸತ್ತಾತ್ಮಕ ಗಣರಾಜ್ಯ ಮತ್ತು ಉಗಾಂಡಾದಲ್ಲಿ ಕಾಣಿಸಿಕೊಂಡ ಎಬೋಲಾ/ಬುಂಡಿಬುಗ್ಯೊ ವೈರಸ್‌ ಸೋಂಕಿನ ಹಿನ್ನೆಲೆಯಲ್ಲಿ ಜಾರಿಗೆ ಬಂದಿದೆ. ಅಧಿಕೃತ ಏರ್‌ ಸುವಿಧಾ ಪೋರ್ಟಲ್‌ ಮೂಲಕ ಉಚಿತವಾಗಿ ಫಾರಂ ಸಲ್ಲಿಸಬಹುದು.