ದೇಶ ಸುತ್ತಲು ವೇಗದ ರೈಲುಗಳೇ ಹೊಸ ಆಯ್ಕೆ

ಭಾರತೀಯ ರೈಲ್ವೇಯ ವಂದೇ ಭಾರತ್ ಎಕ್ಸ್‌ಪ್ರೆಸ್ ರೈಲುಗಳು ದೇಶದ ದೂರದ ನಗರಗಳನ್ನು ವೇಗವಾಗಿ ಮತ್ತು ಆರಾಮದಾಯಕವಾಗಿ ಸಂಪರ್ಕಿಸುತ್ತಿದ್ದು, ಪ್ರವಾಸಿಗರ ನೆಚ್ಚಿನ ಆಯ್ಕೆಯಾಗುತ್ತಿವೆ. 2019ರಲ್ಲಿ ಆರಂಭವಾದ ಈ ಸೆಮಿ-ಹೈ ಸ್ಪೀಡ್ ರೈಲುಗಳು ಈಗ 650 ಕಿಮೀ. ಗಿಂತಲೂ ಹೆಚ್ಚಿನ ದೂರದ ಮಾರ್ಗಗಳಲ್ಲೂ ಸಂಚರಿಸುತ್ತಿವೆ. ಇದರಿಂದ ದೀರ್ಘ ಪ್ರಯಾಣದ ಸಮಯ ಗಣನೀಯವಾಗಿ ಕಡಿಮೆಯಾಗಿದ್ದು, ಆಧುನಿಕ ಸೌಲಭ್ಯಗಳೊಂದಿಗೆ ಸುಖಕರ ರೈಲುಯಾನ ಸಾಧ್ಯವಾಗಿದೆ.

ಈ ಉದ್ದದ ವಂದೇ ಭಾರತ್ ಮಾರ್ಗಗಳು ದೇಶದ ಪ್ರಮುಖ ಪ್ರವಾಸಿ ತಾಣಗಳನ್ನು ಸಂಪರ್ಕಿಸುವ ವಿಶೇಷತೆಯನ್ನು ಹೊಂದಿವೆ. ಯುನೆಸ್ಕೋ ವಿಶ್ವ ಪರಂಪರೆ ತಾಣಗಳು, ಐತಿಹಾಸಿಕ ನಗರಗಳು, ಪ್ರಾಚೀನ ದೇವಾಲಯಗಳು, ಸುಂದರ ಕಡಲತೀರಗಳು, ಪರ್ವತ ಪ್ರದೇಶಗಳು ಹಾಗೂ ಸಾಂಸ್ಕೃತಿಕ ಕೇಂದ್ರಗಳಿಗೆ ಈ ರೈಲುಗಳ ಮೂಲಕ ಸುಲಭವಾಗಿ ತಲುಪಬಹುದು. ಹೀಗಾಗಿ ಪ್ರವಾಸೋದ್ಯಮಕ್ಕೂ ಹೊಸ ಉತ್ತೇಜನ ಸಿಕ್ಕಿದೆ.

ನವದೆಹಲಿ–ವಾರಾಣಸಿ, ತಿರುವನಂತಪುರಂ–ಕಾಸರಗೋಡು, ಚೆನ್ನೈ–ತಿರುನೆಲ್ವೇಲಿ, ಮುಂಬಯಿ–ಗೋವಾ ಸೇರಿದಂತೆ ಹಲವು ದೀರ್ಘ ಮಾರ್ಗಗಳ ವಂದೇ ಭಾರತ್ ರೈಲುಗಳು ಪ್ರಯಾಣಿಕರಿಗೆ ವೇಗ, ಸಮಯಪಾಲನೆ, ವಿಶಾಲ ಆಸನಗಳು, ಹವಾನಿಯಂತ್ರಿತ ಬೋಗಿಗಳು ಹಾಗೂ ಆಧುನಿಕ ಸೌಲಭ್ಯಗಳನ್ನು ಒದಗಿಸುತ್ತಿವೆ. ಭಾರತೀಯ ರೈಲ್ವೇ ವಂದೇ ಭಾರತ್ ಜಾಲವನ್ನು ನಿರಂತರವಾಗಿ ವಿಸ್ತರಿಸುತ್ತಿದ್ದು, ದೇಶದ ವಿವಿಧ ಭಾಗಗಳ ನಡುವಿನ ಸಂಪರ್ಕವನ್ನು ಮತ್ತಷ್ಟು ಬಲಪಡಿಸುವ ಜತೆಗೆ ಪ್ರವಾಸೋದ್ಯಮ ಮತ್ತು ಪ್ರಾದೇಶಿಕ ಅಭಿವೃದ್ಧಿಗೆ ಸಹಕಾರಿಯಾಗುತ್ತಿದೆ.