ಹಿಮಾಚಲ ಪ್ರದೇಶದಲ್ಲಿ ‘ಜಿಪ್‌ಲೈನ್‌’ ಸಾಹಸ ಚಟುವಟಿಕೆಗಳು ಆರಂಭ

ಹಿಮಾಚಲ ಪ್ರದೇಶ ಸರ್ಕಾರವು ‘ಪರಿಸರ ಪ್ರವಾಸೋದ್ಯಮ ನೀತಿ’ ಅಡಿಯಲ್ಲಿ ಜಿಪ್‌ಲೈನ್ ಸಾಹಸ ಚಟುವಟಿಕೆಗಳಿಗೆ ಅಧಿಕೃತ ಮಾನ್ಯತೆ ನೀಡಿದೆ. ಈ ನಿರ್ಧಾರದಿಂದ ಸಾಹಸ ಪ್ರವಾಸೋದ್ಯಮಕ್ಕೆ ಹೊಸ ಚೈತನ್ಯ ಸಿಕ್ಕಿದ್ದು, ವಿಶೇಷವಾಗಿ ಲಾಹೌಲ್–ಸ್ಪಿತಿ ಪ್ರದೇಶದ ಉದ್ಯಮಿಗಳು ಹಾಗೂ ಪ್ರವಾಸೋದ್ಯಮ ಹೂಡಿಕೆದಾರರು ಇದನ್ನು ಸ್ವಾಗತಿಸಿದ್ದಾರೆ.

ಲಾಹೌಲ್–ಸ್ಪಿತಿಯ ಶಾಸಕಿ ಅನುರಾಧಾ ರಾಣಾ ಅವರು ಮಾತನಾಡಿ, ಸರ್ಕಾರದ ಈ ಕ್ರಮವು ಸ್ಥಳೀಯ ಸಾಹಸ ಉದ್ಯಮಿಗಳಿಗೆ ದೊಡ್ಡ ನಿರಾಳತೆ ನೀಡಿದೆಯೆಂದು ಹೇಳಿದರು. ಇದುವರೆಗೆ ರಾಜ್ಯದಲ್ಲಿ ಜಿಪ್‌ಲೈನ್ ಕಾರ್ಯಾಚರಣೆಗೆ ಸ್ಪಷ್ಟ ನಿಯಮಾವಳಿ ಇರದ ಕಾರಣದಿಂದ ಭದ್ರತಾ ಅನುಮೋದನೆಗಳು ಹಾಗೂ ಪರವಾನಿಗೆಗಳಲ್ಲಿ ಅನೇಕ ಅಡಚಣೆಗಳು ಎದುರಾಗುತ್ತಿದ್ದವು.

ಮುಖ್ಯಮಂತ್ರಿ ಸುಖವಿಂದರ್ ಸಿಂಗ್ ಸುಖು ಅವರ ನೇತೃತ್ವದಲ್ಲಿ ಈ ಚಟುವಟಿಕೆಗಳನ್ನು ಪರಿಸರ ಪ್ರವಾಸೋದ್ಯಮ ನೀತಿಯಡಿ ತರಲು ಸರ್ಕಾರ ನಿರ್ಧರಿಸಿದ್ದು, ಇದು ಸುಸ್ಥಿರ ಸಾಹಸ ಪ್ರವಾಸೋದ್ಯಮ ಮತ್ತು ಸಾರ್ವಜನಿಕ ಭದ್ರತೆಯ ನಡುವಣ ಸಮತೋಲನ ಸಾಧಿಸುವ ಪ್ರಮುಖ ಹೆಜ್ಜೆಯಾಗಿದೆ.

ಈ ನಿರ್ಧಾರದ ಬಳಿಕ ಅನೇಕ ಸ್ಥಳೀಯರು ಕಾನೂನುಬದ್ಧವಾಗಿ ಜಿಪ್‌ಲೈನ್ ಕಾರ್ಯಾರಂಭಕ್ಕೆ ಪ್ರಸ್ತಾಪಗಳನ್ನು ಸಲ್ಲಿಸಿದ್ದು, ಜಿಲ್ಲಾಡಳಿತವು ಅವುಗಳ ಪರಿಶೀಲನೆ ಹಾಗೂ ಅನುಮೋದನೆ ಪ್ರಕ್ರಿಯೆಯನ್ನು ವೇಗಗೊಳಿಸಿದೆ. ಸರ್ಕಾರವು ಸ್ಥಳೀಯ ಯುವಕರಿಗೆ ಈ ಚಟುವಟಿಕೆಗಳಲ್ಲಿ ಉದ್ಯೋಗಾವಕಾಶ ಕಲ್ಪಿಸಲು ಸಹಕಾರ ನೀಡುವುದಾಗಿ ತಿಳಿಸಿದೆ.

ಸರ್ಕಾರದ ಈ ನಡೆಯಿಂದ ಹಿಮಾಚಲ ಪ್ರದೇಶದ ಸಾಹಸ ಪ್ರವಾಸೋದ್ಯಮಕ್ಕೆ ಪುಷ್ಠಿ ದೊರೆತಿದ್ದು, ರಾಜ್ಯವು ಪ್ಯಾರಾಗ್ಲೈಡಿಂಗ್, ಟ್ರೆಕ್ಕಿಂಗ್, ನದಿ ರಾಫ್ಟಿಂಗ್ ಮತ್ತು ಜಿಪ್‌ಲೈನ್ ಮುಂತಾದ ಕ್ರೀಡೆಗಳ ಪ್ರಮುಖ ಕೇಂದ್ರವಾಗಿ ಬೆಳೆಯುವ ನಿರೀಕ್ಷೆಯಿದೆ.