14,740 ರು.ಗೆ ಅರುಣಾಚಲ ಮೋಕ್ಷ ಯಾತ್ರೆ

ಭಾರತೀಯ ರೈಲ್ವೇ ಪ್ರವಾಸೋದ್ಯಮ ಸಂಸ್ಥೆ ಐಆರ್‌ಸಿಟಿಸಿ ತಮಿಳುನಾಡಿನ ಪ್ರಮುಖ ಧಾರ್ಮಿಕ ಹಾಗೂ ಪ್ರವಾಸಿ ತಾಣಗಳನ್ನು ಒಳಗೊಂಡ ‘ಅರುಣಾಚಲ ಮೋಕ್ಷ ಯಾತ್ರೆ’ ಪ್ಯಾಕೇಜ್ ಘೋಷಿಸಿದೆ. ನಾಲ್ಕು ರಾತ್ರಿ ಹಾಗೂ ಐದು ದಿನಗಳ ಈ ಪ್ರವಾಸಕ್ಕೆ 14,740 ರು. ರಿಂದ ದರ ಆರಂಭವಾಗಲಿದೆ. ಪುದುಚೇರಿ, ತಿರುವಣ್ಣಾಮಲೈ ಮತ್ತು ಕಾಂಚೀಪುರಂ ಪ್ರಮುಖ ತಾಣಗಳಾಗಿವೆ.

ಪ್ರತಿ ಶುಕ್ರವಾರ ಕಾಚಿಗುಡ ರೈಲು ನಿಲ್ದಾಣದಿಂದ ಸಂಜೆ 5 ಗಂಟೆಗೆ ಪ್ರಯಾಣ ಆರಂಭವಾಗಲಿದೆ. ಮೊದಲ ದಿನ ಕಾಚಿಗುಡ–ಪುದುಚೇರಿ ಎಕ್ಸ್‌ಪ್ರೆಸ್‌ನಲ್ಲಿ ಪ್ರಯಾಣ ಬೆಳೆಸಲಿದ್ದು, ಎರಡನೇ ದಿನ ಪುದುಚೇರಿ ತಲುಪಿದ ಬಳಿಕ ಅರೋವಿಲ್, ಶ್ರೀ ಅರವಿಂದ ಆಶ್ರಮ ಹಾಗೂ ಪ್ಯಾರಡೈಸ್ ಬೀಚ್ ವೀಕ್ಷಣೆಗೆ ಅವಕಾಶವಿದೆ. ರಾತ್ರಿ ಪುದುಚೇರಿಯಲ್ಲಿ ವಾಸ್ತವ್ಯ ಇರಲಿದೆ.

ಮೂರನೇ ದಿನ ತಿರುವಣ್ಣಾಮಲೈಗೆ ತೆರಳಿ ಅರುಣಾಚಲಂ ದೇವಸ್ಥಾನ ದರ್ಶನ ಮಾಡಬಹುದು. ನಾಲ್ಕನೇ ದಿನ ಕಾಂಚೀಪುರಂಗೆ ತೆರಳಿ ಕಾಮಾಕ್ಷಿ ಅಮ್ಮನ್ ಹಾಗೂ ಏಕಾಂಬರೇಶ್ವರ ದೇವಸ್ಥಾನಗಳ ದರ್ಶನಕ್ಕೆ ವ್ಯವಸ್ಥೆ ಮಾಡಲಾಗಿದೆ. ಬಳಿಕ ಅರಕ್ಕೋಣಂ ರೈಲು ನಿಲ್ದಾಣದಿಂದ ವಾಪಸ್ ಪ್ರಯಾಣ ಆರಂಭವಾಗಲಿದೆ. ಐದನೇ ದಿನ ಬೆಳಗ್ಗೆ 7.50ಕ್ಕೆ ಕಾಚಿಗುಡ ತಲುಪುವುದರೊಂದಿಗೆ ಯಾತ್ರೆ ಮುಕ್ತಾಯಗೊಳ್ಳಲಿದೆ.

ಪ್ಯಾಕೇಜ್‌ನಲ್ಲಿ ರೈಲು ಟಿಕೆಟ್, ರಸ್ತೆ ಸಾರಿಗೆ, ಹೊಟೇಲ್ ವಾಸ್ತವ್ಯ, ಊಟ ಮತ್ತು ಪ್ರಯಾಣ ವಿಮೆ ಸೇರಿವೆ. ಸ್ಲೀಪರ್ ಹಾಗೂ 3AC ಆಯ್ಕೆಗಳೂ ಲಭ್ಯವಿದ್ದು, ಪ್ಯಾಕೇಜ್ ದರ ಪ್ರಯಾಣಿಕರ ಸಂಖ್ಯೆ ಮತ್ತು ಕೊಠಡಿ ಹಂಚಿಕೆಯ ಆಧಾರದ ಮೇಲೆ ಬದಲಾಗುತ್ತದೆ.