ಕರ್ನಾಟಕ ಸರ್ಕಾರದ ಹಿಂದೂ ಧಾರ್ಮಿಕ ಸಂಸ್ಥೆಗಳು ಮತ್ತು ಧರ್ಮಾದಾಯ ದತ್ತಿಗಳ ಇಲಾಖೆಯು ಐಆರ್‌ಸಿಟಿಸಿ ರವರ ಸಹಯೋಗದಲ್ಲಿ ಕರ್ನಾಟಕ ಭಾರತ್‌ ಗೌರವ್‌ ಯೋಜನೆಯಡಿ ಆಸಕ್ತ ಪ್ರವಾಸಿಗರಿಗಾಗಿ ಕಳೆದ 3 ವರ್ಷಗಳಿಂದ ಕಾಶಿಯಾತ್ರೆ ಹಮ್ಮಿಕೊಳ್ಳಲಾಗುತ್ತದೆ. ಸೆಪ್ಟೆಂಬರ್‌ನಲ್ಲಿ ಈ ವರ್ಷದ ಮೊದಲ ಪ್ರವಾಸ ನಡೆದಿದ್ದು, ಸದ್ಯ ಅಕ್ಟೋಬರ್‌ ತಿಂಗಳಲ್ಲಿ 5 ರಿಂದ 13 ರವರೆಗೆ 9 ದಿನಗಳ ಕಾಲ 2 ನೇ ಕಾಶಿಯಾತ್ರೆ ಆಯೋಜನೆ ಮಾಡಲಾಗಿದೆ.

ಧಾರ್ಮಿಕ ದತ್ತಿ ಇಲಾಖೆಯಿಂದ ಸಬ್ಸಿಡಿ ಲಭ್ಯವಿದೆ. ಬೆಂಗಳೂರಿನಿಂದ ಆರಂಭವಾಗಿ 7 ಜಿಲ್ಲೆಗಳ ಮೂಲಕ ಹಾದುಹೋಗುವ ಈ ರೈಲು ಯಾತ್ರೆಯಲ್ಲಿ ವಾರಣಾಸಿ, ಅಯೋಧ್ಯೆ, ಗಯಾ, ಪ್ರಯಾಗ್‌ರಾಜ್‌ನ ಪ್ರಮುಖ ದೇವಾಲಯಗಳಿಗೆ ಭೇಟಿ ನೀಡಬಹುದು. ಕಾಶಿಯಾತ್ರೆಗೆ 22,500 ರು. ಟಿಕೆಟ್‌ ದರ ನಿಗದಿಯಾಗಿದ್ದು, ವಿಶೇಷ ಕೊಡುಗೆಯಾಗಿ ಕರ್ನಾಟಕದ ನಿವಾಸಿ ಪ್ರಯಾಣಿಕರಿಗೆ ಕರ್ನಾಟಕ ಸರ್ಕಾರದ ಸಹಾಯಧನ 7,500 ರು. ನೀಡಲಾಗುವುದು.ಹೆಚ್ಚಿನ ಮಾಹಿತಿಗಾಗಿ www.irctctourism.com ಸಂಪರ್ಕಿಸಬಹುದು.