ಹೊಟೇಲ್ ಉದ್ಯಮಕ್ಕೆ ಶೇ.9ರವರೆಗೆ ಆದಾಯ ವೃದ್ಧಿ ನಿರೀಕ್ಷೆ

ಪಶ್ಚಿಮ ಏಷ್ಯಾದಲ್ಲಿನ ಭೌರಾಜಕೀಯ ಉದ್ವಿಗ್ನತೆಯ ನಡುವೆಯೂ ಭಾರತದ ಆತಿಥ್ಯ (ಹಾಸ್ಪಿಟಾಲಿಟಿ) ಉದ್ಯಮವು 2026- 27ನೆಯ ಹಣಕಾಸು ವರ್ಷದಲ್ಲಿ ಶೇ.7ರಿಂದ 9ರಷ್ಟು ಆದಾಯ ವೃದ್ಧಿ ದಾಖಲಿಸಲಿದೆ ಎಂದು ರೇಟಿಂಗ್ ಸಂಸ್ಥೆ ಐಸಿಆರ್‌ಎ (ICRA) ಅಂದಾಜಿಸಿದೆ. ದೇಶೀಯ ಪ್ರವಾಸೋದ್ಯಮ, ಮದುವೆ ಸಮಾರಂಭಗಳು, ಕಾರ್ಪೊರೆಟ್ ಸಭೆಗಳು, ಪ್ರದರ್ಶನಗಳು ಹಾಗೂ ವ್ಯಾಪಾರ ಪ್ರವಾಸಗಳ ಬೇಡಿಕೆಯೇ ಈ ಬೆಳವಣಿಗೆಗೆ ಪ್ರಮುಖ ಕಾರಣವಾಗಲಿದೆ.

ಐಸಿಆರ್‌ಎ ಪ್ರಕಾರ, ದೇಶದ ಪ್ರೀಮಿಯಂ ಹೋಟೆಲ್‌ಗಳ ಆಕ್ಯುಪೆನ್ಸಿ ದರ 2026- 27ರಲ್ಲೂ ಶೇ.72ರಿಂದ 74ರ ನಡುವೆ ಸ್ಥಿರವಾಗಿರಲಿದೆ. ಸರಾಸರಿ ಕೊಠಡಿ ಬಾಡಿಗೆ (ARR) ₹8,600ರಿಂದ ₹8,800ರವರೆಗೆ ಏರಿಕೆಯಾಗುವ ನಿರೀಕ್ಷೆಯಿದೆ. ಕಾರ್ಯಾಚರಣಾ ಲಾಭಾಂಶವೂ ಶೇ.34ರಿಂದ 36ರ ನಡುವೆ ಆರೋಗ್ಯಕರ ಮಟ್ಟದಲ್ಲಿ ಮುಂದುವರಿಯಲಿದೆ.

ಪಶ್ಚಿಮ ಏಷ್ಯಾ ಸಂಘರ್ಷದಿಂದ ವಿದೇಶಿ ಪ್ರವಾಸಿಗರ ಆಗಮನದ ಮೇಲೆ ಸ್ವಲ್ಪ ಪರಿಣಾಮ ಬೀರಿದರೂ, ಭಾರತದ ಹೋಟೆಲ್ ಉದ್ಯಮವು ಮುಖ್ಯವಾಗಿ ದೇಶೀಯ ಪ್ರವಾಸಿಗರ ಮೇಲೆಯೇ ಅವಲಂಬಿತವಾಗಿರುವುದರಿಂದ ಒಟ್ಟಾರೆ ಬೆಳವಣಿಗೆಗೆ ಹೆಚ್ಚಿನ ಹೊಡೆತ ಬೀಳುವುದಿಲ್ಲ ಎಂದು ಐಸಿಆರ್‌ಎ ತಿಳಿಸಿದೆ. ಆದರೆ, ಸಂಘರ್ಷ ದೀರ್ಘಕಾಲ ಮುಂದುವರಿದರೆ ವಿದೇಶಿ ಪ್ರವಾಸೋದ್ಯಮ ಹಾಗೂ ಪ್ರಯಾಣಿಕರ ಮನೋಭಾವದ ಮೇಲೆ ಒತ್ತಡ ಉಂಟಾಗುವ ಸಾಧ್ಯತೆಯಿದೆ ಎಂದು ಎಚ್ಚರಿಸಿದೆ.