ಸಿಕ್ಕಿಂನ ನಿರ್ಬಂಧಿತ ಹಾಗೂ ಸಂರಕ್ಷಿತ ಪ್ರವಾಸಿ ತಾಣಗಳಿಗೆ ಭೇಟಿ ನೀಡುವ ಪ್ರವಾಸಿಗರಿಗಾಗಿ ಹೊಸ ಆನ್‌ಲೈನ್ ಪರ್ಮಿಟ್ ವ್ಯವಸ್ಥೆಯನ್ನು ಜಾರಿಗೆ ತರಲು ರಾಜ್ಯ ಸರಕಾರ ಮುಂದಾಗಿದೆ. ನಾಥುಲಾ ಪಾಸ್‌, ತ್ಸೋಮ್ಗೊ ಸರೋವರ, ಬಾಬಾ ಮಂದಿರ, ಲಾಚೆನ್‌, ಲಾಚುಂಗ್‌, ಯುಮ್ಥಾಂಗ್‌ ಮತ್ತು ಗುರುಡೋಂಗ್ಮಾರ್‌ ಸೇರಿದಂತೆ ಹಲವು ತಾಣಗಳ ಪರ್ಮಿಟ್ ಅರ್ಜಿಗಳನ್ನು ಒಂದೇ ಆನ್‌ಲೈನ್ ವೇದಿಕೆಯಲ್ಲಿ ನಿರ್ವಹಿಸುವ ಉದ್ದೇಶ ಹೊಂದಲಾಗಿದೆ.

ಪ್ರಸ್ತುತ ವ್ಯವಸ್ಥೆಯಲ್ಲಿ ಆದಾಯ ಸೋರಿಕೆಯಾಗುತ್ತಿರುವ ಸಾಧ್ಯತೆ ಇರುವುದರಿಂದ ಹೊಸ ವ್ಯವಸ್ಥೆ ತರಲಾಗುತ್ತಿದೆ ಎಂದು ಮುಖ್ಯಮಂತ್ರಿ ಪ್ರೇಮ್ ಸಿಂಗ್ ಗೋಲೆ ಹೇಳಿದ್ದಾರೆ. 2025ರಲ್ಲಿ ನಾಥುಲಾ ಸೇರಿದಂತೆ ಭಾರತ-ಚೀನಾ ಗಡಿಯ ಸಮೀಪದ ಪ್ರದೇಶಗಳಿಗೆ ಸುಮಾರು 15.68 ಲಕ್ಷ ಪ್ರವಾಸಿಗರು ಭೇಟಿ ನೀಡಿದ್ದು, ಪ್ರತಿ ಪರ್ಮಿಟ್‌ಗೆ ₹200ರಂತೆ ಸುಮಾರು ₹31.36 ಕೋಟಿ ಆದಾಯ ಬರಬೇಕಿದ್ದರೂ ಸರಕಾರಕ್ಕೆ ₹3.64 ಕೋಟಿ ಮಾತ್ರ ತಲುಪಿದೆ ಎಂದು ಅವರು ತಿಳಿಸಿದ್ದಾರೆ.

ಹೊಸ ವ್ಯವಸ್ಥೆಯಲ್ಲಿ ನೋಂದಾಯಿತ ಸಿಕ್ಕಿಂ ಪ್ರವಾಸೋದ್ಯಮ ಸಂಸ್ಥೆಗಳು ಆನ್‌ಲೈನ್‌ನಲ್ಲಿ ಅರ್ಜಿ ಸಲ್ಲಿಸಲಿದ್ದು, ಪರ್ಮಿಟ್ ನೀಡುವ ಅಧಿಕಾರ ಪ್ರವಾಸೋದ್ಯಮ ಇಲಾಖೆಯಲ್ಲೇ ಇರಲಿದೆ. ಶುಲ್ಕ ಹೆಚ್ಚಳದ ಪ್ರಸ್ತಾವವೂ ಇದೆ. ಸರಕಾರದ ಪ್ರಕಾರ, ಹೊಸ ವ್ಯವಸ್ಥೆ ಪರ್ಮಿಟ್ ಪ್ರಕ್ರಿಯೆಯನ್ನು ಸರಳಗೊಳಿಸುವುದರ ಜತೆಗೆ ಪಾರದರ್ಶಕತೆಯನ್ನು ಹೆಚ್ಚಿಸಲಿದೆ.