ಮೇಲಿಂದ ಮೇಲೆ ವಿಮಾನದಲ್ಲಿ ಸಂಚರಿಸುವವರು ಫೋನೆಟಿಕ್ ಆಲ್ಫಾಬೆಟ್‌ಗಳನ್ನೂ ಬಳಸಿ ಮಾತಾಡುವುದನ್ನು ನೀವು ಗಮನಿಸಿರಬಹುದು. ಉದಾಹರಣೆಗೆ, ಬೋರ್ಡಿಂಗ್ ಪಾಸ್ ತೆಗೆದು ಕೊಳ್ಳುವಾಗ, ಒಂದನೇ ಸಾಲಿನ ‘ಸಿ’ ಆಸನ ಬೇಕಾದರೆ, ‘ನನಗೆ ಒನ್ ಸಿ ಸೀಟನ್ನು ಕಾಯ್ದಿರಿಸಿ’ ಎಂದು ಹೇಳುವುದಿಲ್ಲ. ಬದಲಿಗೆ, ‘ನನಗೆ ಒನ್ ಚಾರ್ಲಿ ಸೀಟ್ ಕಾಯ್ದಿರಿಸಿ’ ಎನ್ನುತ್ತಾರೆ.

ಸಂವಹನದಲ್ಲಿ ಸ್ಪಷ್ಟತೆಗಾಗಿ ಫೋನೆಟಿಕ್ ಆಲ್ಫಾಬೆಟ್‌ಗಳನ್ನೂ ಬಳಸುತ್ತಾರೆ. ಅಂತಾರಾಷ್ಟ್ರೀಯ ವಿಮಾನಯಾನ ಸಂಸ್ಥೆ ( International Civil Aviation Organization- ICAO) ರೂಪಿಸಿದ ಫೋನೆಟಿಕ್ ಆಲ್ಫಾಬೆಟ್, ವಿಮಾನಯಾನ, ಸೇನಾಪಡೆಗಳು ಮತ್ತು ರೇಡಿಯೋ ಸಂವಹನಗಳಲ್ಲಿ ಅಕ್ಷರಗಳು ಮತ್ತು ಸಂಖ್ಯೆಗಳನ್ನು ಸ್ಪಷ್ಟವಾಗಿ ಉಚ್ಚರಿಸಲು ಬಳಸುವ ಒಂದು ವ್ಯವಸ್ಥೆಯಾಗಿದೆ.

ಈ ಆಲ್ಫಾಬೆಟ್ ನ ಮುಖ್ಯ ಉದ್ದೇಶವೆಂದರೆ, ರೇಡಿಯೋದಲ್ಲಿ ಬರುವ ಶಬ್ದಗಳು (static), ವಿಭಿನ್ನ ಉಚ್ಚಾರಣೆಗಳು ( accents ) ಅಥವಾ ಹಿನ್ನೆಲೆ ಶಬ್ದಗಳ (background noise) ಕಾರಣದಿಂದಾಗಿ ಉಂಟಾಗುವ ಗೊಂದಲವನ್ನು ತಪ್ಪಿಸುವುದು. ಇದರಿಂದಾಗಿ, ಪ್ರಮುಖ ಮಾಹಿತಿ, ಉದಾಹರಣೆಗೆ ವಿಮಾನ ಸಂಖ್ಯೆಗಳು, ರನ್‌ವೇ ಗುರುತುಗಳು ಅಥವಾ ಇತರ ಸಂಕೇತಗಳನ್ನು ನಿಖರವಾಗಿ ಅರ್ಥ ಮಾಡಿಕೊಳ್ಳಲು ಸಾಧ್ಯವಾಗುತ್ತದೆ.

ಇದನ್ನೂ ಓದಿ: ಒಂದು ವಿಲಕ್ಷಣ ದುರಂತ

ಆಧುನಿಕ ಐಸಿಎಒ ಫೋನೆಟಿಕ್ ಆಲ್ಫಾಬೆಟ್ ಅನ್ನು ರೂಪಿಸುವ ಮೊದಲು, ಹಲವಾರು ಪ್ರಯತ್ನಗಳು ನಡೆದಿವೆ. ಮೊದಲ ವಿಶ್ವಯುದ್ಧದ ಸಮಯದಲ್ಲಿ, ರೇಡಿಯೋ ಸಂವಹನ ಹೆಚ್ಚಾದಾಗ, ವಿಮಾನಗಳು ಮತ್ತು ಭೂ ನಿಯಂತ್ರಣ ಕೇಂದ್ರಗಳ ನಡುವಿನ ಮಾತುಕತೆಗಳಲ್ಲಿ ಅಕ್ಷರಗಳ ಗೊಂದಲಗಳು ಸಾಮಾನ್ಯವಾಗಿದ್ದವು.

Phonetic alphabet in airlines ೧

ಈ ಸಮಸ್ಯೆಯನ್ನು ನಿವಾರಿಸಲು, ವಿವಿಧ ದೇಶಗಳು ತಮ್ಮದೇ ಆದ ಫೋನೆಟಿಕ್ ಕೋಡ್‌ಗಳನ್ನು ಅಭಿವೃದ್ಧಿಪಡಿಸಿದವು. ನಂತರ, 1920 ಮತ್ತು 1930ರ ದಶಕಗಳಲ್ಲಿ, ಅಂತಾರಾಷ್ಟ್ರೀಯ ಮಟ್ಟದಲ್ಲಿ ಒಂದು ಏಕೀಕೃತ ವ್ಯವಸ್ಥೆಯ ಅಗತ್ಯ ಕಂಡುಬಂತು. 1947ರಲ್ಲಿ, ಐಸಿಎಒ ಈ ಕಾರ್ಯವನ್ನು ಕೈಗೆತ್ತಿಕೊಂಡಿತು. ಸಂಶೋಧಕರು, ಭಾಷಾ ತಜ್ಞರು ಮತ್ತು ಪೈಲಟ್‌ಗಳ ಸಹಾಯದಿಂದ ವಿಭಿನ್ನ ಭಾಷೆಗಳ ಪೈಲಟ್‌ಗಳು ಸುಲಭವಾಗಿ ಉಚ್ಚರಿಸುವ ಮತ್ತು ಅರ್ಥಮಾಡಿಕೊಳ್ಳುವ ಪದಗಳನ್ನು ಆಯ್ದುಕೊಂಡಿತು.

1956ರಲ್ಲಿ, ಪ್ರಸ್ತುತ ಬಳಸುತ್ತಿರುವ ಐಸಿಎಒ ಫೋನೆಟಿಕ್ ಆಲ್ಫಾಬೆಟ್ ಅನ್ನು ಅಧಿಕೃತವಾಗಿ ಅಳವಡಿಸಲಾಯಿತು. ಈ ಆಲ್ಫಾಬೆಟ್‌ನಲ್ಲಿ ಪ್ರತಿ ಅಕ್ಷರಕ್ಕೂ ಒಂದು ನಿರ್ದಿಷ್ಟ ಪದವನ್ನು ಬಳಸಲಾಗುತ್ತದೆ. ಇದು ಸಂವಹನದಲ್ಲಿ ಯಾವುದೇ ಗೊಂದಲವಿಲ್ಲದೇ ಅಕ್ಷರಗಳನ್ನು ಹೇಳಲು ಅನುಕೂಲಕರವಾಗಿದೆ. ಉದಾಹರಣೆಗೆ, A- Alpha, B- Bravo, C- Charlie, D- Delta, E- Echo, F- Foxtrot, G- Golf, H- Hotel, I- India, J- Juliett, K- Kilo, L- Lima, M- Mike, N- November, O- Oscar, P- Papa, Q- Quebec, R- Romeo, S- Sierra, T- Tango, U- Uniform, V- Victor, W- Whiskey, X- X-ray, Y- Yankee, Z- Zulu.

ಅಕ್ಷರಗಳ ತೆಗೆ, ಸಂಖ್ಯೆಗಳ ಉಚ್ಚಾರಣೆಯೂ ವಿಭಿನ್ನವಾಗಿದೆ. ಕೆಲವು ಸಂಖ್ಯೆಗಳನ್ನು ಗೊಂದಲವಾಗದಂತೆ ವಿಶಿಷ್ಟವಾಗಿ ಉಚ್ಚರಿಸಲಾಗುತ್ತದೆ. ಉದಾಹರಣೆಗೆ, 1- Wun (ಒನ್), 2- Too (ಟೂ), 3- Tree (ತ್ರೀ), 4- Fower (ಫೋವರ್), 5- Fife (ಫೈಫ್), 9- Niner (ನೈನರ್). ಉಳಿದ ಸಂಖ್ಯೆಗಳನ್ನು ಸಾಮಾನ್ಯವಾಗಿ ಅವುಗಳ ಇಂಗ್ಲಿಷ್ ಉಚ್ಚಾರಣೆಯಂತೆಯೇ ಹೇಳಲಾಗುತ್ತದೆ ( e.g., Six, Seven, Eight). ಐಸಿಎಒ ಫೋನೆಟಿಕ್ ಆಲ್ಫಾಬೆಟ್ ಅನ್ನು ವಿಮಾನಯಾನದಲ್ಲಿ ಮಾತ್ರವಲ್ಲದೆ, ಸೇನಾಪಡೆಗಳು, ಪೊಲೀಸ್ ಇಲಾಖೆ, ತುರ್ತುಸೇವೆಗಳು ಮತ್ತು ಇತರ ರೇಡಿಯೋ ಸಂವಹನ ಗಳಲ್ಲಿಯೂ ವ್ಯಾಪಕವಾಗಿ ಬಳಸಲಾಗುತ್ತದೆ.

ಉದಾಹರಣೆಗೆ, ವಿಮಾನ ಸಂಖ್ಯೆ BA249 ಅನ್ನು ಬ್ರಾವೋ ಆಲಾ ಟೂ ಫೋವರ್ ನೈನರ್’ ಎಂದು ಹೇಳಲಾಗುತ್ತದೆ. ರನ್‌ವೇ 27R ಅನ್ನು ‘ಟೂ ಸೆವೆನ್ ರೈಟ್’ ಎಂದು ಉಚ್ಚರಿಸಲಾಗುತ್ತದೆ. ರೇಡಿಯೋದಲ್ಲಿ ಹೇಳಬೇಕಾದ SOS ಎಂಬ ಸಂದೇಶವನ್ನು ‘ಸಿಯೆರಾ ಆಸ್ಕರ್ ಸಿಯೆರಾ’ ಎಂದು ಹೇಳಲಾಗುತ್ತದೆ. ಈ ವ್ಯವಸ್ಥೆಯಿಂದಾಗಿ, ಪ್ರಮುಖ ಸಂದೇಶಗಳನ್ನು ತಪ್ಪಿಲ್ಲದೇ ತಲುಪಿಸಬಹುದು. ಇದರಿಂದ ಸಮಯಕ್ಕೆ ಸರಿಯಾಗಿ ರಕ್ಷಣಾ ಕಾರ್ಯಾಚರಣೆಗಳು ಮತ್ತು ಇತರ ನಿರ್ಣಾಯಕ ಕಾರ್ಯಗಳನ್ನು ನಿರ್ವಹಿಸಲು ಸಾಧ್ಯವಾಗುತ್ತದೆ.