ದಶಾಯುಷಿ ಪಾಸ್ ಪೋರ್ಟ್ ಗೆ ಮರುಜೀವ ಕೊಡಿ..!
ನೀವು ಪಾಸ್ಪೋರ್ಟ್ ರಿನೀವಲ್ ಮಾಡಿಸುವಾಗ ಎಲ್ಲಾ ಸಮಯದಲ್ಲೂ ಪೊಲೀಸ್ ವೆರಿಫಿಕೇಶನ್ ಬೇಕಾಗುವುದಿಲ್ಲ. ಆದರೆ, ನಿಮ್ಮ ಪಾಸ್ಪೋರ್ಟ್ ಅವಧಿ ಪೂರ್ಣಗೊಂಡು ಮೂರು ವರ್ಷಗಳ ಮೇಲಾಗಿದ್ದರೆ ಅಥವಾ ನಿಮ್ಮ ಈಗಿನ ವಿಳಾಸ ಬದಲಾಗಿದ್ದರೆ ಪೊಲೀಸ್ ವೆರಿಫಿಕೇಶನ್ ಅಗತ್ಯ ಇರುತ್ತದೆ. ಆಗ ಅವರು ನಿಮ್ಮ ಮನೆಗೆ ಭೇಟಿ ನೀಡಿ ವೆರಿಫಿಕೇಶನ್ ಮಾಡುತ್ತಾರೆ. ಆ ಬಳಿಕ ನಿಮ್ಮ ವಿಳಾಸಕ್ಕೆ ಪಾಸ್ಪೋರ್ಟ್ ಬರಲಿದೆ.
- ಸಂಜೀವ್ ಪಿ ಪಿ
ಒಂದು ದೇಶದಿಂದ ಮತ್ತೊಂದು ದೇಶಕ್ಕೆ ತೆರಳಬೇಕು ಎಂದರೆ ಪಾಸ್ಪೋರ್ಟ್ ಬಹುಮುಖ್ಯ. ಹಾಗಂತ ಈ ಪಾಸ್ಪೋರ್ಟ್ಗಳಿಗೆ ವೋಟಿಂಗ್ ಕಾರ್ಡ್ ಹಾಗೂ ಆಧಾರ್ ಕಾರ್ಡ್ ರೀತಿ ಜೀವನ ಪರ್ಯಂತ ವ್ಯಾಲಿಡಿಟಿ ಇರೋದಿಲ್ಲ. 10 ವರ್ಷಗಳಿಗೆ ಪಾಸ್ಪೋರ್ಟ್ ಎಕ್ಸ್ಪೈರ್ ಆಗಿ ಬಿಡುತ್ತದೆ. ಆಗ ನೀವು ಬೇರೆ ಪಾಸ್ಪೋರ್ಟ್ ತೆಗೆದುಕೊಳ್ಳಲೇಬೇಕು. ಅಷ್ಟೇ ಅಲ್ಲ, ಪಾಸ್ಪೋರ್ಟ್ ಪೇಜ್ಗಳು ಖಾಲಿ ಆದರೂ ನೀವು ಹೊಸ ಪಾಸ್ಪೋರ್ಟ್ ಪಡೆಯಬೇಕು.
ಮೊದಲೆಲ್ಲ ಪಾಸ್ಪೋರ್ಟ್ ನವೀಕರಿಸೋದು ಎಂದರೆ ದೊಡ್ಡ ಚಾಲೆಂಜ್ ಆಗಿತ್ತು. ಆದರೆ, ಈಗ ಆನ್ಲೈನ್ ಮೂಲಕ ನೀವು ಹೊಸ ಪಾಸ್ಪೋರ್ಟ್ಗೆ ಅರ್ಜಿ ಸಲ್ಲಿಸಬಹುದು. ಕೆಲವೊಮ್ಮೆ ಇದಕ್ಕೆ ಪೊಲೀಸ್ ವೆರಿಫಿಕೇಷನ್ ಕೂಡ ಬೇಕಾಗುತ್ತದೆ. ಹಾಗಾದರೆ ಪಾಸ್ಪೋರ್ಟ್ ನವೀಕರಣಕ್ಕೆ ಏನು ಮಾಡಬೇಕು? ಯಾವೆಲ್ಲ ದಾಖಲೆ ಬೇಕು ಎಂಬ ಪ್ರಶ್ನೆಗೆ ಇಲ್ಲಿದೆ ಉತ್ತರ.
ಅರ್ಜಿ ಸಲ್ಲಿಸಿ
ಅಧಿಕೃತ ಪಾಸ್ಪೋರ್ಟ್ ಸೇವಾ ಕೇಂದ್ರಕ್ಕೆ ಭೇಟಿ ನೀಡಿ. ಒಂದೊಮ್ಮೆ ನೀವು ಹೊಸ ಬಳಕೆದಾರರಾಗಿದ್ದರೆ New User Registration ಕ್ಲಿಕ್ ಮಾಡಿ ಅಲ್ಲಿ ನಿಮ್ಮ ಖಾತೆಯನ್ನು ಕ್ರಿಯೇಟ್ ಮಾಡಿಕೊಳ್ಳಬೇಕು. ಈಗಾಗಲೇ ನೀವು ಖಾತೆ ಹೊಂದಿದ್ದರೆ ಅದರ ಮೂಲಕ ಲಾಗಿನ್ ಆಗಬೇಕು.
ಪಾಸ್ಪೋರ್ಟ್ ರಿನಿವಲ್ ಅಪ್ಲಿಕೇಷನ್ ವಿಭಾಗಕ್ಕೆ ತೆರಳಿ ‘ರೀ ಇಶ್ಯೂ ಆಫ್ ಪಾಸ್ಪೋರ್ಟ್’ ಪೇಜ್ ಮೇಲೆ ಕ್ಲಿಕ್ ಮಾಡಿ. ಅಲ್ಲಿ ನಿಮ್ಮ ಪಾಸ್ಪೋರ್ಟ್ ರಿನೀವಲ್ಗೆ ಕಾರಣ ನೀಡಬೇಕು. ಪಾಸ್ಪೋರ್ಟ್ ದಿನಾಂಕ ಮುಗಿದಿದ್ದರೆ, ಪೇಜ್ ಖಾಲಿ ಆಗಿದ್ದರೆ ಅಥವಾ ನಿಮ್ಮ ಮಾಹಿತಿ ಬದಲಾಯಿಸುವ ಉದ್ದೇಶದಿಂದ ಹೊಸ ಪಾಸ್ಪೋರ್ಟ್ ಪಡೆಯಬಹುದು. ಅಪ್ಲಿಕೇಶನ್ ಸಲ್ಲಿಕೆ ಮಾಡುವ ಮೊದಲು ನಿಮ್ಮ ಮಾಹಿತಿಯನ್ನು ಸರಿಯಾಗಿ ಪರಿಶೀಲಿಸಿಕೊಳ್ಳಿ.
ನೀವು ಪಾಸ್ಪೋರ್ಟ್ ರಿನೀವಲ್ಗೆ ಹಣವನ್ನು ಕೂಡ ಪಾವತಿಸಬೇಕು. ನೆಟ್ ಬ್ಯಾಂಕಿಂಗ್, ಕಾರ್ಡ್, ಯುಪಿಐ ಮೂಲಕ ಹಣ ಪಾವತಿಸಬಹುದಾಗಿದೆ. ಆ ಬಳಿಕ ನಿಮ್ಮ ಅಪಾಯಿಂಟ್ಮೆಂಟ್ ಫಿಕ್ಸ್ ಮಾಡಿಕೊಳ್ಳಿ. ನಿಮಗೆ ಹೊಂದಿಕೆ ಆಗುವ ದಿನಾಂಕವನ್ನು ಆಯ್ಕೆ ಮಾಡಿಕೊಳ್ಳಿ. ಆ ಬಳಿಕ ನಿಮ್ಮ ಅಪಾಯಿಂಟ್ಮೆಂಟ್ ದಾಖಲೆಯನ್ನು ಡೌನ್ಲೋಡ್ ಮಾಡಿಟ್ಟುಕೊಳ್ಳಿ.
ನಂತರ ನಿಮ್ಮ ಪಾಸ್ಪೋರ್ಟ್ ಸೇವಾ ಕೇಂದ್ರಕ್ಕೆ ಭೇಟಿ ನೀಡಿ. ಈ ವೇಳೆ ನಿಮ್ಮ ಒರಿಜಿನಲ್ ದಾಖಲೆಗಳನ್ನು ತೆಗೆದುಕೊಂಡ ಹೋಗಬೇಕು. ಅಲ್ಲಿ ನಿಮ್ಮ ದಾಖಲೆಗಳನ್ನು ಪರಿಶೀಲಿಸಲಾಗುತ್ತದೆ.
ಪೊಲೀಸ್ ವೆರಿಫಿಕೇಶನ್
ನೀವು ಪಾಸ್ಪೋರ್ಟ್ ರಿನೀವಲ್ ಮಾಡಿಸುವಾಗ ಎಲ್ಲಾ ಸಮಯದಲ್ಲೂ ಪೊಲೀಸ್ ವೆರಿಫಿಕೇಶನ್ ಬೇಕಾಗುವುದಿಲ್ಲ. ಆದರೆ, ನಿಮ್ಮ ಪಾಸ್ಪೋರ್ಟ್ ಅವಧಿ ಪೂರ್ಣಗೊಂಡು ಮೂರು ವರ್ಷಗಳ ಮೇಲಾಗಿದ್ದರೆ ಅಥವಾ ನಿಮ್ಮ ಈಗಿನ ವಿಳಾಸ ಬದಲಾಗಿದ್ದರೆ ಪೊಲೀಸ್ ವೆರಿಫಿಕೇಶನ್ ಅಗತ್ಯ ಇರುತ್ತದೆ. ಆಗ ಅವರು ನಿಮ್ಮ ಮನೆಗೆ ಭೇಟಿ ನೀಡಿ ವೆರಿಫಿಕೇಶನ್ ಮಾಡುತ್ತಾರೆ. ಆ ಬಳಿಕ ನಿಮ್ಮ ವಿಳಾಸಕ್ಕೆ ಪಾಸ್ಪೋರ್ಟ್ ಬರಲಿದೆ.
ಯಾವೆಲ್ಲ ದಾಖಲೆ ಬೇಕು?
ಹಳೆಯ ಪಾಸ್ಪೋರ್ಟ್ ಕಡ್ಡಾಯವಾಗಿ ಬೇಕೇ ಬೇಕು. ಮೊದಲ ಮತ್ತು ಕೊನೆಯ ಎರಡು ಪುಟಗಳ ಸ್ವಯಂ-ದೃಢೀಕರಿಸಿದ ಪ್ರತಿಗಳು. ವಿಳಾಸಕ್ಕೆ (ಆಧಾರ್ ಕಾರ್ಡ್, ವೋಟಿಂಗ್ ಐಡಿ, ವಾಟರ್ ಬಿಲ್ ಅಥವಾ ಫೋನ್ ಬಿಲ್) ಒಂದು ದಾಖಲೆ ಬೇಕು.
ನಿಮ್ಮ ಜನ್ಮ ದಿನಾಂಕ ಖಚಿತಪಡಿಸಲು ಬರ್ತ್ ಸರ್ಟಿಫಿಕೇಟ್, ಪ್ಯಾನ್ ಕಾರ್ಡ್ ಅಥವಾ ಆಧಾರ ಕಾರ್ಡ್ ಬೇಕು.
ಬೆಲೆ ಎಷ್ಟು?
ಪಾಸ್ಪೋರ್ಟ್ ರಿನೀವಲ್ಗೆ 36 ಪೇಜ್ನ ಪಾಸ್ಬುಕ್ಗೆ 1500 ರೂಪಾಯಿ, 60 ಪೇಜ್ಗಳ ಪಾಸ್ಬುಕ್ಗೆ 2000 ರೂಪಾಯಿ ಹಣ ಪಾವತಿಸಬೇಕು. ತತ್ಕಾಲ್ ಅಡಿಯಲ್ಲಿ ಹೊಸ ಪಾಸ್ಪೋರ್ಟ್ ಪಡೆಯಲು 36 ಪೇಜ್ಗಳ ಪಾಸ್ಬುಕ್ಗೆ 3500 ರೂಪಾಯಿ, 60 ಪೇಜ್ಗಳ ಪಾಸ್ಪೋರ್ಟ್ಗೆ 4 ಸಾವಿರ ರೂಪಾಯಿ ಬೇಕು.
ಈ ತಪ್ಪು ಮಾಡದಿರಿ
ನಿಮ್ಮ ಅಪ್ಲಿಕೇಶನ್ನಲ್ಲಿ ಹೆಸರು, ದಿನಾಂಕ ಹಾಗೂ ಅಡ್ರೆಸ್ ಬರೆಯುವಾಗ ತಪ್ಪು ಮಾಡದಿರಿ. ಡ್ಯಾಕ್ಯುಮೆಂಟ್ ಮಿಸ್ ಮಾಡಬೇಡಿ. ಎಲ್ಲಾ ದಾಖಲೆಗಳು ಜೆರಾಕ್ಸ್ ಕೂಡ ನಿಮ್ಮ ಕೈಯಲ್ಲಿ ಇರಲಿ.