ವಿಮಾನ ಸಿಬ್ಬಂದಿಯೂ, ಗಿಫ್ಟ್‌ ಸ್ವೀಕಾರವೂ

ವಿಮಾನ ಪ್ರಯಾಣದ ಸಮಯದಲ್ಲಿ ಸಿಬ್ಬಂದಿಯ ಸೇವೆಯನ್ನು ಮೆಚ್ಚಿ ಕೃತಜ್ಞತೆ ಸಲ್ಲಿಸಲು ಬಯಸುವುದು ಪ್ರಯಾಣಿಕರ ಸಹಜ ಗುಣ. ವಿಶೇಷವಾಗಿ ರಜಾದಿನಗಳಲ್ಲಿ ಅಥವಾ ದೀರ್ಘಕಾಲದ ಪ್ರಯಾಣದಲ್ಲಿ, ಫ್ಲೈಟ್ ಅಟೆಂಡೆಂಟ್‌ಗಳು (ಗಗನಸಖಿ) ಮತ್ತು ಪೈಲಟ್‌ಗಳು ಪ್ರಯಾಣಿಕರ ಸುರಕ್ಷತೆ ಮತ್ತು ಸೌಕರ್ಯಕ್ಕಾಗಿ ಶ್ರಮಿಸುತ್ತಾರೆ. ಅದನ್ನು ಪರಿಗಣಿಸಿ ಪ್ರಯಾಣಿಕರು ಅವರಿಗೆ ನೆನಪಿನ ಕಾಣಿಕೆ ನೀಡುವುದು ಸಾಮಾನ್ಯ.

ಇತ್ತೀಚೆಗೆ ಅಮೆರಿಕನ್ ಏರ್‌ಲೈನ್ಸ್‌ನ ಪ್ರಯಾಣಿಕರೊಬ್ಬರು ಸಿಬ್ಬಂದಿಗೆ ದುಬಾರಿ ‘ಆಪಲ್ ಏರ್‌‌ ಪಾಡ್ಸ್’ ನೀಡಿದ ಘಟನೆ ವೈರಲ್ ಆದ ನಂತರ, ವಿಮಾನಯಾನ ಸಂಸ್ಥೆಗಳು ‘ಉಡುಗೊರೆ ನೀತಿ’ (Gifting Policy) ಯನ್ನು ಜಾರಿಗೊಳಿಸಿವೆ. ಹೊರಗಿನಿಂದ ನೋಡಲು ಇದು ಕೇವಲ ಸೌಜನ್ಯದ ವಿಷಯವಾಗಿ ಕಂಡರೂ, ವಿಮಾನಯಾನ ಉದ್ಯಮದಲ್ಲಿ ಉಡುಗೊರೆಗಳನ್ನು ಸ್ವೀಕರಿಸುವುದಕ್ಕೆ ಕಠಿಣವಾದ ಮತ್ತು ಸಂಕೀರ್ಣವಾದ ನಿಯಮಗಳಿವೆ.

ಈ ನಿಯಮಗಳನ್ನು ಸುರಕ್ಷತೆ, ನೈತಿಕತೆ ಮತ್ತು ವೃತ್ತಿಪರತೆಯ ದೃಷ್ಟಿಯಿಂದ ರೂಪಿಸಲಾಗಿದೆ. ವಿಮಾನಯಾನ ಸಂಸ್ಥೆಗಳು ಹೊಟೇಲ್ ಅಥವಾ ರೆಸ್ಟೋರೆಂಟ್‌ಗಳಂತೆ ಅಲ್ಲ. ಇಲ್ಲಿ ಸಿಬ್ಬಂದಿಯ ಪ್ರಮುಖ ಜವಾಬ್ದಾರಿ ‘ಸೇವೆ’ಗಿಂತ ಹೆಚ್ಚಾಗಿ ‘ಸುರಕ್ಷತೆ’. ಅಪರಿಚಿತ ಪ್ರಯಾಣಿಕರಿಂದ ಯಾವುದೇ ವಸ್ತುವನ್ನು, ವಿಶೇಷವಾಗಿ ಇಲೆಕ್ಟ್ರಾನಿಕ್ ಸಾಧನಗಳು ಅಥವಾ ಸೀಲ್ ಇಲ್ಲದ ಆಹಾರ ಪದಾರ್ಥಗಳನ್ನು ಸ್ವೀಕರಿಸುವುದು ಅಪಾಯಕಾರಿ.

ಅವುಗಳಲ್ಲಿ ಸ್ಫೋಟಕಗಳು ಅಥವಾ ನಿಷೇಧಿತ ವಸ್ತುಗಳು ಅಡಗಿರಬಹುದು ಎಂಬ ಭೀತಿ ಯಾವಾಗಲೂ ಇರುತ್ತದೆ. ಸಿಬ್ಬಂದಿ ಉಡುಗೊರೆ ಪಡೆದರೆ, ಆ ನಿರ್ದಿಷ್ಟ ಪ್ರಯಾಣಿಕನಿಗೆ ವಿಶೇಷ ಆತಿಥ್ಯ ನೀಡಬಹುದು ಅಥವಾ ನಿಯಮಗಳನ್ನು ಮೀರಿ (ಉದಾಹರಣೆಗೆ, ಉಚಿತ ಮದ್ಯ ನೀಡುವುದು,ಸೀಟ್ ಅಪ್‌ಗ್ರೇಡ್ ಮಾಡುವುದು) ಸಹಾಯ ಮಾಡಬಹುದು ಎಂಬ ಆತಂಕ ಸಂಸ್ಥೆಗಿರುತ್ತದೆ. ಇದನ್ನು ‘ಕ್ವಿಡ್ ಪ್ರೊ ಕ್ವೋ’ (Quid Pro Quo- ವಿನಿಮಯ ವ್ಯವಹಾರ) ಎಂದು ಕರೆಯಲಾಗುತ್ತದೆ. ವಿಮಾನ ಸಿಬ್ಬಂದಿ ತರಬೇತಿ ಪಡೆದ ಸುರಕ್ಷತಾ ಅಧಿಕಾರಿಗಳು. ಅವರು ವೇಟರ್‌ಗಳಲ್ಲ. ಟಿಪ್ಟ್ ಅಥವಾ ಉಡುಗೊರೆಗಳನ್ನು ನಿರೀಕ್ಷಿಸುವುದು ಅವರ ವೃತ್ತಿಪರತೆಗೆ ಧಕ್ಕೆ ತರುತ್ತದೆ ಎಂದು ಏರ್‌ ಲೈನ್ಸ್‌ಳು ಭಾವಿಸುತ್ತವೆ. ಬಹುತೇಕ ಎಲ್ಲ ಪ್ರಮುಖ ವಿಮಾನಯಾನ ಸಂಸ್ಥೆಗಳಲ್ಲಿ (ಅಮೆರಿಕನ್, ಡೆಲ್ಟಾ, ಇಂಡಿಗೋ, ಏರ್ ಇಂಡಿಯಾ ಸೇರಿದಂತೆ) ಸಿಬ್ಬಂದಿಗಳು ಪ್ರಯಾಣಿಕರಿಂದ ಹಣವನ್ನು (ಟಿಪ್ಸ್) ಸ್ವೀಕರಿಸುವುದನ್ನು ಕಟ್ಟುನಿಟ್ಟಾಗಿ ನಿಷೇಧಿಸಲಾಗಿದೆ.

ಇದನ್ನೂ ಓದಿ: ಒಂದು ಫೊಟೋ ಹುಟ್ಟಿಸಿದ ಭೀತಿ

ಸಿಬ್ಬಂದಿ ನಗದು ಹಣವನ್ನು ಸ್ವೀಕರಿಸಿದರೆ ಅದು ಲಂಚದಂತೆ ಕಾಣಬಹುದು. ಕೆಲವು ಅಮೆರಿಕನ್ ವಿಮಾನಯಾನ ಸಂಸ್ಥೆಗಳಲ್ಲಿ ಒಂದು ವಿಚಿತ್ರ ನಿಯಮವಿದೆ. ಪ್ರಯಾಣಿಕರು ಹಣ ನೀಡಲು ಮುಂದಾದಾಗ ಸಿಬ್ಬಂದಿ ಮೊದಲು ಅದನ್ನು ನಿರಾಕರಿಸಬೇಕು. ಆದರೆ ಪ್ರಯಾಣಿಕರು ಒತ್ತಾಯಮಾಡುತ್ತಲೇ ಇದ್ದರೆ, ಪ್ರಯಾಣಿಕರಿಗೆ ಮುಜುಗರವಾಗದಂತೆ ಅದನ್ನು ಸ್ವೀಕರಿಸಲು ಕೆಲವೊಮ್ಮೆ ಅನುಮತಿ ನೀಡಲಾಗುತ್ತದೆ. ಆದರೆ ಆ ಹಣವನ್ನು ಅವರು ಚಾರಿಟಿಗೆ (ದಾನ) ನೀಡಬೇಕಾಗುತ್ತದೆ.

ಭಾರತೀಯ ವಿಮಾನಯಾನ ಸಂಸ್ಥೆಗಳಲ್ಲಿ ಟಿಪ್ಸ್ ಪಡೆಯುವುದು ಗಂಭೀರ ಶಿಸ್ತು ಉಲ್ಲಂಘನೆ‌ಯಾಗಿದೆ. ಹಾಗಾದರೆ ಯಾವ ರೀತಿಯ ಉಡುಗೊರೆ ಸ್ವೀಕಾರಾರ್ಹ? ನಿಯಮಗಳು ಕಠಿಣವಾಗಿದ್ದರೂ, ಸಣ್ಣ ಮಟ್ಟದ ಕೃತಜ್ಞತೆಯನ್ನು ತೋರಿಸಲು ಅವಕಾಶವಿದೆ. ಆದರೆ ಅದಕ್ಕೆ ಕೆಲವು ಮಿತಿಗಳಿವೆ.

ಸಾಮಾನ್ಯವಾಗಿ, ಐದು ನೂರರಿಂದ ಒಂದೂವರೆ ಸಾವಿರ ರುಪಾಯಿ ಒಳಗಿನ ಉಡುಗೊರೆಗಳನ್ನು ಸ್ವೀಕರಿಸಲು ಅಡ್ಡಿಯಿಲ್ಲ. ಚಾಕೊಲೇಟ್ ಬಾಕ್ಸ್, ಪೆನ್ನುಗಳು ಅಥವಾ ಸಣ್ಣ ಸ್ಮರಣಿಕೆಗಳು ಇದರಲ್ಲಿ ಸೇರುತ್ತವೆ. ಮನೆಯಲ್ಲಿ ತಯಾರಿಸಿದ ತಿಂಡಿಗಳನ್ನು ಎಷ್ಟೇ ಪ್ರೀತಿಯಿಂದ ತಂದರೂ, ಸಿಬ್ಬಂದಿ ಅದನ್ನು ತಿನ್ನಲು ಅನುಮತಿ ಇಲ್ಲ.

ಸುರಕ್ಷತೆಯ ದೃಷ್ಟಿಯಿಂದ ಕೇವಲ ಅಂಗಡಿಯಲ್ಲಿ ಖರೀದಿಸಿದ, ಸೀಲ್ ತೆರೆಯದ ಪ್ಯಾಕೆಟ್‌ಗಳನ್ನು (ಉದಾಹರಣೆಗೆ, ಡ್ಯೂಟಿ ಫ್ರೀ ಚಾಕೊಲೇಟ್ಸ್) ಮಾತ್ರ ಸ್ವೀಕರಿಸಲಾಗುತ್ತದೆ. ಸ್ಟಾರ್‌ಬಕ್ಸ್ ಅಥವಾ ಅಮೆಜಾನ್ ಗಿಫ್ಟ್ ಕಾರ್ಡ್‌ ಗಳನ್ನು ನೀಡುವುದು ಪಾಶ್ಚಿಮಾತ್ಯ ದೇಶಗಳಲ್ಲಿ ಜನಪ್ರಿಯವಾಗಿದೆ.

ಇದು ಹಣದ ರೂಪದಲ್ಲಿದ್ದರೂ, ನೇರ ನಗದಿನಷ್ಟು ಸಮಸ್ಯಾತ್ಮಕವಲ್ಲದ ಕಾರಣ ಇದು ಸ್ವೀಕಾರಾರ್ಹ. ಇನ್ನು ‘ಆಪಲ್ ಏರ್‌ಪಾಡ್ಸ್‌’ ಸ್ವೀಕರಿಸಿದ ಘಟನೆ. ತಾಂತ್ರಿಕವಾಗಿ, ಸಾವಿರಾರು ರುಪಾಯಿ ಬೆಲೆಬಾಳುವ ಇಲೆಕ್ಟ್ರಾನಿಕ್ ವಸ್ತುವನ್ನು ಪಡೆಯುವುದು ‘ಸಣ್ಣ ಮೌಲ್ಯ’ದ ವ್ಯಾಪ್ತಿಯಲ್ಲಿ ಬರುವುದಿಲ್ಲ.

ಅಮೆರಿಕನ್ ಏರ್‌ಲೈನ್ಸ್‌ನಂಥ ಸಂಸ್ಥೆಗಳಲ್ಲಿ, ನಿರ್ದಿಷ್ಟ ಮೌಲ್ಯಕ್ಕಿಂತ ಹೆಚ್ಚಿನ ಉಡುಗೊರೆಗಳನ್ನು ಸಿಬ್ಬಂದಿ ತಮ್ಮ ಮೇಲಧಿಕಾರಿಗಳಿಗೆ ವರದಿ ಮಾಡಬೇಕು ಅಥವಾ ಅದನ್ನು ಹಿಂದಿರುಗಿಸಬೇಕು.