ಕಿಟಕಿಯ ರಂಧ್ರದ ಮಹತ್ವ

ವಿಮಾನದಲ್ಲಿ ಪ್ರಯಾಣಿಸುವಾಗ ಕಿಟಕಿಯ ಕೆಳಭಾಗದಲ್ಲಿ ಒಂದು ಪುಟ್ಟ ರಂಧ್ರವನ್ನು ನೀವು ಗಮನಿಸಿರಬಹುದು. ಇದನ್ನು ತಾಂತ್ರಿಕವಾಗಿ ‘ಬ್ರೀದರ್ ಹೋಲ್’ (Breather Hole) ಅಥವಾ ‘ಬ್ಲೀಡ್ ಹೋಲ್’ (Bleed Hole) ಎಂದು ಕರೆಯುತ್ತಾರೆ. ಇದು ನೋಡಲು ಅತ್ಯಂತ ಸಣ್ಣದಾಗಿ ಕಂಡರೂ, ವಿಮಾನದ ಸುರಕ್ಷತೆ ಮತ್ತು ಪ್ರಯಾಣಿಕರ ದೃಷ್ಟಿಕೋನದಲ್ಲಿ ಇದರ ಪಾತ್ರ ಬಹಳ ದೊಡ್ಡದು.

ಬ್ರೀದರ್ ಹೋಲ್ ಏಕೆ ಬೇಕು ಎಂದು ತಿಳಿಯುವ ಮೊದಲು, ವಿಮಾನದ ಕಿಟಕಿಯನ್ನು ಹೇಗೆ ಮಾಡಲಾಗಿದೆ ಎಂದು ತಿಳಿಯುವುದು ಮುಖ್ಯ. ವಿಮಾನದ ಕಿಟಕಿಯು ಸಾಮಾನ್ಯವಾಗಿ ಮೂರು ಪದರಗಳ ಆಕ್ರಿಲಿಕ್ ಗಾಜಿನಿಂದ ಮಾಡಲ್ಪಟ್ಟಿರುತ್ತದೆ. ಹೊರಗಿನ ಪದರ ವಿಮಾನದ ಹೊರಭಾಗದ ತೀವ್ರ ಚಳಿ ಮತ್ತು ಒತ್ತಡವನ್ನು ತಡೆದುಕೊಳ್ಳುವ ಮುಖ್ಯ ಪದರ. ಮಧ್ಯದ ಪದರದಲ್ಲಿಯೇ ಆ ‘ಸಣ್ಣ ರಂಧ್ರ’ವು ಕಾಣುತ್ತದೆ.

ಇದು ತುರ್ತು ಸಂದರ್ಭದಲ್ಲಿ ಹೊರಗಿನ ಪದರಕ್ಕೆ ಬೆಂಬಲವಾಗಿ ನಿಲ್ಲುತ್ತದೆ. ಒಳಗಿನ ಪದರ ನಮಗೆ ಕಾಣಿಸುವ ತೀರಾ ಹತ್ತಿರದ ಪದರ. ಇದು ಪ್ರಯಾಣಿಕರು ಗಾಜನ್ನು ಗೀಚದಂತೆ ಅಥವಾ ಹಾನಿ ಮಾಡದಂತೆ ರಕ್ಷಿಸುತ್ತದೆ. ವಿಮಾನವು 35000 ಅಡಿ ಎತ್ತರದಲ್ಲಿ ಹಾರುತ್ತಿರುವಾಗ, ವಿಮಾನದ ಹೊರಗಿನ ಗಾಳಿಯ ಒತ್ತಡವು ತುಂಬಾ ಕಡಿಮೆ ಇರುತ್ತದೆ. ಆದರೆ ವಿಮಾನದ ಒಳಗಡೆ ಪ್ರಯಾಣಿ ಕರ ಅನುಕೂಲಕ್ಕಾಗಿ ಕೃತಕವಾಗಿ ಹೆಚ್ಚಿನ ಒತ್ತಡವನ್ನು ಕಾಪಾಡಿಕೊಳ್ಳಲಾಗುತ್ತದೆ.

ಇದನ್ನೂ ಓದಿ: ವಿಮಾನವೆಂಬ ಪವರ್‌ ಹೌಸ್

ವಿಮಾನದ ಒಳಗಿನ ಹೆಚ್ಚಿನ ಒತ್ತಡವು ಕಿಟಕಿಯ ಮೇಲೆ ಬಿದ್ದಾಗ, ಆ ಒತ್ತಡವು ನೇರವಾಗಿ ಹೊರಗಿನ ಪದರದ ಮೇಲೆ ಬೀಳುವಂತೆ ಮಾಡಲು ಈ ರಂಧ್ರ ಸಹಾಯಕ. ಅದು ಹೇಗೆ ಕೆಲಸ ಮಾಡುತ್ತದೆ? ಮಧ್ಯದ ಪದರದಲ್ಲಿರುವ ಈ ಸಣ್ಣ ರಂಧ್ರವು, ಒಳಗಿನ ಕ್ಯಾಬಿನ್ ಗಾಳಿಯು ಹೊರಗಿನ ಮತ್ತು ಮಧ್ಯದ ಪದರಗಳ ನಡುವಿನ ಜಾಗಕ್ಕೆ (Air Gap) ಹೋಗಲು ಅನುವು ಮಾಡಿಕೊಡುತ್ತದೆ.

ಇದರಿಂದಾಗಿ ಒಳಗಿನ ಹೆಚ್ಚಿನ ಒತ್ತಡವು ಮಧ್ಯದ ಪದರದ ಮೇಲೆ ಬೀಳುವ ಬದಲಿಗೆ ನೇರವಾಗಿ ಗಟ್ಟಿಯಾದ ಹೊರಗಿನ ಪದರದ ಮೇಲೆ ಬೀಳುತ್ತದೆ. ವಿಮಾನವು ಅತಿ ಎತ್ತರದಲ್ಲಿ ಹಾರುವಾಗ ಹೊರಗಿನ ತಾಪಮಾನವು ಸುಮಾರು -50 ಡಿಗ್ರಿ ಸೆಂಟಿಗ್ರೇಡ್ ಇರುತ್ತದೆ.

ಕಿಟಕಿಯ ಒಳಗಡೆ ಪ್ರಯಾಣಿಕರ ಉಸಿರಾಟದಿಂದಾಗಿ ಬೆಚ್ಚಗಿನ ಗಾಳಿ ಇರುತ್ತದೆ. ತಾಪಮಾನದ ಈ ವಿಪರೀತ ವ್ಯತ್ಯಾಸದಿಂದಾಗಿ ಕಿಟಕಿಯ ಗಾಜಿನ ಮೇಲೆ ಮಂಜು ಅಥವಾ ತೇವಾಂಶ ಶೇಖರಣೆಯಾಗುವ ಸಾಧ್ಯತೆ ಇರುತ್ತದೆ. ಬ್ರೀದರ್ ಹೋಲ್ ಗಾಳಿಯ ಹರಿವನ್ನು ನಿಯಂತ್ರಿಸುವ ಮೂಲಕ ಎರಡು ಗಾಜಿನ ಪದರಗಳ ನಡುವೆ ತೇವಾಂಶ ಸೇರದಂತೆ ನೋಡಿಕೊಳ್ಳುತ್ತದೆ.

ಇದರಿಂದಾಗಿ ಪ್ರಯಾಣಿಕರು ಯಾವುದೇ ಮಂಜು ಅಡ್ಡಿಯಿಲ್ಲದೇ ಹೊರಗಿನ ದೃಶ್ಯಗಳನ್ನು ಸ್ಪಷ್ಟವಾಗಿ ನೋಡಲು ಸಾಧ್ಯವಾಗುತ್ತದೆ. ಒಂದು ವೇಳೆ ವಿಮಾನದ ಹೊರಗಿನ ಗಾಜು ಯಾವುದಾದರೂ ಹಕ್ಕಿ ಬಡಿದು ಅಥವಾ ಮೈಕ್ರೋ-ಕ್ರ್ಯಾಕ್‌ನಿಂದಾಗಿ ಒಡೆದುಹೋದರೆ ಏನು ಮಾಡುವುದು? ಅಂಥ ಅಪರೂಪದ ಸಂದರ್ಭದಲ್ಲಿ, ಮಧ್ಯದ ಪದರವು ಮುಖ್ಯ ರಕ್ಷಣಾ ಕವಚವಾಗಿ ಕಾರ್ಯ ನಿರ್ವಹಿಸುತ್ತದೆ.

ಬ್ರೀದರ್ ಹೋಲ್ ಅತ್ಯಂತ ಚಿಕ್ಕದಾಗಿರುವುದರಿಂದ, ಕ್ಯಾಬಿನ್ ಒಳಗಿನ ಒತ್ತಡವು ತಕ್ಷಣವೇ ಹೊರಹೋಗದಂತೆ ತಡೆಯುತ್ತದೆ. ಪೈಲಟ್‌ಗಳು ವಿಮಾನವನ್ನು ಸುರಕ್ಷಿತ ಎತ್ತರಕ್ಕೆ ಇಳಿಸಲು ಬೇಕಾದ ಸಮಯವನ್ನು ಈ ಸಣ್ಣ ರಂಧ್ರವು ಒದಗಿಸುತ್ತದೆ. ಈ ರಂಧ್ರವು ಕೇವಲ ಒಂದು ಮಿಲಿಮೀಟರ್‌ ಗಿಂತಲೂ ಚಿಕ್ಕದಾಗಿರುತ್ತದೆ.

ಇದನ್ನು ಅಷ್ಟು ಚಿಕ್ಕದಾಗಿ ಇಡಲು ಕಾರಣವೆಂದರೆ, ಗಾಳಿಯ ಹರಿವು ಅತ್ಯಂತ ನಿಯಂತ್ರಿತವಾಗಿರಬೇಕು ಎಂಬುದು. ಈ ರಂಧ್ರವಿಲ್ಲದಿದ್ದರೆ, ಹೊರಗಿನ ಮತ್ತು ಮಧ್ಯದ ಪದರಗಳ ನಡುವಿನ ಗಾಳಿಯ ಒತ್ತಡಕ್ಕೆ ಸಿಲುಕಿ ಕಿಟಕಿಯೇ ಸೀಳಿಹೋಗುವ ಸಂಭವವಿರುತ್ತದೆ.

ಒಟ್ಟಾರೆ, ವಿಮಾನದ ಕಿಟಕಿಯಲ್ಲಿರುವ ಆ ಪುಟ್ಟ ರಂಧ್ರವು ಮೂರು ಪ್ರಮುಖ ಕೆಲಸಗಳನ್ನು ಮಾಡುತ್ತದೆ. ಮೊದಲನೆಯದಾಗಿ, ಕ್ಯಾಬಿನ್ ಒತ್ತಡವನ್ನು ಹೊರಗಿನ ಗಾಜಿನ ಮೇಲೆ ಕೇಂದ್ರೀಕರಿಸುತ್ತದೆ. ಎರಡನೆಯದಾಗಿ, ಕಿಟಕಿಗಳ ನಡುವೆ ಮಂಜು ಮತ್ತು ತೇವಾಂಶ ಗಟ್ಟಿಯಾಗದಂತೆ ತಡೆಯುತ್ತದೆ ಹಾಗೂ ಮೂರನೆಯದಾಗಿ, ತುರ್ತು ಸಂದರ್ಭದಲ್ಲಿ ಒಂದು ಹೆಚ್ಚುವರಿ ರಕ್ಷಣಾ ಕವಚವಾಗಿ ಕೆಲಸ ಮಾಡುತ್ತದೆ.