ರಾಜ್ಯ ಪ್ರವಾಸೋದ್ಯಮವನ್ನು ರಿಚಾರ್ಜ್ ಮಾಡಿದ ಜಾರ್ಜ್

ಕರ್ನಾಟಕ ಪ್ರವಾಸೋದ್ಯಮಕ್ಕೆ ಇದು ಬದಲಾವಣೆಯ ಕಾಲವೇ? ಕಳೆದ ಕೆಲವು ತಿಂಗಳ ಬೆಳವಣಿಗೆಗಳನ್ನು ಗಮನಿಸಿದರೆ, ಈ ಪ್ರಶ್ನೆ ಸಹಜವಾಗಿ ಮೂಡುತ್ತಿದೆ. ಪ್ರವಾಸೋದ್ಯಮವೆಂದರೆ ಕೇವಲ ಪ್ರವಾಸಿ ತಾಣಗಳನ್ನು ಅಭಿವೃದ್ಧಿಪಡಿಸುವುದಲ್ಲ. ಒಂದು ರಾಜ್ಯವನ್ನು ಪ್ರವಾಸಿಗರ ಮನಸಿನಲ್ಲಿ ‘ಗಮ್ಯಸ್ಥಾನ’ವಾಗಿ ರೂಪಿಸುವುದು. ಅದಕ್ಕೆ ಮೂಲಸೌಕರ್ಯ ಬೇಕು, ಪ್ರಚಾರ ಬೇಕು, ಉದ್ಯಮದ ಸಹಕಾರ ಬೇಕು, ಹೊಸ ಆಲೋಚನೆಗಳು ಬೇಕು. ಎಲ್ಲಕ್ಕಿಂತ ಮುಖ್ಯವಾಗಿ, ನಿರಂತರ ಚಟುವಟಿಕೆ ಬೇಕು.

ಈ ದೃಷ್ಟಿಯಿಂದ ನೋಡಿದಾಗ ಕರ್ನಾಟಕ ಪ್ರವಾಸೋದ್ಯಮ ಇಲಾಖೆಯ ಇತ್ತೀಚಿನ ಚಟುವಟಿಕೆಗಳು ಗಮನ ಸೆಳೆಯುತ್ತಿವೆ. ಮೊದಲ ಬಾರಿಗೆ ರಾಜ್ಯಮಟ್ಟದ ಕರ್ನಾಟಕ ಟೂರಿಸಂ ಅವಾರ್ಡ್ಸ್ ಆಯೋಜಿಸಿ ಪ್ರಶಸ್ತಿ ನೀಡಿರುವುದು ಅದರಲ್ಲೊಂದು ಪ್ರಮುಖ ಹೆಜ್ಜೆ. ಪ್ರವಾಸೋದ್ಯಮ ಕ್ಷೇತ್ರದಲ್ಲಿ ಕೆಲಸ ಮಾಡುವ ಹೊಟೇಲ್‌ಗಳು, ರೆಸಾರ್ಟ್‌ಗಳು, ಟೂರ್ ಆಪರೇಟರ್‌ಗಳು, ಮಾರ್ಗದರ್ಶಕರು, ನೈಸರ್ಗಿಕ ತಜ್ಞರು, ಸಂಸ್ಥೆಗಳು ಹಾಗೂ ಹೊಸತನ ತರುತ್ತಿರುವವರನ್ನು ಗುರುತಿಸಿ ಗೌರವಿಸುವ ಈ ಪ್ರಯತ್ನ, ‘ಪ್ರವಾಸೋದ್ಯಮ ಎಂದರೆ ಸರ್ಕಾರದ ಕೆಲಸ ಮಾತ್ರವಲ್ಲ; ಅದರಲ್ಲಿ ದುಡಿಯುತ್ತಿರುವ ಪ್ರತಿಯೊಬ್ಬರೂ ಅದರ ಪಾಲುದಾರರು’ ಎಂಬ ಸಂದೇಶವನ್ನು ನೀಡಿದೆ. ಸೆಪ್ಟೆಂಬರ್ 27ರಂದು ನಡೆದ ಮೊದಲ ಪ್ರಶಸ್ತಿ ಸಮಾರಂಭದಲ್ಲಿ 42 ಪುರಸ್ಕೃತರನ್ನು ಗೌರವಿಸಲಾಗಿದೆ.

ಇನ್ನೊಂದು ದೊಡ್ಡ ಹೆಜ್ಜೆ ಕರಾವಳಿ ಪ್ರವಾಸೋದ್ಯಮ. ಕರ್ನಾಟಕದ 320 ಕಿ.ಮೀ. ಕರಾವಳಿ ಕೇವಲ ಕಡಲತೀರಗಳ ಸಮೂಹವಲ್ಲ. ಬೀಚ್‌ಗಳು, ಯಕ್ಷಗಾನ, ದೇವಾಲಯಗಳು, ಪಾಕಪದ್ಧತಿ, ಜಲಕ್ರೀಡೆ, ಬಂದರುಗಳು, ಸಂಸ್ಕೃತಿ, ಜಾನಪದ ಮತ್ತು ಪ್ರಕೃತಿ ಇವೆಲ್ಲವನ್ನೂ ಒಟ್ಟುಗೂಡಿಸಿ ಒಂದು ಸಮಗ್ರ ಪ್ರವಾಸೋದ್ಯಮ ಅನುಭವವನ್ನಾಗಿ ರೂಪಿಸುವ ಅಪಾರ ಅವಕಾಶ ಇಲ್ಲಿದೆ. ಈ ಕರಾವಳಿಯನ್ನು ಜಾಗತಿಕ ಪ್ರವಾಸೋದ್ಯಮ ಕೇಂದ್ರವನ್ನಾಗಿಸುವ ರಸ್ತೆನಕ್ಷೆಯನ್ನು ಇಲಾಖೆ ಮುಂದಿಟ್ಟಿರುವುದು ಈ ಭಾಗಕ್ಕೆ ಹೊಸ ನಿರೀಕ್ಷೆ ಮೂಡಿಸಿದೆ.

ಚಿಕ್ಕಮಗಳೂರಿನತ್ತಲೂ ಗಮನ ಹರಿದಿದೆ. ‘ಡಿಸ್ಕವರ್ ಚಿಕ್ಕಮಗಳೂರು’ ಮೂಲಕ ಪ್ರವಾಸೋದ್ಯಮ ಕ್ಷೇತ್ರದ ಪಾಲುದಾರರು, ಉದ್ಯಮಿಗಳು ಮತ್ತು ಪ್ರವಾಸ ವಲಯವನ್ನು ಒಟ್ಟುಗೂಡಿಸಿ B2B ಪ್ರಚಾರ ನಡೆಸಿರುವುದು, ಕಾಫಿ ನಾಡನ್ನು ಕೇವಲ ಒಂದು ವಾರಾಂತ್ಯದ ಪ್ರವಾಸಿ ತಾಣವಾಗಿ ನೋಡದೆ ದೊಡ್ಡ ಪ್ರವಾಸೋದ್ಯಮ ಉತ್ಪನ್ನವಾಗಿ ರೂಪಿಸುವ ಪ್ರಯತ್ನದ ಭಾಗವಾಗಿದೆ.

ಇದನ್ನೂ ಓದಿ: ಆದಾಯ ಹೆಚ್ಚಳಕ್ಕೆ ಬೆಲೆ ಏರಿಕೆಯೊಂದೇ ದಾರಿಯೇ?

ಇದರ ನಡುವೆ ಅತ್ಯಂತ ಆಸಕ್ತಿದಾಯಕವಾದ ಹೊಸ ಪ್ರಯತ್ನವೆಂದರೆ ಕ್ರೀಡೆ ಮತ್ತು ಪ್ರವಾಸೋದ್ಯಮದ ಜೋಡಣೆ. ಕರ್ನಾಟಕದ ಪುರುಷ, ಮಹಿಳಾ ಹಾಗೂ ವಿವಿಧ ವಯೋಮಾನದ ಕ್ರಿಕೆಟ್ ತಂಡಗಳಿಗೆ ಪ್ರವಾಸೋದ್ಯಮ ಇಲಾಖೆ, ಕೆಎಸ್‌ಟಿಡಿಸಿ ಮತ್ತು ಜಂಗಲ್ ಲಾಡ್ಜಸ್ ಅಂಡ್ ರೆಸಾರ್ಟ್ಸ್ ಪ್ರಾಯೋಜಕತ್ವ ನೀಡುವ ಯೋಜನೆ ಮುಂದಿಟ್ಟಿದೆ. ಕರ್ನಾಟಕದ ತಂಡಗಳು ದೇಶದ ವಿವಿಧ ಭಾಗಗಳಲ್ಲಿ ಆಡುವಾಗ, ಅದರೊಂದಿಗೆ ಕರ್ನಾಟಕದ ಪ್ರವಾಸಿ ತಾಣಗಳ ಹೆಸರು ಮತ್ತು ಚಿತ್ರಣವೂ ದೇಶದಾದ್ಯಂತ ತಲುಪುವ ಸಾಧ್ಯತೆ ಇದೆ. ಮುಂದಿನ ಹಂತದಲ್ಲಿ ಪಂದ್ಯ ಆಧಾರಿತ ಪ್ರವಾಸ ಪ್ಯಾಕೇಜ್‌ಗಳು, ಸ್ಪೋರ್ಟ್ಸ್ ಟೂರಿಸಂ ಮತ್ತು ಪ್ರವಾಸಿ ತಾಣಗಳಲ್ಲಿ ಕ್ರೀಡಾಕೂಟಗಳ ಸಾಧ್ಯತೆಯನ್ನೂ ಪರಿಗಣಿಸಲಾಗುತ್ತಿದೆ.

ಇದು ಪ್ರವಾಸೋದ್ಯಮದ ಪ್ರಚಾರದಲ್ಲಿ ಹೊಸ ಆಲೋಚನೆ. ಪ್ರವಾಸಿಗರನ್ನು ಕೇವಲ ಜಾಹೀರಾತಿನ ಮೂಲಕ ತಲುಪಿಸುವ ಬದಲು, ಅವರು ಈಗಾಗಲೇ ಆಸಕ್ತಿ ಹೊಂದಿರುವ ಕ್ರೀಡೆ, ಸಿನಿಮಾ, ಸಂಸ್ಕೃತಿ ಮತ್ತು ಡಿಜಿಟಲ್ ಮಾಧ್ಯಮಗಳ ಮೂಲಕ ಕರ್ನಾಟಕವನ್ನು ಪರಿಚಯಿಸುವುದು ಹೆಚ್ಚು ವ್ಯಾಪಕವಾದ ತಂತ್ರ.

ತಿರುಮಲದ ಕರ್ನಾಟಕ ಭವನದ ವಿಚಾರವೂ ಇದೇ ಸರಣಿಯಲ್ಲಿ ಗಮನಾರ್ಹ. ಕರ್ನಾಟಕದಿಂದ ತಿರುಪತಿ–ತಿರುಮಲಕ್ಕೆ ತೆರಳುವ ಭಕ್ತರ ಸಂಖ್ಯೆ ದೊಡ್ಡದಾಗಿದೆ. ತಿರುಮಲದಲ್ಲಿರುವ ಕರ್ನಾಟಕ ಭವನದ ನಿರ್ವಹಣೆಯನ್ನು ಕೆಎಸ್‌ಟಿಡಿಸಿಗೆ ವಹಿಸುವ 10 ವರ್ಷದ ವ್ಯವಸ್ಥೆ ರೂಪುಗೊಂಡಿದ್ದು, 377 ಕೊಠಡಿಗಳು ಮತ್ತು 12 ಡಾರ್ಮಿಟರಿಗಳಿರುವ ಈ ಸೌಲಭ್ಯವನ್ನು ಹಂತ ಹಂತವಾಗಿ ಸುಧಾರಿಸಿ, ಉತ್ತಮ ಆತಿಥ್ಯ ವ್ಯವಸ್ಥೆಯೊಂದಿಗೆ ನಿರ್ವಹಿಸುವ ಉದ್ದೇಶವಿದೆ.

ಸಚಿವ ಕೆ.ಜೆ. ಜಾರ್ಜ್ ಅವರ ನೇತೃತ್ವದಲ್ಲಿ ಪ್ರವಾಸೋದ್ಯಮ ಇಲಾಖೆ, ಕೆಎಸ್‌ಟಿಡಿಸಿ, ಜಂಗಲ್ ಲಾಡ್ಜಸ್ ಅಂಡ್ ರೆಸಾರ್ಟ್ಸ್ ಹಾಗೂ ಕರ್ನಾಟಕ ಟೂರಿಸಂ ಸೊಸೈಟಿ ಸೇರಿದಂತೆ ವಿವಿಧ ಸಂಸ್ಥೆಗಳು ಬೇರೆ ಬೇರೆ ದಿಕ್ಕುಗಳಲ್ಲಿ ಹೆಜ್ಜೆ ಇಡುತ್ತಿರುವುದು ಗಮನಾರ್ಹ. ಪ್ರಶಸ್ತಿ ಮೂಲಕ ಉದ್ಯಮವನ್ನು ಗೌರವಿಸುವುದು, ಕರಾವಳಿಗೆ ಹೊಸ ದೃಷ್ಟಿಕೋನ ನೀಡುವುದು, ಚಿಕ್ಕಮಗಳೂರನ್ನು ಮಾರುಕಟ್ಟೆಗೆ ಪರಿಚಯಿಸುವುದು, ಕ್ರಿಕೆಟ್ ಮೂಲಕ ಬ್ರ್ಯಾಂಡಿಂಗ್ ಮಾಡುವುದು ಮತ್ತು ತಿರುಮಲದಲ್ಲಿ ಕರ್ನಾಟಕದ ಪ್ರವಾಸಿಗರಿಗೆ ಉತ್ತಮ ಸೌಲಭ್ಯ ಕಲ್ಪಿಸುವುದು ಇವೆಲ್ಲವೂ ಒಂದೇ ದೊಡ್ಡ ಗುರಿಯ ವಿವಿಧ ಮುಖಗಳು.

ಆದರೆ ಇವುಗಳ ನಿಜವಾದ ಯಶಸ್ಸು ಮುಂದಿನ ಹಂತದಲ್ಲಿದೆ. ಯೋಜನೆಗಳು ಘೋಷಣೆಯಾಗುವುದಕ್ಕಿಂತ ಅವು ಎಷ್ಟು ಕಾರ್ಯಗತವಾಗಿದೆ ಎಂಬುದು ಮುಖ್ಯ. ರಸ್ತೆ, ಸಂಪರ್ಕ, ಸ್ವಚ್ಛತೆ, ಸುರಕ್ಷತೆ, ಶೌಚಾಲಯ, ವಸತಿ, ಮಾರ್ಗದರ್ಶಕರು, ಸ್ಥಳೀಯ ಉದ್ಯೋಗ ಮತ್ತು ಪರಿಸರ ಸಂರಕ್ಷಣೆ ಇವೆಲ್ಲವೂ ಪ್ರವಾಸೋದ್ಯಮದ ಯಶಸ್ಸಿನ ಭಾಗವಾಗಬೇಕು.

ಕರ್ನಾಟಕಕ್ಕೆ ಪ್ರವಾಸಿ ತಾಣಗಳ ಕೊರತೆಯಿಲ್ಲ. ಕೊರತೆಯಿರುವುದು ಕೆಲವೊಮ್ಮೆ ಅವುಗಳನ್ನು ಒಟ್ಟಾಗಿ, ನಿರಂತರವಾಗಿ ಮತ್ತು ಸರಿಯಾದ ಕಥೆಯೊಂದಿಗೆ ಜಗತ್ತಿಗೆ ತಲುಪಿಸುವ ಪ್ರಯತ್ನದಲ್ಲಿ. ಇತ್ತೀಚಿನ ಚಟುವಟಿಕೆಗಳು ಆ ದಿಕ್ಕಿನಲ್ಲಿ ಹೊಸ ಚೈತನ್ಯ ಮೂಡಿಸಿರುವುದು ಸುಳ್ಳಲ್ಲ. ಈ ಚೈತನ್ಯ ಮುಂದುವರಿಯಲಿ. ಯೋಜನೆಗಳು ಅನುಷ್ಠಾನಕ್ಕೆ ಬರಲಿ. ಪ್ರವಾಸಿಗರು ಹೆಚ್ಚಲಿ. ಅದಕ್ಕಿಂತ ಮುಖ್ಯವಾಗಿ, ಪ್ರವಾಸೋದ್ಯಮದಿಂದ ಕರ್ನಾಟಕದ ಸಾಮಾನ್ಯ ಜನರಿಗೂ ಉದ್ಯೋಗ ಮತ್ತು ಆದಾಯದ ಹೊಸ ಬಾಗಿಲುಗಳು ತೆರೆಯಲಿ. ಅದೇ ಪ್ರವಾಸೋದ್ಯಮದ ನಿಜವಾದ ಯಶಸ್ಸು. ಇಷ್ಟೆಲ್ಲ ಕಾರ್ಯಚಟುವಟಿಕೆ ತೋರುತ್ತಿರುವ ಕರ್ನಾಟಕ ಪ್ರವಾಸೋದ್ಯಮ ಸಚಿವರಿಗೂ ಹಾಗೂ ಅವರೊಂದಿಗೆ ಕೆಲಸ ಮಾಡುವ ಸಂಸ್ಥೆ-ಸಿಬ್ಬಂದಿಗೂ ಪತ್ರಿಕೆಯ ಮೆಚ್ಚುಗೆಗಳು ಸಲ್ಲುತ್ತವೆ. ಶುಭವಾಗಲಿ.