716 ಕೋಟಿ ರು. ವೆಚ್ಚದ ಡೆಹ್ರಾಡೂನ್‌ ಬೈಪಾಸ್‌

ಉತ್ತರಾಖಂಡದ ಡೆಹ್ರಾಡೂನ್‌ನಲ್ಲಿ ಹೆಚ್ಚುತ್ತಿರುವ ಸಂಚಾರ ದಟ್ಟಣೆ ಕಡಿಮೆ ಮಾಡಲು 716 ಕೋಟಿ ರು. ವೆಚ್ಚದಲ್ಲಿ 12 ಕಿಮೀ. ಉದ್ದದ ನಾಲ್ಕು ಪಥದ ಬೈಪಾಸ್‌ ನಿರ್ಮಿಸಲಾಗುತ್ತಿದೆ. ಭಾರತೀಯ ರಾಷ್ಟ್ರೀಯ ಹೆದ್ದಾರಿ ಪ್ರಾಧಿಕಾರ (NHAI) ಕೈಗೊಳ್ಳುತ್ತಿರುವ ಈ ಗ್ರೀನ್‌ಫೀಲ್ಡ್‌ ಬೈಪಾಸ್‌ ಝಜ್ಹಾರಾದಿಂದ ಆರಂಭವಾಗಿ, ಎನ್‌ಎಚ್‌-7ರ ಪಾಂಟಾ ಸಾಹಿಬ್–ಬಲ್ಲೂಪುರ ವಿಭಾಗವನ್ನು ಸಂಪರ್ಕಿಸಿ, ಆಶಾರೋಡಿ ಚೆಕ್‌ಪೋಸ್ಟ್‌ ಸಮೀಪ ದೆಹಲಿ–ಡೆಹ್ರಾಡೂನ್ ಎಕ್ಸ್‌ಪ್ರೆಸ್‌ವೇಗೆ ಸೇರ್ಪಡೆಯಾಗಲಿದೆ.

ಬೈಪಾಸ್‌ ಡೆಹ್ರಾಡೂನ್ ನಗರದ ಒಳಭಾಗದ ವಾಹನ ಸಂಚಾರವನ್ನು ಸೆಲಾಕ್ವಿ, ವಿಕಾಸನಗರ, ಹೆರ್ಬರ್ಟ್‌ಪುರ ಹಾಗೂ ಹಿಮಾಚಲ ಪ್ರದೇಶದ ಪಾಂಟಾ ಸಾಹಿಬ್‌ ಕಡೆಗೆ ತಿರುಗಿಸಲಿದೆ. ಇದರಿಂದ ನಗರದಲ್ಲಿನ ಟ್ರಾಫಿಕ್‌ ಜಾಮ್‌ ಮತ್ತು ವಾಹನ ಮಾಲಿನ್ಯ ಕಡಿಮೆಯಾಗುವ ನಿರೀಕ್ಷೆಯಿದೆ. ಯೋಜನೆ 2027ರ ಏಪ್ರಿಲ್ ವೇಳೆಗೆ ಪೂರ್ಣಗೊಳ್ಳುವ ಗುರಿ ಹೊಂದಿದೆ.

ದೆಹಲಿ–ಡೆಹ್ರಾಡೂನ್ ಎಕ್ಸ್‌ಪ್ರೆಸ್‌ವೇ ಮೂಲಕ ಮಸ್ಸೂರಿಗೆ ತೆರಳುವ ಪ್ರವಾಸಿಗರಿಗೆ ಈ ಬೈಪಾಸ್‌ ಹೆಚ್ಚಿನ ಅನುಕೂಲ ಒದಗಿಸಲಿದೆ. ಪ್ರಯಾಣದ ಸಮಯ ಸುಮಾರು 30–40 ನಿಮಿಷ ಕಡಿಮೆಯಾಗುವ ನಿರೀಕ್ಷೆಯಿದೆ. ಹರಿಯಾಣ, ಪಂಜಾಬ್‌ ಮತ್ತು ಹಿಮಾಚಲ ಪ್ರದೇಶದೊಂದಿಗೆ ಅಂತಾರಾಜ್ಯ ಸಂಪರ್ಕವೂ ಮತ್ತಷ್ಟು ಸುಧಾರಿಸಲಿದೆ.