ಪರಂಪರೆ ಮತ್ತು ಸಾಂಸ್ಕೃತಿಕ ಒಕ್ಕೂಟಕ್ಕೆ ಸಾಕ್ಷಿಯಾದ ಮಧ್ಯಪ್ರದೇಶ-ಗೋವಾ

ಗೋವಾ ಮತ್ತು ಮಧ್ಯಪ್ರದೇಶ ರಾಜ್ಯಗಳು ಪ್ರವಾಸೋದ್ಯಮ ಕ್ಷೇತ್ರದ ಬೆಳವಣಿಗೆಗೆ ಪರಸ್ಪರ ಕೈ ಜೋಡಿಸಿ ಕಾರ್ಯನಿರ್ವಹಿಸಲು ನಿರ್ಧರಿಸಿವೆ. ಎರಡೂ ರಾಜ್ಯಗಳ ಆಕರ್ಷಣೀಯ ತಾಣಗಳ ಬಗ್ಗೆ ಒಟ್ಟಾಗಿ ಪ್ರಚಾರ ನೀಡಿ ದೇಶೀಯ ಮತ್ತು ಅಂತಾರಾಷ್ಟ್ರೀಯ ಪ್ರವಾಸಿಗರನ್ನು ಆಕರ್ಷಿಸುವ ನಿಟ್ಟಿನಲ್ಲಿ ಈ ತೀರ್ಮಾನಕ್ಕೆ ಬರಲಾಗಿದೆ.

ಇತ್ತೀಚೆಗೆ ನಡೆದ ಸಭೆಯಲ್ಲಿ ಉಭಯ ರಾಜ್ಯಗಳ ಪ್ರವಾಸೋದ್ಯಮ ಅಧಿಕಾರಿಗಳು ಮತ್ತು ಉದ್ಯಮದ ಪ್ರತಿನಿಧಿಗಳು ಭಾಗವಹಿಸಿ, ಈ ವಿಶಿಷ್ಟ ಯೋಜನೆಯ ಕುರಿತು ಚರ್ಚೆ ನಡೆಸಿದರು. ಈ ಯೋಜನೆಯಡಿ, ಗೋವಾ ಪ್ರವಾಸಿಗರನ್ನು ಮಧ್ಯಪ್ರದೇಶದ ಪುರಾತನ ಕೋಟೆಗಳು, ವನ್ಯಜೀವಿ ಅಭಯಾರಣ್ಯಗಳು ಹಾಗೂ ಧಾರ್ಮಿಕ ತಾಣಗಳಿಗೆ ಸೆಳೆಯುವುದು ಮತ್ತು ಮಧ್ಯಪ್ರದೇಶದ ಪ್ರವಾಸಿಗರನ್ನು ಗೋವಾಕ್ಕೆ ಆಹ್ವಾನಿಸುವ ಕ್ರಮ ಕೈಗೊಳ್ಳಲಾಗುತ್ತಿದೆ.

ಗೋವಾ ಪ್ರವಾಸೋದ್ಯಮ ಇಲಾಖೆ ಈ ಸಹಯೋಗದ ಮೂಲಕ ಸುಂದರ ಕಡಲತೀರದ ತಾಣಗಳನ್ನು ಮಧ್ಯಪ್ರದೇಶದ ಪ್ರವಾಸಿಗರಿಗೆ ತೋರಿಸುವುದರ ಜತೆಗೆ ತನ್ನ ಸಂಸ್ಕೃತಿ ಮತ್ತು ಪರಂಪರೆಯನ್ನು ಪರಿಚಯಿಸಲು ಉತ್ಸುಕವಾಗಿದೆ. ಮಧ್ಯಪ್ರದೇಶದ ಅಧಿಕಾರಿಗಳು ಸಹ ಈ ಯೋಜನೆಯು ರಾಜ್ಯದ ಹೇರಿಟೇಜ್ ತಾಣಗಳ ಮತ್ತು ನೈಸರ್ಗಿಕ ಸಂಪತ್ತಿನ ಪ್ರಚಾರಕ್ಕೆ ಮಹತ್ತರ ವೇದಿಕೆ ಎಂದು ತಿಳಿಸಿದ್ದಾರೆ.

ಈ ಒಕ್ಕೂಟದ ಮೂಲಕ ಉಭಯ ರಾಜ್ಯಗಳು ಸಂಯುಕ್ತ ಪ್ರಚಾರ ಅಭಿಯಾನ, ಪ್ರದರ್ಶನ ಮತ್ತು ವಿಚಾರ ವಿನಿಮಯ ಕಾರ್ಯಕ್ರಮಗಳನ್ನು ಕೈಗೊಳ್ಳಲು ನಿರ್ಧರಿಸಿವೆ. ಸುಸ್ಥಿರ ಪ್ರವಾಸೋದ್ಯಮದ ಬೆಳವಣಿಗೆಯೊಂದಿಗೆ ಸಾಂಸ್ಕೃತಿಕ ಸಹಯೋಗಕ್ಕೆ ಈ ನಡೆ ಕಾರಣವಾಗಲಿದೆ.