ಲೇಹ್‌ನ ಸಂಗಮ ಪಾಯಿಂಟ್: ಎತ್ತರದ ರಾಫ್ಟಿಂಗ್ ಸಾಹಸಕ್ಕೆ ಪ್ರಸಿದ್ಧ ತಾಣ

ಲಡಾಖ್‌ನ ಲೇಹ್‌ಗೆ ಪ್ರವಾಸ ಕೈಗೊಳ್ಳುವ ಸಾಹಸಪ್ರಿಯರಿಗೆ ಸಂಗಮ ಪಾಯಿಂಟ್ ಪ್ರಮುಖ ಆಕರ್ಷಣೆಯಾಗಿದೆ. ಲೇಹ್‌ನಿಂದ ಸುಮಾರು 35 ಕಿಮೀ. ದೂರದಲ್ಲಿರುವ ಈ ಸ್ಥಳದಲ್ಲಿ ಸಿಂಧೂ ಮತ್ತು ಜಂಸ್ಕಾರ್ ನದಿಗಳು ಒಂದಾಗುತ್ತವೆ. ಶ್ರೀನಗರ– ಲೇಹ್ ರಾಷ್ಟ್ರೀಯ ಹೆದ್ದಾರಿಯಲ್ಲಿರುವ ನಿಮ್ಮು ಸಮೀಪದ ಈ ತಾಣವು ಕಾರ್ಗಿಲ್ ಮಾರ್ಗದಲ್ಲಿ ಸಾಗುವ ಪ್ರವಾಸಿಗರ ಜನಪ್ರಿಯ ತಂಗುದಾಣವೂ ಆಗಿದೆ.

ಸುತ್ತಲೂ ಒಣ, ಕಲ್ಲುಮಯ ಪರ್ವತಗಳು ಮತ್ತು ಕೆಳಗೆ ಸೇರುವ ಎರಡು ನದಿಗಳ ವಿಭಿನ್ನ ಬಣ್ಣಗಳು ಸಂಗಮದ ದೃಶ್ಯವನ್ನು ಮತ್ತಷ್ಟು ಮನಮೋಹಕವಾಗಿಸುತ್ತವೆ. ಈ ಪ್ರದೇಶವು ಹೈ-ಆಲ್ಟಿಟ್ಯೂಡ್ ರಿವರ್ ರಾಫ್ಟಿಂಗ್‌ಗೆ ಪ್ರಸಿದ್ಧವಾಗಿದ್ದು, ಸಿಂಧೂ ಮತ್ತು ಜಂಸ್ಕಾರ್ ನದಿಗಳಲ್ಲಿ ಹಲವು ರಾಫ್ಟಿಂಗ್ ಮಾರ್ಗಗಳಿವೆ. ಫೇಯ್– ಸಂಗಮ, ಸಂಗಮ– ಅಲ್ಚಿ ಮತ್ತು ಚಿಲ್ಲಿಂಗ್– ಸಂಗಮ ಪ್ರಮುಖ ಮಾರ್ಗಗಳಾಗಿವೆ. ನದಿ ಮತ್ತು ಹವಾಮಾನದ ಸ್ಥಿತಿಗನುಗುಣವಾಗಿ ರಾಫ್ಟಿಂಗ್‌ನ ಲಭ್ಯತೆ ಹಾಗೂ ಕಠಿಣತೆ ಬದಲಾಗುತ್ತದೆ.

ಸಂಗಮ ಪಾಯಿಂಟ್‌ಗೆ ಮತ್ತೊಂದು ವಿಶೇಷತೆ ಸಿನಿಮಾದಿಂದ ದೊರೆತಿದೆ. ರಣವೀರ್ ಸಿಂಗ್ ಮತ್ತು ಸಾರಾ ಅರ್ಜುನ್ ಅಭಿನಯದ Dhurandhar ಚಿತ್ರದ ‘Gehra Hua’ ಹಾಡಿನ ಚಿತ್ರೀಕರಣವನ್ನು ಈ ಪ್ರದೇಶದಲ್ಲಿ ನಡೆಸಲಾಗಿದೆ. ಹೀಗಾಗಿ ಸಾಹಸಪ್ರಿಯರಷ್ಟೇ ಅಲ್ಲದೆ ಸಿನಿಮಾ ಅಭಿಮಾನಿಗಳಿಗೂ ಈ ತಾಣ ವಿಶೇಷ ಆಕರ್ಷಣೆಯಾಗಿದೆ.

ಸಂಗಮಕ್ಕೆ ತೆರಳುವಾಗ ಮ್ಯಾಗ್ನೆಟಿಕ್ ಹಿಲ್, ಗುರುದ್ವಾರ ಪಥರ್ ಸಾಹಿಬ್, ನಿಮ್ಮು ಮತ್ತು ಬಸ್ಗೋ ಮುಂತಾದ ತಾಣಗಳನ್ನೂ ಭೇಟಿ ಮಾಡಬಹುದು. ರಾಫ್ಟಿಂಗ್ ಸಾಮಾನ್ಯವಾಗಿ ಬೆಚ್ಚಗಿನ ತಿಂಗಳುಗಳಲ್ಲಿ ನಡೆಯುತ್ತದೆ. ಅಧಿಕೃತ ರಾಫ್ಟಿಂಗ್ ನಿರ್ವಾಹಕರ ಮೂಲಕವೇ ಸಾಹಸ ಚಟುವಟಿಕೆಯಲ್ಲಿ ಪಾಲ್ಗೊಂಡು ಸುರಕ್ಷತಾ ಸೂಚನೆಗಳನ್ನು ಪಾಲಿಸುವುದು ಅಗತ್ಯ.