ಸಿಲಿಗುರಿ ಕಾರಿಡಾರ್‌ನಲ್ಲಿ ಅಂಡರ್‌ಗ್ರೌಂಡ್‌ ರೈಲ್ವೇ ಟನಲ್‌

ಭಾರತದ ಅತ್ಯಂತ ಸೂಕ್ಷ್ಮ ಮತ್ತು ಆಯಕಟ್ಟಿನ ಪ್ರದೇಶವಾದ 'ಸಿಲಿಗುರಿ ಕಾರಿಡಾರ್' ಅಥವಾ 'ಚಿಕನ್ಸ್ ನೆಕ್' ಪ್ರದೇಶದಲ್ಲಿ ಭಾರತೀಯ ರೈಲ್ವೆಯು ಬೃಹತ್ ಮೂಲಸೌಕರ್ಯ ಬದಲಾವಣೆಗೆ ಮುನ್ನುಡಿ ಬರೆದಿದೆ. ಈಶಾನ್ಯ ರಾಜ್ಯಗಳ ಸಂಪರ್ಕವನ್ನು ವಿಸ್ತರಿಸುವ ಮತ್ತು ರಾಷ್ಟ್ರೀಯ ಭದ್ರತೆಯನ್ನು ಬಲಪಡಿಸುವ ದೃಷ್ಟಿಯಿಂದ, ಕೇಂದ್ರ ಸರಕಾರವು ಇಲ್ಲಿ ದೇಶದ ಮೊದಲ ಭೂಗತ ರೈಲ್ವೇ ಸುರಂಗ ಮಾರ್ಗ ಮತ್ತು ಹೈ-ಸ್ಪೀಡ್ ಬುಲೆಟ್ ಟ್ರೈನ್ ಕಾರಿಡಾರ್ ಘೋಷಿಸಿದೆ. ಈ ಮಹತ್ವಾಕಾಂಕ್ಷೆಯ ಯೋಜನೆಯು ಮುಖ್ಯ ಭೂಭಾಗ ಮತ್ತು ಈಶಾನ್ಯ ಭಾರತದ ನಡುವಿನ ಪ್ರಯಾಣದ ಸಮಯವನ್ನು ಗಣನೀಯವಾಗಿ ಕಡಿಮೆ ಮಾಡಲಿದ್ದು, ಪ್ರವಾಸೋದ್ಯಮ ಮತ್ತು ಆರ್ಥಿಕತೆಗೆ ಅಭೂತಪೂರ್ವ ವೇಗವನ್ನು ನೀಡಲಿದೆ.

ಇದನ್ನೂ ಓದಿ: ವಿಯೆಟ್ನಾಂನಲ್ಲಿ ಹೈ-ಸ್ಪೀಡ್ ರೈಲು

ಕೇಂದ್ರ ರೈಲ್ವೆ ಸಚಿವ ಅಶ್ವಿನಿ ವೈಷ್ಣವ್ ಅವರ ಪ್ರಕಾರ, ಈ ಹೊಸ ಹೈ-ಸ್ಪೀಡ್ ರೈಲು ಕಾರಿಡಾರ್ ವಾರಾಣಸಿಯಿಂದ ಬಿಹಾರದ ಪಟ್ನಾ ಮಾರ್ಗವಾಗಿ ಪಶ್ಚಿಮ ಬಂಗಾಳದ ಸಿಲಿಗುರಿ ನಗರವನ್ನು ನೇರವಾಗಿ ಸಂಪರ್ಕಿಸಲಿದೆ. ಬಿಹಾರ ರಾಜ್ಯವು ಬುಲೆಟ್ ಟ್ರೇನ್ ಜಾಲಕ್ಕೆ ಸೇರ್ಪಡೆಗೊಳ್ಳುತ್ತಿರುವುದು ಇದೇ ಮೊದಲ ಬಾರಿಯಾಗಿದ್ದು, ಈ ಯೋಜನೆಯನ್ನು ಪ್ರಾದೇಶಿಕ ಪ್ರಗತಿಯ ʼಗೇಮ್ ಚೇಂಜರ್ʼ ಎಂದು ಬಣ್ಣಿಸಲಾಗಿದೆ. ಒಮ್ಮೆ ಈ ವಾರಾಣಸಿ-ಪಟ್ನಾ-ಸಿಲಿಗುರಿ ಬುಲೆಟ್ ಟ್ರೈನ್ ಕಾರಿಡಾರ್ ಪೂರ್ಣಗೊಂಡರೆ, ಪ್ರಸ್ತುತ ಇರುವ 14 ರಿಂದ 18 ಗಂಟೆಗಳ ಪ್ರಯಾಣದ ಸಮಯವು ಕೇವಲ 3 ಗಂಟೆಗಿಂತ ಕಡಿಮೆಯಾಗಲಿದೆ. ಈ ಬುಲೆಟ್ ಟ್ರೇನ್‌ಗಳು ಗಂಟೆಗೆ 300 ರಿಂದ 350 ಕಿಲೋಮೀಟರ್ ವೇಗದಲ್ಲಿ ಚಲಿಸುವಂತೆ ವಿನ್ಯಾಸಗೊಳಿಸಲಾಗುತ್ತಿದ್ದು, ಭವಿಷ್ಯದಲ್ಲಿ ಇದನ್ನು ಅಸ್ಸಾಂನ ಗುವಾಹಟಿ ನಗರದವರೆಗೂ ವಿಸ್ತರಿಸುವ ಯೋಜನೆ ಇದೆ.

ಭದ್ರತೆ ಮತ್ತು ನೈಸರ್ಗಿಕ ವಿಕೋಪಗಳ ದೃಷ್ಟಿಯಿಂದ ಸಿಲಿಗುರಿ ಕಾರಿಡಾರ್ ಕೇವಲ 22 ಕಿಲೋಮೀಟರ್ ಅಗಲದ ಕಿರಿದಾದ ಭೂಭಾಗವಾಗಿದ್ದು, ಇದು ನೇಪಾಳ, ಭೂತಾನ್, ಬಾಂಗ್ಲಾದೇಶ ಮತ್ತು ಚೀನಾದ ಟಿಬೆಟ್‌ನ ಚುಂಬಿ ಕಣಿವೆಗೆ ಅತ್ಯಂತ ಸಮೀಪದಲ್ಲಿದೆ. ಮೇಲ್ಮೈ ರೈಲ್ವೆ ಮಾರ್ಗಗಳು ಸದಾ ಉಪಗ್ರಹಗಳ ಕಣ್ಗಾವಲು ಮತ್ತು ದಾಳಿಗಳಿಗೆ ತುತ್ತಾಗುವ ಅಪಾಯ ಇರುವುದರಿಂದ, ಭಾರತ ಸರ್ಕಾರವು 40 ಕಿಲೋಮೀಟರ್ ಉದ್ದದ ಬೃಹತ್ ಭೂಗತ ರೈಲ್ವೆ ಸುರಂಗವನ್ನು ನಿರ್ಮಿಸಲು ಅನುಮೋದನೆ ನೀಡಿದೆ. ಈ ಸುರಂಗ ಮಾರ್ಗವು ಡುಮ್ಡಾಂಗಿಯಿಂದ ಆರಂಭಗೊಂಡು ತಿನ್‌ಮೈಲ್ ಹಾಟ್ ಮತ್ತು ರಂಗಪಾನಿ ಮೂಲಕ ಬಾಗ್ದೋಗ್ರಾವನ್ನು ಸಂಪರ್ಕಿಸಲಿದೆ.

ಈ ಮಹತ್ವದ ಮೂಲಸೌಕರ್ಯ ಅಭಿವೃದ್ಧಿಗೆ ಪೂರಕವಾಗಿ ಪಶ್ಚಿಮ ಬಂಗಾಳ ಸರ್ಕಾರವು ಈಗಾಗಲೇ ಕಾರಿಡಾರ್‌ನ ಸೂಕ್ಷ್ಮ ವಲಯದಲ್ಲಿ ಸುಮಾರು 120 ಎಕರೆ ಭೂಮಿಯನ್ನು ಕೇಂದ್ರ ಸರಕಾರಕ್ಕೆ ಹಸ್ತಾಂತರಿಸಿದೆ. ಇದು ಗಡಿ ಭದ್ರತಾ ಪಡೆಗೆ ಗಡಿ ಕಣ್ಗಾವಲನ್ನು ಬಿಗಿಗೊಳಿಸಲು ಮತ್ತು ರಸ್ತೆ ಮೂಲಸೌಕರ್ಯಗಳನ್ನು ವಿಸ್ತರಿಸಲು ನೆರವಾಗಲಿದೆ. ಅಸ್ಸಾಂ ಮುಖ್ಯಮಂತ್ರಿ ಹಿಮಂತ ಬಿಸ್ವ ಶರ್ಮಾ ಅವರು ಈ ಯೋಜನೆಯನ್ನು ಶ್ಲಾಘಿಸಿದ್ದು, ದಶಕಗಳಿಂದ ದೇಶ ವಿರೋಧಿ ಶಕ್ತಿಗಳು ಭಾರತವನ್ನು ಬೆದರಿಸಲು ಬಳಸುತ್ತಿದ್ದ 'ಚಿಕನ್ಸ್ ನೆಕ್' ದೌರ್ಬಲ್ಯವನ್ನು ಈ ಸುರಂಗ ಮಾರ್ಗವು ಶಾಶ್ವತವಾಗಿ ಮೆಟ್ಟಿ ನಿಲ್ಲಲಿದೆ ಎಂದು ಹೇಳಿದ್ದಾರೆ.