ಉಮ್ರಾ ಸೇವಾ ಉಲ್ಲಂಘನೆ: 1,800 ವಿದೇಶಿ ಪ್ರವಾಸ ಏಜೆನ್ಸಿಗಳನ್ನು ಸ್ಥಗಿತಗೊಳಿಸಿದ ಸೌದಿ ಅರೇಬಿಯಾ

ಉಮ್ರಾ ಯಾತ್ರಿಕರಿಗೆ ಸಮರ್ಪಕ ಸೇವೆ ಒದಗಿಸುವಲ್ಲಿ ವಿಫಲವಾದ ಹಿನ್ನೆಲೆಯಲ್ಲಿ ಸೌದಿ ಅರೇಬಿಯಾ ಸರಕಾರವು 1,800 ವಿದೇಶಿ ಪ್ರವಾಸ ಏಜೆನ್ಸಿಗಳನ್ನು ಸ್ಥಗಿತಗೊಳಿಸಿದೆ. ಈ ಕ್ರಮವನ್ನು ಸೌದಿ ಅರೇಬಿಯಾದ ಹಜ್ ಮತ್ತು ಉಮ್ರಾ ಸಚಿವಾಲಯ ಕೈಗೊಂಡಿದ್ದು, ಉಮ್ರಾ ಸೇವೆಗಳ ಗುಣಮಟ್ಟವನ್ನು ಹೆಚ್ಚಿಸುವ ಉದ್ದೇಶವನ್ನು ಹೊಂದಿದೆ.

ಹಜ್ ಮತ್ತು ಉಮ್ರಾ ಸಚಿವಾಲಯದ ಮಾಹಿತಿ ಪ್ರಕಾರ, ಒಟ್ಟು ಸುಮಾರು 5,800 ವಿದೇಶಿ ಪ್ರವಾಸ ಏಜೆನ್ಸಿಗಳ ಪೈಕಿ 1,800 ಸಂಸ್ಥೆಗಳು ನಿಗದಿತ ಸೇವಾ ಮಾನದಂಡಗಳನ್ನು ಪಾಲಿಸದೆ ಉಲ್ಲಂಘನೆ ನಡೆಸಿರುವುದು ಪತ್ತೆಯಾಗಿದೆ. ವಸತಿ ವ್ಯವಸ್ಥೆ, ಸಾರಿಗೆ, ಸಮಯಪಾಲನೆ ಹಾಗೂ ಯಾತ್ರಿಕರ ಆರೈಕೆ ಸಂಬಂಧಿತ ಸೇವೆಗಳಲ್ಲಿ ಕೊರತೆಗಳು ಕಂಡುಬಂದ ಹಿನ್ನೆಲೆಯಲ್ಲಿ ಈ ಏಜೆನ್ಸಿಗಳೊಂದಿಗೆ ಇರುವ ಒಪ್ಪಂದಗಳನ್ನು ತಾತ್ಕಾಲಿಕವಾಗಿ ಅಮಾನತುಗೊಳಿಸಲಾಗಿದೆ.

ಸಚಿವಾಲಯವು ಈ ಏಜೆನ್ಸಿಗಳಿಗೆ 10 ದಿನಗಳ ಕಾಲಾವಕಾಶ ನೀಡಿದ್ದು, ಈ ಅವಧಿಯಲ್ಲಿ ಸೇವಾ ಕೊರತೆಗಳನ್ನು ಸರಿಪಡಿಸಿ ಮಾನದಂಡಗಳನ್ನು ಪೂರೈಸಿದಲ್ಲಿ ಮಾತ್ರ ಪುನಃ ಅನುಮತಿ ನೀಡಲಾಗುವುದು ಎಂದು ತಿಳಿಸಿದೆ. ನಿಗದಿತ ಅವಧಿಯಲ್ಲಿ ದೋಷಗಳನ್ನು ಸರಿಪಡಿಸಲು ವಿಫಲವಾದರೆ, ಹೆಚ್ಚಿನ ಕಠಿಣ ಕ್ರಮ ಕೈಗೊಳ್ಳಲಾಗುವುದು ಎಂದು ಎಚ್ಚರಿಕೆ ನೀಡಲಾಗಿದೆ.

ಸೌದಿ ಸರಕಾರ ಸ್ಪಷ್ಟಪಡಿಸಿರುವಂತೆ, ಈ ನಿರ್ಧಾರವು ಹೊಸ ಉಮ್ರಾ ವೀಸಾ ಮತ್ತು ಹೊಸ ಬುಕಿಂಗ್‌ಗಳಿಗೆ ಮಾತ್ರ ಅನ್ವಯವಾಗುತ್ತದೆ. ಈಗಾಗಲೇ ಮಾನ್ಯ ಉಮ್ರಾ ವೀಸಾ ಹೊಂದಿರುವ ಅಥವಾ ಪ್ರಯಾಣವನ್ನು ದೃಢಪಡಿಸಿಕೊಂಡಿರುವ ಯಾತ್ರಿಕರ ಮೇಲೆ ಈ ಕ್ರಮದ ಯಾವುದೇ ಪರಿಣಾಮ ಇರುವುದಿಲ್ಲ. ಅವರ ಯಾತ್ರೆ ಮತ್ತು ಸೇವೆಗಳು ನಿರಂತರವಾಗಿ ಮುಂದುವರಿಯಲಿವೆ ಎಂದು ಸಚಿವಾಲಯ ತಿಳಿಸಿದೆ.

ಯಾತ್ರಿಕರ ಹಿತಾಸಕ್ತಿಯನ್ನು ರಕ್ಷಿಸುವುದು ಹಾಗೂ ಉಮ್ರಾ ಸೇವೆಗಳಲ್ಲಿ ಪಾರದರ್ಶಕತೆ ಮತ್ತು ಗುಣಮಟ್ಟವನ್ನು ಖಚಿತಪಡಿಸುವುದು ಸರಕಾರದ ಆದ್ಯತೆಯಾಗಿದೆ ಎಂದು ಹಜ್ ಮತ್ತು ಉಮ್ರಾ ಸಚಿವಾಲಯ ತಿಳಿಸಿದೆ. ಮುಂದಿನ ದಿನಗಳಲ್ಲಿ ನಿಯಮ ಉಲ್ಲಂಘಿಸುವ ಏಜೆನ್ಸಿಗಳ ವಿರುದ್ಧ ಇನ್ನಷ್ಟು ಕಟ್ಟುನಿಟ್ಟಿನ ಕ್ರಮ ಕೈಗೊಳ್ಳಲಾಗುವುದು ಎಂದು ಕೂಡ ಎಚ್ಚರಿಕೆ ನೀಡಲಾಗಿದೆ.