ಕಾಶ್ಮೀರದ ಎತ್ತರದ ಪ್ರದೇಶಗಳಲ್ಲಿ, ವಿಶೇಷವಾಗಿ 'ರಾಜದಾನ್ ಟಾಪ್' ಭಾಗದಲ್ಲಿ ಭಾರೀ ಹಿಮಪಾತ ಉಂಟಾದ ಹಿನ್ನೆಲೆಯಲ್ಲಿ ಮುನ್ನೆಚ್ಚರಿಕಾ ಕ್ರಮವಾಗಿ ಬಂದೀಪೋರಾ-ಗುರೇಜ್ ರಸ್ತೆಯನ್ನು ಸಂಚಾರಕ್ಕಾಗಿ ಮುಚ್ಚಲಾಗಿದೆ. ಪ್ರವಾಸಿಗರು ಮತ್ತು ಸ್ಥಳೀಯರ ಸುರಕ್ಷತೆಯನ್ನು ಗಮನದಲ್ಲಿಟ್ಟುಕೊಂಡು ಅಧಿಕಾರಿಗಳು ವಾಹನ ಸಂಚಾರವನ್ನು ತಾತ್ಕಾಲಿಕವಾಗಿ ಸ್ಥಗಿತಗೊಳಿಸಿದ್ದಾರೆ. ಹಿಮವನ್ನು ತೆರವುಗೊಳಿಸಲು ಬಿಆರ್‌ಒ ತಂಡಗಳು ಕಾರ್ಯಾಚರಣೆ ನಡೆಸುತ್ತಿದ್ದು, ಹವಾಮಾನ ಸುಧಾರಿಸಿದ ತಕ್ಷಣ ಸಂಚಾರವನ್ನು ಪುನರಾರಂಭಿಸಲಾಗುವುದು ಎಂದು ಆಡಳಿತ ಮಂಡಳಿ ತಿಳಿಸಿದೆ.

ಪ್ರವಾಸೋದ್ಯಮದಲ್ಲಿ ಸುಧಾರಣೆ:

ಒಂದೆಡೆ ಹವಾಮಾನದ ಸವಾಲುಗಳಿದ್ದರೂ, ಕಾಶ್ಮೀರದ ಒಟ್ಟಾರೆ ಪ್ರವಾಸೋದ್ಯಮವು ಈ ಬೇಸಗೆಯಲ್ಲಿ ಭಾರೀ ಯಶಸ್ಸನ್ನು ಕಾಣುತ್ತಿದೆ. ಕಳೆದ ಕೆಲವು ವರ್ಷಗಳಿಗೆ ಹೋಲಿಸಿದರೆ ಈ ಬಾರಿ ಪ್ರವಾಸಿಗರ ಆಗಮನದಲ್ಲಿ ಗಣನೀಯ ಏರಿಕೆಯಾಗಿದೆ.

ಇದನ್ನೂ ಓದಿ: ಬಂಗಾಳ ಪ್ರವಾಸೋದ್ಯಮದ ಮೇಲೆ ಚುನಾವಣಾ ಪ್ರಭಾವ

ಬೇಸಗೆಯ ಬಿಸಿಲಿನಿಂದ ಪಾರಾಗಲು ದೇಶದ ವಿವಿಧ ಭಾಗಗಳಿಂದ ಪ್ರವಾಸಿಗರು ಕಾಶ್ಮೀರದತ್ತ ಧಾವಿಸುತ್ತಿದ್ದಾರೆ. ಶ್ರೀನಗರದ ದಾಲ್ ಸರೋವರ, ಪಹಲ್ಗಾಮ್, ಗುಲ್ಮರ್ಗ್ ಮತ್ತು ಸೋನ್ಮಾರ್ಗ್‌ಗಳಲ್ಲಿನ ಹೋಟೆಲ್‌ಗಳು ಮತ್ತು ಹೌಸ್‌ಬೋಟ್‌ಗಳು ಬಹುತೇಕ ಭರ್ತಿಯಾಗಿವೆ. ಇದರಿಂದ ಸ್ಥಳೀಯ ಕರಕುಶಲ ಉದ್ಯಮ, ಟ್ಯಾಕ್ಸಿ ಚಾಲಕರು ಮತ್ತು ಶಿಕಾರಾ ನಡೆಸುವವರ ಆದಾಯದಲ್ಲಿ ಚೇತರಿಕೆ ಕಂಡುಬಂದಿದೆ.