ಗೋವಾ ಪ್ರವಾಸಿಗರಿಗೆ ಕಟ್ಟುನಿಟ್ಟಿನ ನಿಯಮಗಳು: ₹1 ಲಕ್ಷದವರೆಗೆ ದಂಡ

ಗೋವಾದ ಕಡಲತೀರಗಳು ಮತ್ತು ಪ್ರಮುಖ ಪ್ರವಾಸಿ ತಾಣಗಳಲ್ಲಿ ಶಿಸ್ತು, ಸ್ವಚ್ಛತೆ ಹಾಗೂ ಸುರಕ್ಷತೆಯನ್ನು ಕಾಪಾಡುವ ಉದ್ದೇಶದಿಂದ ಗೋವಾ ಪ್ರವಾಸೋದ್ಯಮ ಇಲಾಖೆ 19 ಚಟುವಟಿಕೆಗಳನ್ನು 'ಸಾರ್ವಜನಿಕ ತೊಂದರೆ' (Public Nuisance) ಎಂದು ಘೋಷಿಸಿದೆ. ಈ ನಿಯಮಗಳನ್ನು ಉಲ್ಲಂಘಿಸುವವರಿಗೆ ₹5,000ರಿಂದ ₹1 ಲಕ್ಷದವರೆಗೆ ದಂಡ ವಿಧಿಸಲಾಗುವುದಲ್ಲದೆ, ಗಂಭೀರ ಪ್ರಕರಣಗಳಲ್ಲಿ ಭಾರತೀಯ ನ್ಯಾಯ ಸಂಹಿತೆ (BNS)–2023ರ ಸೆಕ್ಷನ್ 223ರ ಅಡಿಯಲ್ಲಿ ಕಾನೂನು ಕ್ರಮವೂ ಕೈಗೊಳ್ಳಬಹುದು.

ಪ್ರವಾಸೋದ್ಯಮ ನಿರ್ದೇಶಕ ಕೇದಾರ್ ನಾಯಕ್ ಹೊರಡಿಸಿರುವ ಆದೇಶದಂತೆ, ಪೊಲೀಸರು ಹಾಗೂ ಪ್ರವಾಸೋದ್ಯಮ ಇಲಾಖೆಯ ಅಧಿಕಾರಿಗಳಿಗೆ ನಿಯಮ ಉಲ್ಲಂಘಿಸುವವರ ವಿರುದ್ಧ ತಕ್ಷಣ ಕ್ರಮ ಕೈಗೊಳ್ಳುವ ಅಧಿಕಾರ ನೀಡಲಾಗಿದೆ. ಗೋವಾದ ಕಡಲತೀರಗಳನ್ನು ಸ್ವಚ್ಛ, ಸುರಕ್ಷಿತ ಹಾಗೂ ಪ್ರವಾಸಿಗರಿಗೆ ಅನುಕೂಲಕರವಾಗಿಡುವುದು ಈ ಕ್ರಮದ ಪ್ರಮುಖ ಉದ್ದೇಶವಾಗಿದೆ.

ಹೊಸ ನಿಯಮಗಳ ಪ್ರಕಾರ ಅನುಮತಿ ಇಲ್ಲದೆ ಬೀಚ್ ಪಾರ್ಟಿ ಅಥವಾ ಕಾರ್ಯಕ್ರಮಗಳನ್ನು ಆಯೋಜಿಸುವುದು, ನೋಂದಣಿ ಇಲ್ಲದ ಮಾರ್ಗದರ್ಶಕರು (ಗೈಡ್) ಅಥವಾ ಮಸಾಜ್ ಸೇವೆಗಳನ್ನು ಬಳಸುವುದು, ಅನಧಿಕೃತ ಮಾರಾಟಗಾರರಿಂದ ರಿವರ್ ಕ್ರೂಸ್ ಅಥವಾ ವಾಟರ್ ಸ್ಪೋರ್ಟ್ಸ್ ಟಿಕೆಟ್ ಖರೀದಿಸುವುದು, ಪರವಾನಗಿ ಇಲ್ಲದ ವಾಟರ್ ಸ್ಪೋರ್ಟ್ಸ್ ಸೇವೆಗಳನ್ನು ಬಳಸುವುದು, ನಿಷೇಧಿತ ಸ್ಥಳಗಳಲ್ಲಿ ಮದ್ಯಪಾನ ಮಾಡುವುದು, ಕಡಲತೀರದಲ್ಲಿ ಗಾಜಿನ ಬಾಟಲಿಗಳನ್ನು ಒಡೆಯುವುದು ಅಥವಾ ಬಿಟ್ಟುಹೋಗುವುದು, ಸಾರ್ವಜನಿಕ ಸ್ಥಳಗಳಲ್ಲಿ ಅಡುಗೆ ಮಾಡುವುದು, ಕಸ ಎಸೆಯುವುದು, ಸಮುದ್ರತೀರಕ್ಕೆ ತ್ಯಾಜ್ಯ, ರಾಸಾಯನಿಕ ಅಥವಾ ಎಣ್ಣೆ ಸುರಿಯುವುದು, ಬೀಚ್‌ನಲ್ಲಿ ವಾಹನ ಚಲಾಯಿಸುವುದು, ತುರ್ತು ಸೇವೆಗಳ ವಾಹನಗಳು, ಜೀವರಕ್ಷಕ ವಾಹನಗಳು ಅಥವಾ ಸ್ವಚ್ಛತಾ ವಾಹನಗಳಿಗೆ ಅಡ್ಡಿಯಾಗುವುದು ಸೇರಿದಂತೆ ಹಲವು ಚಟುವಟಿಕೆಗಳಿಗೆ ದಂಡ ವಿಧಿಸಲಾಗುತ್ತದೆ.

ಇದಲ್ಲದೆ, ಅನಧಿಕೃತ ವ್ಯಾಪಾರಿಗಳು ಹಾಗೂ ಟಿಕೆಟ್ ಮಾರಾಟಗಾರರಿಗೆ ಉತ್ತೇಜನ ನೀಡುವುದು, ಅನುಮತಿ ಇಲ್ಲದೆ ವ್ಯಾಪಾರ ನಡೆಸುವುದು ಮತ್ತು ಸಾರ್ವಜನಿಕ ಸುರಕ್ಷತೆ ಹಾಗೂ ಪ್ರವಾಸೋದ್ಯಮ ವ್ಯವಸ್ಥೆಗೆ ತೊಂದರೆ ಉಂಟುಮಾಡುವ ಯಾವುದೇ ಚಟುವಟಿಕೆಯೂ ಶಿಕ್ಷಾರ್ಹವಾಗಿರುತ್ತದೆ.

ಪ್ರವಾಸಿಗರು ಅಧಿಕೃತ ಸೇವಾ ಪೂರೈಕೆದಾರರ ಮೂಲಕವೇ ಬುಕಿಂಗ್ ಮಾಡುವುದು, ಕಸವನ್ನು ಎಲ್ಲೆಂದರಲ್ಲಿ ಎಸೆಯದಿರುವುದು, ಬೀಚ್‌ನಲ್ಲಿ ವಾಹನ ಚಲಾಯಿಸದಿರುವುದು ಹಾಗೂ ಸ್ಥಳೀಯ ನಿಯಮಗಳನ್ನು ಪಾಲಿಸುವ ಮೂಲಕ ಭಾರೀ ದಂಡದಿಂದ ತಪ್ಪಿಸಿಕೊಳ್ಳಬಹುದು ಎಂದು ಗೋವಾ ಪ್ರವಾಸೋದ್ಯಮ ಇಲಾಖೆ ತಿಳಿಸಿದೆ.