ಭಾರತದ ಮೊದಲ ಎಐ ಟ್ರಾವೆಲ್ ಏಜೆಂಟ್ ‘ಮಾರ್ಕೊ’

ಪ್ರಯಾಣ ಯೋಜನೆ, ಬುಕಿಂಗ್‌ ಮತ್ತು ಪಾವತಿಯನ್ನು ಒಂದೇ ವೇದಿಕೆಯಲ್ಲಿ ನಿರ್ವಹಿಸುವ ‘ಮಾರ್ಕೊ’ ಎಂಬ ಎಐ ಟ್ರಾವೆಲ್ ಏಜೆಂಟ್‌ ಅನ್ನು Travelxp ಪರಿಚಯಿಸಿದೆ.

ಭಾರತದ ಮೊದಲ ‘ಏಜೆಂಟಿಕ್ ಎಐ ಟ್ರಾವೆಲ್ ಏಜೆಂಟ್’ ಎಂದು ಹೇಳಲಾಗಿರುವ ಮಾರ್ಕೊ, ಪ್ರಯಾಣಿಕರ ಪರವಾಗಿ ಸಂಪೂರ್ಣ ಪ್ರವಾಸ ಪ್ರಕ್ರಿಯೆಯನ್ನು ನಿರ್ವಹಿಸುವ ಸಾಮರ್ಥ್ಯ ಹೊಂದಿದೆ.

ಪ್ರಯಾಣಿಕರು ತಮ್ಮ ಪ್ರವಾಸದ ಅಗತ್ಯಗಳು, ಬಜೆಟ್ ಮತ್ತು ಆದ್ಯತೆಗಳನ್ನು ತಿಳಿಸಿದರೆ, ಮಾರ್ಕೊ ಸೂಕ್ತ ಆಯ್ಕೆಗಳನ್ನು ಹುಡುಕಿ ಪ್ರವಾಸವನ್ನು ಯೋಜಿಸುವುದಲ್ಲದೆ, ವಿಮಾನ ಟಿಕೆಟ್, ಹೊಟೇಲ್, ಕಾರು ಹಾಗೂ ರೆಸ್ಟೋರೆಂಟ್ ಬುಕಿಂಗ್‌ಗಳನ್ನೂ ನಿರ್ವಹಿಸಬಲ್ಲದು. ಬಳಕೆದಾರರು ನಿಗದಿಪಡಿಸಿರುವ ಬಜೆಟ್ ಮತ್ತು ಅನುಮತಿ ಮಿತಿಗಳೊಳಗೆ ಬುಕಿಂಗ್‌ ಹಾಗೂ ಪಾವತಿ ಪ್ರಕ್ರಿಯೆಯನ್ನು ಪೂರ್ಣಗೊಳಿಸುವುದು ಇದರ ಪ್ರಮುಖ ವೈಶಿಷ್ಟ್ಯವಾಗಿದೆ.

ಸಾಮಾನ್ಯ ಎಐ ಚಾಟ್‌ಬಾಟ್‌ಗಳು ಮಾಹಿತಿ ಅಥವಾ ಸಲಹೆ ನೀಡುವುದಕ್ಕೆ ಸೀಮಿತವಾಗಿದ್ದರೆ, ಮಾರ್ಕೊ ಪ್ರಯಾಣಿಕರ ಪರವಾಗಿ ಕಾರ್ಯನಿರ್ವಹಿಸುವ ‘ಏಜೆಂಟ್’ ಮಾದರಿಯ ತಂತ್ರಜ್ಞಾನವನ್ನು ಬಳಸುತ್ತದೆ. ಪ್ರವಾಸದ ಹುಡುಕಾಟದಿಂದ ಆರಂಭಿಸಿ, ಯೋಜನೆ, ಬುಕಿಂಗ್ ಮತ್ತು ಪಾವತಿಯವರೆಗಿನ ಪ್ರಕ್ರಿಯೆಯನ್ನು ಸ್ವಯಂಚಾಲಿತಗೊಳಿಸುವ ಮೂಲಕ ಪ್ರಯಾಣ ವ್ಯವಸ್ಥೆಯನ್ನು ಸರಳಗೊಳಿಸುವುದು ಇದರ ಉದ್ದೇಶ.

Travelxp ಪ್ರಕಾರ, ಈ ಹೊಸ ತಂತ್ರಜ್ಞಾನವು ಪ್ರಯಾಣಿಕರಿಗೆ ಹೆಚ್ಚು ವೈಯಕ್ತಿಕ, ವೇಗದ ಮತ್ತು ಅನುಕೂಲಕರ ಬುಕಿಂಗ್ ಅನುಭವ ನೀಡಲಿದೆ.