ಎಚ್-1 ಬಿ ವೀಸಾಕ್ಕೆ ಲಾಟರಿ ಪದ್ಧತಿ ರದ್ದುಪಡಿಸಿದ ಅಮೆರಿಕ
ಈ ಹೊಸ ವ್ಯವಸ್ಥೆಯಡಿ, ಎಚ್-1 ಬಿ ವೀಸಾ ಅರ್ಜಿದಾರರನ್ನು ಕೇವಲ ಲಾಟರಿಯಿಂದ ಆಯ್ಕೆ ಮಾಡುವುದಿಲ್ಲ. ಬದಲಾಗಿ, ಹೆಚ್ಚಿನ ವೇತನ ನೀಡುವ ಉದ್ಯೋಗಗಳು ಮತ್ತು ವಿಶೇಷ ಕೌಶಲ್ಯ ಹೊಂದಿರುವ ಅಭ್ಯರ್ಥಿಗಳಿಗೆ ಪ್ರಾಮುಖ್ಯತೆ ನೀಡಲಾಗುತ್ತದೆ. ಈ ಕ್ರಮವು 2026ರ ಫೆಬ್ರವರಿಯಿಂದ ಜಾರಿಗೆ ಬರುವ ನಿರೀಕ್ಷೆಯಿದ್ದು, 2027ರ ಆರ್ಥಿಕ ವರ್ಷದ ವೀಸಾ ನೋಂದಣಿ ಪ್ರಕ್ರಿಯೆಗೆ ಅನ್ವಯವಾಗಲಿದೆ.
ಅಮೆರಿಕದ ಎಚ್-1 ಬಿ ಉದ್ಯೋಗ ವೀಸಾ ವ್ಯವಸ್ಥೆಯಲ್ಲಿ ಮಹತ್ವದ ಬದಲಾವಣೆಗಳನ್ನು ಅಮೆರಿಕ ಸರ್ಕಾರ ಘೋಷಿಸಿದೆ. ಇನ್ನು ಮುಂದೆ ವರ್ಷಗಳಿಂದ ಜಾರಿಯಲ್ಲಿದ್ದ ಲಾಟರಿ (ಚೀಟಿ) ಆಧಾರಿತ ಆಯ್ಕೆ ವ್ಯವಸ್ಥೆಯನ್ನು ರದ್ದುಗೊಳಿಸಿ, ಕೌಶಲ್ಯ ಮತ್ತು ವೇತನ ಆಧಾರಿತ ಹೊಸ ಆಯ್ಕೆ ಕ್ರಮವನ್ನು ಜಾರಿಗೆ ತರಲು ನಿರ್ಧರಿಸಲಾಗಿದೆ.
ಈ ಹೊಸ ವ್ಯವಸ್ಥೆಯಡಿ, ಎಚ್-1 ಬಿ ವೀಸಾ ಅರ್ಜಿದಾರರನ್ನು ಕೇವಲ ಲಾಟರಿಯಿಂದ ಆಯ್ಕೆ ಮಾಡುವುದಿಲ್ಲ. ಬದಲಾಗಿ, ಹೆಚ್ಚಿನ ವೇತನ ನೀಡುವ ಉದ್ಯೋಗಗಳು ಮತ್ತು ವಿಶೇಷ ಕೌಶಲ್ಯ ಹೊಂದಿರುವ ಅಭ್ಯರ್ಥಿಗಳಿಗೆ ಪ್ರಾಮುಖ್ಯತೆ ನೀಡಲಾಗುತ್ತದೆ. ಈ ಕ್ರಮವು 2026ರ ಫೆಬ್ರವರಿಯಿಂದ ಜಾರಿಗೆ ಬರುವ ನಿರೀಕ್ಷೆಯಿದ್ದು, 2027ರ ಆರ್ಥಿಕ ವರ್ಷದ ವೀಸಾ ನೋಂದಣಿ ಪ್ರಕ್ರಿಯೆಗೆ ಅನ್ವಯವಾಗಲಿದೆ.
ಪ್ರಸ್ತುತ ವ್ಯವಸ್ಥೆಯಲ್ಲಿ ವರ್ಷಕ್ಕೆ 85 ಸಾವಿರ ಎಚ್-1 ಬಿ ವೀಸಾಗಳ ಮಿತಿ ಇದ್ದು, ಅರ್ಜಿಗಳ ಸಂಖ್ಯೆ ಮಿತಿಗಿಂತ ಹೆಚ್ಚಾದಾಗ ಲಾಟರಿ ಮೂಲಕ ಆಯ್ಕೆ ಮಾಡಲಾಗುತ್ತಿತ್ತು. ಈ ವಿಧಾನವು ದುರುಪಯೋಗಕ್ಕೆ ದಾರಿ ಮಾಡಿಕೊಡುತ್ತಿದ್ದು, ಕೆಲ ಸಂಸ್ಥೆಗಳು ಕಡಿಮೆ ವೇತನದ ಅನೇಕ ಅರ್ಜಿಗಳನ್ನು ಸಲ್ಲಿಸುತ್ತಿದ್ದವು ಎಂಬ ಆರೋಪಗಳು ಕೇಳಿಬಂದಿದ್ದವು. ಇದನ್ನು ತಡೆಗಟ್ಟುವ ಉದ್ದೇಶದಿಂದ ಹೊಸ ನಿಯಮಗಳನ್ನು ತರಲಾಗಿದೆ ಎಂದು ಅಮೆರಿಕ ಆಡಳಿತ ಸ್ಪಷ್ಟಪಡಿಸಿದೆ.
ಹೊಸ ಆಯ್ಕೆ ವ್ಯವಸ್ಥೆಯಿಂದ ಅಮೆರಿಕದ ಉದ್ಯೋಗ ಮಾರುಕಟ್ಟೆಯಲ್ಲಿ ಹೆಚ್ಚಿನ ಕೌಶಲ್ಯ ಹೊಂದಿರುವ ವಿದೇಶಿ ವೃತ್ತಿಪರರನ್ನು ಆಕರ್ಷಿಸುವುದು ಮತ್ತು ಸ್ಥಳೀಯ ಉದ್ಯೋಗಿಗಳ ಹಿತಾಸಕ್ತಿಯನ್ನು ರಕ್ಷಿಸುವುದು ಸರಕಾರದ ಉದ್ದೇಶವಾಗಿದೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.
ಈ ಬದಲಾವಣೆ ಭಾರತೀಯ ಅಭ್ಯರ್ಥಿಗಳ ಮೇಲೂ ಪರಿಣಾಮ ಬೀರುವ ಸಾಧ್ಯತೆ ಇದೆ. ಭಾರತವು ಎಚ್-1 ಬಿ ವೀಸಾಗಳ ಪ್ರಮುಖ ಲಾಭ ಪಡೆಯುತ್ತಿರುವ ದೇಶವಾಗಿದ್ದು, ಹೆಚ್ಚಿನ ಅನುಭವ ಮತ್ತು ಉತ್ತಮ ವೇತನದ ಉದ್ಯೋಗಗಳಿಗೆ ಅರ್ಜಿ ಹಾಕುವವರಿಗೆ ಲಾಭವಾಗುವ ನಿರೀಕ್ಷೆಯಿದೆ. ಆದರೆ ಕಡಿಮೆ ವೇತನದ ಅಥವಾ ಪ್ರಾರಂಭಿಕ ಹುದ್ದೆಗಳ ಅಭ್ಯರ್ಥಿಗಳಿಗೆ ಸವಾಲಾಗಬಹುದು ಎಂದು ತಜ್ಞರು ಅಭಿಪ್ರಾಯಪಟ್ಟಿದ್ದಾರೆ.