ಐಸ್‌ಲ್ಯಾಂಡ್ ಪ್ರವಾಸೋದ್ಯಮವೂ, ಡ್ರೋನ್ ಚಿತ್ರೀಕರಣವೂ!

ಉತ್ತರ ಧ್ರುವಕ್ಕೆ ಹತ್ತಿರವಿರುವ ಐಸ್‌ಲ್ಯಾಂಡ್ ದೇಶ ಕಳೆದ ಮೂರ್ನಾಲ್ಕು ವರ್ಷಗಳಿಂದ ಇಡೀ ಜಗತ್ತಿನ ಪ್ರವಾಸಿಗರ ಮೆಚ್ಚಿನ ತಾಣವಾಗಿದೆ. ಒಂದು ರೀತಿಯಲ್ಲಿ ಎಲ್ಲ ದೇಶಗಳ ಪ್ರವಾಸಿಗರು ಆ ದೇಶದ ಕಡೆಗೆ ಮುಖ ಮಾಡಿದ್ದಾರೆ. 2022 ರಲ್ಲಿ ಐಸ್‌ಲ್ಯಾಂಡ್ ಗೆ ಸುಮಾರು ಹದಿನೈದು ಲಕ್ಷ ಜನ ಭೇಟಿ ನೀಡಿದ್ದರು. ಮುಂದಿನ ವರ್ಷ (2023) ಈ ಸಂಖ್ಯೆ ಇಪ್ಪತ್ತೆರಡು ಲಕ್ಷಕ್ಕೇರಿತು. ಪ್ರತಿ ವರ್ಷ ಅಮೆರಿಕವೊಂದರಿಂದಲೇ ಐದರಿಂದ ಎಂಟು ಲಕ್ಷ ಪ್ರವಾಸಿಗರು ಐಸ್‌ಲ್ಯಾಂಡ್ ಗೆ ಹೋಗುತ್ತಿದ್ದಾರೆ. ಸಾಮಾಜಿಕ ಜಾಲತಾಣ ತೆರೆದರೆ ಐಸ್‌ಲ್ಯಾಂಡ್ ನ ಸುಂದರ ತಾಣಗಳ ಚಿತ್ರಗಳು, ದೃಶ್ಯಗಳು ಕಣ್ಮನ ಸೆಳೆಯುತ್ತವೆ. ಐಸ್‌ಲ್ಯಾಂಡ್ ನ ಒಂದು ಜಲಪಾತದ ಒಂದು ನಿಮಿಷದ ದೃಶ್ಯಾವಳಿಯನ್ನು ‘ಯೂಟ್ಯೂಬ್’ನಲ್ಲಿ ಇನ್ನೂರು ಕೋಟಿಗೂ ಹೆಚ್ಚು ಜನ ವೀಕ್ಷಿಸಿದ್ದು ಒಂದು ಅಪರೂಪದ ದಾಖಲೆಯೇ. ಆ ಕ್ಲಿಪ್ ವಾಟ್ಸಾಪ್ ನಲ್ಲೂ ಸಾಕಷ್ಟು ಹರಿದಾಡಿದ್ದು ಬೇರೆ ಮಾತು.

ಐಸ್‌ಲ್ಯಾಂಡ್ ಇದ್ದಕ್ಕಿದ್ದಂತೆ ಜಗತ್ತಿನ ಪ್ರವಾಸಿಗರ ‘ಹಾಟ್ ಡೆಸ್ಟಿನೇಶನ್’ ಆಗಿದ್ದು ಹೇಗೆ?
ಇದಕ್ಕೆ ಮುಖ್ಯ ಕಾರಣ ಅಂದ್ರೆ ಡ್ರೋನ್ ಅಂದ್ರೆ ನೀವು ನಂಬಬೇಕು. ಇತ್ತೀಚೆಗೆ ಐಸ್‌ಲ್ಯಾಂಡ್ ಗೆ ಹೋಗಿ ಬಂದ ಸ್ನೇಹಿತರೊಬ್ಬರು ಹೇಳುತ್ತಿದ್ದರು - ‘ಭಾರತದ ಯಾವ ನಗರದ ಮೇಲೂ ಅಷ್ಟೊಂದು ವಿಮಾನಗಳು, ಹಕ್ಕಿಗಳು ಹಾರಲಿಕ್ಕಿಲ್ಲ, ಆದರೆ ಐಸ್‌ಲ್ಯಾಂಡಿನ ಆಗಸದಲ್ಲಿ ಎಲ್ಲಿ ನೋಡಿದರೂ ಬರೀ ಡ್ರೋನ್ ಗಳೇ. ಅದರಲ್ಲೂ ಕೆಲವು ಪ್ರವಾಸಿ ತಾಣಗಳ ಮೇಲೆ ಮೂರು-ನಾಲ್ಕು ಸಾವಿರ ಡ್ರೋನ್ ಗಳು ಹಾರುವುದನ್ನು ಕಾಣಬಹುದು. ಐಸ್‌ಲ್ಯಾಂಡ್ ಗೆ ಹೋಗುವವರು ಡ್ರೋನ್ ಇಲ್ಲದೇ ಹೋಗುವುದಿಲ್ಲ ಅಥವಾ ಅಲ್ಲಿಗೆ ಡ್ರೋನ್ ನಿಂದ ಚಿತ್ರೀಕರಣ ಮಾಡಲೆಂದೇ ಅಲ್ಲಿಗೆ ಹೋಗುತ್ತಾರೆ. ಹಾಗೆ ಹೋದವರು ಮರಳಿ ಬಂದು ಯುಟ್ಯೂಬ್ ಸೇರಿದಂತೆ ಎಲ್ಲ ಸಾಮಾಜಿಕ ಜಾಲತಾಣಗಳಲ್ಲಿ ಅಲ್ಲಿ ಸೆರೆ ಹಿಡಿದ ದೃಶ್ಯಗಳನ್ನು ಹಂಚಿಕೊಳ್ಳುತ್ತಾರೆ. ಈ ಕಾರಣದಿಂದ ಐಸ್‌ಲ್ಯಾಂಡ್ ಸರಕಾರ ಪ್ರಚಾರ ಮಾಡದಿದ್ದರೂ, ಆ ದೇಶ ವಿಶ್ವದಾದ್ಯಂತ ಇರುವ ಪ್ರವಾಸಿಗರನ್ನು ಕೈ ಬೀಸಿ ಕರೆಯುತ್ತಿದೆ.’

ಐಸ್‌ಲ್ಯಾಂಡ್‌ನ ಪ್ರವಾಸೋದ್ಯಮದಲ್ಲಿ ಡ್ರೋನ್‌ಗಳು ನಿರ್ಣಾಯಕ ಪಾತ್ರ ವಹಿಸಿವೆ. ಐಸ್‌ಲ್ಯಾಂಡ್ ಅಸಾಮಾನ್ಯ ಪ್ರಾಕೃತಿಕ ಸೌಂದರ್ಯವನ್ನು ಹೊಂದಿದೆ. ಇದರ ಬಹುತೇಕ ಭಾಗ ಜ್ವಾಲಾಮುಖಿ, ಗ್ಲೇಸಿಯರ್‌ಗಳು, ಬಂಡೆಗಳು ಮತ್ತು ಅದ್ಭುತ ಜಲಪಾತಗಳಿಂದ ಕೂಡಿದೆ. ಆದರೂ ಈ ಸೌಂದರ್ಯವನ್ನು ಪ್ರಪಂಚದಾದ್ಯಂತ ಜನರಿಗೆ ಪರಿಚಯಿಸಿದ್ದು ಡ್ರೋನ್‌ಗಳು. ಇದು ಹೇಗೆ ಸಾಧ್ಯವಾಯಿತು ಎಂಬುದನ್ನು ನೋಡೋಣ.

ಐಸ್‌ಲ್ಯಾಂಡ್‌ನ ಭೂಪ್ರದೇಶ ಅತ್ಯಂತ ಒರಟಾದ ಮತ್ತು ಕಠಿಣವಾದ ಮಾರ್ಗಗಳಿಂದ ಕೂಡಿದೆ. ಕೆಲವು ಸ್ಥಳಗಳನ್ನು ಬರಿಗಣ್ಣಿನಿಂದ ಅಥವಾ ಸಾಂಪ್ರದಾಯಿಕ ಕೆಮರಾಗಳಿಂದ ಸಂಪೂರ್ಣವಾಗಿ ಸೆರೆಹಿಡಿಯುವುದು ಅಸಾಧ್ಯ. ಆದರೆ ಡ್ರೋನ್‌ಗಳು ಎತ್ತರದಿಂದ ಮತ್ತು ವಿಶಿಷ್ಟ ಕೋನಗಳಿಂದ ಅದ್ಭುತವಾದ ದೃಶ್ಯಗಳನ್ನು ಸೆರೆಹಿಡಿಯಲು ಸಹಾಯಕವಾಗಿವೆ. ಉದಾಹರಣೆಗೆ, ಬೃಹತ್ ಜ್ವಾಲಾಮುಖಿ, ಮಂಜುಗಡ್ಡೆಯ ಗುಹೆಗಳು, ಹಸಿರು ಹುಲ್ಲುಗಾವಲುಗಳು ಮತ್ತು ಆಳವಾದ ಕಣಿವೆಗಳನ್ನು ಡ್ರೋನ್ ಮೂಲಕ ಚಿತ್ರೀಕರಿಸಿದಾಗ ಅವು ಹೊಸ ರೂಪದಲ್ಲಿ ಕಾಣುತ್ತವೆ.
ಡ್ರೋನ್ ಕೆಮರಾಗಳಿಂದ ತೆಗೆದ ವಿಡಿಯೋಗಳು ಮತ್ತು ಫೋಟೊಗಳು ಸುಲಭವಾಗಿ ಸಾಮಾಜಿಕ ಜಾಲತಾಣಗಳಲ್ಲಿ ಹಂಚಿಕೊಂಡಾಗ, ಇವು ಕೋಟ್ಯಂತರ ಜನರ ಗಮನ ಸೆಳೆಯುತ್ತವೆ. ಐಸ್‌ಲ್ಯಾಂಡ್‌ನ ಒಂದು ಜಲಪಾತದ ವೀಡಿಯೊ ಎರಡು ನೂರು ಕೋಟಿಗೂ ಹೆಚ್ಚು ವೀಕ್ಷಣೆ ಪಡೆದಿದೆ ಅಂದ್ರೆ ಇದು ಡ್ರೋನ್ ವೀಡಿಯೋಗಳ ಪ್ರಭಾವಕ್ಕೆ ಒಂದು ಉತ್ತಮ ಉದಾಹರಣೆಯಾಗಿದೆ. ಈ ಅದ್ಭುತ ದೃಶ್ಯಗಳನ್ನು ಕಂಡ ಜನರು ನೇರವಾಗಿ ಅಲ್ಲಿಗೆ ಹೋಗಲು ಪ್ರೇರೇಪಿತರಾದರು.

ಡ್ರೋನ್ ವೀಡಿಯೋಗಳು ಕೇವಲ ದೃಶ್ಯಗಳನ್ನು ಮಾತ್ರ ತೋರಿಸಲಿಲ್ಲ. ಅವುಗಳು ಪ್ರವಾಸಿಗರಿಗೆ ಆ ಸ್ಥಳಕ್ಕೆ ಹೋಗಲು ಯಾವ ಮಾರ್ಗ ಉತ್ತಮ, ಅಲ್ಲಿನ ಹವಾಮಾನ ಹೇಗಿದೆ, ಎಷ್ಟು ದೂರ ಹೋಗಬೇಕು ಎಂಬ ಮಾಹಿತಿಯನ್ನು ಪರೋಕ್ಷವಾಗಿ ತಿಳಿಸುತ್ತವೆ. ಇದು ಪ್ರವಾಸಿಗರಿಗೆ ಐಸ್‌ಲ್ಯಾಂಡ್ ಪ್ರವಾಸವನ್ನು ಯೋಜಿಸಲು ಸಹಾಯ ಮಾಡಿತು. ಐಸ್‌ಲ್ಯಾಂಡ್ ಸರಕಾರ ಮತ್ತು ಪ್ರವಾಸೋದ್ಯಮ ಇಲಾಖೆ ಕೂಡ ಡ್ರೋನ್ ಛಾಯಾಗ್ರಾಹಕರು ಮತ್ತು ವೀಡಿಯೊ ನಿರ್ಮಾಪಕರನ್ನು ಪ್ರೋತ್ಸಾಹಿಸಿತು. ಇದರಿಂದಾಗಿ ಅಲ್ಲಿಗೆ ಬರುವ ಪ್ರವಾಸಿಗರು ಕೂಡ ತಮ್ಮದೇ ಆದ ಡ್ರೋನ್ ವೀಡಿಯೊಗಳನ್ನು ಚಿತ್ರೀಕರಿಸಿ ಹಂಚಿಕೊಳ್ಳಲು ಆರಂಭಿಸಿದರು. ಇದು ಹೊಸ ಪ್ರವಾಸಿಗರಿಗೆ ಐಸ್‌ಲ್ಯಾಂಡ್ ನೋಡಲೇಬೇಕಾದ ಸ್ಥಳ ಎಂಬ ಭಾವನೆಯನ್ನು ಮೂಡಿಸಿತು.
ಈ ದಿನಗಳಲ್ಲಿ ಡ್ರೋನ್ ಪ್ರವಾಸೋದ್ಯಮ ಉತ್ತೇಜನಕ್ಕೆ ಸಹಕಾರಿ. ಪ್ರವಾಸಿಗ ಬರಿಗಣ್ಣಿನಿಂದ ನೋಡಲು ಸಾಧ್ಯವಾಗದ್ದನ್ನು ಡ್ರೋನ್ ತೋರಿಸುತ್ತದೆ. ಇಲ್ಲಿ ತನಕ ಯಾರೂ ನೋಡದ ಹೊಸ ದೃಶ್ಯಗಳನ್ನು ಪ್ರವಾಸಿಗನ ಮುಂದೆ ಇಡುತ್ತದೆ. ಆದರೆ ಕೆಲವು ದೇಶಗಳು ಡ್ರೋನ್ ನ್ನು ನಿಷೇಧಿಸುವ ಮೂಲಕ ಪ್ರವಾಸಿಗನ ಅನುಭವಕ್ಕೆ ಅಡ್ಡಿಪಡಿಸುತ್ತಿದ್ದರೆ, ಐಸ್‌ಲ್ಯಾಂಡ್ ಡ್ರೋನ್ ಗೆ ತನ್ನ ದೇಶದ ಆಕಾಶವನ್ನು ಮುಕ್ತವಾಗಿ ತೆರೆಯಿತು.

ಪ್ರವಾಸೋದ್ಯಮ ಹೆಚ್ಚುತ್ತಿದ್ದಂತೆ, ಐಸ್‌ಲ್ಯಾಂಡ್ ಸರಕಾರ ಡ್ರೋನ್ ಬಳಕೆದಾರರಿಗೆ ನಿಯಮಗಳನ್ನು ರೂಪಿಸಿತು. ಇದು ನಿಯಂತ್ರಿತ ರೀತಿಯಲ್ಲಿ ಡ್ರೋನ್ ಬಳಸಲು ಅನುವು ಮಾಡಿಕೊಟ್ಟಿತು. ಇದರಿಂದ ಪ್ರವಾಸೋದ್ಯಮದ ಜತೆಗೆ ಪರಿಸರ ಸಂರಕ್ಷಣೆಗೂ ಗಮನ ನೀಡಲು ಸಾಧ್ಯವಾಯಿತು. ಐಸ್‌ಲ್ಯಾಂಡ್‌ನ ಪ್ರಾಕೃತಿಕ ಸೌಂದರ್ಯಕ್ಕೆ ಡ್ರೋನ್‌ಗಳು ರೆಕ್ಕೆ ನೀಡಿದವು. ಸಾಂಪ್ರದಾಯಿಕ ಛಾಯಾಗ್ರಹಣದಿಂದ ಸಾಧ್ಯವಾಗದ ವಿಶಿಷ್ಟ ದೃಶ್ಯಗಳನ್ನು ಡ್ರೋನ್‌ಗಳು ಜಗತ್ತಿಗೆ ಪರಿಚಯಿಸಿದವು. ಸಾಮಾಜಿಕ ಜಾಲತಾಣಗಳ ಮೂಲಕ ಆ ದೃಶ್ಯಗಳು ಲಕ್ಷಾಂತರ ಜನರನ್ನು ತಲುಪಿ, ಐಸ್‌ಲ್ಯಾಂಡ್ ಅನ್ನು ವಿಶ್ವದ ಪ್ರಮುಖ ಪ್ರವಾಸಿ ತಾಣವಾಗಿ ಪರಿವರ್ತಿಸಿತು.

ಐಸ್ ಲ್ಯಾಂಡ್ ಸೇರಿದಂತೆ ಹಲವು ದೇಶಗಳು ಡ್ರೋನ್‌ಗಳ ಬಳಕೆಯನ್ನು ಪ್ರವಾಸೋದ್ಯಮದಲ್ಲಿ ಉತ್ತೇಜಿಸುತ್ತಿವೆ. ಆದರೆ, ಕೆಲವು ದೇಶಗಳು ಕೆಲವು ಕಾರಣಗಳಿಗಾಗಿ ಅವುಗಳ ಬಳಕೆಯನ್ನು ಸಂಪೂರ್ಣವಾಗಿ ಅಥವಾ ಭಾಗಶಃ ನಿಷೇಧಿಸಿವೆ. ಡ್ರೋನ್‌ಗಳು ಪ್ರವಾಸೋದ್ಯಮದಲ್ಲಿ ಹಲವು ವಿಧಗಳಲ್ಲಿ ಪ್ರಯೋಜನಕಾರಿಯಾಗಿವೆ. ಎತ್ತರದ ಸ್ಥಳಗಳು, ಪರ್ವತಗಳು, ಕಣಿವೆಗಳು ಮತ್ತು ದಟ್ಟವಾದ ಅರಣ್ಯದಂಥ ಪ್ರದೇಶಗಳನ್ನು ಡ್ರೋನ್ ಮೂಲಕ ಸುಲಭವಾಗಿ ನೋಡಬಹುದು. ಈ ವೈಶಿಷ್ಟ್ಯವು ಪ್ರವಾಸಿಗರಿಗೆ ಎಂದಿಗೂ ಮರೆಯಲಾಗದ ಅನುಭವವನ್ನು ನೀಡುತ್ತದೆ. ಡ್ರೋನ್‌ಗಳು ಪರ್ವತಾರೋಹಣ, ಸ್ಕೀಯಿಂಗ್ ಮತ್ತು ಇತರ ಸಾಹಸ ಕ್ರೀಡೆಗಳ ವೀಡಿಯೊಗಳನ್ನು ಸೆರೆ ಹಿಡಿಯಲು ಸಹಾಯ ಮಾಡುತ್ತವೆ. ಇದು ಪ್ರವಾಸಿಗರಿಗೆ ತಮ್ಮ ಅನುಭವಗಳನ್ನು ದಾಖಲಿಸಿಕೊಳ್ಳಲು ಒಂದು ಅದ್ಭುತ ಅವಕಾಶವಾಗಿದೆ.

ಕೆಲವು ಐತಿಹಾಸಿಕ ತಾಣಗಳು ಡ್ರೋನ್ ಮೂಲಕ ನೋಡುವುದು ಹೆಚ್ಚು ಸೂಕ್ತ. ಉದಾಹರಣೆಗೆ, ಪಿರಮಿಡ್‌ಗಳಂಥ ಸ್ಥಳಗಳನ್ನು ಎತ್ತರದಿಂದ ನೋಡಿದಾಗ ಅವುಗಳ ಸಂಪೂರ್ಣ ಚಿತ್ರಣ ಸಿಗುತ್ತದೆ. ಡ್ರೋನ್ ವೀಡಿಯೊಗಳು ಪ್ರವಾಸಿ ತಾಣದ ಒಂದು ವಾಸ್ತವಿಕ ಅನುಭವವನ್ನು ನೀಡುತ್ತವೆ. ಒಂದು ಸ್ಥಳದ ಭೌಗೋಳಿಕ ರಚನೆ, ಅಲ್ಲಿನ ಪ್ರಮುಖ ಆಕರ್ಷಣೆಗಳು ಮತ್ತು ಪರಿಸರವನ್ನು ಡ್ರೋನ್ ವೀಡಿಯೊಗಳು ಸ್ಪಷ್ಟವಾಗಿ ತೋರಿಸುವುದರಿಂದ, ಪ್ರವಾಸಿಗರಿಗೆ ಆ ಜಾಗದ ಬಗ್ಗೆ ಸಂಪೂರ್ಣ ಕಲ್ಪನೆ ದೊರೆಯುತ್ತದೆ. ಉದಾಹರಣೆಗೆ, ಹಂಪಿಯ ಐತಿಹಾಸಿಕ ದೇವಾಲಯಗಳನ್ನು ನೆಲಮಟ್ಟದಿಂದ ಪ್ರತ್ಯೇಕವಾಗಿ ನೋಡಿದಾಗ ಅವುಗಳ ಸಂಪೂರ್ಣ ನೋಟ ಸಿಗುವುದಿಲ್ಲ. ಆದರೆ ಡ್ರೋನ್ ಮೂಲಕ ಚಿತ್ರೀಕರಿಸಿದಾಗ, ವಿಜಯ ವಿಠಲ ದೇವಾಲಯದ ರಥ, ತುಂಗಭದ್ರಾ ನದಿ, ಮತ್ತು ಸುತ್ತಲಿನ ಭವ್ಯವಾದ ಬಂಡೆಗಳ ಸಂಪೂರ್ಣ ಸಂಯೋಜನೆ ಮತ್ತು ವಿಶಿಷ್ಟ ರಚನೆ ಸ್ಪಷ್ಟವಾಗಿ ಗೋಚರಿಸುತ್ತದೆ. ಈ ದೃಶ್ಯಗಳು ಪ್ರವಾಸಿಗರನ್ನು ನಿಜವಾಗಿಯೂ ಹಂಪಿಗೆ ಭೇಟಿ ನೀಡಲು ಪ್ರೇರೇಪಿಸುತ್ತವೆ.

ಡ್ರೋನ್ ಫೋಟೋಗ್ರಫಿ ಸಾಮಾನ್ಯವಾದ ನೆಲಮಟ್ಟದ ಫೋಟೋಗಳು ನೀಡಲು ಸಾಧ್ಯವಾಗದ ವಿಶಿಷ್ಟ ದೃಶ್ಯಗಳನ್ನು ಒದಗಿಸುತ್ತದೆ. ಎತ್ತರದಿಂದ ತೆಗೆದ ಶಾಟ್‌ಗಳು ಪ್ರವಾಸಿ ಸ್ಥಳದ ವಿಶಾಲ ದೃಶ್ಯವನ್ನು, ಅದರ ಸುತ್ತಮುತ್ತಲಿನ ಭೂಪ್ರದೇಶವನ್ನು ಮತ್ತು ವಿನ್ಯಾಸವನ್ನು ಅದ್ಭುತವಾಗಿ ತೋರಿಸುತ್ತವೆ. ಉದಾಹರಣೆಗೆ, ಗೋಕರ್ಣದ ಓಂ ಬೀಚ್ ಅನ್ನು ನೆಲಮಟ್ಟದಿಂದ ಚಿತ್ರೀಕರಿಸಿದರೆ ಅದರ ಸಮುದ್ರ ತೀರ ಮತ್ತು ಮರಳು ಮಾತ್ರ ಕಾಣಿಸುತ್ತದೆ. ಆದರೆ ಡ್ರೋನ್ ಮೂಲಕ ಚಿತ್ರೀಕರಿಸಿದರೆ, ಅದು 'ಓಂ' ಆಕಾರದಲ್ಲಿರುವ ಬೀಚ್‌ನ ಸಂಪೂರ್ಣ ವಿನ್ಯಾಸವನ್ನು ಸ್ಪಷ್ಟವಾಗಿ ತೋರಿಸುತ್ತದೆ. ಇದು ಪ್ರವಾಸಿಗರನ್ನು ಆಕರ್ಷಿಸಲು ಬಹಳ ಪರಿಣಾಮಕಾರಿ.

ಡ್ರೋನ್‌ಗಳು ಹಲವು ಉಪಯೋಗಗಳನ್ನು ಹೊಂದಿದ್ದರೂ ಸಹ, ಕೆಲವು ದೇಶಗಳು ಭದ್ರತೆ ಮತ್ತು ಗೌಪ್ಯತೆಯ ದೃಷ್ಟಿಯಿಂದ ಅವುಗಳ ಬಳಕೆಯನ್ನು ನಿರ್ಬಂಧಿಸಿವೆ. ಮೊರಾಕೊ, ಈಜಿಪ್ಟ್, ಕ್ಯೂಬಾ, ಸೆನೆಗಲ್ ಸೇರಿದಂತೆ ಹಲವು ದೇಶಗಳು ಡ್ರೋನ್ ನ್ನು ನಿಷೇಧಿಸಿವೆ. ಭಾರತದಲ್ಲೂ ಡ್ರೋನ್ ಚಿತ್ರೀಕರಣಕ್ಕೆ ಹಲವು ಅಡ್ಡಿ-ಆತಂಕಗಳು. ಸುರಕ್ಷಿತವಾದ ಪ್ರದೇಶದಲ್ಲಿ ನೀವು ಡ್ರೋನ್ ಹಾರಿಸುತ್ತಿದ್ದರೂ, ಸಾಮಾನ್ಯ ಪೊಲೀಸ್ ಪೇದೆ ನಿಮ್ಮನ್ನು ಹೆದರಿಸಬಹುದು. ನಿಮ್ಮ ಮೇಲೆ ಕೇಸ್ ಹಾಕುವುದಾಗಿ ಬೆದರಿಸಬಹುದು. ಏನೂ ಇಲ್ಲದಿದ್ದರೂ ನಿಮಗೆ ಅನಗತ್ಯವಾಗಿ ಕಿರುಕುಳ ನೀಡಬಹುದು.

ಅಷ್ಟಕ್ಕೂ ಡ್ರೋನ್ ಬಳಕೆಯ ಬಗ್ಗೆ ಕಟ್ಟುನಿಟ್ಟಾದ ಕಾನೂನುಗಳನ್ನು ರೂಪಿಸಿದರೆ ತಪ್ಪೇನೂ ಇಲ್ಲ. ಆದರೆ ಅದನ್ನು ನಿಷೇಧಿಸುವುದು ಪ್ರವಾಸೋದ್ಯಮದ ದೃಷ್ಟಿಯಿಂದ ಮಾರಕವೇ. ರಕ್ಷಣಾ ಮತ್ತು ಭದ್ರತೆಯ ಕಾರಣಗಳಿಗಾಗಿ ಸರಕಾರ ಡ್ರೋನ್‌ಗಳನ್ನು ನಿಷೇಧಿಸುವುದು ಸಾಮಾನ್ಯ. ಪ್ರವಾಸೋದ್ಯಮಕ್ಕಿಂತ ದೇಶದ ರಕ್ಷಣೆ ಮತ್ತು ಭದ್ರತೆ ಮುಖ್ಯ ಎನ್ನುವುದರಲ್ಲಿ ಎರಡು ಮಾತಿಲ್ಲ. ಆದರೆ ಸೂಕ್ಷ್ಮ ಪ್ರದೇಶಗಳಲ್ಲಿ ಡ್ರೋನ್ ಹಾರಿಸಬೇಕು ಎಂದು ಎಷ್ಟೇ ಪ್ರಯತ್ನಪಟ್ಟರೂ ಅದು ಹಾರದಂತೆ ಮಾಡುವುದು ಸಾಧ್ಯವಿದೆ. ಆದರೆ ಸರಿಯಾದ ನಿಯಮಗಳು ಮತ್ತು ನಿಬಂಧನೆಗಳೊಂದಿಗೆ ಡ್ರೋನ್ ಬಳಕೆಯನ್ನು ಪ್ರೋತ್ಸಾಹಿಸಿದರೆ ಪ್ರವಾಸೋದ್ಯಮ ಕ್ಷೇತ್ರ ಮತ್ತಷ್ಟು ಅಭಿವೃದ್ಧಿ ಕಾಣುವುದರಲ್ಲಿ ಸಂದೇಹವೇ ಇಲ್ಲ.

ಯಾವುದೇ ಪ್ರವಾಸಿ ತಾಣದಲ್ಲಿ ಡ್ರೋನ್ ಗೆ ಅವಕಾಶವನ್ನು ನೀಡಿದರೆ, ಚಿಕ್ಕಾಸನ್ನೂ ನೀಡದೇ ಧಾರಾಳ ಪ್ರಚಾರ ಪಡೆಯಬಹುದು. 'ಮುಂಗಾರು ಮಳೆ' ಸಿನಿಮಾ ನಂತರ, ಕಳೆದ ಎರಡು-ಮೂರು ವರ್ಷಗಳಿಂದ ಜೋಗ ಜಲಪಾತ ಅತಿ ಹೆಚ್ಚು ಪ್ರವಾಸಿಗರನ್ನು ಆಕರ್ಷಿಸುತ್ತಿದ್ದರೆ ಅದಕ್ಕೆ ಡ್ರೋನ್ ಕಾರಣ ಎಂಬುದನ್ನು ಮರೆಯುವಂತಿಲ್ಲ. ಈ ದಿನಗಳಲ್ಲಿ ಡ್ರೋನ್ ಇಲ್ಲದೇ ಪ್ರವಾಸೋದ್ಯಮವನ್ನು ಉತ್ತೇಜಿಸುತ್ತೇವೆ ಎಂಬುದು ಸುಳ್ಳು. ಸರಿಯಾದ ನಿಯಮಾವಳಿಗಳನ್ನು ಪಾಲಿಸಿ ಮತ್ತು ವೃತ್ತಿಪರತೆಯಿಂದ ಡ್ರೋನ್ ಫೋಟೋಗ್ರಫಿಯನ್ನು ಬಳಸಿಕೊಂಡರೆ, ಇದು ಪ್ರವಾಸೋದ್ಯಮ ಕ್ಷೇತ್ರಕ್ಕೆ ಹೊಸ ಜೀವ ತುಂಬಬಲ್ಲದು. ಇದು ಕೇವಲ ಚಿತ್ರಗಳನ್ನು ತೆಗೆಯುವುದಲ್ಲ, ಬದಲಾಗಿ ಒಂದು ಸ್ಥಳದ ಕಥೆಯನ್ನು ಸಂಪೂರ್ಣವಾಗಿ ಹೊಸ ದೃಷ್ಟಿಕೋನದಿಂದ ಹೇಳುತ್ತದೆ. ಹೀಗಾಗಿ, ಪ್ರವಾಸೋದ್ಯಮದಲ್ಲಿ ಹೂಡಿಕೆ ಮಾಡುವವರಿಗೆ ಡ್ರೋನ್ ಫೋಟೋಗ್ರಫಿ ಒಂದು ಅತ್ಯುತ್ತಮ ಮತ್ತು ಲಾಭದಾಯಕ ಆಯ್ಕೆಯಾಗಿದೆ.
ಕರ್ನಾಟಕ ಪ್ರವಾಸೋದ್ಯಮ ಇಲಾಖೆ ಕೂಡ ಡ್ರೋನ್ ವಿಷಯದಲ್ಲಿ ಕಣ್ಣು ತೆರೆಯುವುದು ಒಳ್ಳೆಯದು.