ಲ್ಯಾಂಡಿಂಗ್‌ ಅಂದ್ರೆ...

ವಿಮಾನ ರನ್‌ವೇಯಲ್ಲಿ ಇಳಿಯುವುದು ಒಂದು ಕಲೆಯಂತೆ ಕಂಡರೂ, ಅದರ ಹಿಂದೆ ನಿಖರವಾದ ವೈಜ್ಞಾನಿಕ ತಂತ್ರಜ್ಞಾನ ಅಡಕವಾಗಿದೆ. ಈ ಸಂಪೂರ್ಣ ಪ್ರಕ್ರಿಯೆಯ ಮುಖ್ಯ ಉದ್ದೇಶವೆಂದರೆ ವಿಮಾನವನ್ನು ಸುರಕ್ಷಿತವಾಗಿ, ಸರಿಯಾದ ವೇಗದಲ್ಲಿ ಮತ್ತು ಸರಿಯಾದ ಕೋನದಲ್ಲಿ ರನ್‌ವೇಗೆ ಇಳಿಸುವುದು. ಈ ಕಾರ್ಯದಲ್ಲಿ ಇನ್‌ಸ್ಟ್ರುಮೆಂಟ್ ಲ್ಯಾಂಡಿಂಗ್ ಸಿಸ್ಟಮ್ (ILS) ಮತ್ತು ಡಿಸ್ಟೆ ಮೆಷರಿಂಗ್ ಇಕ್ವಿಪ್‌ಮೆಟ್ (DME)ಗಳು ಪ್ರಮುಖ ಪಾತ್ರ ವಹಿಸುತ್ತವೆ.

ಇವೆರಡನ್ನೂ ವಿಮಾನ ನಿಲ್ದಾಣದಲ್ಲಿ ಇರಿಸಿರುತ್ತಾರೆ. ರನ್‌ವೇಯ ಕೊನೆಯಲ್ಲಿ ಒಂದು ಆಂಟೆನಾ ಇರುತ್ತದೆ. ಇದು ವಿಮಾನಕ್ಕೆ ಸಮತಲವಾಗಿ (horizontal) ಮಾರ್ಗದರ್ಶನ ನೀಡುತ್ತವೆ. ಇದು ಎರಡು ರೇಡಿಯೋ ತರಂಗಗಳನ್ನು (radio waves) ಕಳುಹಿಸುತ್ತದೆ- ಒಂದು ರನ್‌ವೇಯ ಎಡಭಾಗಕ್ಕೆ ಮತ್ತು ಇನ್ನೊಂದು ಬಲ ಭಾಗಕ್ಕೆ. ವಿಮಾನವು ಸರಿಯಾದ ಮಧ್ಯರೇಖೆಯಲ್ಲಿ ಇದ್ದಾಗ, ಈ ಎರಡೂ ತರಂಗಗಳ ಸಿಗ್ನಲ್ ಸಾಮರ್ಥ್ಯ ಸಮನಾಗಿರುತ್ತದೆ.

ಒಂದು ವೇಳೆ ವಿಮಾನವು ಎಡಕ್ಕೆ ಅಥವಾ ಬಲಕ್ಕೆ ಸರಿದಾಗ, ಅದರ ಉಪಕರಣಗಳು ಸಿಗ್ನಲ್ ಸಾಮರ್ಥ್ಯದಲ್ಲಿನ ವ್ಯತ್ಯಾಸವನ್ನು ಗುರುತಿಸಿ ಪೈಲಟ್‌ಗೆ ತಿಳಿಸುತ್ತವೆ. ಹೀಗೆ, ಪೈಲಟ್ ವಿಮಾನವನ್ನು ನೇರ ರೇಖೆಗೆ ತರುತ್ತಾರೆ. ರನ್‌ವೇಯ ಪಕ್ಕದಲ್ಲಿರುವ ಮತ್ತೊಂದು ಆಂಟೆನಾ ಇನ್ನೊಂದು ಸಿಗ್ನಲ್ ಕಳುಹಿಸುತ್ತದೆ.

ಇದು ವಿಮಾನಕ್ಕೆ ಲಂಬವಾಗಿ (vertical) ಮಾರ್ಗದರ್ಶನ ನೀಡುತ್ತದೆ. ಅಂದರೆ ವಿಮಾನವು ಸರಿಯಾದ ಕೋನದಲ್ಲಿ ಕೆಳಗೆ ಇಳಿಯುವಂತೆ ನೋಡಿಕೊಳ್ಳುತ್ತದೆ. ಇದು ಸಹ ಎರಡು ರೇಡಿಯೋ ತರಂಗಗಳನ್ನು ಕಳುಹಿಸುತ್ತದೆ- ಒಂದು ಇಳಿಯುವ ಮಾರ್ಗದ ಮೇಲ್ಭಾಗಕ್ಕೆ ಮತ್ತು ಇನ್ನೊಂದು ಕೆಳಭಾಗಕ್ಕೆ. ವಿಮಾನವು ಸರಿಯಾದ ಇಳಿಯುವಿಕೆಯ ಕೋನದಲ್ಲಿದ್ದಾಗ ಈ ಸಿಗ್ನಲ್‌ಗಳು ಸಮನಾಗಿರುತ್ತವೆ.

ಇದನ್ನೂ ಓದಿ: ಪ್ರವಾಸ ಅಂದ್ರೆ ಕಣ್ಣು ತುಂಬಿಕೊಳ್ಳುವುದೊಂದೇ ಅಲ್ಲ, ಹೊಟ್ಟೆ ತುಂಬಿಕೊಳ್ಳೋದೂ ಹೌದು

ವಿಮಾನ ತುಂಬಾ ಎತ್ತರದಲ್ಲಿದ್ದರೆ ಅಥವಾ ತುಂಬಾ ಕೆಳಗಿದ್ದರೆ ಈ ಸಿಗ್ನಲ್ ಗಳಲ್ಲಿ ವ್ಯತ್ಯಾಸ ಉಂಟಾಗಿ ಪೈಲಟ್‌ಗೆ ಸೂಕ್ತ ಸೂಚನೆ ದೊರೆಯುತ್ತದೆ. ಸಾಮಾನ್ಯ ಗ್ಲೈಡ್ ಸ್ಲೋಪ್ ಕೋನ 3 ಡಿಗ್ರಿ ಇರುತ್ತದೆ, ಇದು ವಿಮಾನಕ್ಕೆ ಸುರಕ್ಷಿತವಾದ ಇಳಿಯುವಿಕೆಗೆ ಸೂಕ್ತವಾದ ಕೋನವಾಗಿದೆ. ಡಿಎಂಇ ಒಂದು ರೇಡಿಯೋ ಆಧಾರಿತ ವ್ಯವಸ್ಥೆಯಾಗಿದ್ದು, ಇದು ವಿಮಾನ ಮತ್ತು ರನ್‌ವೇಯ ನಡುವಿನ ನಿಖರ ಅಂತರವನ್ನು ಅಳೆಯುತ್ತದೆ.

ಇದು ಹೇಗೆ ಕಾರ್ಯ ನಿರ್ವಹಿಸುತ್ತದೆ ಎಂದರೆ, ವಿಮಾನದಲ್ಲಿರುವ ಡಿಎಂಇ ಇಂಟರೋಗೇಟರ್ ಒಂದು ರೇಡಿಯೋ ಸಿಗ್ನಲ್ (ಪಲ್ಸ್) ಕಳುಹಿಸುತ್ತದೆ. ಈ ಸಿಗ್ನಲ್ ರನ್ ವೇಯಲ್ಲಿರುವ ಡಿಎಂಇ ಟ್ರಾನ್ಸ್‌ಪಾಂಡರ್‌ಗೆ ತಲುಪಿದಾಗ, ಅದು ತಕ್ಷಣವೇ ಮತ್ತೊಂದು ಸಿಗ್ನಲ್ ಅನ್ನು ವಿಮಾನಕ್ಕೆ ಹಿಂತಿರುಗಿಸುತ್ತದೆ.

ವಿಮಾನದಲ್ಲಿರುವ ವ್ಯವಸ್ಥೆಯು ಸಿಗ್ನಲ್ ಹೋಗಲು ಮತ್ತು ಹಿಂದಿರುಗಲು ತೆಗೆದುಕೊಂಡ ಸಮಯವನ್ನು ಲೆಕ್ಕ ಹಾಕಿ, ಆ ದೂರವನ್ನು ಕಿಲೋಮೀಟರ್ ಅಥವಾ ನಾಟಿಕಲ್ ಮೈಲುಗಳಲ್ಲಿ ಪೈಲಟ್‌ಗೆ ತೋರಿಸುತ್ತದೆ. ಹಾಗಾದರೆ ಐಎಲಎಸ್ ಮತ್ತು ಡಿಎಂಇ ಒಟ್ಟಾಗಿ ಹೇಗೆ ಕೆಲಸ ಮಾಡುತ್ತವೆ? ಕೇವಲ ಐಎಲ್ಎಸ್ ಅನ್ನು ಬಳಸಿ ಇಳಿಯುವಾಗ, ಪೈಲಟ್‌ಗೆ ಕೇವಲ ಸರಿಯಾದ ದಿಕ್ಕು ಮತ್ತು ಕೋನದ ಬಗ್ಗೆ ಮಾಹಿತಿ ಸಿಗುತ್ತದೆ. ಆದರೆ ಆ ನಿರ್ದಿಷ್ಟ ಕೋನದಲ್ಲಿ ವಿಮಾನವು ಎಷ್ಟು ದೂರದಲ್ಲಿ ಇದೆ ಎಂಬ ಮಾಹಿತಿ ಇರುವುದಿಲ್ಲ.

ಇಲ್ಲಿ ಡಿಎಂಇ ಸಹಾಯಕ್ಕೆ ಬರುತ್ತದೆ. ಉದಾಹರಣೆಗೆ, ಪೈಲಟ್ ಒಂದು ನಿರ್ದಿಷ್ಟ ಎತ್ತರದಲ್ಲಿ (ಉದಾಹರಣೆಗೆ 1000 ಅಡಿ) ಇದ್ದಾಗ, ಡಿಎಂಇ ಸಹಾಯದಿಂದ ರನ್ ವೇಯಿಂದ ಅವರು ಎಷ್ಟು ದೂರದಲ್ಲಿದ್ದಾರೆ ಎಂಬುದನ್ನು ಪರಿಶೀಲಿಸಬಹುದು (ಉದಾಹರಣೆಗೆ 3 ಕಿಮೀ.). ಈ ಮಾಹಿತಿಯು ಪೈಲಟ್‌ಗೆ ವಿಮಾನದ ಇಳಿಯುವಿಕೆಯ ವೇಗ ಮತ್ತು ಕೋನ ಸರಿಯಾಗಿದೆಯೇ ಎಂದು ಖಚಿತ‌ ಪಡಿಸಿಕೊಳ್ಳಲು ಸಹಾಯ ಮಾಡುತ್ತದೆ.

ಈ ತಂತ್ರಜ್ಞಾನಗಳ ಸಂಯೋಜನೆಯಿಂದಾಗಿ, ಪ್ರತಿಕೂಲ ಹವಾಮಾನ, ಮಂಜು ಅಥವಾ ಕಡಿಮೆ ಗೋಚರ ಸನ್ನಿವೇಶ ಇದ್ದಾಗಲೂ ಪೈಲಟ್‌ಗಳು ವಿಮಾನವನ್ನು ಸುರಕ್ಷಿತವಾಗಿ ಇಳಿಸಲು ಸಾಧ್ಯವಾಗುತ್ತದೆ. ಇವುಗಳು ಆಧುನಿಕ ವಿಮಾನ ಯಾನದಲ್ಲಿ ಸುರಕ್ಷತೆಯ ಬೆನ್ನೆಲುಬಾಗಿ ಕಾರ್ಯನಿರ್ವಹಿಸುತ್ತವೆ.

ಐಎಲ್ಎಸ್ ಮತ್ತು ಡಿಎಂಇ ನಿಖರವಾದ ಮಾರ್ಗಗಳನ್ನು ರೂಪಿಸಿ, ವಿಮಾನವು ಸರಿಯಾದ ದಿಕ್ಕಿ ನಲ್ಲಿ, ಸರಿಯಾದ ಕೋನದಲ್ಲಿ ಮತ್ತು ಸರಿಯಾದ ದೂರದಲ್ಲಿ ಇರುವುದನ್ನು ಖಚಿತಪಡಿಸುತ್ತವೆ. ಇದು ವಿಶೇಷವಾಗಿ ಮಂದ ಬೆಳಕಿನ ಸಂದರ್ಭಗಳಲ್ಲಿ ಅತ್ಯಂತ ನಿರ್ಣಾಯಕವಾಗಿರುತ್ತದೆ. ಇಳಿಯುವುದು ಅಂದ್ರೆ ಕೇವಲ ‘ನೆಲ ಮುಟ್ಟುವುದು’ ಅಲ್ಲ. ಇದು ಸುರಕ್ಷತೆ ಮತ್ತು ನಿಖರತೆಯನ್ನು ಖಚಿತ ಪಡಿಸಲು, ಚಲನೆ ಮತ್ತು ತಂತ್ರಜ್ಞಾನ ಒಟ್ಟಾಗಿ ಕೆಲಸ ಮಾಡುವ ಒಂದು ಅದ್ಭುತ ಸಹಯೋಗ.