ಸಂಭವಿಸದ ವೈಫಲ್ಯಗಳಿಗೆ ಸಿದ್ಧತೆ

ವಿಮಾನಯಾನ ಎನ್ನುವುದು ಕೇವಲ ತಂತ್ರಜ್ಞಾನದ ಅದ್ಭುತವಲ್ಲ, ಅದು ಮನುಷ್ಯನ ಸಾಮರ್ಥ್ಯ ಮತ್ತು ನಿಖರತೆಯ ಪರಾಕಾಷ್ಠೆ. ‘ಪೈಲಟ್ʼಗಳು ಎಂದೂ ಸಂಭವಿಸದ ಮತ್ತು ಬಹುಶಃ ಎಂದಿಗೂ ಸಂಭವಿಸದ ವೈಫಲ್ಯಗಳಿಗಾಗಿ ತರಬೇತಿ ಪಡೆಯುತ್ತಾರೆ’ ಎಂಬ ಮಾತು ವಿಮಾನಯಾನ ಸುರಕ್ಷತೆಯ ಹಿಂದಿರುವ ತತ್ವವನ್ನು ಸಾರುತ್ತದೆ.

ಆಧುನಿಕ ವಿಮಾನಯಾನ ಕ್ಷೇತ್ರದಲ್ಲಿ ‘ಫ್ಲೈಟ್ ಸಿಮ್ಯುಲೇಟರ್‌ಗಳು’ ಕೇವಲ ಯಂತ್ರಗಳಲ್ಲ; ಅವು ಪೈಲಟ್‌ಗಳ ಜಾಣ್ಮೆ ಮತ್ತು ಧೈರ್ಯವನ್ನು ಒರೆಗೆ ಹಚ್ಚುವ ಪ್ರಯೋಗಾಲಯಗಳು. ಸಾಮಾನ್ಯವಾಗಿ ತರಬೇತಿ ಎಂದರೆ ಹಿಂದೆ ನಡೆದ ತಪ್ಪುಗಳಿಂದ ಕಲಿಯುವುದು ಎಂಬ ಅಭಿಪ್ರಾಯವಿದೆ. ಆದರೆ ವಿಮಾನಯಾನದಲ್ಲಿ ಇದು ಸಾಲದು. ಇಲ್ಲಿ ತರಬೇತಿಯು ಕೇವಲ ಅನುಭವದ ಮೇಲೆ ನಿಂತಿಲ್ಲ, ಬದಲಿಗೆ ಕಲ್ಪನೆಯ ಮೇಲೆ ನಿಂತಿದೆ.

ಆಧುನಿಕ ʻಸಿಮ್ಯುಲೇಟರ್ʼಗಳು ಕೇವಲ ನೈಜ ಅಪಘಾತದ ಸನ್ನಿವೇಶಗಳನ್ನು ಮರು ಸೃಷ್ಟಿಸುವುದಿಲ್ಲ. ಅವು ಊಹಿಸಲಾಗದ, ವಿಲಕ್ಷಣ ಮತ್ತು ಸಂಕೀರ್ಣ ವೈಫಲ್ಯಗಳನ್ನು ಸಹ ಸೃಷ್ಟಿಸುತ್ತವೆ. ವಿಮಾನದ ಒಂದು ಎಂಜಿನ್ ವಿಫಲವಾದರೆ ಏನು ಮಾಡಬೇಕೆಂದು ಪ್ರತಿಯೊಬ್ಬ ಪೈಲಟ್‌ಗೂ ತಿಳಿದಿರುತ್ತದೆ. ಆದರೆ, ಎಂಜಿನ್ ವೈಫಲ್ಯದ ಜತೆಗೆ ಹವಾಮಾನ ಕೆಟ್ಟದಾಗಿದ್ದು, ವಿಮಾನದ ಹೈಡ್ರಾಲಿಕ್ ವ್ಯವಸ್ಥೆಯೂ ಕೈಕೊಟ್ಟರೆ? ಇಂಥ ಸನ್ನಿವೇಶಗಳನ್ನು ‘ಕಾಂಪೌಂಡ್ ಫೈಲ್ಯೂರ್ಸ್’ ಎನ್ನಲಾಗುತ್ತದೆ. ಸಿಮ್ಯುಲೇಟರ್‌ಗಳಲ್ಲಿ ಇಂಥ ಪರಸ್ಪರ ಸಂಬಂಧವಿಲ್ಲದ ತಾಂತ್ರಿಕ ತೊಂದರೆಗಳನ್ನು ಒಟ್ಟಿಗೆ ನೀಡಲಾಗುತ್ತದೆ. ಇದು ಪೈಲಟ್‌ಗಳ ನಿರ್ಧಾರ ತೆಗೆದುಕೊಳ್ಳುವ ಸಾಮರ್ಥ್ಯವನ್ನು ಮತ್ತು ಒತ್ತಡದ ಸಂದರ್ಭದಲ್ಲಿ ಅವರು ಹೇಗೆ ಆದ್ಯತೆಗಳನ್ನು ನಿರ್ಧರಿಸುತ್ತಾರೆ ಎಂಬುದನ್ನು ಪರೀಕ್ಷಿಸುತ್ತದೆ.

ಇದನ್ನೂ ಓದಿ: ರೆಕ್ಕೆಗಳಲ್ಲೇಕೆ ಇಂಧನ ?

ಕೆಲವೊಮ್ಮೆ ಯಂತ್ರಗಳೂ ಗೊಂದಲಕ್ಕೊಳಗಾಗಬಹುದು. ವಿಮಾನದ ವೇಗವನ್ನು ತೋರಿಸುವ ಸೆನ್ಸರ್ ಒಂದು ರೀತಿ ತೋರಿಸಿದರೆ, ಎತ್ತರವನ್ನು ತೋರಿಸುವ ಸೆನ್ಸರ್ ಮತ್ತೊಂದು ರೀತಿ ತೋರಿಸಬಹುದು. ಇಂಥ ತಪ್ಪು ಮಾಹಿತಿಗಳು ಅಥವಾ ‘ಡಿಗ್ರೇಡೆಡ್ ಡೇಟಾ’ ನೀಡಿದಾಗ ಪೈಲಟ್ ತನ್ನ ಇಂದ್ರಿಯಗಳನ್ನು ನಂಬಬೇಕೋ ಅಥವಾ ಯಂತ್ರವನ್ನೋ? ಈ ಗೊಂದಲದ ಸಮಯದಲ್ಲಿ ಪರಿಸ್ಥಿತಿಯನ್ನು ವಿಶ್ಲೇಷಿಸುವ ಕಲೆಯನ್ನು ಸಿಮ್ಯುಲೇಟರ್‌ಗಳು ಕಲಿಸುತ್ತವೆ.

ಪೈಲಟ್‌ಗಳಿಗೆ ಇಂಥ ಕಠಿಣ ತರಬೇತಿ ನೀಡುವುದರ ಉದ್ದೇಶ ‘ಮುಂದೆ ಹೀಗೆಯೇ ಆಗುತ್ತದೆ’ ಎಂದು ಭವಿಷ್ಯ ನುಡಿಯುವುದಲ್ಲ. ಬದಲಿಗೆ, ‘ಏನೇ ಆದರೂ ಎದುರಿಸುವ ಸಾಮರ್ಥ್ಯ’ವನ್ನು ಬೆಳೆಸುವುದು. ವಿಪರೀತ ಒತ್ತಡದ ಸಮಯದಲ್ಲಿ ಮನುಷ್ಯನ ಮಿದುಳು ಕೆಲಸ ಮಾಡುವುದನ್ನು ನಿಲ್ಲಿಸಬಹುದು.

ತರಬೇತಿಯ ಮೂಲಕ ಪೈಲಟ್‌ಗಳು ಇಂಥ ತುರ್ತು ಪರಿಸ್ಥಿತಿಯಲ್ಲಿಯೂ ಶಾಂತವಾಗಿರಲು ಕಲಿಯುತ್ತಾರೆ. ಪ್ರತಿಯೊಂದು ಸಮಸ್ಯೆಗೆ ವಿಮಾನದಲ್ಲಿ ಒಂದು ಕೈಪಿಡಿ ಅಥವಾ ‘ಚೆಕ್‌ಲಿಸ್ಟ್’ ಇರುತ್ತದೆ. ಆದರೆ ಸಿಮ್ಯುಲೇಟರ್‌ಗಳಲ್ಲಿ ಯಾವುದೇ ಪುಸ್ತಕದಲ್ಲಿ ಇಲ್ಲದ ಸಮಸ್ಯೆಗಳನ್ನು ಸೃಷ್ಟಿಸಲಾಗುತ್ತದೆ. ಆಗ ಪೈಲಟ್ ತನ್ನ ಮೂಲಭೂತ ಜ್ಞಾನವನ್ನು ಬಳಸಿ ವಿಮಾನವನ್ನು ಸ್ಥಿರಗೊಳಿಸ ಬೇಕಾಗುತ್ತದೆ.

ತಾಂತ್ರಿಕತೆಗಿಂತ ಹೆಚ್ಚಾಗಿ ಇಲ್ಲಿ ಮನುಷ್ಯನ ಮಿತಿಗಳನ್ನು ಪರೀಕ್ಷಿಸಲಾಗುತ್ತದೆ. ದಣಿವು, ಗೊಂದಲ ಮತ್ತು ಸಂವಹನದ ಕೊರತೆಯನ್ನು ಹೇಗೆ ನೀಗಿಸಬೇಕು ಎಂಬುದೇ ಈ ತರಬೇತಿಯ ಸಾರ. ಅಂತಾರಾಷ್ಟ್ರೀಯ ವಿಮಾನಯಾನ ಸಂಸ್ಥೆಗಳ ನಿಯಮದಂತೆ, ಪೈಲಟ್ʼಗಳು ಈ ಕಠಿಣ ಪರೀಕ್ಷೆಗಳಲ್ಲಿ ಉತ್ತೀರ್ಣರಾಗುವುದು ಕಡ್ಡಾಯ. ವಿಮಾನವನ್ನು ಅದರ ಗರಿಷ್ಠ ಮಿತಿಯವರೆಗೆ ಕೊಂಡೊಯ್ದು ಪರೀಕ್ಷಿಸಲಾಗುತ್ತದೆ.

ಹಾಗೆಯೇ, ಆ ವಿಮಾನವನ್ನು ನಡೆಸುವ ಮನುಷ್ಯನನ್ನು ಸಹ ಅವನ ಸಾಮರ್ಥ್ಯದ ಗರಿಷ್ಠ ಮಿತಿಯವರೆಗೆ ಪರೀಕ್ಷೆಗೆ ಒಡ್ಡಲಾಗುತ್ತದೆ. ಹೆಚ್ಚಿನ ಈ ವೈಫಲ್ಯಗಳು ವಿಮಾನದ ಇಡೀ ಜೀವಿತಾವಧಿಯಲ್ಲಿ ಒಮ್ಮೆಯೂ ಸಂಭವಿಸದೇ ಇರಬಹುದು. ಆದರೆ, ‘ಲಕ್ಷದಂದು ಬಾರಿ’ ಅಂಥ ಘಟನೆ ಸಂಭವಿಸಿದರೂ, ಅಲ್ಲಿರುವ ನೂರಾರು ಪ್ರಯಾಣಿಕರ ಜೀವ ಉಳಿಸಲು ಪೈಲಟ್ ಸಿದ್ಧನಾಗಿರಬೇಕು.

ವಿಮಾನಯಾನ ಸುರಕ್ಷತೆಯು ಕೇವಲ ಉತ್ತಮ ಎಂಜಿನ್ʼಗಳ ಮೇಲೆ ನಿಂತಿಲ್ಲ, ಅದು ಪೈಲಟ್‌ಗಳ ಅಚಲವಾದ ಸಿದ್ಧತೆಯ ಮೇಲೆ ನಿಂತಿದೆ. ‘ನಮಗೆ ಗೊತ್ತಿಲ್ಲದ ವಿಷಯಗಳ ಬಗ್ಗೆ ನಾವು ಸಿದ್ಧರಾಗಿರ ಬೇಕು’ ಎಂಬುದು ಈ ತರಬೇತಿಯ ಮೂಲಮಂತ್ರ. ಸಿಮ್ಯುಲೇಟರ್ ಒಳಗೆ ಪೈಲಟ್ ಎದುರಿಸುವ ಪ್ರತಿಯೊಂದು ‘ಕೃತಕ ಸಂಕಷ್ಟ’ವೂ ನಿಜವಾದ ಆಕಾಶದಲ್ಲಿ ಲಕ್ಷಾಂತರ ಪ್ರಯಾಣಿಕರ ಪಾಲಿಗೆ ‘ಸುರಕ್ಷತೆಯ ಭರವಸೆ’ಯಾಗಿರುತ್ತದೆ.

ಪೈಲಟ್‌ಗಳು ಎಂದೂ ಬಾರದ ಬಿರುಗಾಳಿಗೆ ಸಿದ್ಧರಾಗುತ್ತಿರುತ್ತಾರೆ, ಏಕೆಂದರೆ ಸುರಕ್ಷತೆಯ ವಿಷಯ ದಲ್ಲಿ ‘ಅತಿ ಸಿದ್ಧತೆ’ ಎಂಬುದು ಯಾವುದೂ ಇಲ್ಲ.