ರನ್‌ ವೇ ಮೇಲಿನ ಗುರುತು

ನೀವು ಎಂದಾದರೂ ವಿಮಾನ ನಿಲ್ದಾಣದಲ್ಲಿರುವ ರನ್‌ವೇ ಮೇಲಿನ ಗುರುತು (ಮಾರ್ಕಿಂಗ್‌ಗಳು) ಗಳನ್ನು ಗಮನಿಸಿದ್ದೀರಾ? ರನ್ ವೇ ಎಂದರೆ ಕೇವಲ ಅಗಲವಾದ ಮತ್ತು ಉದ್ದವಾದ ಒಂದು ಆಸಾಲ್ಟ್‌ ರಸ್ತೆಯಲ್ಲ. ಇದು ಸುರಕ್ಷಿತ ಲ್ಯಾಂಡಿಂಗ್ ಮತ್ತು ಟೇಕಾಫ್‌ ಗಾಗಿ ಎಚ್ಚರಿಕೆಯಿಂದ ವಿನ್ಯಾಸಗೊಳಿಸಲಾದ ಒಂದು ರೋಡ್‌ಮ್ಯಾಪ್ ಆಗಿದೆ.

ರನ್‌ವೇಯ ಮೇಲಿನ ಪ್ರತಿಯೊಂದು ಗುರುತು ಒಂದು ಕಥೆಯನ್ನು ಹೇಳುತ್ತದೆ. ಕೆಲವು ಸೆಕೆಂಡ್‌ಗಳ ಅವಧಿಯಲ್ಲಿ ವಿಮಾನ ಚಾಲಕರಿಗೆ ಸ್ಪಷ್ಟ ಮಾರ್ಗದರ್ಶನ ನೀಡುತ್ತದೆ. ಈ ಗುರುತುಗಳು ವಿಮಾನ ಚಾಲಕರಿಗೆ ರನ್ ವೇಯನ್ನು ಸರಿಯಾಗಿ ಬಳಸಲು ಮತ್ತು ಸುರಕ್ಷಿತವಾಗಿ ಲ್ಯಾಂಡಿಂಗ್ ಮಾಡಲು ಸಹಾಯ ಮಾಡುತ್ತವೆ. ‌

ರನ್‌ವೇ ಆರಂಭದಲ್ಲಿ ಥ್ರೆಶೋಲ್ಡ್ ( Threshold) ಗುರುತು ಇರುತ್ತದೆ. ಇದು ರನ್‌ವೇಯ ಆರಂಭವನ್ನು ಸೂಚಿಸುವ ಗುರುತಾಗಿದೆ. ಇಲ್ಲಿ ವಿಮಾನದ ಚಕ್ರಗಳು ಮೊದಲು ನೆಲವನ್ನು ಸ್ಪರ್ಶಿಸುತ್ತವೆ. ಥ್ರೆಶೋಲ್ಡ ಒಂದು ದಪ್ಪ ಬಿಳಿರೇಖೆಯಾಗಿದ್ದು, ರನ್‌ವೇಯ ಸುರಕ್ಷಿತ ಭಾಗವನ್ನು ಸೂಚಿಸುತ್ತದೆ. ಈ ಗುರುತಿನ ಮುಂಭಾಗದಲ್ಲಿ ಯಾವುದೇ ಲ್ಯಾಂಡಿಂಗ್ ಅಥವಾ ಟೇಕಾಫ್‌ ಗೆ ಬಳಸಲಾಗುವುದಿಲ್ಲ, ಏಕೆಂದರೆ ಇದು ಸಾಮಾನ್ಯವಾಗಿ ರನ್‌ವೇ ಸುರಕ್ಷಿತ ಪ್ರದೇಶಕ್ಕೆ (Runway Safety Area- RSA ) ಒಳಗಿರುತ್ತದೆ. ‌

ಇದನ್ನೂ ಓದಿ: ಅತಿ ಹೆಚ್ಚು ಜನರಿದ್ದ ವಿಮಾನ

ಥ್ರೆಶೋಲ್ಡ್ ವಿಮಾನ ಚಾಲಕರಿಗೆ ಲ್ಯಾಂಡಿಂಗ್ ಆರಂಭವಾಗುವ ಸ್ಥಳವನ್ನು ಸ್ಪಷ್ಟವಾಗಿ ತಿಳಿಸುತ್ತದೆ. ನಂತರದ್ದು ರನ್‌ವೇ ಡಿಸಿಗ್ನೇಟರ್. ರನ್‌ವೇಯ ಒಂದು ತುದಿಯಲ್ಲಿ ದೊಡ್ಡ ಬಿಳಿ ಸಂಖ್ಯೆಗಳಿರುತ್ತವೆ. ಈ ಸಂಖ್ಯೆಯನ್ನು ರನ್‌ವೇಯ ಕಂಪಾಸ್ ದಿಕ್ಕಿನ ಆಧಾರದ ಮೇಲೆ ನಿರ್ಧರಿಸಲಾಗುತ್ತದೆ.

ಉದಾಹರಣೆಗೆ, ಒಂದು ರನ್‌ವೇ 360 ಡಿಗ್ರಿ (ಉತ್ತರ) ದಿಕ್ಕಿನಲ್ಲಿದ್ದರೆ, ಅದನ್ನು ‘36’ ಎಂದು ಗುರುತಿಸಲಾಗುತ್ತದೆ. ಒಂದು ರನ್‌ವೇಗೆ ಎರಡು ತುದಿಗಳಿರುವುದರಿಂದ, ಎರಡನೇ ತುದಿಯ ಸಂಖ್ಯೆಯು ವಿರುದ್ಧ ದಿಕ್ಕಿನಿಂದ 180 ಡಿಗ್ರಿ ವ್ಯತ್ಯಾಸವನ್ನು ಹೊಂದಿರುತ್ತದೆ. ಉದಾಹರಣೆಗೆ, ಒಂದು ರನ್‌ವೇ ‘09’ (ಪೂರ್ವ) ಆಗಿದ್ದರೆ, ಇನ್ನೊಂದು ತುದಿಯು ‘27’ (ಪಶ್ಚಿಮ) ಆಗಿರುತ್ತದೆ. ಒಂದು ವೇಳೆ ಒಂದೇ ದಿಕ್ಕಿನಲ್ಲಿ ಎರಡು ರನ್‌ವೇಗಳಿದ್ದರೆ, ಅವುಗಳನ್ನು ‘ L ’ (ಎಡ) ಅಥವಾ 'R' (ಬಲ) ಎಂದು ಗುರುತಿಸಲಾಗುತ್ತದೆ (ಉದಾಹರಣೆಗೆ 09L, 09R). ರನ್ ವೇಯ ಮಧ್ಯಭಾಗದಲ್ಲಿ ಒಂದು ಉದ್ದನೆಯ, ದಪ್ಪನೆಯ ಬಿಳಿರೇಖೆ ಇರುವುದನ್ನು ಗಮನಿಸಿರಬಹುದು.

ಇದನ್ನು ಸೆಂಟರ್‌ಲೈನ್ ಎಂದು ಕರೆಯಲಾಗುತ್ತದೆ. ಇದು ವಿಮಾನ ಚಾಲಕರಿಗೆ ರನ್‌ವೇಯ ಮಧ್ಯ ಭಾಗದಲ್ಲಿ ಚಲಿಸಲು ಮಾರ್ಗದರ್ಶನ ನೀಡುತ್ತದೆ, ವಿಶೇಷವಾಗಿ ಟೇಕಾಫ್ ಮತ್ತು ಲ್ಯಾಂಡಿಂಗ್ ಸಮಯದಲ್ಲಿ. ಈ ರೇಖೆಯು ವಿಮಾನವನ್ನು ಸರಿಯಾದ ದಿಕ್ಕಿನಲ್ಲಿ ಇಡಲು ಸಹಾಯ ಮಾಡುತ್ತದೆ, ವಿಶೇಷವಾಗಿ ಮಬ್ಬು ವಾತಾವರಣದಲ್ಲಿ. (ಉದಾಹರಣೆಗೆ, ಮಂಜು ಅಥವಾ ಮಳೆ). ಹಾಗೆ ಏಮಿಂಗ್ ಪಾಯಿಂಟ್ ಎಂಬುದು ರನ್‌ವೇಯ ಮೇಲಿನ ದೊಡ್ಡ, ಆಯತಾಕಾರದ ಬಿಳಿ ಗುರುತುಗಳಾಗಿದ್ದು, ಇವು ವಿಮಾನ ಚಾಲಕರಿಗೆ ಲ್ಯಾಂಡಿಂಗ್ ಸಮಯದಲ್ಲಿ ಗುರಿಯಾಗಿ ಕಾರ್ಯ ನಿರ್ವಹಿಸುತ್ತವೆ.

ಈ ಗುರುತುಗಳು ಸಾಮಾನ್ಯವಾಗಿ ಥ್ರೆಶೋಲ್ಡ್‌ನಿಂದ ಸುಮಾರು 1000-1500 ಅಡಿಗಳ ದೂರದಲ್ಲಿರುತ್ತದೆ. ವಿಮಾನ ಚಾಲಕರು ಈ ಗುರುತಿನ ಮೇಲೆ ತಮ್ಮ ವಿಮಾನವನ್ನು ಲ್ಯಾಂಡ್ ಮಾಡಲು ಗುರಿಯಿಡುತ್ತಾರೆ, ಇದರಿಂದ ವಿಮಾನವು ಸುರಕ್ಷಿತವಾಗಿ ಮತ್ತು ಸರಿಯಾದ ದೂರದಲ್ಲಿ ನೆಲವನ್ನು ಮುಟ್ಟುತ್ತದೆ. ಮುಂದಿನದು ಟಚ್ ಡೌನ್ ಝೋನ್ ಮಾರ್ಕಿಂಗ್ಸ್. ಇವು ಲ್ಯಾಂಡಿಂಗ್ ವಲಯ ಗುರುತುಗಳು.

ಟಚ್‌ಡೌನ್ ಝೋನ್ ಎಂಬುದು ರನ್‌ವೇಯ ಒಂದು ನಿರ್ದಿಷ್ಟ ವಲಯವಾಗಿದ್ದು, ಇಲ್ಲಿ ವಿಮಾನವು ಸುರಕ್ಷಿತವಾಗಿ ಲ್ಯಾಂಡ್ ಆಗಬೇಕು. ಈ ವಲಯವನ್ನು ಸೂಚಿಸಲು, ರನ್‌ವೇಯ ಮೇಲೆ ಒಂದರಿಂದ ಮೂರು ಬಿಳಿ ರೇಖೆಗಳಿರುತ್ತವೆ. ಈ ಗುರುತುಗಳು ಥ್ರೆಶೋಲ್ಡ್‌ನಿಂದ 500 ಅಡಿಗಳಿಂದ 3000 ಅಡಿಗಳವರೆಗೆ ವಿಸ್ತರಿಸಿರುತ್ತವೆ. ಈ ವಲಯದಲ್ಲಿ ಲ್ಯಾಂಡ್ ಆಗದಿದ್ದರೆ, ವಿಮಾನವು ರನ್‌ ವೇಯ ಉದ್ದಕ್ಕಿಂತ ಹೆಚ್ಚಿನ ದೂರವನ್ನು ಚಲಿಸಬಹುದು, ಇದು ಸುರಕ್ಷತೆಗೆ ಅಪಾಯ‌ವನ್ನುಂಟು ಮಾಡಬಹುದು.

ಹಾಗೇ ರನ್‌ವೇ ಮೇಲೆ ಎಡ್ಜ್‌ ಮಾರ್ಕಿಂಗ್ಸ್ (ಅಂಚಿನ ಗುರುತುಗಳು) ಗಳಿರುತ್ತವೆ. ಇವು ರನ್‌ವೇಯ ಎರಡೂ ಬದಿಗಳಲ್ಲಿರುವ ಕೆಂಪು ಅಥವಾ ಬಿಳಿ ರೇಖೆಗಳು. ಇವು ರನ್‌ವೇಯ ಬಳಕೆಯ ಅಗಲವನ್ನು ಸೂಚಿಸುತ್ತವೆ. ಈ ಗುರುತುಗಳು ವಿಮಾನ ಚಾಲಕರಿಗೆ ರನ್‌ವೇಯ ಸುರಕ್ಷಿತ ಅಗಲವನ್ನು ತಿಳಿಸುತ್ತವೆ ಮತ್ತು ಅಂಚಿನ ಆಚೆಗೆ ಚಲಿಸದಂತೆ ಎಚ್ಚರಿಕೆ ನೀಡುತ್ತವೆ. ಇವು ವಿಶೇಷವಾಗಿ ಮಬ್ಬು ವಾತಾವರಣದಲ್ಲಿ ಸಹಾಯಕ.