ಇಸ್ರೇಲಿಗಳ ಈ ಸಿನೆಮಾ ಮುಗಿಯಲು ಇನ್ನೆಷ್ಟು ಇಂಟರ್ವಲ್ಲುಗಳು ಬಾಕಿಯಿದೆಯೋ ?!

ನ್ಯಾಯಾಂಗ ಸುಧಾರಣೆಯ ಪ್ರಸ್ತಾಪವು ಇಸ್ರೇಲಿ ಸಮಾಜವನ್ನು ಹಿಂದೆಂದೂ ಕಾಣದ ರೀತಿಯಲ್ಲಿ ವಿಭಜಿಸಿದೆ. ಇದರ ಪರಿಣಾಮವಾಗಿ ದೇಶದಾದ್ಯಂತ ಬೃಹತ್ ಪ್ರತಿಭಟನೆಗಳು ನಡೆಯುತ್ತಿವೆ. 2023ರ ಆರಂಭದಿಂದ, ಪ್ರತಿವಾರ ಲಕ್ಷಾಂತರ ಇಸ್ರೇಲಿಗರು, ವಿಶೇಷವಾಗಿ ಟೆಲ್ ಅವಿವ್ ಮತ್ತು ಜೆರುಸಲೆಮ್ ನಗರಗಳಲ್ಲಿ ಬೀದಿಗಿಳಿದು ಪ್ರತಿಭಟನೆ ನಡೆಸುತ್ತಿದ್ದಾರೆ. ಇದನ್ನು ಇಸ್ರೇಲ್‌ನ ಇತಿಹಾಸದಲ್ಲಿಯೇ ಅತಿ ದೊಡ್ಡ ಪ್ರತಿಭಟನಾ ಚಳವಳಿ ಎಂದು ಪರಿಗಣಿಸಲಾಗಿದೆ.

ನಾನು ಕಳೆದ 15 ವರ್ಷಗಳ ಅವಧಿಯಲ್ಲಿ 11 ಸಲ ಇಸ್ರೇಲಿಗೆ ಬೇರೆ ಬೇರೆ ಸಂದರ್ಭ, ಕಾಲಘಟ್ಟ ಮತ್ತು ಉದ್ದೇಶಗಳನ್ನಿಟ್ಟುಕೊಂಡು ಭೇಟಿ ನೀಡಿದ್ದೇನೆ. ಪ್ರತಿ ಸಲವೂ ನನಗೆ ಬೇರೆ ಬೇರೆ ಇಸ್ರೇಲ್ ದರ್ಶನವಾಗಿದೆ. ಪ್ರತಿ ಬಾರಿಯೂ ನನಗೆ ಇಸ್ರೇಲ್ ಹೊಸ ಮುಖವನ್ನು ಪರಿಚಯಿಸಿದೆ. ಆದರೆ ಮೊನ್ನೆ ಹೋದಾಗಿನ ಪರಿಸ್ಥಿತಿಯೇ ಸಂಪೂರ್ಣ ಭಿನ್ನ.

2010ರಿಂದ 2015ರವರೆಗಿನ ಅವಧಿಯಲ್ಲಿ ಇಸ್ರೇಲ್‌ನಲ್ಲಿ ಇನ್ನೂ ಮಧ್ಯಮಪಂಥೀಯ, ತಾತ್ಕಾಲಿಕ ಶಾಂತಿ ಸಂವಾದದ ಭರವಸೆಗಳ ಮಾತುಗಳು ಕೇಳಿಸುತ್ತಿದ್ದವು. ಪ್ರಧಾನಿ ಬೆಂಜಮಿನ್ ನೆತನ್ಯಾಹು ನೇತೃತ್ವದಲ್ಲಿ ದೀರ್ಘ ಆಡಳಿತ ಪ್ರಾರಂಭವಾಗಿದ್ದರೂ, ಅಂತಾರಾಷ್ಟ್ರೀಯ ಒತ್ತಡದ ನಡುವೆ ಶಾಂತಿ ಕುರಿತು ಮಾತುಕತೆ ನಡೆಯುತ್ತಿತ್ತು. ಈ ಅವಧಿಯಲ್ಲಿ ನೆತನ್ಯಾಹು ಪ್ರಧಾನಿಯಾಗಿ ತಮ್ಮ ದೀರ್ಘ ಆಡಳಿತವನ್ನು ಸ್ಥಾಪಿಸಿದರು.

ಅಂತಾರಾಷ್ಟ್ರೀಯ ಸಮುದಾಯ (ಮುಖ್ಯವಾಗಿ ಅಮೆರಿಕ, ಯುರೋಪ್) ‘ದ್ವಿರಾಷ್ಟ್ರೀಯ ಪರಿಹಾರ’ದ ( Two-State Solution) ಬಗ್ಗೆ ಒತ್ತಡ ನೀಡುತ್ತಿತ್ತು. ಪ್ಯಾಲೆಸ್ತೀಯನ್ ಪ್ರಾಧಿಕಾರ (ಮಹಮದ್ ಅಬ್ಬಾಸ್ ನೇತೃತ್ವ) ಜತೆ ಮಾತುಕತೆ ನಡೆದರೂ, ಗಡಿಭಾಗಗಳು, ವಸತಿ ನಿರ್ಮಾಣಗಳು ಹಾಗೂ ಸುರಕ್ಷತಾ ವಿಚಾರಗಳಲ್ಲಿ ಯಾವುದೇ ಸ್ಪಷ್ಟ ಮುನ್ನಡೆ ಇರಲಿಲ್ಲ.

ಇಸ್ರೇಲ್ ಒಳಗೆ ಜನತೆ ಇನ್ನೂ ಶಾಂತಿಯಾಸೆಯಲ್ಲಿದ್ದರೂ, ಭದ್ರತೆ ಮುಖ್ಯ ಎಂಬ ಭಾವನೆ ಬಲವಾಗಿತ್ತು. ಹೀಗಾಗಿ, ಹೊರಗೆ ‘ಶಾಂತಿ ಮಾತುಕತೆ’ ಮುಖವಾಡ, ಒಳಗೆ ‘ಭದ್ರತಾ ಕಟ್ಟುನಿಟ್ಟು’ ಎಂಬ ದ್ವಂದ್ವ ಪರಿಸ್ಥಿತಿ ನೆಲೆಸಿತ್ತು. ಮುಂದಿನ ಐದು ವರ್ಷಗಳಲ್ಲಿ (2015-2020) ಬಲ ಪಂಥೀಯ ರಾಜಕೀಯ ಬಲ ಹೆಚ್ಚಾಗಿ, ಪ್ಯಾಲೆಸ್ತೀನಿಯನ್ ವಿಷಯದಲ್ಲಿ ಕಠಿಣ ನಿಲುವು ತೆಗೆದುಕೊಳ್ಳಲಾಯಿತು.

ಇದನ್ನೂ ಓದಿ: ಸೀಟ್‌ ಬೆಲ್ಟ್‌ ಏಕೆ ಕಟ್ಟಿಕೊಳ್ಳಬೇಕು ?

ಜೆರುಸಲೆಮ್ ಅನ್ನು ‘ಅವಿಭಾಜ್ಯ ರಾಜಧಾನಿ’ ಎಂದು ಘೋಷಿಸುವಂತೆ ಧೈರ್ಯಶಾಲಿ ನಿರ್ಧಾರಗಳು ಬಂದವು. 2017-18ರಲ್ಲಿ ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಜೆರುಸಲೆಮ್ ಅನ್ನು ಇಸ್ರೇಲ್‌ ನ ರಾಜಧಾನಿ ಎಂದು ಅಽಕೃತವಾಗಿ ಗುರುತಿಸಿ, ರಾಯಭಾರಿ ಕಚೇರಿಯನ್ನು ಅಲ್ಲಿಗೆ ಸ್ಥಳಾಂತರಿಸಿದರು.

ಇದನ್ನು ನೆತನ್ಯಾಹು ತಮ್ಮ ದೊಡ್ಡ ಜಯವೆಂದು ತೋರಿಸಿಕೊಂಡರು. ವೆಸ್ಟ್ ಬ್ಯಾಂಕ್‌ನಲ್ಲಿ ಹೊಸ ವಸತಿಗಳು ( settlements) ಹೆಚ್ಚಾಗಿ‌ ನಿರ್ಮಿಸಲ್ಪಟ್ಟವು. ಇದು ಅಂತಾರಾಷ್ಟ್ರೀಯ ಸಮುದಾಯದಲ್ಲಿ ಆಕ್ರೋಶ ಹುಟ್ಟಿಸಿದರೂ, ಇಸ್ರೇಲ್ ಒಳಗೆ ಬಲಪಂಥೀಯರಿಗೆ ಹೆಚ್ಚು ಬೆಂಬಲ ಒದಗಿಸಿತು. ರಾಷ್ಟ್ರಭಾವನೆ ಗಟ್ಟಿಯಾಯಿತು. ಆದರೆ ಅರಬ್ ನಾಗರಿಕರು ಹಾಗೂ ಪ್ಯಾಲೆಸ್ತೀನಿಯನ್ ಪ್ರದೇಶಗಳೊಂದಿಗೆ ಘರ್ಷಣೆ ಗಾಢವಾಯಿತು.

ಮುಂದಿನ ಮೂರು ವರ್ಷ (2021-2023) ಅಸ್ಥಿರ ರಾಜಕೀಯ, ಕೋವಿಡ್ ಮತ್ತು ಸಂಘರ್ಷಗಳ ಕಾಲ. ಕೋವಿಡ್ ಸಮಯದಲ್ಲಿ ಇಸ್ರೇಲ್ ಪ್ರಥಮ ರಾಷ್ಟ್ರಗಳಲ್ಲಿ ಒಂದಾಗಿ ವೇಗವಾಗಿ ಲಸಿಕೆ ನೀಡುವ ಮೂಲಕ ಜಗತ್ತಿನ ಗಮನ ಸೆಳೆಯಿತು. ಆದರೆ ಆರ್ಥಿಕ ಹೊರೆ ಮತ್ತು ಸಮಾಜದ ಅಸಮತೋಲನ ಹೆಚ್ಚಿತು.

ರಾಜಕೀಯ ಅಸ್ಥಿರತೆ ತೀವ್ರವಾಯಿತು- ಒಂದೇ ವರ್ಷದಲ್ಲಿ ಮೂರೂ ಚುನಾವಣೆಗಳು ನಡೆದವು. ಸ್ಪಷ್ಟ ಬಹುಮತ ಯಾರಿಗೂ ಸಿಗಲಿಲ್ಲ. ಕೆಲ ಸಮಯಕ್ಕೆ ‘ಬದಲಾವಣೆ ಸರಕಾರ’ (Bennett-Lapid ಒಕ್ಕೂಟ) ನೆತನ್ಯಾಹು ಅವರನ್ನು ಅಧಿಕಾರದಿಂದ ಕೆಳಗಿಳಿಸಿತು. ಆದರೆ ಅದು ಕೇವಲ ಒಂದು ವರ್ಷದೊಳಗೆ ಬದಲಾಯಿತು. ಗಾಜಾದಲ್ಲಿ ಹಮಾಸ್ ಜತೆ ಮತ್ತೆ ದೊಡ್ಡ ಮಟ್ಟದ ಘರ್ಷಣೆಗಳು ಉಂಟಾದವು. ಇದರಿಂದ ಅನಿಶ್ಚಿತತೆ ಮುಂದುವರಿಯಿತು. ಶಾಂತಿ ದೂರವಾಯಿತು. ರಾಜಕೀಯ ಸ್ಥಿರತೆ ಇಲ್ಲವಾಗಿ ಭದ್ರತೆಯೇ ದೊಡ್ಡ ಪ್ರಶ್ನೆಯಾಗಿ ಕಾಡಲಾರಂಭಿಸಿತು. 2023ರ ನಂತರದ ಮೂರು ವರ್ಷಗಳು ಇಸ್ರೇಲ್ ಇತಿಹಾದಲ್ಲಿ ನಿರ್ಣಾಯಕ. ನ್ಯಾಯಾಂಗ ಸುಧಾರಣೆ, ಬೀದಿ ಪ್ರತಿಭಟನೆಗಳು, ಗಾಜಾ ಯುದ್ಧ ಇಸ್ರೇಲ್ ಅನ್ನು ಕಲ್ಲವಿಲಗೊಳಿಸಿರುವುದು ಸುಳ್ಳಲ್ಲ.

ಇಸ್ರೇಲ್‌ನ ರಾಜಕೀಯ ಬಿಕ್ಕಟ್ಟಿನ ಕೇಂದ್ರಬಿಂದು ಪ್ರಧಾನಿ ಬೆಂಜಮಿನ್ ನೆತನ್ಯಾಹು ಅವರ ನೇತೃತ್ವದ ಬಲಪಂಥೀಯ ಸಮ್ಮಿಶ್ರ ಸರಕಾರದ ‘ನ್ಯಾಯಾಂಗ ಸುಧಾರಣೆ’ (Judicial Reform) ಪ್ರಸ್ತಾಪ. ನೆತನ್ಯಾಹು ಮತ್ತೆ ಅಧಿಕಾರಕ್ಕೆ ಬಂದ ಮೇಲೆ ‘ನ್ಯಾಯಾಂಗ ಸುಧಾರಣೆ’ ಹೆಸರಿನಲ್ಲಿ ಸುಪ್ರೀಂಕೋರ್ಟ್ ಶಕ್ತಿಯನ್ನು ಕಡಿಮೆ ಮಾಡುವ ಪ್ರಯತ್ನ ಮಾಡಿದರು. 2022ರ ಕೊನೆಯಲ್ಲಿ ಅಧಿಕಾರಕ್ಕೆ ಬಂದ ನೆತನ್ಯಾಹು ಸರಕಾರ, ಅವರ ಲಿಕುಡ್ ಪಕ್ಷದ ಜತೆಗೆ ತೀವ್ರ ಬಲಪಂಥೀಯ ಮತ್ತು ಅಲ್ಟ್ರಾ-ಆರ್ಥೊಡಾಕ್ಸ್ (ಧಾರ್ಮಿಕ) ಪಕ್ಷಗಳು ಸೇರಿಕೊಂಡಿವೆ. ಈ ಪಕ್ಷಗಳ ಸೈದ್ಧಾಂತಿಕ ನಿಲುವುಗಳು ಪ್ರಸ್ತಾಪಿತ ಸುಧಾರಣೆಗಳ ಹಿಂದಿನ ಪ್ರಮುಖ ಪ್ರೇರಣೆಯಾಗಿವೆ. ಈ ಕಾನೂನುಗಳ ಮುಖ್ಯ ಗುರಿ, ದೇಶದ ಸುಪ್ರೀಂ ಕೋರ್ಟ್‌ನ ಅಧಿಕಾರವನ್ನು ಮೊಟಕುಗೊಳಿಸುವುದಾಗಿದೆ ಎಂದು ಹೇಳಲಾಗುತ್ತಿದೆ.

ಸರಕಾರದ ಪ್ರಸ್ತಾಪಗಳ ಪ್ರಕಾರ, ನ್ಯಾಯಾಧೀಶರ ನೇಮಕಾತಿಯಲ್ಲಿ ರಾಜಕಾರಣಿಗಳಿಗೆ ಹೆಚ್ಚಿನ ನಿಯಂತ್ರಣ ನೀಡುವುದು, ಸಂಸತ್ತು (Knesset) ಅಂಗೀಕರಿಸಿದ ಕಾನೂನುಗಳನ್ನು ಅಸಿಂಧುಗೊಳಿಸುವ ಸುಪ್ರೀಂ ಕೋರ್ಟ್‌ನ ಸಾಮರ್ಥ್ಯವನ್ನು ಸೀಮಿತಗೊಳಿಸುವುದು ಮುಖ್ಯವಾಗಿವೆ.

ಸರಕಾರದವಾದವೇನೆಂದರೆ, ಚುನಾಯಿತರಾಗದ ನ್ಯಾಯಾಧೀಶರು, ಚುನಾಯಿತ ಸರಕಾರದ ನೀತಿಗಳಲ್ಲಿ ಹೆಚ್ಚು ಹಸ್ತಕ್ಷೇಪ ಮಾಡುತ್ತಿದ್ದಾರೆ ಮತ್ತು ಪ್ರಜಾಪ್ರಭುತ್ವದಲ್ಲಿ ಸಂಸತ್ತೇ ಸರ್ವೋಚ್ಚ ವಾಗಿರಬೇಕು ಎಂಬುದು. ವಿರೋಧಿಗಳ ವಾದವೇನೆಂದರೆ, ‘ಇದು ಪ್ರಜಾಪ್ರಭುತ್ವದ ಮೇಲಿನ ನೇರ ದಾಳಿ. ನ್ಯಾಯಾಂಗದ ಸ್ವಾತಂತ್ರ್ಯವನ್ನು ನಾಶಪಡಿಸಿ, ಅಧಿಕಾರವನ್ನು ಒಂದೇ ಕಡೆ ಕೇಂದ್ರೀಕರಿಸುವ ಹುನ್ನಾರ.ಇದು ಇಸ್ರೇಲ್ ಅನ್ನು ಸರ್ವಾಧಿಕಾರದತ್ತ ಕೊಂಡೊಯ್ಯಬಹುದು’ ಎಂಬುದು. ಇದಕ್ಕೆ ಕಾನೂನು ತಜ್ಞರು ಮತ್ತು ನಾಗರಿಕರು ದನಿಗೂಡಿಸಿದ್ದಾರೆ. ನ್ಯಾಯಾಂಗ ಸುಧಾರಣೆಯ ಪ್ರಸ್ತಾಪವು ಇಸ್ರೇಲಿ ಸಮಾಜವನ್ನು ಹಿಂದೆಂದೂ ಕಾಣದ ರೀತಿಯಲ್ಲಿ ವಿಭಜಿಸಿದೆ. ಇದರ ಪರಿಣಾಮವಾಗಿ ದೇಶದಾದ್ಯಂತ ಬೃಹತ್ ಪ್ರತಿಭಟನೆಗಳು ನಡೆಯುತ್ತಿವೆ.

2023ರ ಆರಂಭದಿಂದ, ಪ್ರತಿವಾರ ಲಕ್ಷಾಂತರ ಇಸ್ರೇಲಿಗರು, ವಿಶೇಷವಾಗಿ ಟೆಲ್ ಅವಿವ್ ಮತ್ತು ಜೆರುಸಲೆಮ್ ನಗರಗಳಲ್ಲಿ ಬೀದಿಗಿಳಿದು ಪ್ರತಿಭಟನೆ ನಡೆಸುತ್ತಿದ್ದಾರೆ. ಇದನ್ನು ಇಸ್ರೇಲ್‌ನ ಇತಿಹಾಸದಲ್ಲಿಯೇ ಅತಿ ದೊಡ್ಡ ಪ್ರತಿಭಟನಾ ಚಳವಳಿ ಎಂದು ಪರಿಗಣಿಸಲಾಗಿದೆ. ಈ ಬಿಕ್ಕಟ್ಟು ಇಸ್ರೇಲಿ ಸಮಾಜದೊಳಗಿನ ಹಳೆಯ ಬಿರುಕುಗಳನ್ನು ಮತ್ತಷ್ಟು ಆಳವಾಗಿಸಿದೆ.

ಪ್ರತಿಭಟನಾಕಾರರಲ್ಲಿ ಹೆಚ್ಚಿನವರು ಜಾತ್ಯತೀತ, ಉದಾರವಾದಿ ಮತ್ತು ಮಧ್ಯಮ ವರ್ಗದವರಾಗಿದ್ದಾರೆ. ಇವರು ದೇಶವು ಧಾರ್ಮಿಕ ಮೂಲಭೂತವಾದದತ್ತ ಸಾಗುತ್ತಿದೆ ಎಂದು ಭಯಪಡುತ್ತಾರೆ. ಮತ್ತೊಂದೆಡೆ, ಸರಕಾರದ ಬೆಂಬಲಿಗರಲ್ಲಿ ಅಲ್ಟ್ರಾ-ಆರ್ಥೊಡಾಕ್ಸ್ ಮತ್ತು ರಾಷ್ಟ್ರೀಯವಾದಿ - ಧಾರ್ಮಿಕ ಗುಂಪುಗಳು ಪ್ರಮುಖವಾಗಿವೆ.

ಉದಾರವಾದಿ ನಗರ ಪ್ರದೇಶಗಳು ಮತ್ತು ಸಂಪ್ರದಾಯವಾದಿ ಗ್ರಾಮೀಣ ಅಥವಾ ವಸಾಹತು ಪ್ರದೇಶಗಳ ನಡುವೆ ಕಂದಕ ಹೆಚ್ಚಾಗಿದೆ. ಈ ಬಿಕ್ಕಟ್ಟಿನ ಅತ್ಯಂತ ಗಂಭೀರ ಪರಿಣಾಮವೆಂದರೆ, ಅದು ಇಸ್ರೇಲ್‌ನ ಸೇನೆಯ ( IDF) ಮೇಲೆ ಬೀರಿದ ಪ್ರಭಾವ. ಸಾವಿರಾರು ಮೀಸಲು ಸೈನಿಕರು, ವಿಶೇಷ ವಾಗಿ ವಾಯುಪಡೆಯ ಪೈಲಟ್ ಗಳು, ಗುಪ್ತಚರ ಅಧಿಕಾರಿಗಳು ಮತ್ತು ವಿಶೇಷ ಪಡೆಗಳ ಸೈನಿಕರು, ‘ಪ್ರಜಾಪ್ರಭುತ್ವವಲ್ಲದ ಸರಕಾರದ ಅಡಿಯಲ್ಲಿ ನಾವು ಸೇವೆ ಸಲ್ಲಿಸುವುದಿಲ್ಲ’ ಎಂದು ಹೇಳಿ ಸ್ವಯಂ ಪ್ರೇರಿತ ಸೇವೆಗೆ ಹಾಜರಾಗಲು ನಿರಾಕರಿಸುತ್ತಿದ್ದಾರೆ.

ಇದು ದೇಶದ ರಾಷ್ಟ್ರೀಯ ಭದ್ರತೆಯ ಬಗ್ಗೆ ಗಂಭೀರ ಕಳವಳವನ್ನು ಸೃಷ್ಟಿಸಿದೆ. ರಾಜಕೀಯ ಅಸ್ಥಿರತೆಯು ದೇಶದ ಆರ್ಥಿಕತೆಯ ಮೇಲೆ ನಕಾರಾತ್ಮಕ ಪರಿಣಾಮ ಬೀರಿದೆ. ಹೈಟೆಕ್ ಉದ್ಯಮ ಇಸ್ರೇಲ್‌ನ ಆರ್ಥಿಕತೆಯ ಬೆನ್ನೆಲುಬಾಗಿದ್ದು, ಈ ಕ್ಷೇತ್ರದ ಹಲವಾರು ಕಂಪನಿಗಳು ಮತ್ತು ಹೂಡಿಕೆದಾರರು ದೇಶದಿಂದ ತಮ್ಮ ಹಣವನ್ನು ಹಿಂಪಡೆಯುವ ಅಥವಾ ಬೇರೆಡೆಗೆ ಸ್ಥಳಾಂತರಿ‌ಸುವ ಬಗ್ಗೆ ಮಾತನಾಡುತ್ತಿದ್ದಾರೆ.

ಇದು ದೇಶದ ಕ್ರೆಡಿಟ್ ರೇಟಿಂಗ್ ಮತ್ತು ವಿದೇಶಿ ಹೂಡಿಕೆಯ ಮೇಲೆ ಪರಿಣಾಮ ಬೀರಿದೆ. ಇನ್ನೊಂದೆ‌ಡೆ, ಆಂತರಿಕ ಬಿಕ್ಕಟ್ಟಿನ ನಡುವೆಯೇ, ಇಸ್ರೇಲ್ ಮತ್ತು ಪ್ಯಾಲೆಸ್ತೀನ್ ನಡುವಿನ ಸಂಘರ್ಷವೂ ತೀವ್ರಗೊಂಡಿದೆ. 2023ರ ಅಕ್ಟೋಬರ್‌ನಿಂದ ಗಾಜಾ ಯುದ್ಧ ತೀವ್ರಗೊಂಡು ಇವತ್ತಿನ ತನಕವೂ ಮುಂದುವರಿದಿದೆ. ಇದು ಇಸ್ರೇಲ್ ಇತಿಹಾಸದಲ್ಲಿಯೇ ಅತಿ ದೀರ್ಘಾವಧಿಯ ಯುದ್ಧ. ಪ್ರಸ್ತುತ ಸರಕಾರದಲ್ಲಿರುವ ತೀವ್ರ ಬಲಪಂಥೀಯ ಸಚಿವರು, ವೆಸ್ಟ್ ಬ್ಯಾಂಕ್‌ನಲ್ಲಿ (West Bank) ಯಹೂದಿ ವಸಾಹತುಗಳನ್ನು ( Settlements ) ವಿಸ್ತರಿಸುವುದನ್ನು ಬಲವಾಗಿ ಪ್ರತಿಪಾದಿಸುತ್ತಾರೆ. ಈ ನೀತಿ ಗಳಿಂದಾಗಿ ವೆಸ್ಟ್ ಬ್ಯಾಂಕ್‌ನಲ್ಲಿ ಇಸ್ರೇಲಿ ಸೇನೆಯ ದಾಳಿಗಳು, ಪ್ಯಾಲೆಸ್ತೀನಿಯರ ಮೇಲಿನ ವಸಾಹತುಗಾರರ ಹಿಂಸಾಚಾರ ಮತ್ತು ಪ್ರತಿಯಾಗಿ ಪ್ಯಾಲೆಸ್ತೀನಿಯರ ದಾಳಿಗಳು ಹೆಚ್ಚಾಗಿವೆ.

ಈ ಮಧ್ಯೆ ಗಾಜಾ ಪಟ್ಟಿಯಲ್ಲಿ ಹಮಾಸ್ ಜತೆಗಿನ ಸಂಘರ್ಷ ಮತ್ತು ಅಲ್ಲಿನ ಮಾನವೀಯ ಬಿಕ್ಕಟ್ಟು ಹಿಂದೆಂದಿಗಿಂತ ಉಲ್ಬಣಿಸಿದೆ. 2023ರ ಅಕ್ಟೋಬರ್ 7ರ ದಾಳಿಯ ನಂತರ ಆರಂಭವಾದ ಯುದ್ಧವು ದೀರ್ಘಕಾಲ ಮುಂದುವರಿದಿದ್ದು, ಒತ್ತೆಯಾಳುಗಳ ಬಿಡುಗಡೆ ಮತ್ತು ಕದನ ವಿರಾಮದ ಮಾತುಕತೆ ಗಳು ಪದೇ ಪದೆ ವಿಫಲವಾಗುತ್ತಿವೆ. ಇದು ನೆತನ್ಯಾಹು ಸರಕಾರದ ಮೇಲೆ ದೇಶೀಯವಾಗಿ ಮತ್ತು ಅಂತಾರಾಷ್ಟ್ರೀಯವಾಗಿ ಒತ್ತಡವನ್ನು ಹೆಚ್ಚಿಸಿದೆ.

ಇಸ್ರೇಲ್‌ನ ಆಂತರಿಕ ಬಿಕ್ಕಟ್ಟು ಅದರ ಅಂತಾರಾಷ್ಟ್ರೀಯ ಸಂಬಂಧಗಳ ಮೇಲೂ ಪರಿಣಾಮ ಬೀರಿದೆ. ಇಸ್ರೇಲ್‌ನ ಆಪ್ತಮಿತ್ರ ರಾಷ್ಟ್ರವಾದ ಅಮೆರಿಕ, ನ್ಯಾಯಾಂಗ ಸುಧಾರಣೆಯ ಬಗ್ಗೆ ಮತ್ತು ಪ್ರಜಾಸತ್ತಾತ್ಮಕ ಮೌಲ್ಯಗಳ ಕುಸಿತದ ಬಗ್ಗೆ ಕಳವಳ ವ್ಯಕ್ತಪಡಿಸಿದೆ. ಇದು ಎರಡೂ ದೇಶಗಳ ನಡುವೆ ಸ್ವಲ್ಪ ಮಟ್ಟಿನ ರಾಜತಾಂತ್ರಿಕ ಭಿನ್ನಾಭಿಪ್ರಾಯಕ್ಕೆ ಕಾರಣವಾಗಿದೆ. ಜಗತ್ತಿನಾದ್ಯಂತ ಇಸ್ರೇಲ್ ಅನ್ನು ಮಧ್ಯಪ್ರಾಚ್ಯದ ಏಕೈಕ ಸ್ಥಿರ ಪ್ರಜಾಪ್ರಭುತ್ವ ಎಂದು ನೋಡಲಾಗುತ್ತಿತ್ತು. ಆದರೆ, ಪ್ರಸಕ್ತ ಬಿಕ್ಕಟ್ಟು ಈ ಚಿತ್ರಣಕ್ಕೆ ಧಕ್ಕೆ ತಂದಿದೆ.

ಒಟ್ಟಾರೆಯಾಗಿ, ಇಸ್ರೇಲ್ ಒಂದು ಐತಿಹಾಸಿಕ ಮತ್ತು ನಿರ್ಣಾಯಕ ಘಟ್ಟದಲ್ಲಿದೆ. ನ್ಯಾಯಾಂಗ ಸುಧಾರಣೆಯ ಸುತ್ತಲಿನ ಹೋರಾಟವು ಕೇವಲ ಕಾನೂನಿನ ಬಗ್ಗೆ ಅಲ್ಲ, ಬದಲಾಗಿ ಅದು ದೇಶದ ಭವಿಷ್ಯದ ಸ್ವರೂಪ, ಅದರ ಪ್ರಜಾಸತ್ತಾತ್ಮಕ ಮತ್ತು ಜಾತ್ಯತೀತ ಅಸ್ಮಿತೆಯ ಬಗೆಗಿನ ಸಂಘರ್ಷ ವಾಗಿದೆ. ಈ ಆಂತರಿಕ ವಿಭಜನೆಯು ದೇಶದ ಸಾಮಾಜಿಕ ಸಾಮರಸ್ಯ, ರಾಷ್ಟ್ರೀಯ ಭದ್ರತೆ ಮತ್ತು ಆರ್ಥಿಕ ಸ್ಥಿರತೆಯ ಮೇಲೆ ದೀರ್ಘಕಾಲೀನ ಪರಿಣಾಮಗಳನ್ನು ಬೀರುವ ಸಾಧ್ಯತೆಯಿದೆ.

ಅಂತಾರಾಷ್ಟ್ರೀಯ ಒತ್ತಡದ ನಡುವೆಯೂ ನೆತನ್ಯಾಹು ಸರಕಾರ ‘ಭದ್ರತೆ ಮೊದಲು’ ಎಂದು ತನ್ನ ನಿಲುವನ್ನು ಗಟ್ಟಿಗೊಳಿಸಿದೆ. ಇದನ್ನು ವಿರೋಧಿಸುವುದು ಅವರ ರಾಜಕೀಯ ವಿರೋಧಿಗಳಿಗೆ ನುಂಗಲಾರದ ತುತ್ತು. ಹೀಗಾಗಿ, ಇಸ್ರೇಲ್‌ನ ರಾಜಕೀಯ ಇತಿಹಾಸದಲ್ಲಿ ಇದು ಅತ್ಯಂತ ನಿರ್ಣಾಯಕ ಮತ್ತು ಗಂಭೀರ ಹಂತ ಎಂದು ಹೇಳಬಹುದು.

ಇಸ್ರೇಲ್ ಎಂದರೆ ಒಂದೇ ಒಂದು ಮುಖವಲ್ಲ, ಇತಿಹಾಸ, ಧರ್ಮ, ರಾಜಕೀಯ, ತಂತ್ರಜ್ಞಾನ, ಭಯ, ಭರವಸೆ- ಇವುಗಳೆಲ್ಲ ಸೇರಿಕೊಂಡಿರುವ ಪ್ರತಿಬಿಂಬ. ಇಸ್ರೇಲ್ ಮತ್ತು ಹಮಾಸ್ ನಡುವಿನ ಪ್ರಸಕ್ತ ಸಂಘರ್ಷವು ಅಕ್ಟೋಬರ್ 7, 2023ರಂದು ಹಮಾಸ್ ಇಸ್ರೇಲ್ ಮೇಲೆ ನಡೆಸಿದ ದಾಳಿಯೊಂದಿಗೆ ಆರಂಭವಾಯಿತು. ಅಂದಿನಿಂದ, ಈ ಸಂಘರ್ಷವು ತೀವ್ರಗೊಂಡು, ಗಾಜಾ ಪಟ್ಟಿಯಲ್ಲಿ ಭಾರಿ ಮಾನವೀಯ ಬಿಕ್ಕಟ್ಟನ್ನು ಸೃಷ್ಟಿಸಿದೆ. ಹಮಾಸ್ ನೇತೃತ್ವದ ಉಗ್ರಗಾಮಿಗಳು ಗಾಜಾದಿಂದ ದಕ್ಷಿಣ ಇಸ್ರೇಲ್‌ಗೆ ನುಗ್ಗಿ, ಸಮುದಾಯಗಳ ಮೇಲೆ ದಾಳಿ ನಡೆಸಿದರು. ಈ ದಾಳಿಯಲ್ಲಿ ಸಾವಿರಾರು ಇಸ್ರೇಲಿಗಳು ಹತರಾದರು ಮತ್ತು ನೂರಾರು ಜನರನ್ನು ಒತ್ತೆಯಾಳಾಗಿ ಗಾಜಾಕ್ಕೆ ಕರೆದೊಯ್ಯಲಾಯಿತು.

ಇದಕ್ಕೆ ಪ್ರತಿಕ್ರಿಯೆಯಾಗಿ, ಇಸ್ರೇಲ್ ಹಮಾಸ್ ವಿರುದ್ಧ ‘ಯುದ್ಧ’ ಘೋಷಿಸಿತು ಮತ್ತು ಗಾಜಾ ಪಟ್ಟಿಯ ಮೇಲೆ ವ್ಯಾಪಕ ವೈಮಾನಿಕ ದಾಳಿ ಮತ್ತು ಭೂ ಕಾರ್ಯಾಚರಣೆಯನ್ನು ಪ್ರಾರಂಭಿಸಿತು. ಹಮಾಸ್ ಅನ್ನು ಸಂಪೂರ್ಣವಾಗಿ ನಾಶಪಡಿಸುವುದು ಮತ್ತು ಒತ್ತೆಯಾಳುಗಳನ್ನು ಬಿಡುಗಡೆ ಮಾಡುವುದು ಇಸ್ರೇಲ್‌ನ ಮುಖ್ಯ ಗುರಿ.

ಅಕ್ಟೋಬರ್ 7ರ ಬಳಿಕ ಹಮಾಸ್ ದಾಳಿಗಳು ಮತ್ತು ಇಸ್ರೇಲ್ ನ ಪ್ರತಿದಾಳಿಗಳು ತೀವ್ರವಾದವು. 2023ರ ಅಕ್ಟೋಬರ್ 28ರಿಂದ ನವೆಂಬರ್ 23ರವರೆಗೆ ಇಸ್ರೇಲ್ ಗಾಜಾ ಪಟ್ಟಿಯ ಮೇಲೆ ಭೂ ಆಕ್ರಮಣವನ್ನು ಆರಂಭಿಸಿತು. ಅದೇ ವರ್ಷದ ನವೆಂಬರ್ 24ರಿಂದ ಡಿಸೆಂಬರ್ 1ರ ತನಕ ಮೊದಲ ಕದನ ವಿರಾಮ. ಈ ಸಮಯದಲ್ಲಿ ಕೆಲವು ಒತ್ತೆಯಾಳುಗಳು ಮತ್ತು ಪ್ಯಾಲೆಸ್ತೀನಿಯನ್ ಕೈದಿಗಳನ್ನು ಬಿಡುಗಡೆ ಮಾಡಲಾಯಿತು.

ಡಿಸೆಂಬರ್ 2023 ರಿಂದೀಚೆಗೆ ಕದನ ವಿರಾಮ ಮುರಿದುಬಿದ್ದ ನಂತರ ಯುದ್ಧವು ಪುನರಾರಂಭವಾಯಿತು ಮತ್ತು ಇಂದಿಗೂ ಮುಂದುವರಿದಿದೆ. ಪರಿಣಾಮ, ಗಾಜಾ ತೀವ್ರವಾದ ಮಾನವೀಯ ಬಿಕ್ಕಟ್ಟನ್ನು ಎದುರಿಸುತ್ತಿದೆ. ಆಗ 22, 2025ರಂದು ಗಾಜಾ ಗವರ್ನರೇಟ್ ಪ್ರದೇಶದಲ್ಲಿ ಕ್ಷಾಮವನ್ನು ಘೋಷಿಸಲಾಯಿತು. ಸುಮಾರು ಇಪ್ಪತ್ತೊಂದು ಲಕ್ಷ ಜನರು ತೀವ್ರ ಹಸಿವಿನಿಂದ ಬಳಲುತ್ತಿದ್ದಾರೆ.

ವಿಶೇಷವಾಗಿ ಮಕ್ಕಳು ತೀವ್ರ ಅಪೌಷ್ಟಿಕತೆಯಿಂದ ಬಳಲುತ್ತಿದ್ದಾರೆ ಮತ್ತು ಸಾವನ್ನಪ್ಪುತ್ತಿದ್ದಾರೆ ಎಂಬ ಸಂಗತಿ ಬಹಿರಂಗವಾಯಿತು. ಗಾಜಾದ ಶೇ.90ಕ್ಕಿಂತ ಹೆಚ್ಚು ಜನಸಂಖ್ಯೆಯು ಸ್ಥಳಾಂತರಗೊಂಡಿದೆ. ಇಸ್ರೇಲಿ ಮಿಲಿಟರಿ ದಾಳಿಯಿಂದಾಗಿ ಸಾವಿರಾರು ಪ್ಯಾಲೆಸ್ತೀನಿಯನ್ನರು ಸಾವನ್ನಪ್ಪಿದ್ದಾರೆ ಮತ್ತು ಗಾಜಾದ ಮೂಲಸೌಕರ್ಯದ ಪೈಕಿ ಶೇ.70ರಷ್ಟು ನಾಶವಾಗಿದೆ. ಗಾಜಾದ ಆರೋಗ್ಯ ವ್ಯವಸ್ಥೆಯು ಸಂಪೂರ್ಣವಾಗಿ ಕುಸಿದಿದೆ. ಆಸ್ಪತ್ರೆಗಳು ಮತ್ತು ವೈದ್ಯಕೀಯ ಸೌಲಭ್ಯಗಳು ದಾಳಿಗೆ ತುತ್ತಾಗಿವೆ ಹಾಗೂ ವೈದ್ಯಕೀಯ ಸಾಮಗ್ರಿಗಳ ತೀವ್ರ ಕೊರತೆಯಿದೆ.

ಅಮೆರಿಕ ಮತ್ತು ಯುರೋಪಿಯನ್ ದೇಶಗಳು ಸೇರಿದಂತೆ ಇಸ್ರೇಲ್‌ನ ಅನೇಕ ಪಾಶ್ಚಿಮಾತ್ಯ ಮಿತ್ರ ರಾಷ್ಟ್ರಗಳು ಹಮಾಸ್‌ನ ದಾಳಿಯನ್ನು ಖಂಡಿಸಿವೆ. ಅದೇ ಸಮಯದಲ್ಲಿ, ಗಾಜಾದಲ್ಲಿ ಇಸ್ರೇಲ್‌ನ ಕ್ರಮಗಳು ಅಂತಾರಾಷ್ಟ್ರೀಯ ಮಟ್ಟದಲ್ಲಿ ಟೀಕೆಗೆ ಗುರಿಯಾಗಿವೆ. ಅನೇಕ ದೇಶಗಳು ಮತ್ತು ಅಂತಾರಾಷ್ಟ್ರೀಯ ಸಂಸ್ಥೆಗಳು ಇಸ್ರೇಲ್‌ನ ದಾಳಿಯನ್ನು ಖಂಡಿಸಿವೆ ಮತ್ತು ಕದನ ವಿರಾಮಕ್ಕೆ ಕರೆ ನೀಡಿವೆ.

ಜನವರಿ 2025ರಲ್ಲಿ, ಅಮೆರಿಕ, ಈಜಿಪ್ಟ್ ಮತ್ತು ಕತಾರ್ ದೇಶಗಳು ಇಸ್ರೇಲ್ ಮತ್ತು ಹಮಾಸ್ ನಡುವೆ‌ ಕದನವಿರಾಮದ ಮಧ್ಯಸ್ಥಿಕೆ ವಹಿಸಿರುವುದಾಗಿ ಘೋಷಿಸಿದವು, ಆದರೆ ಇದು ಸಂಪೂರ್ಣ ವಾಗಿ ಜಾರಿಗೆ ಬಂದಿಲ್ಲ. ಸಂಘರ್ಷವು ಇನ್ನೂ ಮುಂದುವರಿದಿದೆ, ಮತ್ತು ಎರಡೂ ಕಡೆಗಳಲ್ಲಿ ಸಾವು- ನೋವುಗಳು ಸಂಭವಿಸುತ್ತಲೇ ಇವೆ. ಒತ್ತೆಯಾಳುಗಳ ಬಿಡುಗಡೆ ಮತ್ತು ಶಾಶ್ವತ ಕದನ ವಿರಾಮಕ್ಕಾಗಿ ಮಾತುಕತೆಗಳು ನಡೆಯುತ್ತಿವೆ.

ಆದರೆ ಯಾವುದೇ ಮಹತ್ವದ ಪ್ರಗತಿ ಕಂಡುಬಂದಿಲ್ಲ. ಒಟ್ಟಾರೆಯಾಗಿ, ಇಸ್ರೇಲ್-ಹಮಾಸ್ ಸಂಘರ್ಷವು ಈ ಪ್ರದೇಶದಲ್ಲಿ ದೀರ್ಘಕಾಲದ ರಾಜಕೀಯ ಮತ್ತು ಮಾನವೀಯ ಬಿಕ್ಕಟ್ಟನ್ನು‌ ಸೃಷ್ಟಿಸಿರುವುದು ನಿಜ. ಇದಕ್ಕೆ ಶಾಶ್ವತ ಪರಿಹಾರವಿದೆಯಾ? ಆ ಭಗವಂತನಿಗೆ ಮಾತ್ರ ಗೊತ್ತು. ಹಾಗಂತ ಸ್ಪಷ್ಟವಾಗಿ, ಗಟ್ಟಿಯಾಗಿ ಹೇಳುವಂತಿಲ್ಲ. ಗೊತ್ತಿದ್ದಿದ್ದರೆ ಆತ ಈ ಪರಿಯ ಸಾವು-ನೋವನ್ನು ಸಹಿಸಿಕೊಳ್ಳುತ್ತಿದ್ದನಾ? ಈ ಮಧ್ಯೆ ಇಸ್ರೇಲ್, ಇರಾನ್ ಮತ್ತು ಯಮೆನ್‌ನಲ್ಲಿರುವ ಹೌತಿಗಳ ನಡುವಿನ ಸಂಘರ್ಷವು ಮಧ್ಯಪ್ರಾಚ್ಯದಲ್ಲಿನ ಅತ್ಯಂತ ಸಂಕೀರ್ಣ ಮತ್ತು ಬಹು-ಆಯಾಮದ ಭೌಗೋಳಿಕ ರಾಜಕೀಯ ಸಮಸ್ಯೆಯಾಗಿದೆ.

ಇದು ಕೇವಲ ಒಂದು ನೇರ ಯುದ್ಧವಲ್ಲ, ಬದಲಿಗೆ ಪ್ರಾಕ್ಸಿ ಯುದ್ಧ. ಪ್ರಾದೇಶಿಕ ಪ್ರಾಬಲ್ಯಕ್ಕಾಗಿನ ಹೋರಾಟ ಮತ್ತು ಸೈದ್ಧಾಂತಿಕ ಭಿನ್ನಾಭಿಪ್ರಾಯಗಳ ಸಂಕೀರ್ಣ ಸಮಸ್ಯೆ. ಇಸ್ರೇಲ್ ಅನ್ನು ಇರಾನ್ ತನ್ನ ಅಸ್ತಿತ್ವಕ್ಕೆ ಬೆದರಿಕೆ ಎಂದು ಪರಿಗಣಿಸಿದೆ ಮತ್ತು ಇಸ್ರೇಲ್ ಅನ್ನು ನಕ್ಷೆಯಿಂದ ಅಳಿಸಿಹಾಕುವು ದಾಗಿ ಬಹಿರಂಗವಾಗಿ ಘೋಷಿಸಿದೆ.

ಇಸ್ರೇಲ್ ಇರಾನ್‌ನ ಪರಮಾಣು ಕಾರ್ಯಕ್ರಮವನ್ನು ತನ್ನ ಭದ್ರತೆಗೆ ದೊಡ್ಡ ಬೆದರಿಕೆ ಎಂದು ಪರಿಗಣಿಸಿದೆ. ಇರಾನ್ ನೇರವಾಗಿ ಇಸ್ರೇಲ್ ಮೇಲೆ ದಾಳಿ ಮಾಡುವುದನ್ನು ತಪ್ಪಿಸಲು, ಲೆಬನಾನ್‌ನ ಹಿಜ್ಬು, ಗಾಜಾದ ಹಮಾಸ್ ಮತ್ತು ಯೆಮೆನ್‌ನ ಹೌತಿಗಳಂಥ ಪ್ರಾಕ್ಸಿ ಗುಂಪುಗಳಿಗೆ ಬೆಂಬಲ ನೀಡುತ್ತಿದೆ. ಈ ಗುಂಪುಗಳು ಇಸ್ರೇಲ್ ಮೇಲೆ ಸತತ ದಾಳಿಗಳನ್ನು ನಡೆಸುತ್ತಿವೆ.

ಇರಾನ್‌ನ ಪರಮಾಣು ಕಾರ್ಯಕ್ರಮವು ಇಸ್ರೇಲ್‌ನ ಪ್ರಮುಖ ಕಳವಳವಾಗಿದೆ. ಇಸ್ರೇಲ, ಇರಾನ್ ಪರಮಾಣು ಶಸ್ತ್ರಾಸ್ತ್ರಗಳನ್ನು ಅಭಿವೃದ್ಧಿಪಡಿಸುವುದನ್ನು ತಡೆಯಲು ಮಿಲಿಟರಿ ಕ್ರಮವನ್ನು ತೆಗೆದುಕೊಳ್ಳಲು ಸಿದ್ಧವಾಗಿದೆ ಎಂದು ಪದೇ ಪದೆ ಹೇಳಿದೆ.

ಹೌತಿಗಳು ಯೆಮೆನ್‌ನಲ್ಲಿ ಇರಾನ್ ಬೆಂಬಲಿತ ಶಿಯಾ ಬಂಡಾಯ ಗುಂಪಾಗಿದ್ದು, ಯೆಮೆನ್‌ನ ಹೆಚ್ಚಿನ ಭಾಗವನ್ನು ನಿಯಂತ್ರಿಸುತ್ತಿದ್ದಾರೆ. ಇಸ್ರೇಲ್-ಹಮಾಸ್ ಯುದ್ಧ ಪ್ರಾರಂಭವಾದಾಗಿನಿಂದ, ಹೌತಿಗಳು ಇಸ್ರೇಲ್‌ನ ಮೇಲೆ ಕ್ಷಿಪಣಿ ಮತ್ತು ಡ್ರೋನ್ ದಾಳಿಗಳನ್ನು ನಡೆಸುತ್ತಿದ್ದಾರೆ ಮತ್ತು ಕೆಂಪು ಸಮುದ್ರದಲ್ಲಿ ಇಸ್ರೇಲ್‌ನೊಂದಿಗೆ ಸಂಬಂಧ ಹೊಂದಿರುವ ಹಡಗುಗಳ ಮೇಲೆ ದಾಳಿ ಮಾಡು‌ತ್ತಿದ್ದಾರೆ.

ಕೆಂಪು ಸಮುದ್ರವು ಜಾಗತಿಕ ವ್ಯಾಪಾರಕ್ಕೆ ನಿರ್ಣಾಯಕ ಮಾರ್ಗ. ಹೌತಿಗಳ ದಾಳಿಗಳು ಜಾಗತಿಕ ಸಾಗಾಟಕ್ಕೆ ಅಡ್ಡಿಪಡಿಸಿವೆ. ಅಂತಾರಾಷ್ಟ್ರೀಯ ಸಮುದಾಯವು ಈ ಸಂಘರ್ಷವನ್ನು ಶಮನಗೊಳಿಸಲು ಪ್ರಯತ್ನಿಸುತ್ತಿದೆಯಾದರೂ ಯಾವುದೇ ಶಾಶ್ವತ ಪರಿಹಾರ ಕಂಡುಬಂದಿಲ್ಲ. ಒಟ್ಟಾರೆಯಾಗಿ, ಇಸ್ರೇಲ್, ಇರಾನ್ ಮತ್ತು ಹೌತಿಗಳ ನಡುವಿನ ಸಂಘರ್ಷವು ಮಧ್ಯಪ್ರಾಚ್ಯದಲ್ಲಿನ ಭದ್ರತಾ ಪರಿಸ್ಥಿತಿಯನ್ನು ಮತ್ತಷ್ಟು ಸಂಕೀರ್ಣಗೊಳಿಸಿದೆ ಮತ್ತು ಜಾಗತಿಕ ಆರ್ಥಿಕತೆಯ ಮೇಲೆ ಪರಿಣಾಮ ಬೀರುತ್ತಿದೆ.

ಈ ಎಲ್ಲ ಸಮಸ್ಯೆ-ಸಂಕಷ್ಟಗಳಿಂದ ಇಸ್ರೇಲ್ ಹಿಂದೆಂದಿಗಿಂತ ತೀವ್ರವಾಗಿ ತತ್ತರಿಸುವುದು ನಿಜ. ಆಂತರಿಕ ಮತ್ತು ಬಾಹ್ಯ ದಾಳಿಗಳು ಅದನ್ನು ಹಣ್ಣುಗಾಯಿ-ನೀರುಗಾಯಿ ಮಾಡಿವೆ. ಆದರೆ ಶಾಶ್ವತ ಕದನಕಲಿಗಳಾದ ಇಸ್ರೇಲಿಗಳ ಚರಿತ್ರೆಯನ್ನು ನೋಡಿದರೆ, ಇದು ಅವರಿಗೆ ಹೊಸತೇನಲ್ಲ. ಇಸ್ರೇಲಿನ ರಕ್ಷಣಾ ಸಚಿವರಾಗಿದ್ದ ಮೋಶೆ ಡಯಾನ್ ಹೇಳಿದ ಮಾತು ನೆನಪಾಗುತ್ತಿದೆ - The history of Israel is a history of courage, of determination, and hope.

ಯಹೂದಿಗಳು ಆಗಾಗ ತಮ್ಮ ಸಮಸ್ಯೆಯನ್ನು ನೆನೆದು ಒಂದು ತಮಾಷೆ ಮಾತನ್ನು ಹೇಳುತ್ತಾರೆ- ‘ಮೂರು ಇಂಟರ್ವಲ್ ಮುಗಿದರೂ, ಸಿನಿಮಾ ಮುಗಿಯುತ್ತಿಲ್ಲ’. ಇಸ್ರೇಲಿಗಳ ಈ ಕರುಣಾಜನಕ ಕಥೆಯುಳ್ಳ ಸಿನಿಮಾ ಮುಗಿಯಲು ಇನ್ನು ಎಷ್ಟು ಇಂಟರ್ವಲ್ಲುಗಳು ಬಾಕಿ ಇವೆಯೋ?! ಇಸ್ರೇಲಿನಲ್ಲಿ ಒಂದು ವಾರ ಕಾಲ ಸುತ್ತಾಡಿ, ಅಲ್ಲಿನ ಬೆನ್ -ಗುರಿಯನ್ ನಿಲ್ದಾಣದಲ್ಲಿ ವಿಮಾನವೇರುವಾಗ ಈ ಎಲ್ಲ ವಿದ್ಯಮಾನಗಳು ಟೀಸರ್ ಥರ ನನ್ನ ಮುಂದೆ ಹಾದುಹೋದವು.