ರೀಲ್ಸ್‌ಗಳಾಚೆಗೂ ಒಂದು ಸುಂದರ ಪ್ರವಾಸಿ ಪ್ರಪಂಚವಿದೆ

• ಲೀನಾ ಜೋಶಿ

ಇತ್ತೀಚೆಗೆ ಒಬ್ಬ ಸ್ನೇಹಿತ ಯುರೋಪ್ ಪ್ರವಾಸದ ಯೋಜನೆ ಮಾಡುತ್ತಿದ್ದ. ʻಎಲ್ಲಿಗೆ ಹೋಗುತ್ತಿದ್ದೀಯ?ʻ ಎಂದು ಕೇಳಿದಾಗ ಅವನು ʻಸ್ವಿಟ್ಜರ್‌ಲ್ಯಾಂಡ್‌ಗೆ. ಅಲ್ಲಿಗೆ ಹೋಗದಿದ್ದರೆ ಯುರೋಪ್ ಹೋಗಿದ್ದೇನು ಪ್ರಯೋಜನ?ʻ ಎಂದ. ನಾನು ನಕ್ಕು ಕೇಳಿದೆ. ʻಏಕೆ? ಯುರೋಪ್ ಅಂದರೆ ಸ್ವಿಟ್ಜರ್‌ಲ್ಯಾಂಡ್ ಮಾತ್ರವೇ?ʻ ಅವನ ಬಳಿ ಉತ್ತರ ಇರಲಿಲ್ಲ. ಯಾಕೆಂದರೆ ಆ ಉತ್ತರ ಅವನದ್ದಲ್ಲ. ಇನ್‌ಸ್ಟಾಗ್ರಾಮ್, ಯೂಟ್ಯೂಬ್ ಮತ್ತು ಸಿನಿಮಾ ಅವನ ಪರವಾಗಿ ಕೊಟ್ಟ ಉತ್ತರವಾಗಿತ್ತು. ಇದು ಅವನೊಬ್ಬನ ಕಥೆಯಲ್ಲ; ನಮ್ಮಲ್ಲಿ ಬಹುತೇಕರ ಕಥೆ.

ಇಂದು ಪ್ರವಾಸ ಎಂದರೆ ಅನುಸರಣೆ. ಒಂದು ಕಾಲದಲ್ಲಿ ಜನರು ಹೊಸ ಸ್ಥಳಗಳನ್ನು ಹುಡುಕುತ್ತಿದ್ದರು. ಇಂದು ಈಗಾಗಲೇ ಯಾರೋ ಕಂಡುಹಿಡಿದ ಸ್ಥಳವನ್ನೇ ಹುಡುಕುತ್ತಿದ್ದಾರೆ. ಹಿಂದೆ ಪ್ರವಾಸದ ದಾರಿ ಪುಸ್ತಕಗಳು, ನಕ್ಷೆಗಳು ಮತ್ತು ಹಿರಿಯರ ಅನುಭವಗಳಿಂದ ಆರಂಭವಾಗುತ್ತಿತ್ತು. ಈಗ ಅದು ಇನ್‌ಸ್ಟಾಗ್ರಾಮ್‌ನ ಎಕ್ಸಪ್ಲೋರ್‌ ಪುಟದಲ್ಲಿ ಅಥವಾ ಯೂಟ್ಯೂಬ್‌ನ ರೆಕಮೆಂಡೆಡ್‌ ವಿಡಿಯೋಗಳಲ್ಲಿ ಆರಂಭವಾಗುತ್ತದೆ. 30 ಸೆಕೆಂಡಿನ ರೀಲ್ಸ್‌ ಸಾವಿರಾರು ಜನರ ಕನಸನ್ನು ಬದಲಾಯಿಸುವ ಶಕ್ತಿ ಹೊಂದಿದೆ. ಒಬ್ಬ ಜನಪ್ರಿಯ ಟ್ರಾವೆಲ್ ಕ್ರಿಯೇಟರ್‌ ಯಾವುದೋ ಬೆಟ್ಟದ ತುದಿಯಲ್ಲಿ ನಿಂತು ಒಂದು ವಿಡಿಯೋ ಮಾಡಿದರೆ, ಕೆಲವೇ ದಿನಗಳಲ್ಲಿ ಆ ಜಾಗಕ್ಕೆ ಸಾವಿರಾರು ಜನರ ದಂಡೇ ಹರಿದುಬರುತ್ತದೆ. ಅದೇ ಸ್ಥಳದಲ್ಲಿ ನಿಂತು ಅದೇ ಹಾಡಿಗೆ, ಅದೇ ಭಂಗಿಯಲ್ಲಿ ವಿಡಿಯೋ ಮಾಡುವುದು ಅನಿವಾರ್ಯ ಎನ್ನುವಂಥ ಮನಸ್ಥಿತಿ ನಿರ್ಮಾಣವಾಗುತ್ತದೆ. ನಾವು ಪ್ರವಾಸ ಮಾಡುತ್ತಿದ್ದೇವೆಯೇ ಅಥವಾ ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್‌ ಆದ ಕನಸುಗಳನ್ನು ಹಿಂಬಾಲಿಸುತ್ತಿದ್ದೇವೆಯೇ?

ಇದನ್ನೂ ಓದಿ: ಕಣ್ಣಿಗೆ ಕಾಣದ ಕಣಗಳು ಪ್ರಕೃತಿಯ ಕೊಲೆಗೆ ಕಾರಣವಾಗುತ್ತವೆ

ಇತ್ತೀಚಿನ ವರ್ಷಗಳಲ್ಲಿ ಸಾಮಾಜಿಕ ಜಾಲತಾಣಗಳು ಪ್ರವಾಸೋದ್ಯಮದ ಮೇಲೆ ಅಪಾರ ಪ್ರಭಾವ ಬೀರಿವೆ. ಅದರ ಸಕಾರಾತ್ಮಕ ಮುಖವೂ ಇದೆ. ಈ ಹಿಂದೆ ಯಾರಿಗೂ ಪರಿಚಯವಿಲ್ಲದ ಕೆಲವು ಸ್ಥಳಗಳು ಜಗತ್ತಿನ ಗಮನಸೆಳೆದಿವೆ. ಸ್ಥಳೀಯರಿಗೆ ಉದ್ಯೋಗ ಸಿಕ್ಕಿದೆ. ಹೋಮ್‌ಸ್ಟೇಗಳು ಬೆಳೆದಿವೆ. ರಸ್ತೆ, ಸಾರಿಗೆ, ಮೂಲಸೌಕರ್ಯಗಳು ಅಭಿವೃದ್ಧಿಯಾಗಿವೆ. ಪ್ರತಿಯೊಂದು ನಾಣ್ಯಕ್ಕೂ ಇನ್ನೊಂದು ಮುಖವಿರುವಂತೆ, ಈ ಬೆಳವಣಿಗೆಯ ಹಿಂದೆ ಕಾಣದ ಕೆಲವು ಪ್ರಶ್ನೆಗಳೂ ಇವೆ. ಒಂದು ಸ್ಥಳದ ಬಗ್ಗೆ ನೂರಾರು ಜನ ಒಂದೇ ರೀತಿಯ ವಿಡಿಯೋಗಳನ್ನು ಮಾಡುತ್ತಾರೆ. ಸಾವಿರಾರು ಜನ ಅದನ್ನೇ ಹಂಚಿಕೊಳ್ಳುತ್ತಾರೆ. ಲಕ್ಷಾಂತರ ಜನ ಅದನ್ನೇ ನೋಡುತ್ತಾರೆ. ಪರಿಣಾಮವಾಗಿ ಜಗತ್ತಿನಲ್ಲಿ ಸುಂದರ ಸ್ಥಳ ಒಂದೇ ಇದೆ ಎಂಬ ಭ್ರಮೆ ಮೂಡುತ್ತದೆ. ಉಳಿದ ಸ್ಥಳಗಳು ನಿಧಾನವಾಗಿ ನಮ್ಮ ದೃಷ್ಟಿಯಿಂದ ಮರೆಯಾಗುತ್ತವೆ.

ಸ್ವಿಟ್ಜರ್‌ಲ್ಯಾಂಡ್‌ ನಿಸರ್ಗದ ಅದ್ಭುತ ಕಲಾಕೃತಿ. ಆದರೆ ಯುರೋಪಿನ ಸೌಂದರ್ಯ ಅಲ್ಲಿಗೆ ಮುಗಿದುಹೋಗುವುದಿಲ್ಲ. ರೊಮೇನಿಯಾದ ಕಾರ್ಪೇಥಿಯನ್‌ ಪರ್ವತಗಳು, ಬೋಸ್ನಿಯಾದ ನೀಲಿಬಣ್ಣದ ನದಿಗಳು, ಸ್ಲೋವೇನಿಯಾದ ಹಸಿರು ಸರೋವರಗಳು, ಸ್ಲೋವಾಕಿಯಾದ ಕಣಿವೆಗಳು, ಮಾಂಟೆನೆಗ್ರೋದ ಪರ್ವತ ಪ್ರದೇಶಗಳು -ಇವೆಲ್ಲವೂ ಪ್ರಕೃತಿಯ ಅಪರೂಪದ ಉಡುಗೊರೆಗಳು.

ಮಧ್ಯ ಏಷ್ಯಾದ ಕಝಾಕಿಸ್ತಾನ ಮತ್ತು ಕಿರ್ಗಿಸ್ಥಾನ್‌ನ ವಿಶಾಲ ಹುಲ್ಲುಗಾವಲುಗಳು, ಹಿಮಾವೃತ ಶಿಖರಗಳು ಮತ್ತು ಕನ್ನಡಿಯಂತೆ ಹೊಳೆಯುವ ಸರೋವರಗಳನ್ನು ನೋಡಿದರೆ, ಸ್ವಿಟ್ಜರ್‌ಲ್ಯಾಂಡ್‌ ನೆನಪಾಗುವುದು ಸಹಜ. ಅರ್ಮೇನಿಯಾದ ಪ್ರಾಚೀನ ಕಣಿವೆಗಳು, ಜಾರ್ಜಿಯಾದ ಕಾಕಸಸ್‌ ಶ್ರೇಣಿಗಳು -ಇವುಗಳ ಬಗ್ಗೆ ಸಾವಿರಾರು ರೀಲ್ಸ್‌ಗಳಿಲ್ಲ, ಹೀಗಾಗಿ ಪ್ರವಾಸಿಗರ ಪಟ್ಟಿಯಲ್ಲೂ ಅವುಗಳ ಹೆಸರಿಲ್ಲ.

ಇದೇ ಪರಿಸ್ಥಿತಿ ನಮ್ಮ ಭಾರತದಲ್ಲೂ! ಭಾರತದ ಸೌಂದರ್ಯವನ್ನು ತಾಜ್‌ಮಹಲ್‌ಗೆ ಸೀಮಿತಗೊಳಿಸುವುದು ನಮ್ಮ ದೇಶಕ್ಕೆ ಮಾಡುವ ಅನ್ಯಾಯ. ತಾಜ್‌ಮಹಲ್‌ ವಿಶ್ವದ ಅದ್ಭುತಗಳಲ್ಲಿ ಒಂದು. ಆದರೆ, ಭಾರತದ ಸೌಂದರ್ಯ ಅದಕ್ಕಿಂತ ಸಾವಿರ ಪಟ್ಟು ವಿಶಾಲವಾಗಿದೆ. ಅರುಣಾಚಲ ಪ್ರದೇಶದ ಪರ್ವತಗಳಲ್ಲಿ ಬೆಳಗಿನ ಮಂಜು ಆವರಿಸುವ ಕ್ಷಣ, ಮೇಘಾಲಯದ ಜೀವಂತ ಬೇರು ಸೇತುವೆಗಳು, ಒಡಿಶಾದ ಕಡಲ ತೀರಗಳು, ಮಧ್ಯಪ್ರದೇಶದ ಸಾವಿರಾರು ವರ್ಷಗಳ ಇತಿಹಾಸ, ಲಡಾಖ್‌ನ ಮೌನ ಸರೋವರಗಳು, ಹಿಮಾಚಲದ ಕಡಿಮೆ ಪರಿಚಿತ ಕಣಿವೆಗಳು -ಇವು ವಿಶ್ವದ ಯಾವುದೇ ಪ್ರಸಿದ್ಧ ಪ್ರವಾಸಿ ತಾಣಕ್ಕೂ ಕಡಿಮೆಯಿಲ್ಲ.

ನಮ್ಮ ಕರ್ನಾಟಕವೂ ಇದಕ್ಕೆ ಹೊರತಲ್ಲ. ಕೂರ್ಗ್‌, ಚಿಕ್ಕಮಗಳೂರು, ಗೋಕರ್ಣ, ಹಂಪಿ -ಇವುಗಳ ಜನಪ್ರಿಯತೆ ಬಗ್ಗೆ ಅನುಮಾನವಿಲ್ಲ. ಆದರೆ, ಪಶ್ಚಿಮಘಟ್ಟಗಳ ಅರಣ್ಯದೊಳಗೆ ಇನ್ನೂ ನೂರಾರು ಜಲಪಾತಗಳಿವೆ. ಪ್ರವಾಸಿ ನಕ್ಷೆಯಲ್ಲೇ ಕಾಣದ ಹಸಿರು ಕಣಿವೆಗಳಿವೆ. ಇತಿಹಾಸದ ಪುಟಗಳಲ್ಲಿ ಮಾತ್ರ ಉಳಿದಿರುವ ಕೋಟೆಗಳಿವೆ. ಸಾವಿರ ವರ್ಷಗಳ ಸಂಸ್ಕೃತಿಯನ್ನು ಹೊತ್ತ ದೇವಾಲಯಗಳಿವೆ. ಪ್ರಕೃತಿಯ ಮಡಿಲಿನಲ್ಲಿ ಮೌನವಾಗಿ ಬದುಕುತ್ತಿರುವ ಹಳ್ಳಿಗಳಿವೆ. ಅವುಗಳ ಸೌಂದರ್ಯಕ್ಕೆ ಸಾಮಾಜಿಕ ಜಾಲತಾಣಗಳಲ್ಲಿ ʼಲೈಕ್ಸ್‌ʼ ಇಲ್ಲ ಅಷ್ಟೇ.

ಇಂದು ಒಂದು ವಿಚಿತ್ರ ಮನೋವಿಜ್ಞಾನ ಬೆಳೆಯುತ್ತಿದೆ. ನಾವು ಯಾವುದಾದರೂ ಸ್ಥಳಕ್ಕೆ ಹೋಗುವ ಮುನ್ನ, ಆ ಸ್ಥಳದ ಬಗ್ಗೆ ಇತರರು ಏನು ಹೇಳಿದ್ದಾರೆ ಎಂಬುದನ್ನು ನೋಡುತ್ತೇವೆ. ಆದರೆ ಆ ಸ್ಥಳ ನಮಗೆ ಏನು ಹೇಳುತ್ತದೆ ಎಂಬುದನ್ನು ಕೇಳುವುದೇ ಇಲ್ಲ. ಇಂದು ನಾವು ಪ್ರವಾಸಕ್ಕೆ ಹೋಗುವ ಸ್ಥಳಗಳನ್ನು ನಮ್ಮ ಮನಸು ಆಯ್ಕೆ ಮಾಡುತ್ತಿಲ್ಲ. ನಮ್ಮ ಮೊಬೈಲ್ ಪರದೆ ಆಯ್ಕೆ ಮಾಡುತ್ತಿದೆ. ಪ್ರತಿದಿನ ಕಾಣುವ ರೀಲ್ಸ್‌, ಶಾರ್ಟ್ಸ್‌, ಟ್ರಾವೆಲ್ ವ್ಲಾಗ್‌ಗಳು ನಮ್ಮ ಆಸೆಗಳನ್ನು ರೂಪಿಸುತ್ತಿವೆ. ಒಂದೇ ಸ್ಥಳದ ಬಗ್ಗೆ ಸಾವಿರಾರು ವಿಡಿಯೋಗಳು ಬರುತ್ತವೆ. ಒಂದೇ ವ್ಯೂ ಪಾಯಿಂಟ್‌, ಒಂದೇ ಕೆಫೆ, ಒಂದೇ ಜಲಪಾತ, ಒಂದೇ ಹಾಡು, ಕೊನೆಗೆ ಎಲ್ಲರ ಪ್ರವಾಸವೂ ಒಂದೇ ಮಾದರಿಯಾಗುತ್ತದೆ. ಪ್ರವಾಸ ಈಗ ಟ್ರೆಂಡ್. ಕೆಲವರು ಅದನ್ನು ಅನುಭವಿಸಲು ಹೋಗುವುದಿಲ್ಲ; ದಾಖಲಿಸಲು ಹೋಗುತ್ತಾರೆ. ಸೂರ್ಯೋದಯವನ್ನು ಕಣ್ಣಿನಿಂದ ನೋಡುವುದಕ್ಕಿಂತ ಮೊದಲು ಕ್ಯಾಮೆರಾದಲ್ಲಿ ಸೆರೆಹಿಡಿಯುತ್ತಾರೆ. ಕೊನೆಗೆ ಮನೆಗೆ ಮರಳುವಾಗ ಸಾವಿರ ಫೊಟೋಗಳು ಇರುತ್ತವೆ. ಆದರೆ, ನೆನಪುಗಳು ಕಡಿಮೆ. ಪ್ರವಾಸ ಒಂದು ಅನುಭವ, ಅದನ್ನು ಹೋಲಿಸಲಾಗುವುದಿಲ್ಲ. ಒಬ್ಬರೇ ಕುಳಿತು ನೋಡಿದ ಸೂರ್ಯಾಸ್ತ ಹೆಚ್ಚು ಸುಂದರವಾಗಿರುತ್ತದೆ. ಸಾವಿರ ಲೈಕ್ಸ್‌ ಪಡೆದ ಫೊಟೋಗಿಂತ ನೆನಪಿನಲ್ಲಿ ಉಳಿದ ಒಂದು ಕ್ಷಣ ಹೆಚ್ಚು ಅಮೂಲ್ಯವಾಗಿರುತ್ತದೆ.

ಒಂದು ಸ್ಥಳಕ್ಕೆ ಅತಿಯಾದ ಜನಸಂದಣಿ ಹರಿದುಬಂದಾಗ ಅದರ ಪರಿಸರವೂ ಬದಲಾಗುತ್ತದೆ. ಪ್ಲಾಸ್ಟಿಕ್‌ ಹೆಚ್ಚಾಗುತ್ತದೆ. ನೀರಿನ ಸಮಸ್ಯೆ ಉಂಟಾಗುತ್ತದೆ. ವಾಹನಗಳ ದಟ್ಟಣೆ ಹೆಚ್ಚುತ್ತದೆ. ಹೊಟೇಲ್‌ ದರಗಳು ಏರುತ್ತವೆ. ಸ್ಥಳೀಯರ ಬದುಕಿನ ಶೈಲಿಯೇ ಬದಲಾಗುತ್ತದೆ. ಕೆಲವೊಮ್ಮೆ ಆ ಸ್ಥಳ ತನ್ನ ಸಹಜ ಸೌಂದರ್ಯವನ್ನೇ ಕಳೆದುಕೊಳ್ಳುತ್ತದೆ. ಕಡಿಮೆ ಪರಿಚಿತ ಪ್ರದೇಶಗಳಿಗೆ ಪ್ರವಾಸಿಗರು ತೆರಳಿದರೆ ಪ್ರವಾಸೋದ್ಯಮದ ಲಾಭ ಸಮಾನವಾಗಿ ಹಂಚಿಕೆಯಾಗುತ್ತದೆ. ಗ್ರಾಮೀಣ ಆರ್ಥಿಕತೆ ಬೆಳೆಯುತ್ತದೆ. ಸ್ಥಳೀಯ ಕಲೆ, ಸಂಸ್ಕೃತಿ ಮತ್ತು ಆಹಾರ ಪದ್ಧತಿಗಳು ಹೊಸ ಜೀವ ಪಡೆಯುತ್ತವೆ. ಪ್ರವಾಸ ಕೇವಲ ಒಂದು ನಗರ ಅಥವಾ ಒಂದು ರಾಜ್ಯದ ಸುತ್ತ ಸೀಮಿತವಾಗದೆ, ಎಲ್ಲೆಡೆ ಹರಡುತ್ತದೆ.

ಟ್ರಾವೆಲ್‌ ಕ್ರಿಯೇಟರ್‌ಗಳ ಪಾತ್ರವೂ ಮಹತ್ವದ್ದಾಗಿದೆ. ಅವರಲ್ಲಿ ಲಕ್ಷಾಂತರ ಜನರ ಪ್ರವಾಸದ ದಿಕ್ಕನ್ನು ಬದಲಾಯಿಸುವ ಶಕ್ತಿ ಇದೆ. ಒಂದೇ ಜನಪ್ರಿಯ ಸ್ಥಳದ ಬಗ್ಗೆ ನೂರನೆಯ ವಿಡಿಯೋ ಮಾಡುವ ಬದಲು, ಯಾರೂ ಮಾತನಾಡದ ಒಂದು ಅಪರೂಪದ ಹಳ್ಳಿಯನ್ನು, ಒಂದು ಮರೆತುಹೋದ ಜಲಪಾತವನ್ನು, ಒಂದು ಅನಾಮಧೇಯ ಕಣಿವೆಯನ್ನು ಜಗತ್ತಿಗೆ ಪರಿಚಯಿಸಿದರೆ ಅದು ಕೇವಲ ಒಂದು ವಿಡಿಯೋ ಆಗುವುದಿಲ್ಲ; ಬದಲಿಗೆ ಒಂದು ಪ್ರದೇಶದ ಭವಿಷ್ಯವನ್ನೇ ಬದಲಿಸಬಹುದು.

ಮುಂದಿನ ಬಾರಿ ಪ್ರವಾಸ ಯೋಜಿಸುವಾಗ, ಇನ್‌ಸ್ಟಾಗ್ರಾಮ್‌ ಹೇಳಿದ ಜಾಗದ ಜತೆಗೆ ನಕ್ಷೆಯಲ್ಲಿ ನಿಮ್ಮ ಕಣ್ಣಿಗೆ ಹೊಸದಾಗಿ ಕಾಣುವ ಸ್ಥಳವನ್ನೂ ಸೇರಿಸಿಕೊಳ್ಳಿ. ಅಲ್ಲಿನ ಜನರೊಂದಿಗೆ ಮಾತನಾಡಿ. ಅಲ್ಲಿನ ಊಟ ಸವಿಯಿರಿ. ಬೆಳಗಿನ ಮಂಜನ್ನು ಕ್ಯಾಮೆರಾದಲ್ಲಿ ಸೆರೆಹಿಡಿಯುವ ಮುನ್ನ ಕಣ್ಣಿನಿಂದ ಅನುಭವಿಸಿ. ಅದರಲ್ಲೂ ಒಂದು ಸಂತೋಷವಿದೆ. ಅದು ಯಾರೂ ಹೇಳದ ಸ್ಥಳವನ್ನು ನಾವು ಕಂಡುಕೊಂಡಾಗ ಸಿಗುವ ಸಂತೋಷ. ಆ ಅನುಭವವನ್ನು ಯಾವ ರೀಲ್ಸ್ ಕೊಡಲು ಸಾಧ್ಯವಿಲ್ಲ.

ಪ್ರವಾಸದ ಅತ್ಯಂತ ಸುಂದರ ಕ್ಷಣಗಳು ಮನಸಿನೊಳಗೆ ಹುಟ್ಟುತ್ತವೆ. ವೈರಲ್‌ ಆಗಿರುವುದೇ ಒಂದು ಸ್ಥಳದ ಸೌಂದರ್ಯದ ಮಾನದಂಡವಲ್ಲ. ಪ್ರವಾಸದ ಅತ್ಯಂತ ಸುಂದರ ಕಥೆಗಳು ಹೆಚ್ಚಾಗಿ ನಕ್ಷೆಯ ಮಧ್ಯದಲ್ಲಿ ಸಿಗುವುದಿಲ್ಲ. ಅವು ನಕ್ಷೆಯ ಅಂಚಿನಲ್ಲಿ, ಜನಸಂದಣಿಯಿಂದ ದೂರ, ಇನ್ನೂ ತನ್ನ ಸಹಜ ಸೌಂದರ್ಯವನ್ನು ಕಾಪಾಡಿಕೊಂಡಿರುವ ಪುಟ್ಟ ಊರುಗಳಲ್ಲಿ ಹುಟ್ಟುತ್ತವೆ. ಯಾರೂ ಮಾತನಾಡದ ದಾರಿಯೇ ಅತ್ಯಂತ ಸುಂದರ ದಾರಿಯಾಗಿರುತ್ತದೆ. ನಕ್ಷೆಯ ಅಂಚಿನಲ್ಲಿರುವ ಪುಟ್ಟ ಹಳ್ಳಿಯೇ ನಮ್ಮ ಜೀವನದ ಅತ್ಯಂತ ದೊಡ್ಡ ನೆನಪಾಗಿ ಉಳಿಯುತ್ತದೆ. ಪ್ರವಾಸದ ನಿಜವಾದ ಅರ್ಥ ಜನಸಂದಣಿಯನ್ನು ಹಿಂಬಾಲಿಸುವುದಲ್ಲ; ಜನಸಂದಣಿಯಿಂದ ಆಚೆ ಉಳಿದಿರುವ ಸೌಂದರ್ಯವನ್ನು ಕಂಡುಕೊಳ್ಳುವುದು. ಯಾರೂ ಹೆಚ್ಚು ಹೆಜ್ಜೆ ಇಡದ ದಾರಿಯಲ್ಲಿ ನಡೆದು, ಹೊಸ ಸೌಂದರ್ಯವನ್ನು ಕಂಡುಕೊಳ್ಳುವುದೇ ನಿಜವಾದ ಪ್ರವಾಸ.

ಮುಂದಿನ ಬಾರಿ ನೀವು ಪ್ರಯಾಣಕ್ಕೆ ಹೊರಟಾಗ, ರೀಲ್ಸ್‌ಗಳಾಚೆಗೂ ಒಮ್ಮೆ ನೋಡಿ. ಬಹುಶಃ ಮುಂದಿನ ಬಾರಿ ನಿಮ್ಮ ಜೀವನದ ಅತ್ಯುತ್ತಮ ನೆನಪು, ಇನ್‌ಸ್ಟಾಗ್ರಾಮ್‌ನಲ್ಲಿ ವೈರಲ್ ಆದ ಸ್ಥಳದಲ್ಲಲ್ಲ, ಇನ್ನೂ ಯಾರೂ ರೀಲ್ಸ್ ಮಾಡದ ಒಂದು ಪುಟ್ಟ ಹಳ್ಳಿಯಲ್ಲಿ ನಿಮ್ಮನ್ನು ಎದುರು ನೋಡುತ್ತಿರಬಹುದು.