ಪ್ರವಾಸ ಪೂರ್ಣವಾಗಲು ಸ್ಥಳೀಯರನ್ನು ಅರ್ಥಮಾಡಿಕೊಳ್ಳಿ; ಸ್ಥಳೀಯ ಆಹಾರಗಳ ರುಚಿ ತಿಳಿಯಿರಿ

ವಿಭಿನ್ನವಾದ ಪ್ರವಾಸಿತಾಣಗಳಿಗೆ ಹೋಗಬೇಕೆಂಬುದು ಪ್ರತಿಯೊಬ್ಬ ಪ್ರವಾಸ ಪ್ರಿಯನ ನೆಚ್ಚಿನ ಕೆಲಸ. ಆಯ್ದ ಪ್ರವಾಸಿ ಸ್ಥಳದ ಆಸುಪಾಸಿನಲ್ಲಿ ಭೇಟಿ ಮಾಡಬಹುದಾದ ಗಿರಿಧಾಮಗಳು, ಚಾರಣಕ್ಕೆ ಯೋಗ್ಯವಾದ ಸ್ಥಳ, ಸಮುದ್ರ ತೀರ, ದೇವಾಲಯಗಳು ಹೀಗೆ ಎಲ್ಲವನ್ನೂ ನೋಡಿ ಆ ಪ್ರದೇಶದ ಸಂಸ್ಕೃತಿ, ಸಂಪ್ರದಾಯ, ಆಚಾರ-ವಿಚಾರಗಳನ್ನು ತಿಳಿದುಕೊಳ್ಳಬೇಕು ಅಂದುಕೊಳ್ಳುವುದೂ ಸಹಜ. ಆದರೆ ನಿಜವಾಗಿಯೂ ನೀವು ಭೇಟಿ ನೀಡಿದ ಸ್ಥಳದೊಂದಿಗೆ ನೀವು ಬೆರೆಯಬೇಕಾದರೆ ಅಲ್ಲಿನ ಆಹಾರ ಕ್ರಮವನ್ನು ಮೊದಲು ತಿಳಿದುಕೊಳ್ಳಬೇಕು. ರಸ್ತೆಗೆ ಇಳಿದು, ಅಲ್ಲಿನ ಜನಪ್ರಿಯವಾದ ಸ್ಥಳೀಯ ಆಹಾರವೇನು ಎಂಬುದನ್ನು ಅರಿತುಕೊಂಡು, ಅದನ್ನು ರುಚಿಸಿಕೊಳ್ಳಬೇಕು.

ತಲೆಮಾರುಗಳಿಂದ ಸಮುದಾಯದ ಭಾಗವಾಗಿರುವ ಖಾದ್ಯವನ್ನು ಸವಿಯುವುದರಲ್ಲಿ ಇರುವ ಖುಷಿಯೇ ಬೇರೆ.. ನೀವು ಹೋಟೆಲ್ ಗಳು, ಅಥವಾ ಕೆಫೆಗಳಿಗಷ್ಟೇ ನಿಮ್ಮನ್ನು ಸೀಮಿತಗೊಳಿಸಿಕೊಂಡರೆ, ನಿಜವಾದ ಅನುಭವವನ್ನು ಕಳೆದುಕೊಳ್ಳಬಹುದು. ಒಂದು ಸ್ಥಳದ ನಿಜವಾದ ಸಾರವು ಅಲ್ಲಿನ ಜನರು ಪ್ರತಿದಿನ ಏನು ತಿನ್ನುತ್ತಾರೆ ಎಂಬುದರಲ್ಲಿರುತ್ತದೆ. ಹಾಗಾದರೆ ನಿಮ್ಮ ಮುಂದಿನ ಪ್ರವಾಸದಲ್ಲಿ ಸ್ಥಳೀಯ ಆಹಾರವನ್ನು ಸವಿಯಬೇಕೆಂದುಕೊಂಡರೆ ಈ ಸರಳ ಸಲಹೆಗಳು ತಪ್ಪದೇ ಪಾಲಿಸಿ.

ಪ್ರವಾಸಕ್ಕೂ ಮುನ್ನ ಸಂಶೋಧನೆ ಮಾಡಿ

ನೀವು ಎಲ್ಲಿಗೆ ಬೇಕಾದರೂ ಪ್ರಯಾಣಿಸುವ ಮೊದಲು, ಸ್ಥಳೀಯ ಆಹಾರದ ಬಗ್ಗೆ ತಿಳಿದುಕೊಳ್ಳುವುದಕ್ಕಾಗಿಯೂ ಸ್ವಲ್ಪ ಸಮಯವನ್ನು ನಿಗದಿಪಡಿಸಿ. ಆ ಪ್ರದೇಶದಲ್ಲಿ ಹೆಸರುವಾಸಿಯಾಗಿರುವ ಸಾಂಪ್ರದಾಯಿಕ ಖಾದ್ಯಗಳನ್ನು ಹುಡುಕಿ. ಈ ಮೊದಲು ಅಲ್ಲಿಗೆ ಭೇಟಿ ನೀಡಿದ ಪ್ರವಾಸಿಗರು ಮಾತ್ರವಲ್ಲದೆ ಸ್ಥಳೀಯರು ಶಿಫಾರಸು ಮಾಡುವ ರೆಸ್ಟೋರೆಂಟ್‌ಗಳು ಅಥವಾ ತಿನಿಸುಗಳ ಹೆಸರುಗಳನ್ನು ಗಮನಿಸಿ. ಈಗಂತೂ ಸೋಶಿಯಲ್‌ ಮೀಡಿಯಾ ಯುಗವಾಗಿರುವುದರಿಂದ ಯೂಟ್ಯೂಬ್‌ ಅಥವಾ ಇನ್ಸ್ಟಾದಲ್ಲಿ ಟ್ರಾವೆಲ್‌ ವ್ಲಾಗರ್ಸ್‌ ಹಂಚಿಕೊಂಡಿರುವ ವಿಡಿಯೋಗಳಿದ್ದರೆ ಅವರು ಹೇಳಿರುವ ಸ್ಥಳೀಯ ಆಹಾರದ ಬಗ್ಗೆಯೂ ತಿಳಿದುಕೊಳ್ಳಿ. ಇದು ನಿಮ್ಮ ಪ್ರವಾಸವನ್ನು ಇನ್ನೂ ಹಿತಕರವಾಗಿಸಲಿದೆ.

ಸ್ಥಳೀಯ ಆಹಾರವನ್ನು ಸವಿಯಲು ಬೀದಿಗೆ ಇಳಿದುನೋಡಿ

ಶುಚಿ ರುಚಿಯಾದ ಆಹಾರ ಬರಿಯ ಬಿಗ್‌ ಬಜೆಟ್ ರೆಸ್ಟೋರೆಂಟ್‌ , ಹೊಟೇಲ್‌ ಗಳಲ್ಲಿ ಮಾತ್ರ ಲಭ್ಯವಾಗುವುದೆಂದುಕೊಂಡರೆ, ಅದು ನಿಮ್ಮ ತಪ್ಪು ತಿಳುವಳಿಕೆ. ಸ್ಥಳೀಯ ಆಹಾರದ ಸವಿಯನ್ನು ಉಣ್ಣಬಯಸುವವರು ನೀವಾದರೆ ಪಾದಚಾರಿ ಮಾರ್ಗ, ತಳ್ಳುವ ಗಾಡಿಯಲ್ಲಿ ಸಿಗುವ ಆಹಾರದಲ್ಲೂ ಹೊಸತನದ ರುಚಿಯಿರುತ್ತದೆ. ಗ್ಯಾಂಗ್‌ಟಾಕ್‌ನ ಆವಿಯಲ್ಲಿ ಬೇಯಿಸಿದ ಮೊಮೋಸ್‌ ಗಳಿಂದ ಇಂದೋರ್‌ನ ಮಸಾಲೆಯುಕ್ತ ಪಾನಿ ಪುರಿಯವರೆಗೆ, ಬೀದಿ ಆಹಾರವು ಸ್ಥಳೀಯ ರುಚಿಯನ್ನ ಉಣಬಡಿಸುತ್ತವೆ, ನಾಲಿಗೆ ರುಚಿಯನ್ನು ಹೆಚ್ಚಿಸುತ್ತವೆ.

ಗೂಗಲ್‌ ಬದಲು, ಸ್ಥಳೀಯರಿಂದಲೇ ಮಾಹಿತಿ ತಿಳಿಯಿರಿ

ರೇಟಿಂಗ್‌ ನ ಹಿಂದೆ ಬಿದ್ದು ಆಹಾರವನ್ನು ಅರಸಿ ರೆಸ್ಟೋರೆಂಟ್ ಗಳಿಗೆ ಹೋಗುವ ಬದಲು‌ ಸ್ಥಳೀಯರು ನಿಮಗೆ ಆಹಾರ ಜ್ಞಾನದ ಅತ್ಯುತ್ತಮ ಮೂಲ ಎಂಬುದನ್ನು ತಿಳಿದುಕೊಳ್ಳಬೇಕಾಗುತ್ತದೆ. ಸ್ಥಳೀಯ ಆಹಾರದ ಬಗ್ಗೆ ತಿಳಿಯಲು ನಿಮ್ಮ ಹೋಟೆಲ್ ಮಾಲಿಕ,ಪಕ್ಕದ ಅಂಗಡಿಯವರು, ನಿಮ್ಮ ಕ್ಯಾಬ್ ಚಾಲಕ ಅಥವಾ ನಿಮ್ಮ ಅತಿಥಿಗೃಹದ ಆತಿಥೇಯರೊಂದಿಗೆ ಮಾತನಾಡುತ್ತಾ, ಮಾಹಿತಿಯನ್ನು ಕಲೆ ಹಾಕಿ. ಸ್ಥಳೀಯರಿಗಿಂತ ಹೆಚ್ಚಿನ ಆ ಪ್ರದೇಶದ ಆಹಾರ ಕ್ರಮ ಬೇರೆ ಇನ್ಯಾರಿಗೆ ಗೊತ್ತಿದ್ದೀತು ಹೇಳಿ ?

ಜನಸಂದಣಿಯಿಂದ ದೂರ ಉಳಿಯಬೇಡಿ

ಸಾಮಾನ್ಯವಾಗಿ ಹೊಟೇಲ್‌ ಗಳಿಗೆ ಭೇಟಿ ನೀಡುವ ವೇಳೆ, ಜನಸಂದಣಿಯಿದ್ದರೆ ಹೆಚ್ಚಿನ ಸಮಯ ವ್ಯಯಿಸುವುದ್ಯಾಕೆ ಎಂದು ಬೇರೊಂದು ಹೊಟೇಲ್‌ ಅರಸಿ ಹೋಗಿಬಿಡುತ್ತೇವೆ. ಆದರೆ ಗಮನಿಸಬೇಕಿರುವ ಅಂಶವೆಂದರೆ, ಹೆಚ್ಚಿನ ಜನಸಂದಣಿಯುಳ್ಳ ಹೊಟೇಲ್‌ ಗಳಲ್ಲಿ ತಾಜಾ ಹಾಗೂ ರುಚಿಕರ ಆಹಾರ ಲಭ್ಯವಾಗುವುದೆಂಬುದನ್ನು ಅರಿತುಕೊಳ್ಳಬೇಕು.

ಸ್ಥಳೀಯರು ಬಳಸುವ ಆಹಾರ ಸಂಬಂಧಿತ ಕೆಲವು ಪದಗಳನ್ನು ಕಲಿಯಿರಿ

ಸ್ಥಳೀಯ ಆಹಾರಗಳನ್ನು ಅಲ್ಲಿ ಬಳಸುವ ಪದಗಳ ಜ್ಞಾನವನ್ನು ಹೊಂದುವುದು ಅತೀ ಅಗತ್ಯ. ಇದರಿಂದ ಸ್ಥಳೀಯರೊಂದಿಗೆ ಬೆರೆಯಲು ಅವಕಾಶ ಕಲ್ಪಿಸಿದಂತಾಗುತ್ತದೆ. ಉದಾಹರಣೆಗೆ, ದಕ್ಷಿಣ ಭಾರತದಲ್ಲಿ, ಇಡಿಯಪ್ಪಮ್ ಮತ್ತು ಅಪ್ಪಂ ನಡುವಿನ ವ್ಯತ್ಯಾಸವನ್ನು ತಿಳಿದುಕೊಳ್ಳುವುದರಿಂದ ನಿಮಗೆ ಬೇಕಾದುದನ್ನು ಆರ್ಡರ್ ಮಾಡುವುದು ಸುಲಭವಾಗುತ್ತದೆ.

ಒಟ್ಟಿನಲ್ಲಿ ಪ್ರಯಾಣ, ಪ್ರವಾಸದ ವೇಳೆ ನೀವು ಏನು ತಿನ್ನುತ್ತೀರಿ ಎಂಬಷ್ಟೇ ಪ್ರಾಮುಖ್ಯತೆ ನೀವು ಎಲ್ಲಿ ಸೇವಿಸುತ್ತೀರಿ ಎಂಬುದರ ಮೇಲೂ ಅವಲಂಬಿತವಾಗಿರುತ್ತದೆ. ಆದ್ದರಿಂದ, ಸಾಮಾನ್ಯ ಜಾಗತಿಕ ಕಟ್ಟುಪಾಡುಗಳನ್ನು ಬಿಟ್ಟು ಸ್ಥಳೀಯರು ಏನು ಮಾಡುತ್ತಾರೆ, ಅವರ ಜೀವನಶೈಲಿ, ಆಹಾರ ಕ್ರಮಗಳ ಬಗ್ಗೆಯೂ ತಿಳಿದುಕೊಳ್ಳಿ. ಆಗಷ್ಟೇ ನಿಮ್ಮ ಪ್ರವಾಸ ಪರಿಪೂರ್ಣವಾಗೋದು.