ಅಮರನಾಥ ಯಾತ್ರೆ ಸುಖಮಯವಾಗಲು ನಿಮಗೊಂದಿಷ್ಟು ಮಾತ್ರೆ

ಶಿವ ಭಕ್ತರು ಕಾತುರದಿಂದ ಕಾಯುತ್ತಿದ್ದ ವಾರ್ಷಿಕ ಅಮರನಾಥ ಯಾತ್ರೆ ಜುಲೈ ತಿಂಗಳ 3 ನೇ ತಾರೀಖಿನಿಂದ ಪ್ರಾರಂಭವಾಗುತ್ತಿದೆ. ಈ ಪವಿತ್ರ ಪ್ರಯಾಣವು ಯಾತ್ರಿಕರನ್ನು ಜಮ್ಮು ಮತ್ತು ಕಾಶ್ಮೀರದಲ್ಲಿರುವ ಅಮರನಾಥ ಗುಹೆಗೆ ಕರೆದೊಯ್ಯುತ್ತದೆ. ಇಲ್ಲಿ ನೈಸರ್ಗಿಕವಾಗಿ ರೂಪುಗೊಂಡ ಮಂಜುಗಡ್ಡೆಯ ಶಿವಲಿಂಗವನ್ನು ಪೂಜಿಸಲಾಗುತ್ತದೆ. ಅಲ್ಲಿ ಶಿವನಿದ್ದಾನೆ ಎಂಬ ನಂಬಿಕೆಗೆ ಪುಷ್ಠಿ ನೀಡುವ ಸ್ಥಳವಿದು. ಹಿಮದಿಂದ ಶಿವಲಿಂಗವು ರಚನೆಯಾಗುವುದರಿಂದ ಇದನ್ನು 'ಬಾಬಾ ಬರ್ಫಾನಿ' ಎಂದೂ ಕರೆಯುತ್ತಾರೆ. ಈ ಶಿವಲಿಂಗವನ್ನು ಶ್ರದ್ಧಾ ಭಕ್ತಿಯಿಂದ ಮತ್ತು ಹೃದಯದಿಂದ ನೋಡುವ ಭಕ್ತನು ಹುಟ್ಟುಸಾವಿನ ಬಂಧನದಿಂದ ಮುಕ್ತನಾಗುತ್ತಾನೆ ಎನ್ನುವ ನಂಬಿಕೆಯಿದೆ. ಈ ಯಾತ್ರೆ ಕೈಗೊಳ್ಳಲು ದೇಶದ ಮೂಲೆ ಮೂಲೆಗಳಿಂದ ಅಲ್ಲದೆ, ವಿದೇಶಗಳಿಂದ ಕೂಡ ಸಾಕಷ್ಟು ಜನರು ಬರುತ್ತಾರೆ. ಆಗಸ್ಟ್ 9ರವರೆಗೆ ಅಮರನಾಥ ಯಾತ್ರೆಗೆ ಅವಕಾಶವಿದ್ದು, ಯಾತ್ರಿಕರು ಶ್ರೀ ಅಮರನಾಥ ದೇಗುಲ ಮಂಡಳಿಯ ಅಧಿಕೃತ ವೆಬ್‌ಸೈಟ್ ಮೂಲಕ ಆಫ್‌ಲೈನ್ ಮತ್ತು ಆನ್‌ಲೈನ್‌ನಲ್ಲಿ ನೋಂದಾಯಿಸಿಕೊಳ್ಳಬಹುದು. ನೀವೂ ಕೂಡ ಅಮರನಾಥ ಯಾತ್ರೆಯ ಬಗ್ಗೆ ಯೋಚಿಸುತ್ತಿದ್ದರೆ, ಅಥವಾ ಈಗಾಗಲೇ ಹೊರಡಲು ಸಿದ್ಧತೆ ನಡೆಸುತ್ತಿದ್ದರೆ, ಯಾತ್ರೆಗೆ ಮುನ್ನ ನೀವು ಪ್ಯಾಕ್ ಮಾಡಿಕೊಳ್ಳಾಬೇಕಾದ ಅಗತ್ಯ ವಸ್ತುಗಳ ಪಟ್ಟಿ ಇಲ್ಲಿದೆ.

ವೈದ್ಯಕೀಯ ಕಿಟ್

ಅಮರನಾಥ ಯಾತ್ರೆಯ ಸಮಯದಲ್ಲಿ ಹವಾಮಾನ ಬದಲಾಗುತ್ತಲೇ ಇರುತ್ತದೆ. ಅಮರನಾಥ ಗುಹೆ ಜಮ್ಮು ಮತ್ತು ಕಾಶ್ಮೀರದಲ್ಲಿ 3888 ಮೀಟರ್ ಎತ್ತರದಲ್ಲಿರುವುದರಿಂದ ಪ್ರಯಾಣಿಸುವಾಗ ದೇಹದ ಮೇಲೆ ಪರಿಣಾಮ ಬೀರಬಹುದು. ಆದ್ದರಿಂದ ಸಾಮಾನ್ಯ ಜ್ವರ ಶೀತದ ಔಷಧಿಗಳನ್ನು ಮತ್ತು ಅವುಗಳ ಜೊತೆಗೆ ನೋವು ನಿವಾರಕ ಸ್ಪ್ರೇ, ಬ್ಯಾಂಡೇಜ್‌ಗಳನ್ನು ಒಯ್ಯಿರಿ. ನೀವು ಯಾವುದೇ ರೀತಿಯ ಔಷಧಿಗಳನ್ನು ತೆಗೆದುಕೊಳ್ಳುತ್ತಿದ್ದರೆ, ಆ ಔಷಧಿಗಳನ್ನು ನಿಮ್ಮ ಚೀಲದಲ್ಲಿ ಇರಿಸಿಕೊಳ್ಳಿ.

ದಾಖಲಾತಿಗಳು ಅತ್ಯಗತ್ಯ

ಅಮರನಾಥ ಯಾತ್ರೆಯ ಸಮಯದಲ್ಲಿ ಅಲ್ಲಲ್ಲಿ ಹಲವು ಚೆಕ್‌ಪೋಸ್ಟ್‌ಗಳಿವೆ. ಈ ಸ್ಥಳಗಳ ಮೂಲಕ ಹಾದುಹೋಗುವಾಗ, ನಿಮ್ಮ ಮಾನ್ಯ ಗುರುತಿನ ಚೀಟಿಯನ್ನು ತೋರಿಸುವುದು ಅವಶ್ಯಕ. ಇದಲ್ಲದೇ ಇದರೊಂದಿಗೆ, ನೀವು ಅನುಮತಿ ಪತ್ರವನ್ನು ಸಹ ತೋರಿಸಬೇಕು. ಆದ್ದರಿಂದ ಈ ವಸ್ತುಗಳನ್ನು ಸಣ್ಣ ಚೀಲದಲ್ಲಿ ಪ್ರತ್ಯೇಕವಾಗಿ ಇರಿಸಿ.. ಎಲ್ಲಿಯೂ ಬಿದ್ದು ಹೋಗದಂತೆ ಸುಲಭವಾಗಿ ಕೈಗೆ ಸಿಗಲು ಸಹಾಯಕವಾಗುವಂತೆ ಪ್ರತ್ಯೇಕ ಒಂದು ಸಣ್ಣ ಬ್ಯಾಗಿನಲ್ಲಿ ಇಟ್ಟುಕೊಂಡಿರಿ.

ನೀರಿನ ಬಾಟಲಿ:

ಅಮರನಾಥ ಯಾತ್ರೆಯಂಥ ಪ್ರಯಾಣದ ಸಮಯದಲ್ಲಿ ನಿಮ್ಮ ದೇಹದಲ್ಲಿ ನೀರಿನಂಶ ಇರುವುದು ಅತ್ಯಗತ್ಯ. ನೀವು ಬೆಟ್ಟ ಹತ್ತಿ ಪ್ರಯಾಣಿಸುವುದರಿಂದ ಬೇಗನೆ ದಣಿಯುವುದು ಸಾಮಾನ್ಯ. ಕೆಲವೊಮ್ಮೆ ನಿಮಗೆ ತುಂಬಾ ಬಾಯಾರಿಕೆಯಾಗುತ್ತದೆ. ಆದ್ದರಿಂದ, ಅಮರನಾಥ ಯಾತ್ರೆಗೆ ಹೋಗುವ ಮೊದಲು, ನೀವು ನಿಮ್ಮೊಂದಿಗೆ ನೀರಿನ ಬಾಟಲಿಯನ್ನು ಕೊಂಡೊಯ್ಯಬೇಕು. ಬಾಟಲಿಗಳು ಫ್ರೀಜ್ ಆಗದಂತೆ ನೋಡಿಕೊಳ್ಳಿ. ನೀರು ಬಿಸಿಯಾಗಿಯೇ ನಿಲ್ಲುವಂಥ ಒಳ್ಳೆ ಗುಣಮಟ್ಟದ ಥರ್ಮಸ್ ಬಾಟಲಿ ನಿಮ್ಮೊಂದಿಗಿರಲಿ.

ಟಾರ್ಚ್ ಮತ್ತು ಬ್ಯಾಟರಿ:

ಪ್ರಯಾಣದ ಸಮಯದಲ್ಲಿ ವಿದ್ಯುತ್ ಸೀಮಿತವಾಗಿರುವ ಅನೇಕ ಸ್ಥಳಗಳಿವೆ. ಅದಕ್ಕಾಗಿಯೇ ನಿಮ್ಮ ಅನುಕೂಲಕ್ಕಾಗಿ, ನೀವು ಟಾರ್ಚ್ ಮತ್ತು ಬ್ಯಾಟರಿಗಳನ್ನು ನಿಮ್ಮೊಂದಿಗೆ ಇಟ್ಟುಕೊಳ್ಳಬೇಕು.

ಬೆಚ್ಚಗಿನ ಬಟ್ಟೆಗಳು:

ಅಮರನಾಥ ಯಾತ್ರೆಯ ಸಮಯದಲ್ಲಿ ಕೆಲವೊಮ್ಮೆ ತಾಪಮಾನವು ತುಂಬಾ ಕಡಿಮೆಯಾಗುತ್ತದೆ. ಆದ್ದರಿಂದ, ನಿಮ್ಮೊಂದಿಗೆ ಛತ್ರಿ, ವಿಂಡ್‌ಚೀಟರ್, ರೇನ್‌ಕೋಟ್ ಮತ್ತು ಒಳ್ಳೆ ಗುಣಮಟ್ಟದ ನೀರು ಒಳಗೆ ಹೋಗದಂಥ ಬೂಟುಗಳನ್ನು ಇಟ್ಟುಕೊಳ್ಳಿ. ನಿಮ್ಮ ಬಳಿ ಆಹಾರ ಪದಾರ್ಥಗಳಿದ್ದರೆ,ಅವುಗಳಿಗೂ ನೀರು ಒಳಗೆ ಹೋಗದಂಥ ಒಳ್ಳೆಯ ಬ್ಯಾಗ್​​​ ಖರೀದಿಸಿ.

ಅಮರನಾಥ ಯಾತ್ರೆಯ ಆನ್‌ಲೈನ್​ ನೋಂದಣಿ ಪ್ರಕ್ರಿಯೆಯ ಬಗ್ಗೆ ತಿಳಿದಿಲ್ಲವೆಂದಾದರೆ ಈ ಕೆಳಗೆ ಮಾಹಿತಿಯನ್ನು ನೀಡಲಾಗಿದೆ.

ಅಮರನಾಥ ಯಾತ್ರೆಯ ಆನ್‌ಲೈನ್ ನೋಂದಣಿ ಪ್ರಕ್ರಿಯೆ:

ಶ್ರೀ ಅಮರನಾಥ ದೇಗುಲ ಮಂಡಳಿಯ ಅಧಿಕೃತ ವೆಬ್‌ಸೈಟ್‌ಗೆ ಭೇಟಿ ನೀಡಿ ಮತ್ತು ಆನ್‌ಲೈನ್ ಸೇವೆಗಳ ಮೇಲೆ ಕ್ಲಿಕ್ ಮಾಡಿ. ಟ್ರಿಪ್ ಮೆನುವಿನಲ್ಲಿ ಟ್ರಿಪ್ ನೋಂದಣಿ ಮೇಲೆ ಕ್ಲಿಕ್ ಮಾಡಿ ಮತ್ತು ಎಲ್ಲಾ ಸೂಚನೆಗಳನ್ನು ಎಚ್ಚರಿಕೆಯಿಂದ ಓದಿ. ನಿಯಮಗಳನ್ನು ಒಪ್ಪಿಕೊಂಡು ನೋಂದಣಿಗೆ ಮುಂದುವರಿಯಿರಿ.

ನಿಮ್ಮ ಹೆಸರು, ಆಧಾರ್ ಸಂಖ್ಯೆ, ಮೊಬೈಲ್ ಸಂಖ್ಯೆ ಮತ್ತು ನಿಮ್ಮ ಪ್ರಯಾಣದ ದಿನಾಂಕದಂಥ ನಿಮ್ಮ ವೈಯಕ್ತಿಕ ವಿವರಗಳನ್ನು ನಮೂದಿಸಿ. ನಿಮ್ಮ ಪಾಸ್‌ಪೋರ್ಟ್ ಗಾತ್ರದ ಫೋಟೋ ಮತ್ತು ಆರೋಗ್ಯ ಪ್ರಮಾಣಪತ್ರದ ಸ್ಕ್ಯಾನ್ ಮಾಡಿದ ಪ್ರತಿಯನ್ನು ಅಪ್‌ಲೋಡ್ ಮಾಡಿ.

ನಿಮ್ಮ ನೋಂದಾಯಿತ ಸಂಖ್ಯೆಗೆ ಬಂದ OTP ಯನ್ನು ಹಂಚಿಕೊಳ್ಳುವ ಮೂಲಕ ನಿಮ್ಮ ಮೊಬೈಲ್ ಪರಿಶೀಲಿಸಿ. ನಂತರ ರೂ. 220 ನೋಂದಣಿ ಶುಲ್ಕವನ್ನು ಪಾವತಿಸಿ.

ಪಾವತಿ ಪೂರ್ಣಗೊಂಡ ನಂತರ ನೀವು ಪೋರ್ಟಲ್‌ನಿಂದ ನಿಮ್ಮ ಪ್ರಯಾಣ ನೋಂದಣಿ ಪರವಾನಗಿಯನ್ನು ಡೌನ್‌ಲೋಡ್ ಮಾಡಬಹುದು.