ನಾವು ರೈಲು ಬಿಡ್ತಿಲ್ಲ...ನೀವು ರೈಲಿನಲ್ಲಿ ವಿದೇಶಕ್ಕೆ ಹೋಗಬಹುದು!

ಫಾರಿನ್ ಟ್ರಿಪ್ ಹೋಗಬೇಕು ಎಂಬುದು ಸಾಕಷ್ಟು ಜನರ ಕನಸು. ಆದರೆ, ಹೀಗೆ ಪ್ರವಾಸದ ಕನಸು ಹೊಂದಿದ್ದರೂ ಕೆಲವೊಮ್ಮೆ ದುಬಾರಿ ಎಂಬ ಕಾರಣಕ್ಕೆ ಕೆಲವರು ತಮ್ಮ ಆಸೆಯನ್ನು ಅರ್ಥದಲ್ಲೇ ಬಿಟ್ಟು ಬಿಡುತ್ತಾರೆ. ಆದರೆ ಅಗ್ಗದ ಸಾರಿಗೆ ಎಂದೇ ಖ್ಯಾತಿ ಪಡೆದಿರುವ ರೈಲು ಪ್ರಯಾಣದ ಮೂಲಕ ನೀವು ವಿದೇಶಕ್ಕೆ ಪ್ರಯಾಣ ಮಾಡಬಹುದು. ಇಂಟರ್ ನ್ಯಾಷನಲ್ ಏರ್ ಪೋರ್ಟ್ ಗಳ ಹಾಗೆ ಇಂಟರ್ ನ್ಯಾಷನಲ್ ರೈಲ್ವೆ ನಿಲ್ದಾಣಗಳಿವೆ. ವಿದೇಶಕ್ಕೆ ಆಕಾಶದಲ್ಲಿ, ನೀರಿನಲ್ಲಿ, ಬೈ ರೋಡ್ ಮಾತ್ರ ಹೋಗೋಕೆ ಸಾಧ್ಯ ಅಂತ ನೀವು ತಿಳಿದಿದ್ದರೆ ನಿಮಗಿದು ಅಚ್ಚರಿಯ ವಿಷಯ. ನೀವು ರೈಲಿನಲ್ಲೂ ವಿದೇಶಕ್ಕೆ ಪಯಣಿಸಬಹುದು. ಇತರ ದೇಶಗಳಿಗೆ ಸಂಪರ್ಕ ಕಲ್ಪಿಸುವ ಭಾರತದ ಪ್ರಮುಖ ರೈಲ್ವೆ ನಿಲ್ದಾಣಗಳು ಯಾವುದು ಎಂಬ ವಿವರಗಳು ನಿಮಗೆ ಈ ಲೇಖನದಲ್ಲಿ ಸಿಗುತ್ತದೆ..

ನೀವು ರೈಲು ಪ್ರಯಾಣ ಪ್ರಿಯರಾಗಿದ್ದರೆ, ಭಾರತದಿಂದ ಬೇರೆ ದೇಶಕ್ಕೆ ರೈಲಿನ ಮೂಲಕ ಪ್ರಯಾಣಿಸುವುದನ್ನು ಊಹಿಸಿಕೊಳ್ಳಿ. ಇದು ಕೇವಲ ಕನಸಲ್ಲ - ಇದು ವಾಸ್ತವ. ಹಾಗಂತ ನೀವು ರೈಲಿನಲ್ಲೇ ಅಮೆರಿಕ, ಲಂಡನ್ ಆಸ್ಟ್ರೇಲಿಯಾಗೆಲ್ಲ ಹೋಗಬಹುದೆಂದು ಭ್ರಮಿಸಬೇಡಿ. ಏಳು ರಾಷ್ಟ್ರಗಳೊಂದಿಗೆ ಗಡಿಗಳನ್ನು ಹಂಚಿಕೊಳ್ಳುವ ಭಾರತವು ತನ್ನ ಕೆಲವು ನೆರೆಹೊರೆಯ ರಾಷ್ಟ್ರಗಳಿಗೆ ರೈಲು ಮಾರ್ಗಗಳನ್ನು ನೀಡುತ್ತದೆ. ಇದು ವಿಶಿಷ್ಟವಾದ ಗಡಿಯಾಚೆಗಿನ ಪ್ರಯಾಣದ ಅನುಭವವನ್ನು ಒದಗಿಸುತ್ತದೆ. ಅಂತಾರಾಷ್ಟ್ರೀಯ ತಾಣಗಳಿಗೆ ಗೇಟ್‌ವೇಗಳಾಗಿ ಕಾರ್ಯನಿರ್ವಹಿಸುವ ಐದು ಭಾರತೀಯ ರೈಲು ನಿಲ್ದಾಣಗಳು ಇಲ್ಲಿವೆ.

ಹಲ್ದಿಬರಿ ರೈಲು ನಿಲ್ದಾಣ:

ಪಶ್ಚಿಮ ಬಂಗಾಳದ ಬಾಂಗ್ಲಾದೇಶ ಗಡಿಯಿಂದ ಕೇವಲ 4.5 ಕಿ.ಮೀ ದೂರದಲ್ಲಿರುವ ಹಲ್ದಿಬರಿ ರೈಲು ನಿಲ್ದಾಣವು ಚಿಲ್ಹತಿ ನಿಲ್ದಾಣದ ಮೂಲಕ ಭಾರತವನ್ನು ಬಾಂಗ್ಲಾದೇಶದೊಂದಿಗೆ ಸಂಪರ್ಕಿಸುತ್ತದೆ. ಡಿಸೆಂಬರ್ 2020 ರಿಂದ ಕಾರ್ಯನಿರ್ವಹಿಸುತ್ತಿರುವ ಮಿತಾಲಿ ಎಕ್ಸ್‌ಪ್ರೆಸ್ 2021 ರಲ್ಲಿ ತನ್ನ ಸೇವೆಯನ್ನು ಪ್ರಾರಂಭಿಸಿತು, ಇದು ನ್ಯೂ ಜಲ್ಪೈಗುರಿ ಜಂಕ್ಷನ್‌ನಿಂದ ಢಾಕಾಗೆ ಚಲಿಸುತ್ತದೆ ಮತ್ತು ಹಲ್ದಿಬರಿಯಲ್ಲಿ ನಿಲ್ದಾಣವನ್ನು ಹೊಂದಿದೆ.

ಜೈ ನಗರ ರೈಲು ನಿಲ್ದಾಣ:

ಬಿಹಾರದ ಮಧುಬನಿ ಜಿಲ್ಲೆಯಲ್ಲಿರುವ ಜೈ ನಗರವು ಭಾರತ-ನೇಪಾಳ ಗಡಿಯಿಂದ ಕೇವಲ 4 ಕಿ.ಮೀ ದೂರದಲ್ಲಿದೆ. ಈ ನಿಲ್ದಾಣದಿಂದ ನೀವು ನೇಪಾಳಕ್ಕೆ ಸುಲಭವಾಗಿ ಪ್ರಯಾಣಿಸಬಹುದು. ಸ್ಥಳೀಯರು ಮತ್ತು ಇತರ ಪ್ರಯಾಣಿಕರು ನೇಪಾಳಕ್ಕೆ ಹೋಗಲು ಈ ನಿಲ್ದಾಣವನ್ನು ಬಳಸುತ್ತಾರೆ. ಇದು ನೇಪಾಳದ ಜನಕಪುರದಲ್ಲಿರುವ ಕುರ್ತಾ ನಿಲ್ದಾಣಕ್ಕೆ ಸಂಪರ್ಕ ಕಲ್ಪಿಸುತ್ತದೆ. ಪ್ರಯಾಣಿಕ ರೈಲು ಸೇವೆಗಳ ಪುನಃಸ್ಥಾಪನೆಯು ಗಡಿಯಾಚೆಗಿನ ಪ್ರಯಾಣವನ್ನು ಹೆಚ್ಚು ಅನುಕೂಲಕರವಾಗಿಸಿದೆ. ಪ್ರಯಾಣಿಕರು ಪಾಸ್‌ಪೋರ್ಟ್‌ಗಳು ಅಥವಾ ವೀಸಾಗಳ ಅಗತ್ಯವಿಲ್ಲದೆ ಪ್ರಯಾಣಿಸಲು ಅನುವು ಮಾಡಿಕೊಡುತ್ತದೆ.

ಸಿಂಘಾಬಾದ್ ರೈಲು ನಿಲ್ದಾಣ:
ಪಶ್ಚಿಮ ಬಂಗಾಳದ ಮಾಲ್ಡಾ ಜಿಲ್ಲೆಯಲ್ಲಿ ನೆಲೆಗೊಂಡಿರುವ ಸಿಂಘಾಬಾದ್, ಬಾಂಗ್ಲಾದೇಶದ ರೋಹನ್‌ಪುರ ನಿಲ್ದಾಣಕ್ಕೆ ಸಂಪರ್ಕ ಕಲ್ಪಿಸುವ ಮೂಲಕ ಭಾರತ ಮತ್ತು ಬಾಂಗ್ಲಾದೇಶದ ನಡುವೆ ಸರಕು ಸಾಗಣೆಯನ್ನು ಪ್ರಾಥಮಿಕವಾಗಿ ಸುಗಮಗೊಳಿಸುತ್ತದೆ. ಇದು ನೇಪಾಳಕ್ಕೆ ಸರಕು ಸಾಗಣೆಯನ್ನು ಸಹ ಬೆಂಬಲಿಸುತ್ತದೆ, ಇದು ಗಡಿಯಾಚೆಗಿನ ವ್ಯಾಪಾರಕ್ಕೆ ಪ್ರಮುಖ ಕೇಂದ್ರವಾಗಿದೆ. ಈಗ ಯಾವುದೇ ಪ್ರಯಾಣಿಕ ರೈಲುಗಳು ಇಲ್ಲಿ ನಿಲ್ಲುವುದಿಲ್ಲ ಈಗ ಸರಕು ಸಾಗಣೆ ರೈಲು ಮಾತ್ರ ಬಾಂಗ್ಲಾದೇಶಕ್ಕೆ ಇಲ್ಲಿಂದ ಚಲಿಸುತ್ತವೆ.

ಪೆಟ್ರಾಪೋಲ್ ರೈಲು ನಿಲ್ದಾಣ:

ಪಶ್ಚಿಮ ಬಂಗಾಳದ ಉತ್ತರ 24 ಪರಗಣ ಜಿಲ್ಲೆಯಲ್ಲಿರುವ ಪೆಟ್ರಾಪೋಲ್ ಭಾರತದ ಅತ್ಯಂತ ಜನನಿಬಿಡ ಗಡಿ ರೈಲು ನಿಲ್ದಾಣವಾಗಿದೆ. ಇದು ಕೋಲ್ಕತ್ತಾವನ್ನು ಬಾಂಗ್ಲಾದೇಶದ ಖುಲ್ನಾಗೆ ಸಂಪರ್ಕಿಸುವ ಬಂಧನ್ ಎಕ್ಸ್‌ಪ್ರೆಸ್‌ನ ಆರಂಭಿಕ ಹಂತವಾಗಿ ಕಾರ್ಯನಿರ್ವಹಿಸುತ್ತದೆ. ಈ ನಿಲ್ದಾಣವು ಪ್ರಯಾಣಿಕ ಮತ್ತು ಸರಕು ಸೇವೆಗಳೆರಡಕ್ಕೂ ನಿರ್ಣಾಯಕ ಕೇಂದ್ರವಾಗಿದೆ. ಆದರೆ ಪ್ರಯಾಣಿಕರು ಈ ಪ್ರಯಾಣವನ್ನು ಕೈಗೊಳ್ಳಲು ಮಾನ್ಯ ಪಾಸ್‌ಪೋರ್ಟ್‌ಗಳು ಮತ್ತು ವೀಸಾಗಳನ್ನು ಹೊಂದಿರಬೇಕು.

ರಾಧಿಕಾಪುರ ರೈಲು ನಿಲ್ದಾಣ:

ಪಶ್ಚಿಮ ಬಂಗಾಳದ ಉತ್ತರ ದಿನಾಜ್‌ಪುರ ಜಿಲ್ಲೆಯಲ್ಲಿರುವ ರಾಧಿಕಾಪುರ ರೈಲು ನಿಲ್ದಾಣವು ಮುಖ್ಯವಾಗಿ ಭಾರತ ಮತ್ತು ಬಾಂಗ್ಲಾದೇಶದ ನಡುವಿನ ವ್ಯಾಪಾರಕ್ಕಾಗಿ ಬಳಸಲ್ಪಡುತ್ತದೆ. ಇದು ಬಾಂಗ್ಲಾದೇಶದ ಬೀರಲ್ ರೈಲ್ವೆ ನಿಲ್ದಾಣಕ್ಕೆ ನೇರವಾಗಿ ಸಂಪರ್ಕ ಕಲ್ಪಿಸುತ್ತದೆ, ಭಾರತದ ಅಸ್ಸಾಂ ಮತ್ತು ಬಿಹಾರ ರಾಜ್ಯಗಳ ನಡುವಿನ ವ್ಯಾಪಾರ ಮಾರ್ಗಗಳನ್ನು ಬೆಂಬಲಿಸುತ್ತದೆ. ಸರಕು ಸಾಗಣೆಯ ಮೇಲೆ ಕೇಂದ್ರೀಕರಿಸಿದ್ದರೂ, ರಾಧಿಕಾಪುರವು ಎರಡು ರಾಷ್ಟ್ರಗಳ ನಡುವೆ ಆರ್ಥಿಕ ಸಂಬಂಧಗಳನ್ನು ಬೆಳೆಸುವಲ್ಲಿ ಪ್ರಮುಖ ಪಾತ್ರ ವಹಿಸುತ್ತದೆ.

ಜೋಗ್ಬನಿ ರೈಲು ನಿಲ್ದಾಣ:

ಈ ನಿಲ್ದಾಣದ ಮೂಲಕ ಭಾರತೀಯ ಪ್ರಯಾಣಿಕರು ಕಾಲ್ನಡಿಗೆ ಮೂಲಕ ನೇಪಾಳವನ್ನು ತಲುಪಬಹುದು. ಇಲ್ಲಿಂದ ನೇಪಾಳಕ್ಕೆ ತುಂಬಾ ಕಡಿಮೆ ದೂರವಿರುವುದರಿಂದ ನೇಪಾಳಕ್ಕೆ ಹೋಗಲು ವೀಸಾ, ಪಾಸ್‌ಪೋರ್ಟ್ ಕೂಡ ಅಗತ್ಯವಿಲ್ಲ ನಡೆದುಕೊಂಡೇ ಹೋಗಬಹುದು. ಇದನ್ನು ಭಾರತದ ಕೊನೆಯ ನಿಲ್ದಾಣವೆಂದು ಪರಿಗಣಿಸಲಾಗಿದೆ.