ಬೆಂಗಳೂರು–ಎರ್ನಾಕುಲಂ ವಂದೇ ಭಾರತ್‌ಗೆ 16 ಬೋಗಿಗಳು

ಓಣಂ ಹಬ್ಬದ ಪ್ರಯಾಣಿಕರ ದಟ್ಟಣೆಯನ್ನು ಗಮನದಲ್ಲಿಟ್ಟುಕೊಂಡು ಭಾರತೀಯ ರೈಲ್ವೇ ಬೆಂಗಳೂರು–ಎರ್ನಾಕುಲಂ ವಂದೇ ಭಾರತ್ ಎಕ್ಸ್‌ಪ್ರೆಸ್‌ಗೆ ಮಹತ್ವದ ಸಾಮರ್ಥ್ಯ ಹೆಚ್ಚಳಕ್ಕೆ ಅನುಮೋದನೆ ನೀಡಿದೆ. ಪ್ರಸ್ತುತ ಸಂಚರಿಸುತ್ತಿರುವ 8 ಬೋಗಿಗಳ ರೈಲಿನ ಬದಲಿಗೆ ಮುಂದಿನ ವಾರದಿಂದ 16 ಬೋಗಿಗಳ ರೈಲು ಸೇವೆ ಆರಂಭವಾಗಲಿದ್ದು, ಆಸನ ಸಾಮರ್ಥ್ಯ 530ರಿಂದ 1,128ಕ್ಕೆ ಏರಿಕೆಯಾಗಲಿದೆ. ಇದರಿಂದ ಕರ್ನಾಟಕ ಮತ್ತು ಕೇರಳ ನಡುವಿನ ಪ್ರಯಾಣಿಕರಿಗೆ ಹೆಚ್ಚಿನ ಸಂಖ್ಯೆಯಲ್ಲಿ ದೃಢೀಕೃತ ಟಿಕೆಟ್‌ಗಳು ಲಭ್ಯವಾಗುವ ನಿರೀಕ್ಷೆಯಿದೆ.

ಓಣಂ ಹಿನ್ನೆಲೆಯಲ್ಲಿ ಈಗಾಗಲೇ ಟಿಕೆಟ್‌ಗಳಿಗೆ ಭಾರೀ ಬೇಡಿಕೆ ಕಂಡುಬಂದಿದೆ. ಆಗಸ್ಟ್‌ 21 ಮತ್ತು 22ರಂದು ಬೆಂಗಳೂರು–ಎರ್ನಾಕುಲಂ ಮಾರ್ಗದ ಚೇರ್ ಕಾರ್ ವಿಭಾಗದಲ್ಲಿ ಕಾಯುವ ಪಟ್ಟಿಯ ಸಂಖ್ಯೆ 100 ದಾಟಿದ್ದು, ಆಗಸ್ಟ್‌ 29ರಿಂದ 31ರವರೆಗಿನ ಹಿಂತಿರುಗುವ ಸೇವೆಗಳ ಟಿಕೆಟ್‌ಗಳು ಬಹುತೇಕ ಭರ್ತಿಯಾಗಿವೆ. ಹೆಚ್ಚುವರಿ ಬೋಗಿಗಳ ಸೇರ್ಪಡೆಯಿಂದ ಈ ಒತ್ತಡ ಕಡಿಮೆಯಾಗಲಿದೆ ಎಂದು ರೈಲ್ವೇ ಅಧಿಕಾರಿಗಳು ವಿಶ್ವಾಸ ವ್ಯಕ್ತಪಡಿಸಿದ್ದಾರೆ. ಇದೇ ವೇಳೆ ಪ್ರತ್ಯೇಕ ಎರ್ನಾಕುಲಂ–ತಿರುವನಂತಪುರಂ ವಂದೇ ಭಾರತ್ ರೈಲು ಸೇವೆಗೆ ಸಲ್ಲಿಸಿದ್ದ ಪ್ರಸ್ತಾವವನ್ನು ರೈಲ್ವೇ ಮಂಡಳಿ ಈ ಹಂತದಲ್ಲಿ ಅನುಮೋದಿಸಿಲ್ಲ.