ವಿದೇಶ ಪ್ರವಾಸ ಕೈಗೊಳ್ಳುವ ಪ್ರಯಾಣಿಕರಿಗೆ ನಿರಂತರ ಸಂಪರ್ಕ ಸೌಲಭ್ಯ ಒದಗಿಸುವ ಉದ್ದೇಶದಿಂದ ಏರ್ ಇಂಡಿಯಾ ಮತ್ತು ಟಾಟಾ ಕಮ್ಯುನಿಕೇಷನ್ಸ್ ಸಹಭಾಗಿತ್ವದಲ್ಲಿ ‘EasyRoam’ ಎಂಬ ಟ್ರಾವೆಲ್ ಸಿಮ್‌ ಸೇವೆಯನ್ನು ಪರಿಚಯಿಸಿವೆ. ಏರ್ ಇಂಡಿಯಾ ಬ್ರ್ಯಾಂಡ್‌ನ ಈ ಸಿಮ್ ಭೌತಿಕ ಸಿಮ್ ಹಾಗೂ eSIM ಎರಡೂ ರೂಪಗಳಲ್ಲಿ ಲಭ್ಯವಿದ್ದು, ವಿದೇಶದಲ್ಲಿರುವಾಗ ವಾಯ್ಸ್ ಮತ್ತು ಡೇಟಾ ಸೇವೆಗಳನ್ನು ಬಳಸಲು ನೆರವಾಗಲಿದೆ.

ಆರಂಭಿಕ ಹಂತದಲ್ಲಿ ಸಿಮ್ ಉಚಿತವಾಗಿ ದೊರೆಯಲಿದ್ದು, ರೋಮಿಂಗ್ ಪ್ಯಾಕ್‌ಗೆ ಶುಲ್ಕ ವಿಧಿಸಲಾಗುತ್ತದೆ. ಉತ್ತರ ಅಮೆರಿಕ, ಯುರೋಪ್, ಬ್ರಿಟನ್, ಆಸ್ಟ್ರೇಲಿಯಾ, ಏಷ್ಯಾ-ಪೆಸಿಫಿಕ್ ಮತ್ತು ಮಧ್ಯಪ್ರಾಚ್ಯ ಸೇರಿದಂತೆ 30 ದೇಶಗಳಿಗೆ ರೋಮಿಂಗ್ ಪ್ಯಾಕ್‌ಗಳು ಲಭ್ಯವಿದ್ದು, ತೆರಿಗೆ ಹೊರತುಪಡಿಸಿ ರು. 241ರಿಂದ ಆರಂಭವಾಗುತ್ತವೆ. ಡೇಟಾ ಪ್ಲಾನ್ ಖರೀದಿಸುವ ಗ್ರಾಹಕರಿಗೆ ಮಾಲ್ಡೀವ್ಸ್ ಮತ್ತು ಮಾರಿಷಸ್ ಹೊರತುಪಡಿಸಿ 1GBವರೆಗೆ ಹೆಚ್ಚುವರಿ ಉಚಿತ ಡೇಟಾ ಸಿಗಲಿದೆ.

ಮುಂದಿನ ಹಂತದಲ್ಲಿ EasyRoam ಸೇವೆಯನ್ನು 190 ದೇಶಗಳಿಗೆ ವಿಸ್ತರಿಸುವ ಉದ್ದೇಶವಿದೆ. ಪ್ರಯಾಣಿಕರು ನಿರ್ದಿಷ್ಟ ದೇಶದ ಅಥವಾ ವಿಶ್ವವ್ಯಾಪಿ ಪ್ಲಾನ್‌ಗಳನ್ನು ಆಯ್ಕೆ ಮಾಡಬಹುದು. ಡೇಟಾ ಮಾತ್ರ ಅಥವಾ ವಾಯ್ಸ್‌+ಡೇಟಾ ಆಯ್ಕೆಗಳೂ ಇರಲಿವೆ. ಬಳಕೆಯನ್ನು ಗಮನಿಸಲು ನೋಟಿಫಿಕೇಶನ್‌ಗಳು ಮತ್ತು ಅಲರ್ಟ್‌ಗಳ ಸೌಲಭ್ಯವಿದ್ದು, ಗ್ರಾಹಕರು ತಮ್ಮ ಮೊಬೈಲ್ ಸಂಖ್ಯೆಯನ್ನು ಒಂದು ವರ್ಷದವರೆಗೆ ಉಳಿಸಿಕೊಳ್ಳಬಹುದು. ಪ್ರಸ್ತುತ ಸೇವೆ ಏರ್ ಇಂಡಿಯಾ ವೆಬ್‌ಸೈಟ್‌ನಲ್ಲಿ ಲಭ್ಯವಿದ್ದು, ಶೀಘ್ರದಲ್ಲೇ ಮೊಬೈಲ್ ಆ್ಯಪ್‌ನಲ್ಲೂ ದೊರೆಯಲಿದೆ.