ನೂತನ ʼಹಾಲಿಡೇ ಹೋಮ್ʼ ಪರವಾನಗೆ ವ್ಯವಸ್ಥೆ ಜಾರಿಗೊಳಿಸಿದ ಈಜಿಪ್ಟ್

ಈಜಿಪ್ಟ್ ಪ್ರವಾಸೋದ್ಯಮ ಸಚಿವಾಲಯವು ಹೊಸ ‘ಹಾಲಿಡೇ ಹೋಮ್’ ಪರವಾನಗೆ ವ್ಯವಸ್ಥೆಯನ್ನು ಜಾರಿಗೆ ತಂದಿದ್ದು, ದೇಶಕ್ಕೆ ಆಗಮಿಸುವ ಪ್ರವಾಸಿಗರಿಗೆ ವಿಭಿನ್ನ ಹಾಗೂ ಹೋಮ್ಲಿ ಫೀಲಿಂಗ್‌ ನೀಡುವ ವಸತಿ ಆಯ್ಕೆಗಳನ್ನು ಒದಗಿಸುವ ದಿಸೆಯಲ್ಲಿ ಇದು ಮಹತ್ವದ ಹೆಜ್ಜೆಯಾಗಿದೆ.

ಈ ಹೊಸ ನಿಯಮದಡಿ, ಮನೆ, ಸ್ಯೂಟ್, ಅಪಾರ್ಟ್‌ಮೆಂಟ್ ಅಥವಾ ವಿಲ್ಲಾ– ಇವುಗಳನ್ನು ಪ್ರವಾಸಿಗರಿಗೆ ಬಾಡಿಗೆಗೆ ನೀಡಲು ಈಗ ಅಧಿಕೃತ ಪರವಾನಗೆ ಅವಶ್ಯಕವಾಗಿದೆ. ಈ ವಸತಿ ಘಟಕಗಳು ಸರ್ಕಾರ ಗುರುತಿಸಿದ ಪ್ರವಾಸಿ ಪ್ರದೇಶಗಳಲ್ಲಿ ಅಥವಾ ಉತ್ತಮ ಗುಣಮಟ್ಟದ ನಿವಾಸಿ ವಲಯಗಳಲ್ಲಿ ಇರಬೇಕೆಂಬ ನಿಯಮ ಜಾರಿಗೊಳಿಸಲಾಗಿದೆ.

ನೂತನ ವ್ಯವಸ್ಥೆಯ ಪ್ರಮುಖ ಅಂಶಗಳು:-

• ವಸತಿ ಘಟಕಗಳು ಗುಣಮಟ್ಟ, ಭದ್ರತೆ ಮತ್ತು ಸ್ವಚ್ಛತೆಯ ಮಾನದಂಡಗಳನ್ನು ಪಾಲಿಸಬೇಕು.
• ಮಾಲೀಕರು “ಟೂರಿಸ್ಟಿಕ್ ಸೂಟೇಬಿಲಿಟಿ ಸರ್ಟಿಫಿಕೇಟ್” ಅನ್ನು ಪಡೆಯುವುದು ಕಡ್ಡಾಯ.
• ಆನ್‌ಲೈನ್ ಮೂಲಕ ಸರಳ ವಿಧಾನದಲ್ಲಿ ಪರವಾನಿಗೆ ಅರ್ಜಿ ಸಲ್ಲಿಸಬಹುದು.
• ಸ್ಥಳೀಯರು ತಮ್ಮ ಖಾಸಗಿ ಮನೆಗಳನ್ನು ಕಾನೂನುಬದ್ಧವಾಗಿ ಪ್ರವಾಸಿ ವಸತಿಗೆ ಪರಿವರ್ತಿಸಿಕೊಳ್ಳಲು ಅವಕಾಶ.

ಈ ಕ್ರಮದಿಂದ ಈಜಿಪ್ಟ್‌ಗೆ ಭೇಟಿ ನೀಡುವ ಪ್ರವಾಸಿಗರಿಗೆ ಹೊಟೇಲ್‌ಗಳಷ್ಟೇ ಅಲ್ಲದೆ ಮನೆಯಂಥ ಆರಾಮದಾಯಕ ವಸತಿ ಆಯ್ಕೆಗಳೂ ದೊರೆಯಲಿವೆ. ಕುಟುಂಬ ಸಮೇತ ಬರುವ ಪ್ರವಾಸಿಗರಿಗೆ, ಗುಂಪಿನಲ್ಲಿ ಬರುವ ಪ್ರವಾಸಿಗರಿಗೆ ಮತ್ತು ದೀರ್ಘಾವಧಿಯವರೆಗೆ ದೇಶದಲ್ಲೇ ಉಳಿಯಬಯಸುವ ಪ್ರವಾಸಿಗರಿಗೆ ಈ ಯೋಜನೆ ಹೆಚ್ಚು ಲಾಭದಾಯಕ ಮತ್ತು ತೃಪ್ತಿದಾಯಕವಾಗಿದೆ.

ಈಜಿಪ್ಟ್‌ ಸರಕಾರದ ಪ್ರಕಾರ, ಹಾಲಿಡೇ ಹೋಮ್‌ಗಳ ಸುವ್ಯವಸ್ಥೆಯು ಪ್ರವಾಸಿಗರಿಗೆ ಸುರಕ್ಷತೆ ಮತ್ತು ತೃಪ್ತಿಯನ್ನು ನೀಡುವುದರ ಜತೆಗೆ ಈಜಿಪ್ಟ್‌ನ ಪ್ರವಾಸೋದ್ಯಮ ವಲಯಕ್ಕೆ ಆರ್ಥಿಕ ಬಲ ನೀಡಲಿದೆ.