ಏಷ್ಯಾದಲ್ಲೇ ಭಾರತದ ವಾಯುಯಾನ ವೇಗದ ಬೆಳವಣಿಗೆ

ಭಾರತದ ದೇಶೀಯ ವಿಮಾನಯಾನ ಕ್ಷೇತ್ರವು ಏಷ್ಯಾ–ಪೆಸಿಫಿಕ್‌ ಪ್ರದೇಶದಲ್ಲೇ ಅತ್ಯಂತ ವೇಗವಾಗಿ ಬೆಳೆಯುತ್ತಿರುವ ಮಾರುಕಟ್ಟೆಯಾಗಿ ಹೊರಹೊಮ್ಮಿದ್ದು, ಏರ್‌ಬಸ್‌ ತನ್ನ ಬೆಳವಣಿಗೆಯ ಮುನ್ನೋಟವನ್ನು ಶೇ.8.9ರಿಂದ ಶೇ.9.3ಕ್ಕೆ ಹೆಚ್ಚಿಸಿದೆ. 2026–2045ರ ಮಾರುಕಟ್ಟೆ ಮುನ್ನೋಟದಲ್ಲಿ ಈ ಅಂದಾಜು ಮಾಡಲಾಗಿದೆ ಎಂದು ರಾಯಿಟರ್ಸ್‌ ವರದಿ ತಿಳಿಸಿದೆ.

ಮುಂದಿನ ಎರಡು ದಶಕಗಳಲ್ಲಿ ಭಾರತದ ವಿಮಾನಯಾನ ಬೇಡಿಕೆಯನ್ನು ಪೂರೈಸಲು ಸುಮಾರು 3,480 ಹೊಸ ಪ್ರಯಾಣಿಕ ವಿಮಾನಗಳು ಅಗತ್ಯವಾಗಲಿವೆ ಎಂದು ಏರ್‌ಬಸ್‌ ಅಂದಾಜಿಸಿದೆ. ಏಷ್ಯಾ–ಪೆಸಿಫಿಕ್‌ ಪ್ರದೇಶವು ಜಾಗತಿಕವಾಗಿ ಅಗತ್ಯವಿರುವ ಸುಮಾರು 42,000 ಹೊಸ ವಿಮಾನಗಳಲ್ಲಿ ಶೇ.45ರಷ್ಟು ಬೇಡಿಕೆಯನ್ನು ಹೊಂದಿರಲಿದೆ.

ಭಾರತದ ಬೆಳವಣಿಗೆಗೆ ಹೋಲಿಸಿದರೆ ಚೀನಾದ ದೇಶೀಯ ವಾಯು ಸಂಚಾರದ ಮುನ್ನೋಟವನ್ನು ಏರ್‌ಬಸ್‌ ಶೇ.5.4ರಿಂದ ಶೇ.4.7ಕ್ಕೆ ಇಳಿಸಿದೆ. ಚೀನಾಕ್ಕೆ ಮುಂದಿನ 20 ವರ್ಷಗಳಲ್ಲಿ 8,830 ಹೊಸ ಪ್ರಯಾಣಿಕ ವಿಮಾನಗಳ ಅಗತ್ಯವಿದೆ ಎಂದು ಅಂದಾಜಿಸಲಾಗಿದೆ.

ಭೌಗೋಳಿಕ ರಾಜಕೀಯ ಉದ್ವಿಗ್ನತೆ ಹಾಗೂ ಪೂರೈಕೆ ಸರಪಳಿ ಸವಾಲುಗಳ ನಡುವೆಯೂ ವಿಮಾನಗಳ ಬೇಡಿಕೆ ಮತ್ತು ವಿತರಣೆಗಳಲ್ಲಿ ಯಾವುದೇ ಕುಸಿತ ಕಂಡುಬಂದಿಲ್ಲ ಎಂದು ಏರ್‌ಬಸ್‌ ಹೇಳಿದೆ. ಏಷ್ಯಾ–ಪೆಸಿಫಿಕ್‌ ಮತ್ತು ಮಧ್ಯಪ್ರಾಚ್ಯ ಮಾರುಕಟ್ಟೆಗಳಲ್ಲೂ ವಿಮಾನ ಬೇಡಿಕೆ ಬಲವಾಗಿ ಮುಂದುವರಿದಿದೆ.