ಗುಜರಾತ್‌ನಲ್ಲಿ ತಡೆರಹಿತ ಟೋಲಿಂಗ್

ಟೋಲ್ ಪ್ಲಾಜಾಗಳಲ್ಲಿ ವಾಹನಗಳು ನಿಲ್ಲುವ ಅಗತ್ಯವನ್ನು ಈ ಹೊಸ ವ್ಯವಸ್ಥೆಯು ಇಲ್ಲವಾಗಿಸುತ್ತದೆ. ಇದರಿಂದ ಪ್ರಯಾಣದ ಸಮಯ ಉಳಿತಾಯವಾಗುವುದಲ್ಲದೆ, ಇಂಧನ ಬಳಕೆಯೂ ಕಡಿಮೆಯಾಗಲಿದೆ.

ಈ ವ್ಯವಸ್ಥೆಯು ಜಾಗತಿಕ ನ್ಯಾವಿಗೇಷನ್ ಸ್ಯಾಟಲೈಟ್ ಸಿಸ್ಟಮ್ ತಂತ್ರಜ್ಞಾನವನ್ನು ಬಳಸುತ್ತದೆ. ವಾಹನವು ಹೆದ್ದಾರಿಯಲ್ಲಿ ಎಷ್ಟು ದೂರ ಕ್ರಮಿಸಿದೆ ಎಂಬುದನ್ನು ಉಪಗ್ರಹದ ಮೂಲಕ ಲೆಕ್ಕ ಹಾಕಿ, ಅದಕ್ಕೆ ತಕ್ಕಂತೆ ಟೋಲ್ ಮೊತ್ತವನ್ನು ಕಡಿತಗೊಳಿಸಲಾಗುತ್ತದೆ. ಹೆದ್ದಾರಿಗಳಲ್ಲಿ ಯಾವುದೇ ಭೌತಿಕ ಟೋಲ್ ಬೂತ್‌ಗಳು ಅಥವಾ ಬ್ಯಾರಿಯರ್‌ಗಳು ಇರುವುದಿಲ್ಲ. ವಾಹನಗಳು ತಮ್ಮ ಸಾಮಾನ್ಯ ವೇಗದಲ್ಲೇ ಚಲಿಸಬಹುದು, ಇದರಿಂದ ಟೋಲ್ ಪ್ಲಾಜಾಗಳಲ್ಲಿ ಉಂಟಾಗುವ ದಟ್ಟಣೆ ಸಂಪೂರ್ಣವಾಗಿ ನಿವಾರಣೆಯಾಗುತ್ತದೆ.

ಇದನ್ನೂ ಓದಿ: ಗುಜರಾತ್‌ ಪ್ರವಾಸ ಹೋಗುವವರಿಗೆ ಇದೆಲ್ಲಾ ಗೊತ್ತಿರಲಿ

ವಾಹನಕ್ಕೆ ಅಳವಡಿಸಲಾದ ಆನ್‌ ಬೋರ್ಡ್‌ ಯುನಿಟ್‌ ಅಥವಾ ಸುಧಾರಿತ ಫಾಸ್ಟ್ಯಾಗ್ ಮೂಲಕ ವಾಹನ ಸವಾರರ ಬ್ಯಾಂಕ್ ಖಾತೆಯಿಂದ ನೇರವಾಗಿ ಹಣ ಕಡಿತವಾಗುತ್ತದೆ. ಗುಜರಾತ್‌ನ ಪ್ರಮುಖ ಪ್ರವಾಸಿ ತಾಣಗಳಾದ ಏಕತೆಯ ಪ್ರತಿಮೆ, ದ್ವಾರಕಾಧೀಶ ದೇವಾಲಯ ಅಥವಾ ರಾನ್ ಆಫ್ ಕಚ್ ತೆರಳುವ ಪ್ರವಾಸಿಗರಿಗೆ ಈ ತಡೆರಹಿತ ಪ್ರಯಾಣವು ಅತ್ಯಂತ ಆರಾಮದಾಯಕ ಅನುಭವ ನೀಡಲಿದೆ.

ಈ ಯೋಜನೆಯನ್ನು ಆರಂಭದಲ್ಲಿ ಗುಜರಾತ್‌ನ ಆಯ್ದ ಹೆದ್ದಾರಿಗಳಲ್ಲಿ ಪರೀಕ್ಷಿಸಲಾಗುತ್ತಿದೆ. ಇದರ ಯಶಸ್ಸಿನ ಆಧಾರದ ಮೇಲೆ ಮುಂದಿನ ದಿನಗಳಲ್ಲಿ ಭಾರತದಾದ್ಯಂತ ಎಲ್ಲಾ ರಾಷ್ಟ್ರೀಯ ಹೆದ್ದಾರಿಗಳಲ್ಲಿ ಈ ವ್ಯವಸ್ಥೆಯನ್ನು ಜಾರಿಗೆ ತರಲು ಸರಕಾರ ಯೋಜಿಸಿದೆ.