ಭಾರತಕ್ಕೆ ಸಂಪರ್ಕ ಕಲ್ಪಿಸುವ ರೈಲು ಮಾರ್ಗಕ್ಕೆ ರಷ್ಯಾ ಪ್ರಸ್ತಾವ

ರಷ್ಯಾದಿಂದ ಭಾರತವನ್ನು ಸಂಪರ್ಕಿಸುವ ಹೊಸ ರೈಲು ಮಾರ್ಗದ ಸಾಧ್ಯತೆಯನ್ನು ಪರಿಶೀಲಿಸುವ ಪ್ರಸ್ತಾವ ಹೊರಬಿದ್ದಿದೆ. ರಷ್ಯಾದ ಉಪ ಪ್ರಧಾನಮಂತ್ರಿ ಮರಾತ್ ಖುಸ್ನುಲ್ಲಿನ್ ಅವರು ಟಾಸ್ ಸುದ್ದಿ ಸಂಸ್ಥೆಗೆ ನೀಡಿದ ಸಂದರ್ಶನದಲ್ಲಿ, ರಷ್ಯಾದಿಂದ ಹಿಂದೂ ಮಹಾಸಾಗರದವರೆಗೆ ರೈಲು ಸಂಪರ್ಕ ಕಲ್ಪಿಸುವ ಪರ್ಯಾಯ ಮಾರ್ಗಗಳನ್ನು ಅನ್ವೇಷಿಸಬೇಕಿದೆ ಎಂದು ಹೇಳಿದ್ದಾರೆ. ಈ ಮಾರ್ಗವು ಮುಂದಿನ ಹಂತದಲ್ಲಿ ಭಾರತಕ್ಕೂ ಸಂಪರ್ಕ ಕಲ್ಪಿಸುವ ಸಾಧ್ಯತೆಯಿದೆ.

ಸಂಭಾವ್ಯ ಮಾರ್ಗವು ರಷ್ಯಾದಿಂದ ಆರಂಭವಾಗಿ ತುರ್ಕ್‌ಮೆನಿಸ್ತಾನ್, ಇರಾನ್, ಅಫ್ಘಾನಿಸ್ತಾನ ಹಾಗೂ ಪಾಕಿಸ್ತಾನದ ಮೂಲಕ ಭಾರತವನ್ನು ತಲುಪುವ ರೀತಿಯಲ್ಲಿರಬಹುದು. ಆದರೆ, ಇದು ಸದ್ಯ ಕೇವಲ ಪ್ರಸ್ತಾವನೆಯ ಹಂತದಲ್ಲಿದ್ದು, ಅಂತಿಮ ಮಾರ್ಗ, ನಿರ್ಮಾಣ ಯೋಜನೆ ಅಥವಾ ಅನುಷ್ಠಾನದ ದಿನಾಂಕ ಇನ್ನೂ ನಿಗದಿಯಾಗಿಲ್ಲ. ರಷ್ಯಾ–ಭಾರತ ನಡುವೆ ನೇರ ಪ್ರಯಾಣಿಕ ರೈಲು, ಟಿಕೆಟ್ ದರ ಅಥವಾ ಸೇವೆ ಆರಂಭದ ದಿನಾಂಕವೂ ಘೋಷಣೆಯಾಗಿಲ್ಲ.

ಬಾಸ್ಫರಸ್ ಜಲಸಂಧಿ ಹಾಗೂ ಹೋರ್ಮುಜ್ ಜಲಸಂಧಿಯಂತಹ ಪ್ರಮುಖ ಸಮುದ್ರ ಮಾರ್ಗಗಳ ಮೇಲಿನ ಅವಲಂಬನೆಯನ್ನು ಕಡಿಮೆ ಮಾಡುವುದು ಈ ಪ್ರಸ್ತಾವನೆಯ ಪ್ರಮುಖ ಉದ್ದೇಶವಾಗಿದೆ. ಭೌಗೋಳಿಕ ಮತ್ತು ರಾಜಕೀಯ ಕಾರಣಗಳಿಂದ ಸಮುದ್ರ ಮಾರ್ಗಗಳಲ್ಲಿ ಉಂಟಾಗಬಹುದಾದ ಅಪಾಯಗಳಿಗೆ ಪರ್ಯಾಯವಾಗಿ ಭೂ ಸಂಪರ್ಕವನ್ನು ಅಭಿವೃದ್ಧಿಪಡಿಸುವ ಉದ್ದೇಶ ರಷ್ಯಾಕ್ಕೆ ಇದೆ.

ಈ ರೈಲು ಕಾರಿಡಾರ್ ಸಾಕಾರಗೊಂಡರೆ ರಷ್ಯಾ, ಮಧ್ಯ ಏಷ್ಯಾ ಮತ್ತು ಭಾರತ ನಡುವಿನ ಸರಕು ಸಾಗಣೆ ಹಾಗೂ ಭೂ ಸಂಪರ್ಕ ಮತ್ತಷ್ಟು ಬಲಪಡಿಸಬಹುದು. ಭವಿಷ್ಯದಲ್ಲಿ ಪ್ರವಾಸೋದ್ಯಮಕ್ಕೂ ಹೊಸ ಅವಕಾಶಗಳು ಸೃಷ್ಟಿಯಾಗುವ ಸಾಧ್ಯತೆಯಿದೆ.