ಮಧ್ಯಕಾಲೀನ ಯುರೋಪಿಗೆ ಸಾಟಿ ಉದಯಪುರ

ಉದ್ಯಮಿ ಆನಂದ್ ಮಹೀಂದ್ರಾ ಅವರು ರಾಜಸ್ಥಾನದ ಉದಯಪುರದ ಐತಿಹಾಸಿಕ ಸೌಂದರ್ಯವನ್ನು ಹೊಗಳಿದ್ದು, ನಗರದ ಹಳೆಯ ಬೀದಿಗಳು ಮಧ್ಯಕಾಲೀನ ಯುರೋಪಿನ ಪಟ್ಟಣಗಳಿಗೆ ಯಾವುದೇ ರೀತಿಯಲ್ಲೂ ಕಡಿಮೆಯಿಲ್ಲ ಎಂದು ಹೇಳಿದ್ದಾರೆ.

ಆಗಸ್ಟ್‌ 23ರಂದು ‘ಎಕ್ಸ್‌’ನಲ್ಲಿ ಉದಯಪುರದ ಹಳೆಯ ನಗರದ ಚಿತ್ರಗಳನ್ನು ಹಂಚಿಕೊಂಡ ಅವರು, ಪ್ರವಾಸಿಗರು ಹೊಸ ಅನುಭವಗಳಿಗಾಗಿ ದೂರದ ದೇಶಗಳಿಗೆ ತೆರಳುವ ಬದಲು ಕೆಲವೊಮ್ಮೆ ತಮ್ಮ ಸುತ್ತಮುತ್ತಲಿನ ಸ್ಥಳಗಳಲ್ಲೇ ಅದ್ಭುತ ತಾಣಗಳನ್ನು ಕಂಡುಕೊಳ್ಳಬಹುದು ಎಂದು ಅಭಿಪ್ರಾಯಪಟ್ಟಿದ್ದಾರೆ.

1559ರಲ್ಲಿ ಮಹಾರಾಣಾ ಉದಯ್ ಸಿಂಗ್‌ II ಸ್ಥಾಪಿಸಿದ ಉದಯಪುರದ ಹಳೆಯ ನಗರವು ಸ್ವಚ್ಛ, ಕಿರಿದಾದ ಮತ್ತು ವಿಶಿಷ್ಟವಾದ ಬೀದಿಗಳಿಂದ ಗಮನ ಸೆಳೆಯುತ್ತದೆ. ನಗರದ ವಾಸ್ತುಶಿಲ್ಪ, ಅರಮನೆಗಳು, ಸರೋವರಗಳು ಮತ್ತು ಐತಿಹಾಸಿಕ ವಾತಾವರಣ ಪ್ರವಾಸಿಗರನ್ನು ಆಕರ್ಷಿಸುತ್ತವೆ. ವಿಶೇಷವಾಗಿ ಪಿಚೋಲಾ ಸರೋವರ ಹಾಗೂ ಅರಾವಳಿ ಬೆಟ್ಟಗಳ ಸೌಂದರ್ಯ ಉದಯಪುರದ ಪ್ರವಾಸಾನುಭವವನ್ನು ಮತ್ತಷ್ಟು ಶ್ರೀಮಂತಗೊಳಿಸುತ್ತದೆ. ಮಹೀಂದ್ರಾ ಅವರ ಪೋಸ್ಟ್‌ಗೆ ಹಲವರು ಪ್ರತಿಕ್ರಿಯಿಸಿ, ಭಾರತದ ಇಂತಹ ಸ್ಥಳಗಳಿಗೆ ಇನ್ನಷ್ಟು ಜಾಗತಿಕ ಮಾನ್ಯತೆ ದೊರೆಯಬೇಕು ಎಂದು ಮೆಚ್ಚುಗೆ ವ್ಯಕ್ತಪಡಿಸಿದ್ದಾರೆ.