ವಿಶ್ವದ ನಂ.1 ಸಂತೋಷದ ಪ್ರವಾಸಿ ತಾಣ

ಪ್ರವಾಸದ ವೇಳೆ ಸಿಗುವ ಸಂತೋಷವನ್ನು ಅಳೆಯುವ ಪ್ರಯತ್ನವಾಗಿ ಹೊಸ ಅಧ್ಯಯನವೊಂದು ವಿಶ್ವದ ಪ್ರಮುಖ ಪ್ರವಾಸಿ ತಾಣಗಳ ಆನ್‌ಲೈನ್ ವಿಮರ್ಶೆಗಳನ್ನು ವಿಶ್ಲೇಷಿಸಿದೆ. ಐರ್ಲೆಂಡ್‌ನ ಪ್ರವಾಸ ವಿಮಾ ಸಂಸ್ಥೆ JustCover ನಡೆಸಿದ ಅಧ್ಯಯನದಲ್ಲಿ 155 ಪ್ರವಾಸಿ ತಾಣಗಳ ಒಂದು ಕೋಟಿಗೂ ಹೆಚ್ಚು ವಿಮರ್ಶೆಗಳನ್ನು ಪರಿಶೀಲಿಸಲಾಗಿದೆ. ಪ್ರವಾಸಿಗರು ಸಂತೋಷ ಮತ್ತು ಖುಷಿಯನ್ನು ವ್ಯಕ್ತಪಡಿಸಲು ಬಳಸಿರುವ ಪದಗಳು ಹಾಗೂ ವಾಕ್ಯಗಳ ಆಧಾರದ ಮೇಲೆ ‘ಹ್ಯಾಪಿ ಪ್ಲೇಸ್’ ಅಂಕ ನೀಡಲಾಗಿದೆ.

ಮೆಕ್ಸಿಕೋದ ಕ್ಯಾರಿಬಿಯನ್ ಕರಾವಳಿಯಲ್ಲಿರುವ ತುಲುಮ್ 100ಕ್ಕೆ 100 ಅಂಕ ಪಡೆದು ಮೊದಲ ಸ್ಥಾನದಲ್ಲಿದೆ. ಬಿಳಿ ಮರಳಿನ ಕಡಲತೀರಗಳು, ಸಮುದ್ರದ ಮೇಲ್ಭಾಗದಲ್ಲಿರುವ ಪ್ರಾಚೀನ ಮಾಯನ್ ಅವಶೇಷಗಳು, ಬೀಚ್ ಕ್ಲಬ್‌ಗಳು, ರೆಸ್ಟೋರೆಂಟ್‌ಗಳು, ವೆಲ್‌ನೆಸ್ ಚಟುವಟಿಕೆಗಳು ಮತ್ತು ನೈಟ್‌ಲೈಫ್ ತುಲುಮ್‌ನ ಪ್ರಮುಖ ಆಕರ್ಷಣೆಗಳಾಗಿವೆ.

ಸೇಂಟ್ ಲೂಸಿಯಾದ ಸೌಫ್ರಿಯರ್ 95.2 ಅಂಕಗಳೊಂದಿಗೆ ಎರಡನೆಯ ಸ್ಥಾನ ಪಡೆದರೆ, ಮೆಕ್ಸಿಕೋದ ಓಕ್ಸಾಕಾ 88 ಅಂಕಗಳೊಂದಿಗೆ ಮೂರನೆಯ ಸ್ಥಾನದಲ್ಲಿದೆ. ಲಾಸ್ ವೇಗಾಸ್ ಕೂಡ 88 ಅಂಕಗಳೊಂದಿಗೆ ನಾಲ್ಕನೆಯ ಸ್ಥಾನದಲ್ಲಿದೆ.

ಮೌಯಿ, ನ್ಯೂಯಾರ್ಕ್ ಸಿಟಿ, ಕಪಾಡೋಶಿಯಾ, ರಿಯೋ ಡಿ ಜನೈರೊ, ಚಿಕಾಗೋ ಮತ್ತು ಟೊರೊಂಟೊ ಕ್ರಮವಾಗಿ ನಂತರದ ಸ್ಥಾನಗಳನ್ನು ಪಡೆದಿವೆ. ಈ ಅಧ್ಯಯನವು ಸ್ಥಳೀಯರ ಸಂತೋಷವನ್ನಲ್ಲ, ಪ್ರವಾಸಿಗರು ತಮ್ಮ ಅನುಭವವನ್ನು ವಿಮರ್ಶೆಗಳಲ್ಲಿ ಹೇಗೆ ವಿವರಿಸಿದ್ದಾರೆ ಎಂಬುದನ್ನು ಆಧರಿಸಿದೆ.