ವಿಮಾನ ನಿಲ್ದಾಣಗಳು ಅತ್ಯಂತ ಭಾವನಾತ್ಮಕ ಸ್ಥಳಗಳು. ಯಾಕೆ ಗೊತ್ತಾ?

ವಿಮಾನ ನಿಲ್ದಾಣಗಳು ಒಂದು ವಿಚಿತ್ರ ತಾಣ. ಇಲ್ಲಿ ನಿತ್ಯವೂ ಸಾವಿರಾರು ಸಂಖ್ಯೆಯಲ್ಲಿ ಪ್ರಯಾಣಿಕರು ಪ್ರಯಾಣ ಬೆಳೆಸುತ್ತಾರೆಯಾದರೂ, ಪ್ರತಿ ಸೂಟ್‌ಕೇಸ್ ಮತ್ತು ಬೋರ್ಡಿಂಗ್ ಪಾಸ್‌ನ ಹಿಂದೆ, ಒಂದು ವೈಯಕ್ತಿಕ ಕಥೆ ಇರುತ್ತದೆ. ಒಂದು ಹೊಸ ಅಧ್ಯಾಯ, ಒಂದು ದೊಡ್ಡ ಬದಲಾವಣೆ, ಒಂದು ಭಾವನಾತ್ಮಕ ಪುನರ್ಮಿಲನ ಹೀಗೆ ಲೆಕ್ಕವಿಲ್ಲದಷ್ಟು ಕಥೆಗಳ ಭಾವನಾತ್ಮಕ ಸೆಲೆ ಇಲ್ಲಿರುತ್ತದೆ.

ಮೊದಲ ಬಾರಿಗೆ ವಿಮಾನ ಪ್ರಯಾಣ, ಮನಸ್ಸಿಗೆ ಹತ್ತಿರವಾದವರನ್ನು ಭೇಟಿಯಾಗುವ ಸಂದರ್ಭ, ವ್ಯಾಪಾರಕ್ಕಾಗಿ ವಿದೇಶ ಪ್ರಯಾಣ ಹೀಗೆ ವಿಮಾನ ಪ್ರಯಾಣಕ್ಕೆ ಕಾರಣಗಳು ಏನೇ ಇದ್ದರೂ ಅವು ಭಾವನೆಗಳೊಂದಿಗೆ ಬೆಸೆದುಕೊಂಡಿದೆ. ಹಾಗಾದರೆ ವಿಮಾನ ನಿಲ್ದಾಣಗಳು ಜನರೊಂದಿಗೆ ಭಾವನಾತ್ಮಕವಾಗಿ ಬೆಸೆದುಕೊಳ್ಳಲು ಕಾರಣಗಳೇನು ? ಇಲ್ಲಿವೆ ಮಾಹಿತಿ.

ಪ್ರವಾಸಗಳ ಬಗ್ಗೆ ನಿರೀಕ್ಷೆ..ಉತ್ಸಾಹ

ರಜೆಯ ಸಂದರ್ಭದಲ್ಲಿ ಪ್ರವಾಸ ತೆರಳುವ ಮಂದಿ ವಿಮಾನ ನಿಲ್ದಾಣವನ್ನು ಸೇರುವ ವೇಳೆ ಸಾಕಷ್ಟು ನಿರೀಕ್ಷೆಗಳನ್ನು ಹೊತ್ತು ಬಹಳ ಉತ್ಸಾಹಭರಿತರಾಗಿಯೂ ಕಂಡುಬರುತ್ತಾರೆ. ಪ್ರವಾಸದ ಬಗೆಗಿನ ಕನಸುಗಳು, ಭೇಟಿ ಮಾಡಬೇಕಿರುವ ಸ್ಥಳಗಳ ಬಗ್ಗೆ ಸಾಕಷ್ಟು ನಿರೀಕ್ಷೆಗಳು ಅವರ ಕಣ್ಣುಗಳಲ್ಲಿರುತ್ತದೆ. ಪ್ರವಾಸದ ನೆನಪುಗಳನ್ನು ಕೂಡಿಕೊಳ್ಳುವ ಸಲುವಾಗಿ ಫೋಟೋ, ವಿಡೀಯೋಗಳನ್ನು ವಿಮಾನ ನಿಲ್ದಾಣದಿಂದಲೇ ಕ್ಲಿಕ್ಕಿಸುವುದಕ್ಕೆ ಪ್ರಾರಂಭಿಸಿರುತ್ತಾರೆ. ಬೆಳಗಿನ ಜಾವದ ವಿಮಾನಕ್ಕಾಗಿ ಬಂದರೂ ನಿದ್ರೆಯಿಲ್ಲದಿದ್ದರೂ ಅವರ ಹುರುಪಿಗೆ ಯಾವ ಭಂಗವೂ ಬಂದಿರುವುದಿಲ್ಲ.ಎಲ್ಲವೂ ಪ್ರವಾಸದ ಬಗೆಗಿನ ನಿರೀಕ್ಷೆಯ ಭಾವನೆಯನ್ನು ವ್ಯಕ್ತಪಡಿಸುತ್ತದೆ.

ವಿದಾಯ ಹೇಳಲು ಮನಸ್ಸಾಗದು

ತಮ್ಮವರನ್ನು ಬಿಟ್ಟು ಉದ್ಯೋಗಕ್ಕಾಗಿ ಅನ್ಯ ದೇಶಗಳಿಗೆ ಪ್ರಯಾಣ ಬೆಳೆಸುವ ಸಂದರ್ಭ, ಅಥವಾ ವಿವಾಹಿತರಾಗಿ ಪತಿಯೊಂದಿಗೆ ಬೇರೆ ರಾಜ್ಯ, ದೇಶಗಳಿಗೆ ಹೋಗುವ ಸಂದರ್ಭವನ್ನು ಊಹಿಸಿ ನೋಡಿ. ವಿದಾಯ ಹೇಳಲು ಬಂದವರು, ವಿದಾಯ ಹೇಳಿ ಹೋಗುವ ಮಂದಿ ಇಬ್ಬರ ಮನಸ್ಸೂ ಭಾರವೆನ್ನುವ ಭಾವನೆಯಿಂದ ಕೂಡಿಕೊಂಡಿರುತ್ತದೆ.

ಮನೆಗೆ ಮರಳುವ ಸಂತೋಷ

ಇದೊಂದು ಥರದ ಸಂತಸದ ಭಾವನೆಯನ್ನು ಹುಟ್ಟುಹಾಕುತ್ತದೆ. ಅಂದರೆ ವರ್ಷಗಳ ನಂತರ ಪರ ಊರು, ಪರ ದೇಶಗಳಿಂದ ನನ್ನೂರೇ ನನಗೆ ಚಂದವೆಂದು ಬರುವ ಆ ಸಂದರ್ಭ, ಇಲ್ಲವೇ ತಿಂಗಳ ಅವಧಿಯ ರಜೆಯಲ್ಲಿ ತನ್ನ ಊರಿಗೆ ಭೇಟಿ ಮಾಡುವ ಅವಕಾಶ ಸಿಕ್ಕಿದಾಗ ವಿಮಾನವನ್ನೇರಿ ತನ್ನ ನೆಲವನ್ನು ತಲುಪಿದಾಗ ಆಗುವ ಆ ಖುಷಿಯನ್ನು ಪದಗಳಲ್ಲಿ ಹಿಡಿದಿಡುವುದು ಬಹಳ ಕಷ್ಟ. ಅದರಲ್ಲೂ ವಿಮಾನ ನಿಲ್ದಾಣ ತಲುಪಿದಾಗಲೇ ಮನೆ ತಲುಪಿಬಿಟ್ಟೆನೆಂಬ ಭಾವನೆಯನ್ನು ಇದು ಹುಟ್ಟುಹಾಕುತ್ತದೆ.

ಸಮಯಕ್ಕೆ ಸರಿಯಾಗಿ ತಲುಪುವ ಆತುರ

ವಿಮಾನ ಪ್ರಯಾಣದಲ್ಲಿ ಸಮಯಪಾಲನೆ ಅತೀ ಅಗತ್ಯ. ನಿಮಿಷಗಳ ಅಂತರದಲ್ಲೇ ಆಯ್ದ ವಿಮಾನ ಪ್ರಯಾಣ ತಪ್ಪುವ ಸಾಧ್ಯತೆಯಿರುತ್ತದೆ. ಈ ನಡುವೆ ನಮ್ಮವರನ್ನು ಕಾಣುವ ತವಕ, ಸಮಯಕ್ಕೆ ಸರಿಯಾಗಿ ತಲುಪುತ್ತೇವೆಯೇ ಎಂಬ ಒತ್ತಡ, ಭದ್ರತಾ ಪರಿಶೀಲನೆಯನ್ನು ಸರಾಗವಾಗಿ ಆಗುವುದೇ ಎಂಬ ಭಯ, ಪ್ರಯಾಣಕ್ಕೆ ಬೇಕಾದ ಅಗತ್ಯ ದಾಖಲೆಗಳಿವೆಯೇ ಎಂಬ ಗೊಂದಲ ಹೀಗೆ ಅನೇಕ ಭಾವನೆಗಳು ವಿಮಾನ ನಿಲ್ದಾಣದಲ್ಲಿಯೇ ಏಕಕಾಲಕ್ಕೆ ಕಾಣಿಸಿಕೊಂಡು,ಸಾಕಷ್ಟು ಒತ್ತಡವನ್ನು ಹುಟ್ಟುಹಾಕುತ್ತದೆ. ವಿಮಾನ ಗಮ್ಯ ಸ್ಥಾನಕ್ಕೆ ಹೊರಟನಂತರವಷ್ಟೇ ನೆಮ್ಮದಿಯಿಂದ ಉಸಿರಾಡಲು ಸಾಧ್ಯವಾಗುತ್ತದೆ.

ಹೊಸ ಆರಂಭಕ್ಕೆ ನಾಂದಿ

ಅನೇಕ ಬಾರಿ ಜೀವನದ ಹೊಸ ಅಧ್ಯಾಯ ಪ್ರಾರಂಭವಾಗುವುದೇ ವಿಮಾನ ನಿಲ್ದಾಣದಲ್ಲಿ. ಹೊಸ ಉದ್ಯೋಗಕ್ಕಾಗಿ ವಿದೇಶ ಪ್ರಯಾಣ ಕೈಗೊಳ್ಳುವುದು, ವ್ಯಾಸಂಗಕ್ಕಾಗಿ ಬೇರೆ ನಗರಕ್ಕೆ ತೆರಳುವವರಿಗೆ, ವಿಮಾನ ನಿಲ್ದಾಣ ಒಂದು ವಿಶೇಷ ಅನುಭವವನ್ನು ನೀಡುತ್ತದೆ. ಕೆಲವೊಮ್ಮೆ ಹೊಸ ಪರಿಚಯಗಳಾಗುತ್ತವೆ, ಸಂಬಂಧಗಳು ಬೆಸೆದುಕೊಳ್ಳುವುದೂ ಇದೆ. ಹೊಸತನಕ್ಕೆ ನಾಂದಿ ಹಾಡುವಲ್ಲಿ ವಿಮಾನ ನಿಲ್ದಾಣದ ಪಾತ್ರ ಪ್ರಮುಖವಾಗಿರುತ್ತದೆ.

ಈಗ ಹೇಳಿ ವಿಮಾನ ನಿಲ್ದಾಣಗಳು ಒಂದು ರೀತಿಯ ಮಾಂತ್ರಿಕ ಸ್ಥಳವಲ್ಲವೇ? ಭಾವನೆಗಳ ಹುಟ್ಟಿಗೆ ಕಾರಣವಾಗುವ ತಾಣವಲ್ಲವೇ? ಮುಂದಿನ ಬಾರಿ ನೀವು ವಿಮಾನ ನಿಲ್ದಾಣದ ಮೂಲದ ಹಾದುಹೋಗುವಾಗ ನಿಮ್ಮಲ್ಲಿ ಯಾವ ಭಾವನೆ ಹುಟ್ಟಿಕೊಂಡಿದೆ ಎಂಬುದನ್ನು ತಿಳಿದುಕೊಳ್ಳಿ.