ಈಜಿಪ್ಟ್‌ನಲ್ಲಿ 96 ಗಂಟೆಗಳ ಉಚಿತ ಟ್ರಾನ್ಸಿಟ್ ವೀಸಾ ಯೋಜನೆ ವಿಸ್ತರಣೆ
ಪ್ರಯಾಣಿಕರು ಕೈರೋ, ಲಕ್ಸರ್, ಅಸ್ವಾನ್, ಶಾರ್ಮ್ ಅಲ್ ಶೇಕ್, ಹರ್ಘದಾ ಮುಂತಾದ ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣಗಳಲ್ಲಿ layover ಹೊಂದಿದಾಗ ಈ ಉಚಿತ ವೀಸಾ ಪಡೆಯಬಹುದು.
ಈಜಿಪ್ಟ್ ಸರಕಾರವು (Egypt Government) 96 ಗಂಟೆಗಳ ಉಚಿತ ಟ್ರಾನ್ಸಿಟ್ ವೀಸಾ (Transit Visa) ಯೋಜನೆಯನ್ನು ಏಪ್ರಿಲ್ 2026ರವರೆಗೆ ವಿಸ್ತರಿಸಿರುವುದಾಗಿ ಅಧಿಕೃತವಾಗಿ ಘೋಷಿಸಿದೆ. ಲೇಓವರ್ ಹೊಂದುವ ಅಂತಾರಾಷ್ಟ್ರೀಯ ಪ್ರಯಾಣಿಕರಿಗೆ, ಯಾವುದೇ ವೀಸಾ ಶುಲ್ಕ ಪಾವತಿಸದೇ ದೇಶ ಪ್ರವೇಶಿಸಿ 4 ದಿನಗಳ ಕಾಲ ಇಜಿಪ್ಟ್‌ನ ಪ್ರಮುಖ ತಾಣಗಳನ್ನು ಭೇಟಿನೀಡಲು ಅವಕಾಶ ನೀಡಲಾಗುತ್ತಿದೆ.
ಈ ಯೋಜನೆ 2023ರ ಜೂನ್‌ನಲ್ಲಿ ಪ್ರಾರಂಭವಾಗಿದ್ದು, ಯೋಜನೆಯಡಿ ಯುನೈಟೆಡ್ ಸ್ಟೇಟ್ಸ್, ಬ್ರಿಟನ್, ಕೆನಡಾ, ಆಸ್ಟ್ರೇಲಿಯಾ, ಭಾರತ, ಜಪಾನ್ ಸೇರಿದಂತೆ ಸುಮಾರು 106 ದೇಶಗಳ ಜನರಿಗೆ ಈ ಸೌಲಭ್ಯ ಲಭಿಸಲಿದೆ. ಈ ಮೂಲಕ ಈಜಿಪ್ಟ್ ಪ್ರವಾಸೋದ್ಯಮ ಕ್ಷೇತ್ರವನ್ನು ಉತ್ತೇಜಿಸುವ ಜೊತೆಗೆ, ಜಾಗತಿಕ ವಿಮಾನ ಸಂಚಾರ ಕೇಂದ್ರವಾಗಿ ತನ್ನ ಸ್ಥಾನವನ್ನೂ ಬಲಪಡಿಸಲು ಈಜಿಪ್ಟ್ ಮುಂದಾಗುತ್ತಿದೆ.
ಪ್ರಯಾಣಿಕರು ಕೈರೋ, ಲಕ್ಸರ್, ಅಸ್ವಾನ್, ಶಾರ್ಮ್ ಅಲ್ ಶೇಕ್, ಹರ್ಘದಾ ಮುಂತಾದ ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣಗಳಲ್ಲಿ layover ಹೊಂದಿದಾಗ ಈ ಉಚಿತ ವೀಸಾ ಪಡೆಯಬಹುದು. ಆದರೆ, ಈ ಸೌಲಭ್ಯವನ್ನು ಪಡೆಯಲು, EgyptAir, Air Cairo ಅಥವಾ Nile Air ಮಾಲಿಕತ್ವದ ವಿಮಾನಗಳಲ್ಲಿ ಪ್ರಯಾಣಿಸಬೇಕಾಗಿದ್ದು, layover ಅವಧಿ ಕನಿಷ್ಠ 8 ಗಂಟೆಗಳಿಂದ ಗರಿಷ್ಠ 96 ಗಂಟೆಗಳವರೆಗೆ ಇರಬೇಕು ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.
ವೀಸಾ ಪಡೆಯಲು ಮುಂಚಿತ ಅರ್ಜಿ ಅಗತ್ಯವಿಲ್ಲ. ವಿಮಾನ ನಿಲ್ದಾಣದಲ್ಲಿಯೇ ಪಾಸ್‌ಪೋರ್ಟ್ ಮತ್ತು ಮುಂದಿನ ವಿಮಾನದ ಟಿಕೆಟ್ ಪ್ರದರ್ಶಿಸಿ, ಸ್ಥಳದಲ್ಲೇ ವೀಸಾ ಮಂಜೂರಾತಿ ಪಡೆಯಬಹುದಾಗಿದೆ. ಪ್ರವೇಶಿಸುವಾಗ ಪಾಸ್‌ಪೋರ್ಟ್‌ಗೆ ಕನಿಷ್ಠ 6 ತಿಂಗಳ ಮಾನ್ಯತೆ ಇರುವುದೂ ಅಗತ್ಯವಾಗಿದೆ.
ಈ ಹೊಸ ವಿಸ್ತರಣೆಯಿಂದಾಗಿ ಪ್ರವಾಸೋದ್ಯಮ ಹೋಟೆಲ್‌ಗಳ ಬುಕ್ಕಿಂಗ್, ಸ್ಥಳೀಯ ಆರ್ಥಿಕ ಚಟುವಟಿಕೆಗಳಲ್ಲೂ ಗಂಭೀರ ಬೆಳವಣಿಗೆ ಸಂಭವಿಸಲಿದೆ ಎಂದು ಈಜಿಪ್ಟ್ ಪ್ರವಾಸೋದ್ಯಮ ಸಚಿವಾಲಯ ಅಭಿಪ್ರಾಯಪಟ್ಟಿದೆ. ಪ್ರಸಿದ್ಧ ಪೈರಮಿಡ್‌ಗಳು, ಲಕ್ಸರ್‌ನ ಪ್ರಾಚೀನ ದೇವಾಲಯಗಳು ಹಾಗೂ ರೆಡ್ ಸೀ ರಿಸಾರ್ಟ್‌ಗಳಲ್ಲಿ ವಿಶ್ರಾಂತಿ ಅನುಭವಿಸಲು layover ಪ್ರಯಾಣಿಕರಿಗೆ ಇದೀಗ ವಿಶಿಷ್ಟ ಅವಕಾಶ ಲಭಿಸಿದೆ.
