21 ದೇಶಗಳ ಪ್ರವಾಸಕ್ಕೆ ಅಮೆರಿಕದ ರೆಡ್ ಫ್ಲ್ಯಾಗ್; ಭಾರತದ ಪ್ರವಾಸಕ್ಕೂ ಸೂಚನೆ

ಅಮೆರಿಕದಲ್ಲಿ (America) ಬೇಸಿಗೆ ಶುರುವಾಗುತ್ತಿದ್ದಂತೆ ಅಮೆರಿಕದ ರಾಜ್ಯ ಇಲಾಖೆ (US State Department) ಅಂತಾರಾಷ್ಟ್ರೀಯ ಪ್ರಯಾಣಕ್ಕೆ (International Travel) ಸಂಬಂಧಿಸಿದ ಎಚ್ಚರಿಕೆಗಳನ್ನು ಬಿಡುಗಡೆ ಮಾಡಿದೆ. ಈ ವೇಳೆ ಸುಮಾರು 21 ರಾಷ್ಟ್ರಗಳಿಗೆ ‘ಹಂತ 4: ಪ್ರಯಾಣ ಮಾಡಬೇಡಿ’ ಎಂಬ ಗಂಭೀರ ಎಚ್ಚರಿಕೆಯನ್ನು ನೀಡಲಾಗಿದೆ. ಏಪ್ರಿಲ್‌ನಲ್ಲಿ ಎರಡು ಹೊಸ ದೇಶಗಳನ್ನು ಈ ಪಟ್ಟಿಗೆ ಸೇರಿಸಲಾಗಿದೆ.

ಅಮೆರಿಕದ ಪ್ರವಾಸ ಎಚ್ಚರಿಕೆ ವ್ಯವಸ್ಥೆಯು ನಾಲ್ಕು ಹಂತಗಳನ್ನೊಳಗೊಂಡಿದೆ — ‘ಹಂತ 1: ಸಾಮಾನ್ಯ ಜಾಗ್ರತೆ ವಹಿಸಿ’, ‘ಹಂತ 2: ಹೆಚ್ಚು ಜಾಗ್ರತೆ ವಹಿಸಿ’, ‘ಹಂತ 3: ಪ್ರಯಾಣ ಪುನರ್ವಿಚಾರಿಸಿ’, ಮತ್ತು ‘ಹಂತ 4: ಪ್ರಯಾಣ ಮಾಡಬೇಡಿ’. ಈ ಹಂತಗಳನ್ನು ತೀರ್ಮಾನಿಸುವಾಗ, ಪ್ರಾದೇಶಿಕ ಅಪರಾಧ ಪ್ರಮಾಣ, ಉಗ್ರರ ದಾಳಿ ಮತ್ತು ಅಪಾಯ, ನಾಗರಿಕ ಅಶಾಂತಿ, ಆರೋಗ್ಯ ಹಾನಿ, ಹಾಗೂ ಪ್ರಕೃತಿ ವಿಪತ್ತುಗಳ ಸಾಧ್ಯತೆಯಂತಹ ಹಲವಾರು ಅಂಶಗಳನ್ನು ಪರಿಗಣಿಸಲಾಗುತ್ತದೆ.

ಈ ಪೈಕಿ ‘ಹಂತ 4’ ಎಚ್ಚರಿಕೆ ನೀಡಿರುವ ಪ್ರಮುಖ ರಾಷ್ಟ್ರಗಳಲ್ಲಿ ಉತ್ತರ ಕೊರಿಯಾ, ಅಫ್ಘಾನಿಸ್ತಾನ, ಸಿರಿಯಾ, ಯೆಮೆನ್, ಇರಾನ್, ಲಿಬಿಯಾ, ಹೈಟಿ, ವೆನೆಜುಯೆಲಾ, ರಷ್ಯಾ, ಮ್ಯಾನ್ಮಾರ್ ಸೇರಿದಂತೆ ಒಟ್ಟು 21 ದೇಶಗಳಿವೆ. ಮೆಕ್ಸಿಕೋದ ಕೆಲವು ಭಾಗಗಳಾದ ಕೊಲಿಮಾ, ಗುರೆರೋ, ಮಿಚೋಆಕಾನ್, ಸಿನಲೋವಾ, ತಮೌಲಿಪಾಸ್ ಮತ್ತು ಜಾಕಟೆಕಾಸ್ ರಾಜ್ಯಗಳಿಗೂ ಈ ಎಚ್ಚರಿಕೆ ನೀಡಲಾಗಿದೆ. ಗಾಜಾ ಪ್ರದೇಶವೂ ಈ ಪಟ್ಟಿಯಲ್ಲಿ ಸೇರಿದೆ.

ಭಾರತದ ಪ್ರವಾಸದ ಕುರಿತು ಅಮೆರಿಕ ಎಚ್ಚರಿಕೆಯನ್ನು ನೀಡಿದ್ದು, ಪ್ರಸ್ತುತ ಭಾರತಕ್ಕೆ ‘ಹಂತ 2: ಹೆಚ್ಚು ಜಾಗ್ರತೆ ವಹಿಸಿ’ ಎಂಬ ಎಚ್ಚರಿಕೆ ಜಾರಿಯಲ್ಲಿದೆ. ಅಮೆರಿಕದ ಪ್ರಕಟಣೆಯ ಪ್ರಕಾರ, ಭಾರತದಲ್ಲಿ ಅಪರಾಧ ಮತ್ತು ಉಗ್ರರ ಅಪಾಯವಿದೆ ಎಂದು ತಿಳಿಸಲಾಗಿದೆ.

ಇದೇ ವೇಳೆಯಲ್ಲಿ ಭಾರತದಲ್ಲಿ ಕೆಲವು ವಿಶೇಷ ಪ್ರದೇಶಗಳಿಗೆ ವಿಶೇಷ ಎಚ್ಚರಿಕೆಗಳನ್ನೂ ನೀಡಲಾಗಿದೆ. ಜಮ್ಮು ಮತ್ತು ಕಾಶ್ಮೀರದ ಪ್ರದೇಶಗಳಿಗೆ (ಪೂರ್ವ ಲಡಾಖ್ ಮತ್ತು ಲೇಹ್ ಹೊರತುಪಡಿಸಿ), ಭಾರತ-ಪಾಕಿಸ್ತಾನ ಗಡಿಯಿಂದ 10 ಕಿಮೀ ಒಳಗಿನ ಪ್ರದೇಶಗಳಿಗೆ ‘ಹಂತ 4: ಪ್ರಯಾಣ ಮಾಡಬೇಡಿ’ ಎಂಬ ಎಚ್ಚರಿಕೆ ನೀಡಲಾಗಿದೆ. ಈಶಾನ್ಯ ಭಾರತದ ಕೆಲವು ರಾಜ್ಯಗಳಿಗೆ ‘ಹಂತ 3: ಪ್ರಯಾಣ ಪುನರ್ವಿಚಾರಿಸಿ’ ಎಚ್ಚರಿಕೆ ನೀಡಲಾಗಿದೆ.

ಪ್ರತಿನಿತ್ಯ ಪರಿಸ್ಥಿತಿಗಳ ಆಧಾರವಾಗಿ ಅಮೆರಿಕದ ರಾಜ್ಯ ಇಲಾಖೆ ತನ್ನ ಪ್ರವಾಸ ಎಚ್ಚರಿಕೆ ಪಟ್ಟಿಗಳನ್ನು ನವೀಕರಿಸುತ್ತಿದ್ದು, ತ್ವರಿತ ಬದಲಾವಣೆಗಳಿಗೆ ಅನುಗುಣವಾಗಿ ಸೂಚನೆಗಳನ್ನು ತುರ್ತಾಗಿ ಪ್ರಕಟಿಸುತ್ತಿದೆ. ದೇಶದಿಂದ ಹೊರಹೋಗುವ ಮುನ್ನ ಅಥವಾ ಪ್ರವಾಸ ಯೋಜನೆ ರೂಪಿಸುವಾಗ ಅಮೆರಿಕದ ನಾಗರಿಕರು ಈ ಎಚ್ಚರಿಕೆಗಳನ್ನು ಪರಿಶೀಲಿಸಲು ಸೂಚಿಸಲಾಗಿದೆ.