ಪಣಜಿಯಲ್ಲಿದೆ ದಿ ಬೆಸ್ಟ್‌ ಬೀಚ್‌ಗಳು!
ಪ್ರವಾಸಿಗರ ಅಚ್ಚುಮೆಚ್ಚಿನ ತಾಣವಾದ ಗೋವಾದ ರಾಜಧಾನಿಯಾದ ಪಣಜಿಯಲ್ಲಿ ಅದ್ಭುತವಾದ ಬೀಚ್‌ಗಳಿವೆ
ಗೋವಾ ರಾಜಧಾನಿಯಾದ ಪಣಜಿಯಲ್ಲಿ ಹತ್ತಾರು ಪ್ರವಾಸಿ ಆಕರ್ಷಣೆಗಳಿವೆ.ವಿಶೇಷವೆಂದರೆ ಅಲ್ಲಿ ಪ್ರಶಾಂತವಾದ ಬೀಚ್‌ಗಳಿವೆ. ಬೀಚ್ ಸೌಂದರ್ಯವನ್ನು ಸವಿಯಲೆಂದೇ ಪ್ರವಾಸಿಗರು ಗೋವಾಗೆ ಭೇಟಿ ನೀಡುತ್ತಾರೆ. ಸಮುದ್ರದ ಅಲೆಗಳ ನಡುವೆ ಪ್ರವಾಸಿಗರು ಎಂಜಾಯ್‌ ಮಾಡಬಹುದು. ಗೋವಾದಲ್ಲಿ ಸಾಕಷ್ಟು ಬೀಚ್‌ಗಳಿದ್ದರೂ ಪಣಜಿಯಲ್ಲಿನ ಈ ನಾಲ್ಕು ಬೀಚ್‌ಗಳು ಬಹಳ ಸುಪ್ರಸಿದ್ಧವಾಗಿವೆ. ಆ ಬೀಚ್‌ಗಳ ಕುರಿತಾದ ಮಾಹಿತಿ ಇಲ್ಲಿದೆ.
ಓಡ್ಸ್ಕೆಲ್‌ ಬೀಚ್
ಪಣಜಿಯಲ್ಲಿ ಸಾಕಷ್ಟು ಜನಪ್ರಿಯವಾದ ಬೀಚ್‌ಗಳಿವೆ. ಓಡ್ಕ್ಸೆಲ್ ಬೀಚ್ ಕೂಡ ಬಹಳ ಪ್ರಸಿದ್ಧಿ ಪಡೆದಿದೆ. ಇದು ಪಣಜಿಯಿಂದ ಕೇವಲ 11 ಕಿ.ಮೀ ದೂರದಲ್ಲಿದ್ದು, ಸಣ್ಣ ಕಡಲತೀರವಾಗಿದೆ. ಸರಿ ಸುಮಾರು 250 ಮೀಟರ್‌ ಉದ್ದವಿದೆ. ಆದಾಗ್ಯೂ ಈ ಬೀಚ್ ಸುಂದರವಾಗಿದ್ದು,ಶಾಂತಿಯುತ ವಾತಾವರಣವನ್ನು ತನ್ನೊಳಗೆ ಇರಿಸಿಕೊಂಡಿದೆ. ಈ ಬೀಚ್ ಗೋವಾ ಸುತ್ತಮುತ್ತಲಿನ ಪ್ರವಾಸಿಗರ ನೆಚ್ಚಿನ ಪಿಕ್ನಿಕ್ ಸ್ಥಳವಾಗಿದೆ.ವೀಕೆಂಡ್‌ ಕಳೆಯಲು ಇದು ಬೆಸ್ಟ್‌ ತಾಣ. ಆದರೆ ಈ ಬೀಚ್‌ನಲ್ಲಿ ಈಜಾಡಲು ಅವಕಾಶವಿರುವುದಿಲ್ಲ.
ಮಿರಾಮರ್ ಬೀಚ್
ಪಣಜಿಯ ಅತ್ಯದ್ಭುತವಾದ ಮಿರಾಮರ್ ಬೀಚ್ ರಾಜ್ಯದ ಅತಿ ಉದ್ದದ ಬೀಚ್ ಎಂದು ಕರೆಸಿಕೊಂಡಿದೆ. ಸರಿ ಸುಮಾರು 2 ಕಿ.ಮೀ ನಷ್ಟು ವಿಸ್ತರಿಸಿರುವ ಈ ಕಡಲತೀರದಲ್ಲಿ ನಿಂತು ಪ್ರವಾಸಿಗರು ಮಾಂಡೋವಿ ನದಿ ಹಾಗು ಅರೇಬಿಯನ್ ಸಮುದ್ರದ ಭವ್ಯತೆಯನ್ನು ವೀಕ್ಷಿಸಿ ಆನಂದಿಸಬಹುದು.
ತನ್ನ ಬಿಳಿ ಮರಳು, ನೀಲಿ ಬಣ್ಣದ ಸಮುದ್ರ, ಶಾಂತವಾಗಿ ಅಪ್ಪಳಿಸುವ ಅಲೆಗಳಿಗೆ ಈ ಬೀಚ್ ಹೆಸರುವಾಸಿಯಾಗಿದೆ. ಕಡಲತೀರವು ಎತ್ತರದ ಹಾಗು ತೂಗಾಡುವ ತಾಳೆ ಮರಗಳನ್ನು ಹೊಂದಿದೆ. ಕುಟುಂಬ ಪ್ರವಾಸ ಮಾಡಲು ಅಥವಾ ನವ ಜೋಡಿಗಳ ಹನಿಮೂನ್‌ಗೆ ಈ ಬೀಚ್ ಉತ್ತಮ ಆಯ್ಕೆ ಎನ್ನಬಹುದು.
ಡೊನಾ ಪೌಲಾ ಬೀಚ್
ಪಣಜಿಯಿಂದ ಕೇವಲ 9 ಕಿಲೋಮೀಟರ್ ದೂರದಲ್ಲಿರುವ ಡೊನಾ ಪೌಲಾ ಬೀಚ್ ಬಹಳ ಅದ್ಭುತವಾದ ಬೀಚ್. ಇಲ್ಲಿ ಸೂರ್ಯಾಸ್ತದ ಮನಮೋಹಕವಾದ ದೃಶ್ಯವನ್ನು ಕಣ್ತುಂಬಿಕೊಳ್ಳಬಹುದು. ಈ ಸುಂದರವಾದ ಪ್ರದೇಶವು ಮಾಂಡೋವಿ ಮತ್ತು ಜುವಾರಿ ನದಿಗಳು ಮತ್ತು ಅರೇಬಿಯನ್ ಸಮುದ್ರದ ಸಂಗಮದಲ್ಲಿದೆ. ಗೋವಾ ಪ್ರವಾಸ ಕೈಗೊಳ್ಳುವವರು ತಪ್ಪದೇ ಈ ಬೀಚ್‌ಗೆ ಹೋಗಬೇಕು.
ಬಾಂಬೋಲಿಮ್ ಬೀಚ್
ಈ ಬಾಂಬೋಲಿಮ್ ಬೀಚ್ ಪಣಜಿಯಲ್ಲಿನ ಪ್ರಮುಖ ಪ್ರವಾಸಿ ಆಕರ್ಷಣೆಯಾಗಿದೆ. ಕುಟುಂಬದೊಂದಿಗೆ ಈ ಬೀಚ್‌ಗೆ ಪಿಕ್ನಿಕ್‌ಗೆ ಹೋಗಬಹುದು. ಆದರೆ ಹೆಚ್ಚಿನ ಪ್ರವಾಸಿಗರಿಗೆ ಈ ಬೀಚ್ ಕುರಿತು ತಿಳಿದಿಲ್ಲ. ಪಣಜಿಯಿಂದ ಕೇವಲ 7 ಕಿ.ಮೀ ದೂರದಲ್ಲಿರುವ ಈ ಕಡಲತೀರದಲ್ಲಿ ಹಿತವಾದ ವಾತಾವರಣವಿದೆ.ಅರೇಬಿಯನ್ ಸಮುದ್ರದ ಸೌಂದರ್ಯವನ್ನೂ ಅನುಭವಿಸಿ ಪುಳಕಿತರಾಗಬಹುದು.ಗೋವಾ ಪ್ರವಾಸ ಹೋಗುವವರು ಇಲ್ಲಿಗೆ ಮಿಸ್‌ ಮಾಡಿಕೊಳ್ಳದೆ ಹೋಗಬೇಕು. ಇಂತಹ ಜಾಗಗಳಿಗೆ ಹೋಗದಿದ್ದರೆ ಪ್ರವಾಸಿಗರಿಗೆ ನಷ್ಟ!
