ಮಹಾಶಿವರಾತ್ರಿ ನೀಲಕಂಠನ ಮಹಾತ್ಮೆಯನ್ನು ದೇಶವಿಡೀ ಸಾರುವ ಹಬ್ಬ

- ದೀಕ್ಷಾ ಭಟ್‌

ಮಹಾ ಶಿವರಾತ್ರಿ ಸಮೀಪಿಸಿದೊಡನೆ, `ಓಂ ನಮಃ ಶಿವಾಯ’ ಎಂಬ ಪವಿತ್ರ ನಾಮಸ್ಮರಣೆ ದೇಶದಾದ್ಯಂತ ಪ್ರತಿಧ್ವನಿಸುತ್ತದೆ. ದೇವಾಲಯಗಳ ಘಂಟೆನಾದ, ಧೂಪದ ಸುವಾಸನೆ ಮತ್ತು ಜಾಗರಣೆ ವ್ರತದ ಭಕ್ತಿಭಾವದ ನಡುವೆ ಶಿವರಾತ್ರಿ ಮಹೋತ್ಸವವಾಗಿ ರೂಪುಗೊಳ್ಳುತ್ತದೆ. ಶಿವರಾತ್ರಿ ಎಂಬುದು ಕೇವಲ ಹಬ್ಬವಲ್ಲ; ಇದು ತಪಸ್ಸು, ತ್ಯಾಗ, ಜಾಗೃತಿ ಮತ್ತು ಮೋಕ್ಷದ ಸಂಕೇತವಾದ ಮಹೋತ್ಸವ. ಫಾಲ್ಗುಣ ಮಾಸದ ಕೃಷ್ಣ ಪಕ್ಷದ ಚತುರ್ದಶಿಯಂದು ಆಚರಿಸಲ್ಪಡುವ ಈ ಹಬ್ಬ, ಮಾನವನನ್ನು ಅಹಂಕಾರ, ಅಜ್ಞಾನ ಮತ್ತು ಅಂಧಕಾರದಿಂದ ಮುಕ್ತಗೊಳಿಸಿ ಜ್ಞಾನ ಹಾಗೂ ಶಾಂತಿಯ ಬೆಳಕಿನತ್ತ ನಡೆಸುತ್ತದೆ.

ಮಹಾ ಶಿವರಾತ್ರಿಯ ಆಚರಣೆ ಹಿಂದಿನ ಕತೆ

ಒಮ್ಮೆ ಸಮುದ್ರ ಮಥನ ಸಮಯದಲ್ಲಿ ದೇವತೆಗಳು ಮತ್ತು ಅಸುರರು ಅಮೃತಕ್ಕಾಗಿ ಸಮುದ್ರವನ್ನು ಮಥಿಸಿದಾಗ, ಮೊದಲು ಹಾಲಾಹಲ ವಿಷ ಹೊರಬಂತು. ಆ ವಿಷವು ಸಂಪೂರ್ಣ ಸೃಷ್ಟಿಯನ್ನು ನಾಶಮಾಡುವಷ್ಟು ಭಯಾನಕವಾಗಿತ್ತು. ಆಗ ಎಲ್ಲ ದೇವತೆಗಳು ಶಿವನ ಮೊರೆ ಹೋದರು. ಜಗತ್ತಿನ ರಕ್ಷಣೆಗೆ ಶಿವನು ಆ ವಿಷವನ್ನು ಕುಡಿಯುತ್ತಾನೆ. ಆದರೆ ಅದನ್ನು ಗಂಟಲಲ್ಲಿ ಹಿಡಿದುಕೊಂಡು ನುಂಗುವುದಿಲ್ಲ. ವಿಷದ ಪ್ರಭಾವದಿಂದ ಅವನ ಕಂಠ ನೀಲಿ ಬಣ್ಣಕ್ಕೆ ತಿರುಗುತ್ತದೆ. ಅದರಿಂದಲೇ ಶಿವನಿಗೆ ನೀಲಕಂಠ ಎಂಬ ಹೆಸರು ಬಂದಿದೆ. ಈ ಮಹಾ ತ್ಯಾಗವನ್ನು ಸ್ಮರಿಸುವುದಕ್ಕಾಗಿ ಶಿವರಾತ್ರಿ ಆಚರಿಸಲಾಗುತ್ತದೆ.

ಇದನ್ನೂ ಓದಿ: ಇಟಗಿಯ ಶ್ರೀರಾಮೇಶ್ವರ ದೇವಾಲಯದಲ್ಲಿ ನಿತ್ಯಬಲಿ

ಮಹಾ ಶಿವರಾತ್ರಿಯ ಆಧ್ಯಾತ್ಮಿಕ ಮಹತ್ವ

ಮಹಾ ಶಿವರಾತ್ರಿ ನಮಗೆ ತ್ಯಾಗ, ಸಹನೆ, ಆತ್ಮನಿಗ್ರಹ ಮತ್ತು ಭಕ್ತಿಯ ಪಾಠವನ್ನು ಕಲಿಸುತ್ತದೆ. ಶಿವನು ಸಂಹಾರಕನಾಗಿದ್ದರೂ, ಅವನು ಕರುಣಾಮಯ ಮತ್ತು ಲೋಕಕಲ್ಯಾಣಕ್ಕಾಗಿ ತ್ಯಾಗ ಮಾಡುವ ದೇವರು ಎಂಬ ಸಂದೇಶವನ್ನು ಈ ಹಬ್ಬ ಸಾರುತ್ತದೆ. ಶಿವನು ಸಂಹಾರಕ ಮಾತ್ರವಲ್ಲ; ಆತ ಮಹಾಯೋಗಿ, ಪರಮ ತಪಸ್ವಿ ಮತ್ತು ಚೈತನ್ಯದ ಮೂಲ. ಮಹಾ ಶಿವರಾತ್ರಿ ದಿನ ಜಾಗರಣ ಮಾಡಿ ಧ್ಯಾನ, ಜಪ ಮತ್ತು ಪೂಜೆ ಮಾಡುವುದರಿಂದ ಮನಸಿನ ಅಶಾಂತಿ ಶಮನವಾಗುತ್ತದೆ. ಈ ರಾತ್ರಿಯಲ್ಲಿ ಪ್ರಕೃತಿಯ ಶಕ್ತಿ ಮಾನವನ ಆಂತರಿಕ ಚೈತನ್ಯವನ್ನು ಎಚ್ಚರಿಸುತ್ತದೆ ಎಂಬ ನಂಬಿಕೆ ಇದೆ. ಆದ್ದರಿಂದ ಯೋಗಿಗಳು ಮತ್ತು ಸಾಧಕರು ಈ ರಾತ್ರಿಯನ್ನು ಅತ್ಯಂತ ಪವಿತ್ರವಾಗಿ ಆಚರಿಸುತ್ತಾರೆ.

ಮಹಾ ಶಿವರಾತ್ರಿ ಪ್ರಸಿದ್ಧವಾಗಿ ಆಚರಿಸುವ ಕ್ಷೇತ್ರಗಳು

ವಾರಾಣಸಿ (ಕಾಶಿ), ಉತ್ತರ ಪ್ರದೇಶ

ಶಿವನ ನಗರವೆಂದೇ ಪ್ರಸಿದ್ಧವಾದ ಕಾಶಿಯಲ್ಲಿ ಮಹಾ ಶಿವರಾತ್ರಿ ಅತ್ಯಂತ ಭಕ್ತಿ ಮತ್ತು ವೈಭವದಿಂದ ಆಚರಿಸಲಾಗುತ್ತದೆ. ಈ ದಿನ ಲಕ್ಷಾಂತರ ಭಕ್ತರು ಗಂಗಾ ನದಿಯಲ್ಲಿ ಪವಿತ್ರ ಸ್ನಾನ ಮಾಡಿ, ಕಾಶಿ ವಿಶ್ವನಾಥನ ದರ್ಶನ ಪಡೆಯುತ್ತಾರೆ. ರಾತ್ರಿಯಿಡೀ ದೇವಸ್ಥಾನಗಳಲ್ಲಿ `ರುದ್ರಾಭಿಷೇಕ’, ವೇದಮಂತ್ರ ಪಠಣ, ಭಜನೆಗಳು ನಡೆಯುತ್ತವೆ. ಗಂಗಾ ಘಾಟ್‌ಗಳಲ್ಲಿ ನಡೆಯುವ ಭವ್ಯ `ಗಂಗಾ ಆರತಿ’ ಮನಮೋಹಕ ದೃಶ್ಯ ನೀಡುತ್ತದೆ.

ಉಜ್ಜಯಿನಿ – ಮಹಾಕಾಳೇಶ್ವರ, ಮಧ್ಯಪ್ರದೇಶ

12 ಜ್ಯೋತಿರ್ಲಿಂಗಗಳಲ್ಲಿ ಒಂದಾದ ಮಹಾಕಾಳೇಶ್ವರ ದೇವಸ್ಥಾನ ಮಹಾ ಶಿವರಾತ್ರಿಯಂದು ಭಕ್ತರಿಂದ ತುಂಬಿ ತುಳುಕುತ್ತದೆ. ಇಲ್ಲಿ ನಡೆಯುವ ಪ್ರಸಿದ್ಧ `ಭಸ್ಮ ಆರತಿ’ ಶಿವರಾತ್ರಿಯ ವಿಶೇಷ ಆಕರ್ಷಣೆ; ಶವಭಸ್ಮದಿಂದ ಶಿವಲಿಂಗಕ್ಕೆ ಪೂಜೆ ಸಲ್ಲಿಸುವ ಅಪರೂಪದ ಸಂಪ್ರದಾಯ ಇಲ್ಲಿ ನಡೆಯುತ್ತದೆ. ಈ ದಿನ ಉಜ್ಜಯಿನಿಯೆಲ್ಲೆಡೆ ಧಾರ್ಮಿಕ ಮೆರವಣಿಗೆಗಳು, ಸಂಗೀತ, ನೃತ್ಯ ಹಾಗೂ ಪೂಜಾ ಕಾರ್ಯಕ್ರಮಗಳು ನಡೆಯುತ್ತವೆ. ಸಂಪೂರ್ಣ ನಗರವೇ ಹಬ್ಬದ ವಾತಾವರಣದಿಂದ ಕಂಗೊಳಿಸುತ್ತದೆ.

ಈಶಾ ಯೋಗ ಕೇಂದ್ರ, ಕೊಯಮತ್ತೂರು

112 ಅಡಿ ಎತ್ತರದ ಆದಿಯೋಗಿ ಪ್ರತಿಮೆಯ ಮುಂದೆ ನಡೆಯುವ ಮಹಾ ಶಿವರಾತ್ರಿ ಕಾರ್ಯಕ್ರಮ ಜಾಗತಿಕ ಖ್ಯಾತಿ ಪಡೆದಿದೆ. ರಾತ್ರಿಯಿಡೀ ನಡೆಯುವ ಈ ಕಾರ್ಯಕ್ರಮದಲ್ಲಿ ಪ್ರಸಿದ್ಧ ಕಲಾವಿದರಿಂದ ಸಂಗೀತ ಹಾಗೂ ನೃತ್ಯ ಪ್ರದರ್ಶನಗಳು, ಯೋಗ ಮತ್ತು ಧ್ಯಾನ ಸತ್ರಗಳು ನಡೆಯುತ್ತವೆ. ಲಕ್ಷಾಂತರ ಜನರು ಇಲ್ಲಿ ಭಾಗವಹಿಸಿ, ರಾತ್ರಿ ಜಾಗರಣೆ ಮಾಡಿ ಶಿವತತ್ವವನ್ನು ಅನುಭವಿಸುತ್ತಾರೆ. ಆಧ್ಯಾತ್ಮಿಕ ಶಕ್ತಿ ಮತ್ತು ಶಾಂತಿಯ ಸಂಯೋಜನೆಯಾಗಿ ಈ ಉತ್ಸವ ರೂಪುಗೊಳ್ಳುತ್ತದೆ.

ಹರಿದ್ವಾರ ಮತ್ತು ಹೃಷಿಕೇಶ

ಮಹಾ ಶಿವರಾತ್ರಿಯಂದು ಹರಿದ್ವಾರ ಮತ್ತು ಋಷಿಕೇಶ ಭಕ್ತಿ ಮತ್ತು ತಪಸ್ಸಿನ ಕೇಂದ್ರಗಳಾಗುತ್ತವೆ. ಭಕ್ತರು ಗಂಗಾ ನದಿಯಲ್ಲಿ ಪವಿತ್ರ ಸ್ನಾನ ಮಾಡಿ, ಹರಕಿ ಪೌರಿಯಲ್ಲಿ ನಡೆಯುವ ಗಂಗಾ ಆರತಿಯಲ್ಲಿ ಭಾಗವಹಿಸುತ್ತಾರೆ. ಹಲವರು ನೀಲಕಂಠ ಮಹಾದೇವ ದೇವಸ್ಥಾನಕ್ಕೆ ಪಾದಯಾತ್ರೆ ಕೈಗೊಂಡು ಶಿವನಿಗೆ ತಮ್ಮ ಭಕ್ತಿಯನ್ನು ಅರ್ಪಿಸುತ್ತಾರೆ.

ಶ್ರೀಶೈಲಂ, ಆಂಧ್ರ ಪ್ರದೇಶ

ಶ್ರೀಶೈಲಂನ ಮಲ್ಲಿಕಾರ್ಜುನ ಸ್ವಾಮಿ ದೇವಸ್ಥಾನವು ಮತ್ತೊಂದು ಜ್ಯೋತಿರ್ಲಿಂಗವಾಗಿದ್ದು, ಮಹಾ ಶಿವರಾತ್ರಿಯಂದು ಏಳು ದಿನಗಳ ಉತ್ಸವ ನಡೆಯುತ್ತದೆ. ಈ ಅವಧಿಯಲ್ಲಿ ವಿಶೇಷ ಪೂಜೆಗಳು, ಅಭಿಷೇಕಗಳು, ಭವ್ಯ ರಥಯಾತ್ರೆ ಮತ್ತು ಸಾಂಸ್ಕೃತಿಕ ಕಾರ್ಯಕ್ರಮಗಳು ಆಯೋಜಿಸಲಾಗುತ್ತವೆ. ಕೃಷ್ಣಾ ನದಿಯ ತಟದಲ್ಲಿರುವ ಈ ಕ್ಷೇತ್ರದಲ್ಲಿ ಭಕ್ತರು ಆಧ್ಯಾತ್ಮಿಕ ಶಾಂತಿ ಮತ್ತು ಶಕ್ತಿಯನ್ನು ಅನುಭವಿಸುತ್ತಾರೆ.

ಕರ್ನಾಟಕದಲ್ಲೂ ಶಿವರಾತ್ರಿಯ ಸಂಭ್ರಮ

ಮಹಾಶಿವರಾತ್ರಿ ಶಿವಭಕ್ತರ ಪಾಲಿಗೆ ಅತ್ಯಂತ ಪವಿತ್ರವಾದ ರಾತ್ರಿಯಾಗಿದೆ. ಈ ವಿಶೇಷ ದಿನ ಕರ್ನಾಟಕದಾದ್ಯಂತ ಇರುವ ಪ್ರಸಿದ್ಧ ಶಿವಾಲಯಗಳಲ್ಲಿ ಭಕ್ತಿಭಾವದಿಂದ ಜಾಗರಣೆ, ವಿಶೇಷ ಅಭಿಷೇಕಗಳು ಮತ್ತು ಭಜನೆಗಳು ನೆರವೇರುತ್ತವೆ. ಧರ್ಮಸ್ಥಳದ ಮಂಜುನಾಥೇಶ್ವರ ದೇವಸ್ಥಾನ, ಗೋಕಾರ್ಣದ ಮಹಾಬಲೇಶ್ವರ, ಮುರುಡೇಶ್ವರ, ಕೋಲಾರದ ಕೋಟಿಲಿಂಗೇಶ್ವರ, ನಂಜನಗೂಡಿನ ಶ್ರೀಕಂಠೇಶ್ವರ, ಹಳೆಬೀಡಿನ ಐತಿಹಾಸಿಕ ಕೇದಾರೇಶ್ವರ ಹಾಗೂ ತಲಕಾಡಿನ ವೈದ್ಯೇಶ್ವರ ದೇವಸ್ಥಾನಗಳು ಶಿವರಾತ್ರಿ ಸಂಭ್ರಮಕ್ಕೆ ಪ್ರಮುಖ ಕೇಂದ್ರಗಳಾಗಿವೆ. ಮಹಾಶಿವರಾತ್ರಿ ಭಕ್ತರಲ್ಲಿ ಆತ್ಮಶುದ್ಧಿ, ಶಾಂತಿ ಮತ್ತು ಆಧ್ಯಾತ್ಮಿಕ ಜಾಗೃತಿಯನ್ನು ಮೂಡಿಸುವ ಮಹತ್ವದ ಹಬ್ಬವಾಗಿದೆ.

ಮಂಜುನಾಥೇಶ್ವರ ದೇವಸ್ಥಾನ, ಧರ್ಮಸ್ಥಳ

ಧರ್ಮ, ದಾನ ಮತ್ತು ದೇವರ ಸಂಗಮವಾಗಿರುವ ಧರ್ಮಸ್ಥಳದಲ್ಲಿ ಮಹಾಶಿವರಾತ್ರಿ ವಿಶಿಷ್ಟ ಭಕ್ತಿಭಾವದಲ್ಲಿ ನಡೆಯುತ್ತದೆ. ಏಕಕಾಲದಲ್ಲಿ ಜಾಗರಣೆ, ರುದ್ರಪಠಣ ಮತ್ತು ಸೇವಾ ಸಂಪ್ರದಾಯಗಳು ನೆರವೇರುತ್ತವೆ. ಸಹಸ್ರಾರು ಜನರು ಶಿಸ್ತುಬದ್ಧ ಆರಾಧನೆಯ ಮೂಲಕ ಶಿವಾನುಗ್ರಹವನ್ನು ಅನುಭವಿಸುತ್ತಾರೆ.

ಮಹಾಬಲೇಶ್ವರ ದೇವಸ್ಥಾನ, ಗೋಕರ್ಣ

ಗೋಕರ್ಣದ ಮಹಾಬಲೇಶ್ವರ ದೇವಸ್ಥಾನವು ಉತ್ತರ ಕನ್ನಡ ಜಿಲ್ಲೆಯ ಪ್ರಸಿದ್ಧ ಶಿವಕ್ಷೇತ್ರವಾಗಿದ್ದು, ರಾವಣನಿಗೆ ಶಿವನು ನೀಡಿದ ಆತ್ಮಲಿಂಗವನ್ನು (6ಅಡಿ ಎತ್ತರದ ಬಿಳಿ ಗ್ರಾನೈಟ್) ಹೊಂದಿದೆ, ಇದನ್ನು ದಕ್ಷಿಣ ಕಾಶಿ ಎಂದೂ ಕರೆಯುತ್ತಾರೆ. ಇಲ್ಲಿನ ಪ್ರಮುಖ ಹಬ್ಬ ಮಹಾ ಶಿವರಾತ್ರಿ. ಈ ಸಮಯದಲ್ಲಿ ನಡೆಯುವ ಭವ್ಯ ರಥೋತ್ಸವ ಮತ್ತು ಶಿವನ ದರ್ಶನಕ್ಕಾಗಿ ದೇಶದಾದ್ಯಂತ ಲಕ್ಷಾಂತರ ಭಕ್ತರು ಆಗಮಿಸುತ್ತಾರೆ.

ಮುರುಡೇಶ್ವರ ದೇವಸ್ಥಾನ

ಅರಬ್ಬೀ ಸಮುದ್ರದ ತಟದಲ್ಲಿ ನಿಂತಿರುವ ಮಹತ್ತರ ಶಿವಮೂರ್ತಿ ಮುರಡೇಶ್ವರದ ವೈಶಿಷ್ಟ್ಯ. ಶಿವರಾತ್ರಿ ದಿನ ದೀಪಾಲಂಕಾರ, ನಾದಸ್ವರ ಮತ್ತು ಉತ್ಸವ ವಾತಾವರಣ ಭಕ್ತರನ್ನು ಆಕರ್ಷಿಸುತ್ತದೆ. ಪ್ರಕೃತಿ ಹಾಗೂ ಪರಮಾತ್ಮನ ಸಂಗಮದ ಅನುಭವ ಇಲ್ಲಿಯ ವಿಶೇಷತೆ.

ಕೋಟಿಲಿಂಗೇಶ್ವರ ದೇವಸ್ಥಾನ, ಕೋಲಾರ

ಅಸಂಖ್ಯಾತ ಲಿಂಗಗಳ ಸಾಲುಗಳಿಂದ ವಿಭಿನ್ನವಾಗಿರುವ ಕೋಟಿಲಿಂಗೇಶ್ವರ ಕ್ಷೇತ್ರ ಶಿವರಾತ್ರಿ ವೇಳೆ ಭವ್ಯ ರೂಪ ಪಡೆಯುತ್ತದೆ. ಸಾಮೂಹಿಕ ಅರ್ಚನೆ, ವಿಶೇಷ ದರ್ಶನ ವ್ಯವಸ್ಥೆ ಮತ್ತು ವಿಶಾಲ ಆವರಣ ಭಕ್ತರಿಗೆ ಅಪರೂಪದ ಆಧ್ಯಾತ್ಮಿಕ ಅನುಭವ ನೀಡುತ್ತದೆ.

ಶ್ರೀಕಂಠೇಶ್ವರ ದೇವಸ್ಥಾನ, ನಂಜನಗೂಡು

ಪಾರ್ವತಿ ಸಮೇತನಾಗಿ ಪೂಜಿತನಾಗಿರುವ ಶ್ರೀಕಂಠೇಶ್ವರನ ಸಾನ್ನಿಧ್ಯದಲ್ಲಿ ಶಿವರಾತ್ರಿ ಅತ್ಯಂತ ಪಾವನವಾಗಿ ಆಚರಿಸಲಾಗುತ್ತದೆ. ನದೀತೀರದ ಶಾಂತ ವಾತಾವರಣ, ಪುರಾತನ ಆಚರಣೆಗಳು ಮತ್ತು ರಾತ್ರಿ ಪೂಜೆಗಳು ಭಕ್ತರಲ್ಲಿ ಅಪಾರ ನಂಬಿಕೆ ಮೂಡಿಸುತ್ತವೆ.

ವೈದ್ಯೇಶ್ವರ ದೇವಸ್ಥಾನ, ತಲಕಾಡು

ಪಂಚಲಿಂಗ ಪರಂಪರೆಯ ಭಾಗವಾದ ವೈದ್ಯೇಶ್ವರ ಕ್ಷೇತ್ರ ಶಿವರಾತ್ರಿ ದಿನ ವಿಶೇಷ ಮಹತ್ವ ಪಡೆಯುತ್ತದೆ. ಆರೋಗ್ಯ ಹಾಗೂ ಕ್ಷೇಮಕ್ಕಾಗಿ ಸಲ್ಲಿಸುವ ವಿಶಿಷ್ಟ ಸೇವೆಗಳು, ಮಣ್ಣಿನೊಳಗಿನಿಂದ ಹೊರಹೊಮ್ಮುವ ದೇವಾಲಯದ ರಹಸ್ಯತೆಯೊಂದಿಗೆ ಭಕ್ತರನ್ನು ಆಕರ್ಷಿಸುತ್ತವೆ.

ಗವಿ ಗಂಗಾಧರೇಶ್ವರ ಸ್ವಾಮಿ ದೇವಸ್ಥಾನ, ಬೆಂಗಳೂರು

ಬೆಂಗಳೂರಿನ ಗವಿಪುರಂನಲ್ಲಿರುವ ಗವಿ ಗಂಗಾಧರೇಶ್ವರ ಸ್ವಾಮಿ ದೇವಸ್ಥಾನದಲ್ಲಿ ಶಿವರಾತ್ರಿಯನ್ನು ಅತ್ಯಂತ ವೈಭವದಿಂದ ಆಚರಿಸಲಾಗುತ್ತದೆ. ಶಿವರಾತ್ರಿಯಂದು ಭಕ್ತರು ಶಿವಲಿಂಗಕ್ಕೆ ಹಾಲು, ಜೇನುತುಪ್ಪ ಮತ್ತು ಗಂಗಾಜಲದಿಂದ ಅಭಿಷೇಕ ಮಾಡುತ್ತಾರೆ. ವಿಶೇಷವಾಗಿ ಶತರುದ್ರಾಭಿಷೇಕವು ಇಲ್ಲಿನ ಮುಖ್ಯ ಪೂಜೆಯಾಗಿದೆ. ಸಾಮಾನ್ಯ ದಿನಗಳಿಗಿಂತ ಭಿನ್ನವಾಗಿ, ಶಿವರಾತ್ರಿಯಂದು ದೇವಸ್ಥಾನವು ರಾತ್ರಿಯಿಡೀ ತೆರೆದಿರುತ್ತದೆ. ಭಕ್ತರು ಶಿವನ ಜಾಗರಣೆ ಮಾಡಲು ಮತ್ತು ಮಧ್ಯರಾತ್ರಿಯ ವಿಶೇಷ ಪೂಜೆಗಳಲ್ಲಿ ಭಾಗವಹಿಸಲು ಸಾವಿರಾರು ಸಂಖ್ಯೆಯಲ್ಲಿ ಆಗಮಿಸುತ್ತಾರೆ. ಶಿವರಾತ್ರಿಯ ರಾತ್ರಿಯನ್ನು ನಾಲ್ಕು ಭಾಗಗಳಾಗಿ (ಯಾಮಗಳು) ವಿಂಗಡಿಸಿ, ಪ್ರತಿ ಜಾವದಲ್ಲೂ ಶಿವಲಿಂಗಕ್ಕೆ ವಿಶೇಷ ಅಭಿಷೇಕ, ರುದ್ರಾಭಿಷೇಕ ಮತ್ತು ಬಿಲ್ವಾರ್ಚನೆಗಳನ್ನು ಮಾಡಲಾಗುತ್ತದೆ

ಒಟ್ಟಿನಲ್ಲಿ ದೇಶದ ಪ್ರಮುಖ ಶಿವ ದೇವಾಲಯಗಳಲ್ಲಿ ಶಿವನಾಮ ಸ್ಮರಣೆಯ ಜತೆಗೆ ವಿಶೇಷ ಪೂಜೆ, ಅಲಂಕಾರ, ಅಭಿಷೇಕಗಳು ನೆರವೇರುವ ಮೂಲಕ ವಿಶೇಷವಾಗಿ ಶಿವರಾತ್ರಿ ಆಚರಣೆ ಮಾಡಲಾಗುತ್ತದೆ.