ತಗಲಾಕೊಂಡೆ ನಾನು ಎಂಬ ಚಿಂತೆ ಏಕೆ?

ಮಧ್ಯಪ್ರಾಚ್ಯದಲ್ಲಿ ನಡೆಯುತ್ತಿರುವ ಸಂಘರ್ಷ ಎಲ್ಲರಿಗೂ ಗೊತ್ತಿದೆ. ಇಂಥ ಸಂದರ್ಭದಲ್ಲಿ ಆ ಪ್ರದೇಶಗಳಿಗೆ ಪ್ರಯಾಣ ಮಾಡಲು ಮುಂದಾಗುವುದಿಲ್ಲ. ಆದರೆ, ಒಂದುವೇಳೆ ಅಲ್ಲಿಗೆ ಪ್ರವಾಸ ಹೋಗಿ ಸಿಲುಕಿಕೊಂಡಿದ್ದರೆ ಏನು ಮಾಡುವುದು ಎಂಬ ಆತಂಕವಿರುತ್ತದೆ. ದುಬೈ, ದೋಹಾ, ಅಬುಧಾಬಿ ಮತ್ತು ಮಸ್ಕತ್‌ನಂಥ ಪ್ರಮುಖ ಸಾರಿಗೆ ಕೇಂದ್ರಗಳಲ್ಲಿ ಸಾವಿರಾರು ಪ್ರಯಾಣಿಕರು ಸಿಲುಕಿಕೊಂಡಿದ್ದಾರೆ. ವಾಯುಪ್ರದೇಶಗಳನ್ನು ಮುಚ್ಚಲಾಗಿದ್ದು, ಸಾವಿರಾರು ವಿಮಾನ ಸಂಸ್ಥೆಗಳು ವಿಮಾನಗಳನ್ನು ರದ್ದುಗೊಳಿಸಿವೆ. ಕೆಲವು ಮಾರ್ಗ ಬದಲಾವಣೆ ಮಾಡಿವೆ. ಇದರಿಂದಾಗಿ ಪ್ರಯಾಣಿಕರು ಸಾಮಾನ್ಯ ಮಾರ್ಗಗಳ ಮೂಲಕ ಮನೆಗೆ ಮರಳುವುದು ಕಷ್ಟ. ಈ ಪರಿಸ್ಥಿತಿಯು ಸಿಲುಕಿಕೊಂಡಿರುವ ಪ್ರಯಾಣಿಕರನ್ನು ಸಂಕೀರ್ಣ ಮತ್ತು ದುಬಾರಿ ವ್ಯವಸ್ಥೆಗಳನ್ನು ಒಳಗೊಂಡಿರುವ ಪರ್ಯಾಯ ಆಯ್ಕೆಗಳನ್ನು ಹುಡುಕುವಂತೆ ಮಾಡಿದೆ.

ಇದನ್ನೂ ಓದಿ: ಹನಿಮೂನ್‌ಗೂ ತಟ್ಟಿದ ಯುದ್ಧದ ಬಿಸಿ

ಏನೆಲ್ಲ ಆಯ್ಕೆಗಳಿವೆ?

ಅನೇಕ ದೇಶಗಳು ತಮ್ಮ ನಾಗರಿಕರನ್ನು ಸುರಕ್ಷಿತವಾಗಿ ಮನೆಗೆ ಕರೆತರಲು ವಿಮಾನಯಾನ ಸಂಸ್ಥೆಗಳು ಮತ್ತು ವಿದೇಶಾಂಗ ಸಚಿವಾಲಯಗಳ ಸಮನ್ವಯದೊಂದಿಗೆ ಸ್ಥಳಾಂತರಿಸುವ ಪ್ರಯತ್ನಗಳನ್ನು ಪ್ರಾರಂಭಿಸಿವೆ. ಈ ವಿಮಾನಗಳಲ್ಲಿ ಅಶಕ್ತ ಅಥವಾ ಸಂಕಷ್ಟದಲ್ಲಿರುವ ಪ್ರಯಾಣಿಕರಿಗೆ ಆದ್ಯತೆ ನೀಡಲಾಗುತ್ತದೆ. ಇದು ಸೀಮಿತ “ಸೇಫ್‌ ಕಾರಿಡಾರ್‌” ಅಥವಾ ನಿಯಂತ್ರಿತ ಪರಿಸ್ಥಿತಿಗಳಲ್ಲಿ ಕೆಲಸ ಮಾಡುತ್ತಿರುವ ಕೆಲವು ವಿಮಾನ ನಿಲ್ದಾಣಗಳಿಂದ ಕಾರ್ಯನಿರ್ವಹಿಸಬಹುದಷ್ಟೆ. ವಾಣಿಜ್ಯ ಸೇವೆಗಳು ಸ್ಥಗಿತಗೊಂಡಾಗ ಸರಕಾರಗಳು ಮಿಲಿಟರಿ ವಿಮಾನಗಳು ಅಥವಾ ಚಾರ್ಟರ್ಡ್ ವಿಮಾನಗಳನ್ನು ಬಳಸುತ್ತಿವೆ. ಇದು ಸುರಕ್ಷಿತ ಆಯ್ಕೆಯಾಗಿದ್ದರೂ, ಹೆಚ್ಚಿನ ಬೇಡಿಕೆಯಿಂದಾಗಿ ದೀರ್ಘಕಾಲ ಕಾಯಬೇಕಾಗಬಹುದು.

ಮತ್ತೊಂದು ಆಯ್ಕೆಯೆಂದರೆ ಪರ್ಯಾಯ ವಾಣಿಜ್ಯ ಮಾರ್ಗಗಳನ್ನು ಬುಕ್ ಮಾಡುವುದು. ಆದರೆ ಪ್ರಸ್ತುತ ಬಹಳ ಇವು ವಿರಳ ಮತ್ತು ದುಬಾರಿಯಾಗಿವೆ. ಗಲ್ಫ್ ರಾಷ್ಟ್ರಗಳ ಪ್ರಮುಖ ವಿಮಾನ ನಿಲ್ದಾಣಗಳು ಭಾಗಶಃ ಮುಚ್ಚಿರುವುದರಿಂದ, ಪ್ರಯಾಣಿಕರು ಟರ್ಕಿ, ಜೋರ್ಡಾನ್ ಅಥವಾ ಏಷ್ಯಾದ ಇತರ ಭಾಗಗಳ ಮೂಲಕ ಪ್ರಯಾಣಿಸಬೇಕಾಗುತ್ತದೆ. ವಿಮಾನ ಸಂಸ್ಥೆಗಳು ಸಂಘರ್ಷದ ವಲಯಗಳನ್ನು ತಪ್ಪಿಸಲು ದೀರ್ಘ ಮಾರ್ಗಗಳನ್ನು ಸೃಷ್ಟಿಸುತ್ತಿವೆ. ಇವುಗಳು ಹೆಚ್ಚಿನ ಪ್ರಯಾಣ ಸಮಯ ಮತ್ತು ದುಬಾರಿ ದರವನ್ನು ಒಳಗೊಂಡಿರುತ್ತವೆ.

ತಕ್ಷಣವೇ ವಿಮಾನಗಳನ್ನು ಪಡೆಯಲು ಸಾಧ್ಯವಾಗದವರಿಗೆ ತಾತ್ಕಾಲಿಕ ವಸತಿ ಮತ್ತು ಸ್ಥಳೀಯ ನೆರವು ಅತ್ಯಗತ್ಯ. ಕೆಲವು ಸರಕಾರಗಳು ಮತ್ತು ವಿಮಾನ ನಿಲ್ದಾಣ ಪ್ರಾಧಿಕಾರಗಳು ಪ್ರಯಾಣಿಕರಿಗೆ ಉಚಿತ ಅಥವಾ ರಿಯಾಯಿತಿ ದರದಲ್ಲಿ ಹೊಟೇಲ್‌ಗಳು, ಊಟ ಮತ್ತು ತುರ್ತು ಸೇವೆಗಳನ್ನು ಒದಗಿಸುತ್ತಿವೆ. ರಾಯಭಾರಿ ಕಚೇರಿಗಳು ದಾಖಲಾತಿ, ರಿಬುಕಿಂಗ್ ಹಾಗೂ ಸ್ಥಳಾಂತರಿಸುವ ಪ್ರಕ್ರಿಯೆಗಳಿಗೆ ಸಹಾಯವಾಣಿಗಳನ್ನು ಸ್ಥಾಪಿಸಿವೆ.

ವಿಮಾನ ನಿಲ್ದಾಣಗಳನ್ನು ಪ್ರವೇಶಿಸಲಾಗದ ಸ್ಥಿತಿಯಲ್ಲಿದ್ದಾಗ, ರಸ್ತೆ ಮಾರ್ಗದ ಮೂಲಕ ನೆರೆಯ ದೇಶಗಳಿಗೆ ತೆರಳಿ ಅಲ್ಲಿಂದ ವಿಮಾನ ಹಿಡಿಯುವುದು ಇನ್ನೊಂದು ಆಯ್ಕೆ. ಉದಾಹರಣೆಗೆ, ಕೆಲವು ಪ್ರಯಾಣಿಕರು ಸೌದಿ ಅರೇಬಿಯಾ ಅಥವಾ ಒಮನ್‌ಗೆ ತೆರಳಿ ಅಲ್ಲಿಂದ ಪ್ರಯಾಣ ಮುಂದುವರಿಸುತ್ತಿದ್ದಾರೆ. ಆದರೆ, ಇದು ಗಡಿ ನಿರ್ಬಂಧಗಳು ಮತ್ತು ವೀಸಾ ಅಗತ್ಯತೆಗಳಂಥ ಅಪಾಯಗಳನ್ನು ಒಳಗೊಂಡಿರುತ್ತದೆ. ಇದನ್ನು ಗಮನದಲ್ಲಿಟ್ಟುಕೊಂಡು ಹಜ್ಜೆ ಇಡುವುದು ಉತ್ತಮ.

ಅನೇಕ ವಿಮಾ ಕಂಪನಿಗಳು ಪ್ರವಾಸದ ಅಡಚಣೆಗಳು, ರದ್ದು ಮತ್ತು ತುರ್ತು ಪ್ರಯಾಣದ ವೆಚ್ಚಗಳಿಗೆ ಮರುಪಾವತಿಯನ್ನು ನೀಡುತ್ತವೆ. ವಿಮಾನಯಾನ ಸಂಸ್ಥೆಗಳು ಸಹ ರಿಬುಕಿಂಗ್‌ ಅಥವಾ ಮರುಪಾವತಿ ಆಯ್ಕೆಗಳನ್ನು ಒದಗಿಸಬಹುದು. ಪ್ರಯಾಣಿಕರು ವಿಮಾನಯಾನ ಸಂಸ್ಥೆಗಳೊಂದಿಗೆ ನಿರಂತರ ಸಂಪರ್ಕದಲ್ಲಿರುವುದು ಮತ್ತು ಅಧಿಕೃತ ಮಾಹಿತಿಗಳನ್ನು ಗಮನಿಸುವುದು ಸೂಕ್ತ.

ಪಶ್ಚಿಮ ಏಷಿಯಾದ ಸಂಘರ್ಷವು ಅಭೂತಪೂರ್ವ ಪ್ರಯಾಣ ಬಿಕ್ಕಟ್ಟನ್ನು ಸೃಷ್ಟಿಸಿದ್ದರೂ, ಸಿಲುಕಿಕೊಂಡಿರುವ ಪ್ರಯಾಣಿಕರು ಮನೆಗೆ ಮರಳಲು ಹಲವಾರು ದಾರಿಗಳಿವೆ. ಸರಕಾರದ ಸ್ಥಳಾಂತರ ಕಾರ್ಯವಾಗಲಿ, ಪರ್ಯಾಯ ಮಾರ್ಗಗಳಾಗಲಿ ಅಥವಾ ಭೂಮಾರ್ಗದ ಪ್ರಯಾಣವಾಗಲಿ, ಪ್ರತಿಯೊಂದು ಆಯ್ಕೆಯೂ ತನ್ನದೇ ಆದ ಸವಾಲುಗಳನ್ನು ಹೊಂದಿದೆ. ಈ ವೇಗವಾಗಿ ಬದಲಾಗುತ್ತಿರುವ ಪರಿಸ್ಥಿತಿಯಲ್ಲಿ ಸುರಕ್ಷಿತವಾಗಿ ಕಾರ್ಯನಿರ್ವಹಿಸಲು ಪ್ರಯಾಣಿಕರು ಮಾಹಿತಿ ಮತ್ತು ಫ್ಲೆಕ್ಸಿಬಿಲಿಟಿ ಹೊಂದಿರುವುದು ಮುಖ್ಯ.