ವಿಮಾನದಲ್ಲಿ ಶವ ಸಾಗಣೆ

ವಿಮಾನದ ಕಾರ್ಗೋ ವಿಭಾಗದಲ್ಲಿ ಮನುಷ್ಯರ ಶವಗಳನ್ನು ಸಾಗಿಸಬಹುದಾ, ಸಾಗಿಸುತ್ತಾರಾ? ಈ ಪ್ರಶ್ನೆಗೆ ಉತ್ತರ ಹೌದು. ಈ ಪ್ರಕ್ರಿಯೆ ಅತ್ಯಂತ ಸೂಕ್ಷ್ಮ, ಗೌರವಾನ್ವಿತ ಮತ್ತು ಕಟ್ಟುನಿಟ್ಟಾದ ಅಂತಾರಾಷ್ಟ್ರೀಯ ನಿಯಮಗಳನ್ನು ಒಳಗೊಂಡಿದೆ. ವಿಮಾನಯಾನದಲ್ಲಿ ಶವ ಸಾಗಣೆಯನ್ನು ವಾಯು ಯಾನ ಸಂಸ್ಥೆಗಳು ತಮ್ಮ ‘ಸೆರೆನಿಟಿ ಕಾರ್ಗೋ’ ಅಥವಾ ‘ಮಾನವ ಅವಶೇಷಗಳ ಸಾಗಣೆ’ ಸೇವೆಗಳ ಅಡಿಯಲ್ಲಿ ನಿರ್ವಹಿಸುತ್ತವೆ. ಇದು ಕೇವಲ ಲಾಜಿಸ್ಟಿಕ್ಸ್ ಪ್ರಕ್ರಿಯೆಯಲ್ಲ, ಬದಲಿಗೆ ಆರೋಗ್ಯ, ಸುರಕ್ಷತೆ, ಮತ್ತು ಸಾರ್ವಜನಿಕ ಗೌರವವನ್ನು ಕಾಪಾಡುವ ಒಂದು ಮಹತ್ವದ ಕಾರ್ಯವಾಗಿದೆ. ವಿಮಾನದ ಕಾರ್ಗೋ ವಿಭಾಗ‌ವನ್ನು ವ್ಯಾಪಾರದ ಸರಕುಗಳು ಅಥವಾ ಪ್ರಯಾಣಿಕರ ಲಗೇಜ್‌ಗಳನ್ನು ಸಾಗಿಸಲು ಮಾತ್ರ ಬಳಸುವುದಿಲ್ಲ.

ಇದು ನಿಧನರಾದವರ ದೇಹಗಳನ್ನು ಅವರ ಅಂತ್ಯಕ್ರಿಯೆಗಾಗಿ ಒಂದು ಸ್ಥಳದಿಂದ ಇನ್ನೊಂದು ಸ್ಥಳಕ್ಕೆ, ವಿಶೇಷವಾಗಿ ಅಂತಾರಾಷ್ಟ್ರೀಯ ಗಡಿಗಳಾದ್ಯಂತ ಸಾಗಿಸಲು ಬಳಸುವ ಪ್ರಮುಖ ಮಾರ್ಗೋಪಾಯವಾಗಿದೆ. ಈ ಪ್ರಕ್ರಿಯೆಯು ಅತ್ಯಂತ ಜಟಿಲವಾಗಿದ್ದು, ಕಾನೂನು, ವೈದ್ಯಕೀಯ ಮತ್ತು ವಾಯುಯಾನ ನಿಯಮಗಳನ್ನು ಕಟ್ಟುನಿಟ್ಟಾಗಿ ಪಾಲಿಸಬೇಕಾಗುತ್ತದೆ.

ಶವವನ್ನು ವಿಮಾನದಲ್ಲಿ ಸಾಗಿಸುವ ಮೊದಲು, ಹಲವಾರು ನಿರ್ಣಾಯಕ ಪೂರ್ವ ಸಿದ್ಧತೆಗಳನ್ನು ಪೂರೈಸಬೇಕು. ಈ ಹಂತಗಳು ದೇಹದ ಸಂರಕ್ಷಣೆ ಮತ್ತು ವಿಮಾನದ ನೈರ್ಮಲ್ಯ ಸುರಕ್ಷತೆಯನ್ನು ಖಚಿತಪಡಿಸಬೇಕಾಗುತ್ತದೆ. ಅಂತಾರಾಷ್ಟ್ರೀಯ ವಿಮಾನ ಸಾಗಣೆಗಾಗಿ, ಪಾರ್ಥಿವ ಶರೀರವನ್ನು ಕೆಡದಂತೆ ಸಂರಕ್ಷಿಸುವುದು (Embalming) ಕಡ್ಡಾಯ. ಮೃತದೇಹವನ್ನು ಸ್ವಚ್ಛಗೊಳಿಸಿ, ನಂಜು ನಿರೋಧಕ ದ್ರಾವಣಗಳನ್ನು ಬಳಸಿ ವೈದ್ಯಕೀಯವಾಗಿ ಸಂರಕ್ಷಿಸಬೇಕಾಗುತ್ತದೆ.

ಇದರಿಂದ ಹಾರಾಟದ ಸಮಯದಲ್ಲಿ ಶವ ಕೊಳೆಯುವುದಿಲ್ಲ ಮತ್ತು ಅದರಿಂದ ವಾಸನೆ ಬರುವುದಿಲ್ಲ. ಈ ಕಾರ್ಯವನ್ನು ಪ್ರಮಾಣೀಕೃತ ಲೇಪಕರು (Certified Embalmers) ಮಾತ್ರ ಮಾಡಬೇಕು. ಅವರು ನೀಡಿದ ಲೇಪನ ಪ್ರಮಾಣಪತ್ರವನ್ನು (Embalming Certificate) ವಿಮಾನಯಾನ ಸಂಸ್ಥೆಗೆ ಕೊಡಬೇಕಾಗುತ್ತದೆ.

ಸಾಗಣೆಗಾಗಿ ಬಳಸುವ ಶವಪೆಟ್ಟಿಗೆಯು ( Coffin/Casket) ಸಾಮಾನ್ಯ ಪೆಟ್ಟಿಗೆಯಾಗಿರುವುದಿಲ್ಲ. ಅದು ಅಂತಾರಾಷ್ಟ್ರೀಯ ವಾಯು ಸರಕು ಮಾನದಂಡಗಳನ್ನು ಒಳಗೊಂಡ ಸೀಲ್ ಮಾಡಿದ, ತವರ ಅಥವಾ ಸತು-ಲೇಪಿತ ( Zinc lined) ಒಳ ಪೆಟ್ಟಿಗೆ. ಮೃತ ದೇಹವನ್ನು ಈ ಶವಪೆಟ್ಟಿಗೆಯಲ್ಲಿ ಇರಿಸಿದ ನಂತರ, ಅದನ್ನು ಸಂಪೂರ್ಣವಾಗಿ ಗಾಳಿಯಾಡದಂತೆ ಮೊಹರು ಮಾಡಲಾಗುತ್ತದೆ ಮತ್ತು ನಂತರ ಅದನ್ನು ದೃಢವಾದ ಮರದ ಹೊರ ಪೆಟ್ಟಿಗೆಯಲ್ಲಿ ( Wooden Outer Box) ಇರಿಸಲಾಗುತ್ತದೆ.

ಈ ಹೊರ ಪೆಟ್ಟಿಗೆಯಲ್ಲಿ ಯಾವುದೇ ರೀತಿಯ ವಿಸರ್ಜನೆ ಅಥವಾ ವಾಸನೆ ಹೊರಹೋಗದಂತೆ ಖಚಿತಪಡಿಸಿಕೊಳ್ಳಲು ಗಟ್ಟಿಯಾದ ಪ್ಯಾಡಿಂಗ್ ಇರಬೇಕು. ಮಾನವ ಶವಗಳ ಸಾಗಣೆಯು ಗಡಿಯಾಚೆಗಿನ ಪ್ರಕ್ರಿಯೆಯಾಗಿರುವುದರಿಂದ, ಸರಕು ಸಾಗಣೆಯ ಯಾವುದೇ ಇತರ ವಸ್ತುಗಳಿಗಿಂತ ಇದು ಹೆಚ್ಚಿನ ಕಾನೂನು ಪತ್ರಗಳನ್ನು ಬಯಸುತ್ತದೆ.

ಮರಣದ ಕಾರಣ, ಸ್ಥಳ ಮತ್ತು ದಿನಾಂಕವನ್ನು ದೃಢೀಕರಿಸಿದ ಮರಣ ಪ್ರಮಾಣಪತ್ರ, ಸ್ಥಳೀಯ ಪೊಲೀಸ್ (ಸಾವು ಅನುಮಾನಾಸ್ಪದವಾಗಿದ್ದರೆ) ಮತ್ತು ಸಂಬಂಧಪಟ್ಟ ದೇಶದ ರಾಯಭಾರ ಕಚೇರಿ ಅಥವಾ ದೂತಾವಾಸದಿಂದ ಶವವನ್ನು ಸಾಗಿಸಲು ಯಾವುದೇ ಆಕ್ಷೇಪಣೆ ಇಲ್ಲದ ಪ್ರಮಾಣ ಪತ್ರ, ಶವಪೆಟ್ಟಿಗೆಯು ವಿಮಾನಯಾನ ಸುರಕ್ಷತಾ ಮಾನದಂಡಗಳಿಗೆ ಅನುಗುಣವಾಗಿದೆ ಮತ್ತು ಸಂಪೂರ್ಣವಾಗಿ ಮೊಹರು ಮಾಡಲಾಗಿದೆ ಎಂದು ಪ್ರಮಾಣೀಕರಿಸುವ ದಾಖಲೆ, ಶವವನ್ನು ಸರಕಾಗಿ ಬುಕ್ ಮಾಡಿದಾಗ ವಿಮಾನಯಾನ ಸಂಸ್ಥೆ ನೀಡುವ ಸರಕು ರಸೀದಿ ಹಾಗೂ ಶವವು ಗಮ್ಯಸ್ಥಾನದ ದೇಶವನ್ನು ಪ್ರವೇಶಿಸಲು ಅಲ್ಲಿನ ಆರೋಗ್ಯ ಅಧಿಕಾರಿಗಳ ಅನುಮತಿ ಬೇಕು.

ಇದನ್ನೂ ಓದಿ: ವಿಮಾನ ಸಂಖ್ಯೆ ಮತ್ತು ಕೋಡ್

ಮಾನವ ಶವಗಳನ್ನು ವಿಮಾನದ ಮುಖ್ಯ ಕ್ಯಾಬಿನ್ ನಲ್ಲಿ (Passenger Cabin) ಸಾಗಿಸಲು ಅನುಮತಿ ಇರುವುದಿಲ್ಲ. ಅವುಗಳನ್ನು ಕೇವಲ ಕಾರ್ಗೋ ವಿಭಾಗದ ಮೂಲಕವೇ ಸಾಗಿಸಲಾಗುತ್ತದೆ. ಶವವನ್ನು ವಿಮಾನದ ಪ್ರಯಾಣಿಕರ ಲಗೇಜ್ ಆಗಿ ಪರಿಗಣಿಸಲಾಗುವುದಿಲ್ಲ. ಅವುಗಳನ್ನು ವಿಮಾನಯಾನ ಸಂಸ್ಥೆಯ ಕಾರ್ಗೋ ಸೇವೆಗಳ ಮೂಲಕ ಮುಂಗಡವಾಗಿ ಕಾಯ್ದಿರಿಸಲಾಗುತ್ತದೆ. ವಿಮಾನಯಾನ ಸಂಸ್ಥೆಗಳು ಈ ಸಾಗಣೆಗೆ ಅತ್ಯುನ್ನತ ಆದ್ಯತೆಯನ್ನು ನೀಡುತ್ತವೆ.

ಮೃತದೇಹಗಳನ್ನು ಸಾಮಾನ್ಯವಾಗಿ ವಾಣಿಜ್ಯ ಸರಕುಗಳಿಗಿಂತ ಅಥವಾ ಸಾಮಾನ್ಯ ಲಗೇಜ್‌ಗಿಂತ ಮೊದಲು ವಿಮಾನಕ್ಕೆ ಲೋಡ್ ಮಾಡಲಾಗುತ್ತದೆ.