ನಾಯಿಗಳಿಗೂ ವಿಮಾನಯೋಗ

ಮುಂದಿನ ಬಾರಿ ನೀವು ರೋಮ್‌ಗೆ ವಿಮಾನ ಹತ್ತುವಾಗ, ಕಿಟಕಿಯ ಬಳಿ ಗೋಲ್ಡನ್ ರಿಟ್ರೈವರ್ ಅಥವಾ ಇನ್ನಾವುದೇ ದೊಡ್ಡ ನಾಯಿಯನ್ನು ಕಂಡರೆ ಆಶ್ಚರ್ಯಪಡಬೇಡಿ. ಇತ್ತೀಚೆಗೆ ಇಟಲಿ ತನ್ನ ವಿಮಾನಯಾನ ನೀತಿಯಲ್ಲಿ ಮಹತ್ವದ ಬದಲಾವಣೆ ಮಾಡಿದೆ. ಇನ್ನು ಮುಂದೆ ಚಿಕ್ಕ ನಾಯಿಗಳು ಮಾತ್ರವಲ್ಲ, ಮಧ್ಯಮ ಮತ್ತು ದೊಡ್ಡ ಗಾತ್ರದ ನಾಯಿಗಳೂ ಅವುಗಳ ಮಾಲೀಕರೊಂದಿಗೆ ವಿಮಾನದ ಕ್ಯಾಬಿನ್‌ನಲ್ಲಿ ಪ್ರಯಾಣಿಸಬಹುದು.

ಇದು ಪ್ರಾಣಿಪ್ರಿಯರಿಗೆ ನಿಜಕ್ಕೂ ಸಂತೋಷದ ಸುದ್ದಿಯೇ. ಈ ತನಕ ದೊಡ್ಡ ನಾಯಿಗಳನ್ನು ವಿಮಾನದಲ್ಲಿ ಕರೆದೊಯ್ಯಬೇಕಾದರೆ, ಅವುಗಳನ್ನು ಸಾಮಾನು ಸಾಗಿಸುವ ಜಾಗದಲ್ಲಿ (cargo hold) ಇರಿಸಬೇಕಿತ್ತು. ಇದು ನಾಯಿಗಳಿಗೆ ಹಾಗೂ ಅವುಗಳ ಮಾಲೀಕರಿಗೆ ತೀವ್ರ ಕಿರಿಕಿರಿಯನ್ನುಂಟು ಮಾಡುತ್ತಿತ್ತು.

ಕೆಲವು ಸಲ ಕಾರ್ಗೋದಲ್ಲಿಟ್ಟ ನಾಯಿಗಳು ಉಸಿರುಗಟ್ಟಿ ಸತ್ತು ಹೋಗಿದ್ದವು. ತಮ್ಮ ಪ್ರೀತಿಯ ಸಾಕುಪ್ರಾಣಿಗಳನ್ನು ಸಾಮಾನುಗಳ ಜತೆ ಕಳುಹಿಸುವುದು ಅನೇಕರಿಗೆ ತೀವ್ರ ಹಿಂಸೆಯ ಅನುಭವವಾಗಿತ್ತು. ಆದರೆ, ಇಟಲಿ ಈ ಸಮಸ್ಯೆಯನ್ನು ಈಗ ಸಂಪೂರ್ಣವಾಗಿ ನಿವಾರಿಸಿದೆ. ಈ ಹೊಸ ನಿಯಮದ ಪ್ರಕಾರ, ನಿಮ್ಮ ನಾಯಿ ಸುಮ್ಮನಿದ್ದು, ಸರಿಯಾಗಿ ವರ್ತಿಸಬೇಕು ಮತ್ತು ಅದಕ್ಕೆ ಸರಪಣಿ (ಲೀಶ್) ಯನ್ನು ಕಡ್ಡಾಯವಾಗಿ ಹಾಕಬೇಕು.

ಇದನ್ನೂ ಓದಿ: ಇಸ್ರೇಲಿಗಳ ಈ ಸಿನೆಮಾ ಮುಗಿಯಲು ಇನ್ನೆಷ್ಟು ಇಂಟರ್ವಲ್ಲುಗಳು ಬಾಕಿಯಿದೆಯೋ ?!

ಈ ಷರತ್ತುಗಳನ್ನು ಪೂರೈಸಿದರೆ, ನಿಮ್ಮ ನಾಯಿ ನಿಮ್ಮ ಪಕ್ಕದ ಕುಳಿತುಕೊಂಡು ವಿಮಾನ ಪ್ರಯಾಣವನ್ನು ಆನಂದಿಸಬಹುದು. ITA Airways ಮತ್ತು Neos ನಂಥ ಕೆಲವು ಪ್ರಮುಖ ಏರ್ ಲೈನ್ಸ್‌ಗಳು ಈಗಾಗಲೇ ಈ ನೀತಿಯನ್ನು ಅನುಸರಿಸಲು ಪ್ರಾರಂಭಿಸಿವೆ. ಅವು ಪ್ರಾಣಿಗಳನ್ನು ಕೇವಲ ಸಾಮಾನುಗಳಂತೆ ನೋಡದೇ, ಪ್ರಯಾಣಿಕರಂತೆ ಪರಿಗಣಿಸಿ ಸೀಟುಗಳನ್ನು ಒದಗಿಸುತ್ತಿವೆ. ಇದು ಪ್ರಾಣಿಗಳ ಕಲ್ಯಾಣಕ್ಕೆ ಒಂದು ದೊಡ್ಡ ಹೆಜ್ಜೆಯಾಗಿದೆ. ಅವುಗಳಿಗೆ ಪ್ರಯಾಣದ ಸಮಯದಲ್ಲಿ ಸುರಕ್ಷತೆ ಮತ್ತು ಸೌಕರ್ಯ ದೊರಕುತ್ತದೆ. ಮಾಲೀಕರು ತಮ್ಮ ನಾಯಿಯ ಪಕ್ಕದಲ್ಲಿ ನಿಶ್ಚಿಂತರಾಗಿ ಪ್ರಯಾಣಿಸಬಹುದು. ಈ ಕ್ರಮವು ವಿಮಾನ ಪ್ರಯಾಣವನ್ನು ಹೆಚ್ಚು ಆಪ್ತ ಹಾಗೂ ಪ್ರೀತಿಯಿಂದ ಕೂಡಿದ ಅನುಭವವನ್ನಾಗಿಸಿದೆ.

ಈ ಬದಲಾವಣೆಯಿಂದಾಗಿ ಇಟಲಿ ಯುರೋಪಿನಲ್ಲಿ ಅತಿ ಹೆಚ್ಚು ನಾಯಿ ಸ್ನೇಹಿ ವಾಯುಪ್ರದೇಶವೆಂದು ಪರಿಗಣಿಸಲ್ಪಟ್ಟಿದೆ. ಇಟಲಿಯ ವಿಮಾನಯಾನ ಸಂಸ್ಥೆಗಳು ಈ ಹೊಸ ನೀತಿಯನ್ನು ಅಳವಡಿಸಿಕೊಂಡಿರುವುದರಿಂದ, ದೊಡ್ಡ ನಾಯಿಗಳ ಪ್ರಯಾಣಕ್ಕೆ ಇನ್ನೂ ಕೆಲವು ನಿರ್ದಿಷ್ಟ ನಿಯಮಗಳನ್ನು ಪಾಲಿಸಬೇಕಾಗುತ್ತದೆ.

ಸಾಮಾನ್ಯವಾಗಿ, ವಿಮಾನಯಾನ ಸಂಸ್ಥೆಗಳು ನಾಯಿಯ ಗರಿಷ್ಠ ತೂಕದ ಮಿತಿಯನ್ನು ನಿಗದಿ ಪಡಿಸುತ್ತವೆ. ಇದು ನಾಯಿ ಮತ್ತು ಅದರ ವಾಹಕದ (carrier) ಒಟ್ಟು ತೂಕವಾಗಿರುತ್ತದೆ. ಉದಾಹರಣೆಗೆ, ಕೆಲವು ಏರ್‌ಲೈನ್‌ಗಳು 75 ಕೆ.ಜಿ.ವರೆಗಿನ ನಾಯಿಗಳಿಗೆ ಅವಕಾಶ ನೀಡುತ್ತವೆ.

ವಿಮಾನದಲ್ಲಿ ನಾಯಿಯನ್ನು ನೆಲದ ಮೇಲೆ ಇರಿಸಲು, ಅದು ಸಾಕಷ್ಟು ದೊಡ್ಡದಾದ ಮತ್ತು ದೃಢವಾದ ವಾಹಕದಲ್ಲಿ ಇರಬೇಕು. ಕೆಲವು ಸಂದರ್ಭಗಳಲ್ಲಿ, ದೊಡ್ಡ ನಾಯಿಗಳು ಲೀಶ್ (leash) ಹಾಕಿ ಕುಳಿತುಕೊಳ್ಳಲು ಅನುಮತಿ ನೀಡಲಾಗುತ್ತದೆ, ಆದರೆ ಅವುಗಳಿಗೆ ವಿಶೇಷವಾಗಿ ಗೊತ್ತು ಪಡಿಸಿದ ಜಾಗದಲ್ಲಿ ಇರಬೇಕು. ದೊಡ್ಡ ನಾಯಿಗಳನ್ನು ಕ್ಯಾಬಿನ್‌ನಲ್ಲಿ ಕರೆದೊಯ್ಯಲು ಮಾಲೀಕರು ಹೆಚ್ಚುವರಿ ಶುಲ್ಕವನ್ನು ಪಾವತಿಸಬೇಕಾಗಬಹುದು.

ಈ ಶುಲ್ಕವು ನಾಯಿಯ ತೂಕ ಮತ್ತು ಪ್ರಯಾಣಿಸುವ ದೂರದ ಮೇಲೆ ಆಧಾರಿತವಾಗಿರುತ್ತದೆ. ಈ ನೀತಿಯು ಕೇವಲ ಪ್ರಯಾಣದ ಅನುಕೂಲಕ್ಕಾಗಿ ಮಾತ್ರವಲ್ಲ, ನಾಯಿಗಳ ಮಾನಸಿಕ ಮತ್ತು ದೈಹಿಕ ಆರೋಗ್ಯದ ದೃಷ್ಟಿಯಿಂದಲೂ ಬಹಳ ಮುಖ್ಯವಾಗಿದೆ. ಕಾರ್ಗೋ ವಿಭಾಗವು ತಂಪು, ಕತ್ತಲು ಮತ್ತು ಕರ್ಕಶ ಶಬ್ದಗಳಿಂದ ಕೂಡಿರುತ್ತದೆ.

ಅಲ್ಲಿ ಪ್ರಯಾಣಿಸುವುದು ನಾಯಿಗಳಿಗೆ ಭಯ ಮತ್ತು ಆತಂಕವನ್ನು ಉಂಟುಮಾಡಬಹುದು. ಕ್ಯಾಬಿನ್‌ನಲ್ಲಿ ಮಾಲೀಕರ ಜತೆ ಇರುವುದರಿಂದ, ನಾಯಿಗಳು ಸುರಕ್ಷಿತ ಮತ್ತು ಶಾಂತವಾಗಿರುತ್ತವೆ. ಕಾರ್ಗೋ ವಿಭಾಗದಲ್ಲಿ ವಾಯು ಒತ್ತಡ ಮತ್ತು ಉಷ್ಣಾಂಶವು ನಿಯಂತ್ರಣದಲ್ಲಿ ಇರುವುದಿಲ್ಲ. ಇದು ನಾಯಿಗಳ ಆರೋಗ್ಯದ ಮೇಲೆ ಗಂಭೀರ ಪರಿಣಾಮ ಬೀರಬಹುದು. ಆದರೆ ಕ್ಯಾಬಿನ್‌ನಲ್ಲಿ ಹವಾಮಾನವು ಯಾವಾಗಲೂ ನಿಯಂತ್ರಿತವಾಗಿರುತ್ತದೆ.

ಕಾರ್ಗೋ ವಿಭಾಗದಲ್ಲಿ ಸಾಮಾನುಗಳ ಮಧ್ಯೆ ನಾಯಿಯ ವಾಹಕವು ಹಾನಿಗೊಳಗಾಗುವ ಸಾಧ್ಯತೆ ಇರುತ್ತದೆ. ಕ್ಯಾಬಿನ್‌ನಲ್ಲಿ ಈ ಅಪಾಯ ಇರುವುದಿಲ್ಲ. ಇಟಲಿಯ ಈ ಕ್ರಮವು ಪ್ರಪಂಚದ ಇತರ ದೇಶಗಳಿಗಿಂತ ಭಿನ್ನವಾಗಿದೆ. ಅನೇಕ ದೇಶಗಳು ಮತ್ತು ಏರ್‌ಲೈನ್ಸ್‌ಗಳು ಕೇವಲ ಸಣ್ಣ ತಳಿಗಳ ನಾಯಿಗಳನ್ನು (ಉದಾಹರಣೆಗೆ 8-10 ಕೆ.ಜಿ. ಗಿಂತ ಕಡಿಮೆ ತೂಕದವು) ಮಾತ್ರ ಕ್ಯಾಬಿನ್‌ಗೆ ಅನುಮತಿಸುತ್ತವೆ. ದೊಡ್ಡ ನಾಯಿಗಳಿಗೆ ಇನ್ನೂ ಕಾರ್ಗೋ ವಿಭಾಗವೇ ಏಕೈಕ ಆಯ್ಕೆ. ಇದು ಇತರ ದೇಶಗಳಿಗೂ ಒಂದು ಉತ್ತಮ ಮಾದರಿ.