ಫಿಫಾ ವಿಶ್ವಕಪ್ 2026 : ಮೆಕ್ಸಿಕೋವನ್ನು ಜಾಗತಿಕ ಪ್ರವಾಸೋದ್ಯಮದ ಶಕ್ತಿಕೇಂದ್ರವನ್ನಾಗಿಸಬಹುದೇ?

2026ರ ಫಿಫಾ ವಿಶ್ವಕಪ್ ಇತಿಹಾಸದಲ್ಲೇ ಅತಿದೊಡ್ಡ ಟೂರ್ನಿಯಾಗಿದೆ. 48 ದೇಶಗಳ ತಂಡಗಳು, 104 ಪಂದ್ಯಗಳು, ಕೋಟ್ಯಂತರ ಪ್ರೇಕ್ಷಕರು ಮತ್ತು ಲಕ್ಷಾಂತರ ಅಭಿಮಾನಿಗಳು ಈ ಕ್ರೀಡಾ ಮಹೋತ್ಸವದ ಭಾಗವಾಗಲಿದ್ದಾರೆ. ಅಮೆರಿಕ, ಕೆನಡಾ ಮತ್ತು ಮೆಕ್ಸಿಕೋ ಜಂಟಿಯಾಗಿ ಆತಿಥ್ಯ ವಹಿಸುತ್ತಿರುವ ಈ ವಿಶ್ವಕಪ್‌ನಲ್ಲಿ ಮೆಕ್ಸಿಕೋ ತನ್ನ ಪ್ರವಾಸೋದ್ಯಮದ ಸಾಮರ್ಥ್ಯವನ್ನು ವಿಶ್ವದ ಮುಂದೆ ಪ್ರದರ್ಶಿಸಲು ಸಜ್ಜಾಗಿದೆ.

ಈ ಮಹಾಕ್ರೀಡಾಕೂಟದ ಅವಧಿಯಲ್ಲಿ ಸುಮಾರು 55 ಲಕ್ಷ ವಿದೇಶಿ ಪ್ರವಾಸಿಗರು ಮೆಕ್ಸಿಕೊಗೆ ಭೇಟಿ ನೀಡುವ ನಿರೀಕ್ಷೆಯಿದೆ. ಇದರಿಂದ ಹೊಟೇಲ್‌ಗಳು, ರೆಸ್ಟೋರೆಂಟ್‌ಗಳು, ಟ್ಯಾಕ್ಸಿ ಸೇವೆಗಳು, ಸ್ಥಳೀಯ ಮಾರುಕಟ್ಟೆಗಳು, ಕರಕುಶಲ ವಸ್ತುಗಳ ವ್ಯಾಪಾರ ಹಾಗೂ ಸಾಂಸ್ಕೃತಿಕ ಕಾರ್ಯಕ್ರಮಗಳಿಗೆ ಹೊಸ ಜೀವ ಸಿಗಲಿದೆ.

ಇದನ್ನೂ ಓದಿ: ‘ಪ್ರಸಾದ್’ ಯೋಜನೆಯಡಿ ಆಂಧ್ರದ ದೇವಾಲಯಗಳ ಜೀರ್ಣೋದ್ದಾರಕ್ಕೆ ಕೇಂದ್ರ ಸಜ್ಜು

ಕೇವಲ ಪಂದ್ಯಗಳನ್ನು ವೀಕ್ಷಿಸಲು ಬರುವ ಅಭಿಮಾನಿಗಳಷ್ಟೇ ಅಲ್ಲ, ಮೆಕ್ಸಿಕೋದ ಆಹಾರ, ಸಂಸ್ಕೃತಿ ಮತ್ತು ಪ್ರಕೃತಿ ಸೌಂದರ್ಯವನ್ನು ಅನುಭವಿಸಲು ಬರುವ ಪ್ರವಾಸಿಗರೂ ದೇಶದ ಆರ್ಥಿಕತೆಗೆ ದೊಡ್ಡ ಕೊಡುಗೆ ನೀಡಲಿದ್ದಾರೆ.

ಈಗಾಗಲೇ ವಿಶ್ವದಲ್ಲಿ ಅತಿ ಹೆಚ್ಚು ಪ್ರವಾಸಿಗರು ಭೇಟಿ ನೀಡುವ ರಾಷ್ಟ್ರಗಳಲ್ಲಿ ಆರನೇ ಸ್ಥಾನದಲ್ಲಿರುವ ಮೆಕ್ಸಿಕೋ, ವಿಶ್ವಕಪ್‌ ನಂತರ ಅಗ್ರ ಐದು ರಾಷ್ಟ್ರಗಳ ಪಟ್ಟಿಗೆ ಸೇರುವ ಗುರಿ ಹೊಂದಿದೆ. ಅದಕ್ಕಾಗಿ ವಿಮಾನ ನಿಲ್ದಾಣಗಳು, ರಸ್ತೆ ಸಂಪರ್ಕ, ಪ್ರವಾಸಿ ಸೌಲಭ್ಯಗಳು ಹಾಗೂ ನಗರ ಮೂಲಸೌಕರ್ಯಗಳನ್ನು ಮತ್ತಷ್ಟು ಅಭಿವೃದ್ಧಿಪಡಿಸಲಾಗುತ್ತಿದೆ.

ಮೆಕ್ಸಿಕೋ ಅಧ್ಯಕ್ಷೆ ಕ್ಲೌಡಿಯಾ ಶೀನ್‌ಬಾಮ್ ನೇತೃತ್ವದ ಸರಕಾರ ವಿಶ್ವಕಪ್ ಅನ್ನು ಕೇವಲ ಕ್ರೀಡಾ ಕಾರ್ಯಕ್ರಮವಾಗಿ ನೋಡುವುದಿಲ್ಲ. ಇದು ದೇಶದ ಸಂಸ್ಕೃತಿ, ಪರಂಪರೆ ಮತ್ತು ಆತಿಥ್ಯವನ್ನು ಜಗತ್ತಿನ ಮನೆಮಾತಾಗಿಸುವ ಜಾಗತಿಕ ವೇದಿಕೆ ಎಂದು ಪರಿಗಣಿಸಿದೆ. ವಿಶ್ವಪ್ರಸಿದ್ಧ ಚಿಚೆನ್ ಇಟ್ಜಾ, ಬಣ್ಣಬಣ್ಣದ ಕಾಲೋನಿಯಲ್ ನಗರಗಳು, ಕ್ಯಾರಿಬಿಯನ್ ಕಡಲತೀರಗಳು, ಮೆಕ್ಸಿಕನ್ ಆಹಾರ ಸಂಸ್ಕೃತಿ ಮತ್ತು ಸ್ಥಳೀಯ ಹಬ್ಬಗಳನ್ನು ವಿಶ್ವದ ಕೋಟ್ಯಂತರ ಜನರಿಗೆ ಪರಿಚಯಿಸುವ ಯೋಜನೆ ರೂಪಿಸಲಾಗಿದೆ.

ಅಮೆರಿಕದ ಕಟ್ಟುನಿಟ್ಟಿನ ವಲಸೆ ನೀತಿಗಳ ನಡುವೆಯೂ ಮೆಕ್ಸಿಕೋ ಹೆಚ್ಚು ಆತಿಥ್ಯಪರ ಹಾಗೂ ಪ್ರವಾಸಿಗ ಸ್ನೇಹಿ ದೇಶ ಎಂಬ ಭಾವನೆ ರೂಪುಗೊಳ್ಳುತ್ತಿದೆ. ಈ ಅಂಶವೂ ವಿಶ್ವಕಪ್ ಸಮಯದಲ್ಲಿ ಮೆಕ್ಸಿಕೋಗೆ ಹೆಚ್ಚುವರಿ ಲಾಭ ತಂದುಕೊಡಬಹುದು.

ಪ್ರವಾಸೋದ್ಯಮ ತಜ್ಞರು ಹೇಳುವಂತೆ, ವಿಶ್ವಕಪ್‌ನ ಯಶಸ್ಸು ಕೇವಲ ಪಂದ್ಯಗಳೊಂದಿಗೆ ಮುಗಿಯುವುದಿಲ್ಲ. ಒಮ್ಮೆ ದೇಶಕ್ಕೆ ಭೇಟಿ ನೀಡಿದ ಪ್ರವಾಸಿಗರು ಮತ್ತೆ ಕುಟುಂಬದೊಂದಿಗೆ ಮರಳುವ ಸಾಧ್ಯತೆ ಹೆಚ್ಚಿರುತ್ತದೆ. ಇದರಿಂದ ಮುಂದಿನ ಹಲವು ವರ್ಷಗಳವರೆಗೆ ಪ್ರವಾಸೋದ್ಯಮ ಆದಾಯ, ಉದ್ಯೋಗಾವಕಾಶಗಳು ಮತ್ತು ವಿದೇಶಿ ಹೂಡಿಕೆಯಲ್ಲಿ ಗಣನೀಯ ಏರಿಕೆ ಕಂಡುಬರಬಹುದು.

ವಿಶ್ವಕಪ್‌ನಲ್ಲಿ ಟ್ರೋಫಿ ಯಾರ ಕೈಗೆ ಸೇರುತ್ತದೆ ಎಂಬುದು ಇನ್ನೂ ಗೊತ್ತಿಲ್ಲ. ಆದರೆ ಈ ಟೂರ್ನಿಯ ಮೂಲಕ ಮೆಕ್ಸಿಕೋ ತನ್ನ ಸಂಸ್ಕೃತಿ, ಆತಿಥ್ಯ ಮತ್ತು ಪ್ರವಾಸೋದ್ಯಮದ ಸಾಮರ್ಥ್ಯದಿಂದ ಜಗತ್ತಿನ ಮನಸ್ಸನ್ನು ಗೆಲ್ಲುವ ವಿಶ್ವಾಸದಲ್ಲಿದೆ. ಫುಟ್‌ಬಾಲ್‌ನ ಗೆಲುವಿಗಿಂತ ದೊಡ್ಡ ಗೆಲುವು, ವಿಶ್ವದ ಪ್ರವಾಸಿಗರ ಹೃದಯವನ್ನು ಗೆಲ್ಲುವುದೇ ಎಂಬ ಸಂದೇಶವನ್ನು ಮೆಕ್ಸಿಕೋ ಜಗತ್ತಿಗೆ ಸಾರಲು ಸಜ್ಜಾಗಿದೆ.