ಕರ್ನಾಟಕದ ಸಾರಿಗೆ ಸಂಸ್ಥೆಗಳಿಗೆ 5,651 ಕೋಟಿ ರು.ಬಾಕಿ

ಕರ್ನಾಟಕದ ಮಹಿಳೆಯರಿಗೆ ಉಚಿತ ಬಸ್ ಪ್ರಯಾಣ ಕಲ್ಪಿಸುವ ಶಕ್ತಿ ಯೋಜನೆಯ ಫಲಾನುಭವಿಗಳನ್ನು ಡಿಜಿಟಲ್ ಮೂಲಕ ಪರಿಶೀಲಿಸಲು ರಾಜ್ಯ ಸರಕಾರ ಸ್ಮಾರ್ಟ್‌ಕಾರ್ಡ್ ವ್ಯವಸ್ಥೆ ಜಾರಿಗೆ ಮುಂದಾಗಿದೆ. ಈ ಸಂಬಂಧ ಕರ್ನಾಟಕ ರಾಜ್ಯ ರಸ್ತೆ ಸಾರಿಗೆ ಸಂಸ್ಥೆ (KSRTC), ರಾಜ್ಯದ ನಾಲ್ಕು ಸಾರಿಗೆ ಸಂಸ್ಥೆಗಳ ಪರವಾಗಿ, ಏಕೀಕೃತ ಸ್ಮಾರ್ಟ್ ಟಿಕೆಟಿಂಗ್ ವ್ಯವಸ್ಥೆ ಜಾರಿಗೊಳಿಸಲು ಟೆಂಡರ್ ಆಹ್ವಾನಿಸಿದೆ.

2023ರ ಜೂನ್ 11ರಂದು ಆರಂಭವಾದ ಶಕ್ತಿ ಯೋಜನೆಯಡಿ ಕರ್ನಾಟಕದ ನಿವಾಸಿ ಮಹಿಳೆಯರು ರಾಜ್ಯದೊಳಗೆ ಸಂಚರಿಸುವ ನಾನ್-ಎಸಿ ಬಸ್‌ಗಳಲ್ಲಿ ಉಚಿತವಾಗಿ ಪ್ರಯಾಣಿಸಬಹುದು. ಪ್ರಸ್ತುತ ಸರಕಾರಿ ಫೊಟೋ ಗುರುತಿನ ಚೀಟಿ ಪರಿಶೀಲಿಸಿ ಶೂನ್ಯ ಮೌಲ್ಯದ ಟಿಕೆಟ್ ನೀಡಲಾಗುತ್ತಿದೆ.

2023ರ ಜೂನ್‌ನಿಂದ 2026ರ ಜುಲೈವರೆಗೆ ನಾಲ್ಕು ಸಾರಿಗೆ ಸಂಸ್ಥೆಗಳು ಯೋಜನೆಯಡಿ ಸುಮಾರು 20,956 ಕೋಟಿ ರು. ವೆಚ್ಚ ಮಾಡಿದ್ದು, ರಾಜ್ಯ ಸರಕಾರದಿಂದ ಸುಮಾರು 15,305 ಕೋಟಿ ರು. ಮರುಪಾವತಿ ಪಡೆದಿವೆ. ಹೀಗಾಗಿ ಸುಮಾರು ₹5,651 ಕೋಟಿ ಬಾಕಿ ಉಳಿದಿದೆ.

ಹೊಸ ವ್ಯವಸ್ಥೆಯಲ್ಲಿ ಪ್ರತಿ ಶಕ್ತಿ ಪ್ರಯಾಣದ ವಿವರ, ಮಾರ್ಗ, ವಾಹನ, ಡಿಪೋ, ಟಿಕೆಟ್ ಸಾಧನ, GPS ಮಾಹಿತಿ ಮತ್ತು ಅಂದಾಜು ಪ್ರಯಾಣ ದರ ದಾಖಲಾಗಲಿದೆ. ಸುಮಾರು 1.9 ಕೋಟಿ ಫಲಾನುಭವಿಗಳು ಹಾಗೂ ದಿನಕ್ಕೆ 75.68 ಲಕ್ಷ ಉಚಿತ ಪ್ರಯಾಣಗಳು ಇರುವುದಾಗಿ ಟೆಂಡರ್ ಅಂದಾಜಿಸಿದೆ.