ವಿಕಲಚೇತನ ವ್ಯಕ್ತಿಗಳಿಗಾಗಿ ಭಾರತದ ಮಹತ್ವದ ಹೆಜ್ಜೆ

ಭಾರತೀಯ ರೈಲ್ವೆಯು ಒಂದು ಕ್ರಾಂತಿಕಾರಿ ನಿರ್ಧಾರವನ್ನು ಕೈಗೊಂಡಿದೆ. ವಿಕಲಚೇತನ ವ್ಯಕ್ತಿಗಳಿಗೆ ಪ್ರಯಾಣವನ್ನು ಸುಗಮಗೊಳಿಸುವ ಉದ್ದೇಶದಿಂದ, ಮೇಲ್ ಮತ್ತು ಎಕ್ಸ್‌ಪ್ರೆಸ್ ರೈಲುಗಳಲ್ಲಿ ಲಭ್ಯವಿರುವ ಕಾಯ್ದಿರಿಸದ ದಿವ್ಯಾಂಗಜನ ಬೋಗಿಗಳಲ್ಲಿ ಅವರು ಯಾವುದೇ ತೊಂದರೆಯಿಲ್ಲದೆ ಮುಕ್ತವಾಗಿ ಪ್ರಯಾಣಿಸಲು ಅವಕಾಶ ನೀಡುವ ಹೊಸ ನಿಯಮಗಳನ್ನು ಜಾರಿಗೆ ತರಲಾಗಿದೆ.

ಈ ಹೊಸ ನಿಯಮದ ಪ್ರಕಾರ, ರೈಲ್ವೇ ಇಲಾಖೆಯಿಂದ ನೀಡಲಾದ ಮಾನ್ಯತೆ ಪಡೆದ ಗುರುತಿನ ಚೀಟಿಯನ್ನು ಹೊಂದಿರುವ ವಿಕಲಚೇತನ ಪ್ರಯಾಣಿಕರು ಈಗ ರೈಲಿನ ಎಸ್‌ಎಲ್‌ಆರ್ ಬೋಗಿಗಳಲ್ಲಿರುವ ದಿವ್ಯಾಂಗಜನರಿಗಾಗಿ ಮೀಸಲಿಟ್ಟ ವಿಶೇಷ ವಿಭಾಗಗಳಲ್ಲಿ ಪ್ರಯಾಣಿಸಬಹುದು. ಈ ಹಿಂದೆ ಈ ಬೋಗಿಗಳಲ್ಲಿ ಪ್ರಯಾಣಿಸಲು ಇದ್ದ ಕೆಲವು ತಾಂತ್ರಿಕ ಅಡೆತಡೆಗಳನ್ನು ನಿವಾರಿಸಿರುವುದರಿಂದ, ದಿವ್ಯಾಂಗ ಪ್ರಯಾಣಿಕರಿಗೆ ಹೆಚ್ಚಿನ ಅನುಕೂಲವಾಗಲಿದೆ.

ಇದನ್ನೂ ಓದಿ: ಇಂದೋರ್-ಮುಂಬೈ ನಡುವೆ ಹೊಸ ರೈಲು

ದಿವ್ಯಾಂಗಜನ ಬೋಗಿಗಳನ್ನು ವಿಶೇಷವಾಗಿ ವಿನ್ಯಾಸಗೊಳಿಸಲಾಗಿದ್ದು, ಇವುಗಳಲ್ಲಿ ವೀಲ್‌ಚೇರ್‌ ಚಲನೆಗೆ ಅವಕಾಶವಿದೆ. ಅಲ್ಲದೆ, ಇವುಗಳಲ್ಲಿ ವಿಕಲಚೇತನ ಸ್ನೇಹಿ ಶೌಚಾಲಯಗಳು ಮತ್ತು ವಿಶಾಲವಾದ ಆಸನ ವ್ಯವಸ್ಥೆಯನ್ನು ಒದಗಿಸಲಾಗಿದೆ. ಕಾಯ್ದಿರಿಸದ ವಿಭಾಗದಲ್ಲಿ ಈ ಸೌಲಭ್ಯವನ್ನು ನೀಡುತ್ತಿರುವುದರಿಂದ, ತುರ್ತು ಸಂದರ್ಭಗಳಲ್ಲಿ ಪ್ರಯಾಣಿಸುವ ವಿಕಲಚೇತನರಿಗೆ ಮುಂಚಿತವಾಗಿ ಟಿಕೆಟ್ ಕಾಯ್ದಿರಿಸುವ ಅನಿವಾರ್ಯತೆ ಇರುವುದಿಲ್ಲ.

ಈ ಸೌಲಭ್ಯವನ್ನು ಪಡೆಯಲು ಪ್ರಯಾಣಿಕರು ರೈಲ್ವೇ ಇಲಾಖೆಯು ನೀಡಿರುವ ಫೊಟೋ ಸಹಿತದ ಅಧಿಕೃತ ದಿವ್ಯಾಂಗ ಗುರುತಿನ ಚೀಟಿಯನ್ನು ಹೊಂದಿರಬೇಕಾಗುತ್ತದೆ. ಇದು ಕೇವಲ ವಿಕಲಚೇತನರಿಗೆ ಮಾತ್ರವಲ್ಲದೆ, ಅವರೊಂದಿಗೆ ಬರುವ ಒಬ್ಬ ಸಹಾಯಕರಿಗೂ ಅನ್ವಯವಾಗುವ ಸಾಧ್ಯತೆಗಳ ಬಗ್ಗೆ ಇಲಾಖೆಯು ಸ್ಪಷ್ಟ ಮಾರ್ಗಸೂಚಿಗಳನ್ನು ನೀಡಿದೆ.

ಈ ಹೊಸ ನಿಯಮದ ಬಗ್ಗೆ ಎಲ್ಲರಿಗೂ ತಿಳಿಯುವಂತೆ ಮಾಡಲು ದೇಶಾದ್ಯಂತದ ಪ್ರಮುಖ ರೈಲ್ವೆ ನಿಲ್ದಾಣಗಳಲ್ಲಿ ಜಾಗೃತಿ ಕಾರ್ಯಕ್ರಮಗಳನ್ನು ಹಮ್ಮಿಕೊಳ್ಳಲಾಗುತ್ತಿದೆ. ನಿಲ್ದಾಣದ ಅಧಿಕಾರಿಗಳು ಮತ್ತು ರೈಲ್ವೆ ಭದ್ರತಾ ಪಡೆಗೆ ಈ ಕುರಿತು ತರಬೇತಿ ನೀಡಲಾಗಿದ್ದು, ದಿವ್ಯಾಂಗ ಪ್ರಯಾಣಿಕರಿಗೆ ಅಗತ್ಯವಾದ ಸಹಾಯವನ್ನು ನೀಡಲು ಸೂಚಿಸಲಾಗಿದೆ.