ಕರ್ನಾಟಕದಲ್ಲಿ ಹೋಮ್‌ ಸ್ಟೇ ಮತ್ತು ಬಿ&ಬಿಗೆ ಪ್ರತ್ಯೇಕ ನಿಯಮ

ಕರ್ನಾಟಕ ಸರಕಾರವು ಹೋಮ್‌ ಸ್ಟೇ ಮತ್ತು ಬೆಡ್ ಅಂಡ್ ಬ್ರೇಕ್‌ಫಾಸ್ಟ್ (B&B) ವಸತಿ ವ್ಯವಸ್ಥೆಗಳನ್ನು ಇನ್ನು ಮುಂದೆ ಪ್ರತ್ಯೇಕ ವಿಭಾಗಗಳಾಗಿ ವರ್ಗೀಕರಿಸಲು ಹೊಸ ಮಾರ್ಗಸೂಚಿಗಳನ್ನು ಜಾರಿಗೆ ತರುತ್ತಿದೆ. ಪ್ರವಾಸೋದ್ಯಮ ಹಾಗೂ ಇಂಧನ ಸಚಿವ ಕೆ.ಜೆ. ಜಾರ್ಜ್ ಈ ಕುರಿತು ಘೋಷಣೆ ಮಾಡಿದ್ದು, ರಾಜ್ಯದಲ್ಲಿ ಪ್ರವಾಸಿ ವಸತಿ ವ್ಯವಸ್ಥೆಯನ್ನು ಹೆಚ್ಚು ಪಾರದರ್ಶಕ, ಸುರಕ್ಷಿತ ಹಾಗೂ ವ್ಯವಸ್ಥಿತಗೊಳಿಸುವ ಉದ್ದೇಶದಿಂದ ಈ ಕ್ರಮ ಕೈಗೊಳ್ಳಲಾಗಿದೆ.

2025ರ ಹೋಮ್‌ ಸ್ಟೇ ನೋಂದಣಿ ಮಾರ್ಗಸೂಚಿಗಳ ಪ್ರಕಾರ, ಹೋಮ್‌ ಸ್ಟೇ ಮತ್ತು ಬಿ&ಬಿ ಇನ್ನು ಮುಂದೆ ಒಂದೇ ವರ್ಗಕ್ಕೆ ಸೇರದೆ ಪ್ರತ್ಯೇಕ ನಿಯಮಗಳ ಅಡಿಯಲ್ಲಿ ಕಾರ್ಯನಿರ್ವಹಿಸಲಿವೆ. ಹೋಮ್‌ ಸ್ಟೇ ಎಂದರೆ ಮನೆ ಮಾಲೀಕರು ಅಥವಾ ಅವರ ಕುಟುಂಬದ ಸದಸ್ಯರು ವಾಸಿಸುವ ಖಾಸಗಿ ನಿವಾಸದಲ್ಲಿ ಒಂದರಿಂದ ಆರು ಕೊಠಡಿಗಳವರೆಗೆ ಪ್ರವಾಸಿಗರಿಗೆ ವಸತಿ ಒದಗಿಸುವ ವ್ಯವಸ್ಥೆ. ಇವುಗಳನ್ನು ವಾಣಿಜ್ಯೇತರ (Non-commercial) ಸಂಸ್ಥೆಗಳೆಂದು ಪರಿಗಣಿಸಲಾಗುತ್ತದೆ.

ಇನ್ನೊಂದೆಡೆ, ಬಿ&ಬಿ (Bed & Breakfast) ವ್ಯವಸ್ಥೆಯಲ್ಲಿ ಮನೆ ಮಾಲೀಕರು ಸ್ಥಳದಲ್ಲೇ ವಾಸಿಸುವ ಅಗತ್ಯವಿರುವುದಿಲ್ಲ. ಅವರ ಪರವಾಗಿ ನಿರ್ವಾಹಕರು ಅಥವಾ ಏಜೆಂಟ್‌ಗಳು ಅತಿಥಿ ಸೇವೆಗಳನ್ನು ನಿರ್ವಹಿಸುತ್ತಾರೆ. ಇಂಥ ವಸತಿ ಕೇಂದ್ರಗಳಲ್ಲಿ ಗರಿಷ್ಠ ಆರು ಕೊಠಡಿಗಳು ಅಥವಾ 12 ಹಾಸಿಗೆಗಳವರೆಗೆ ಅವಕಾಶವಿದ್ದು, ಇವುಗಳನ್ನು ವಾಣಿಜ್ಯ (Commercial) ಸಂಸ್ಥೆಗಳೆಂದು ಗುರುತಿಸಲಾಗುತ್ತದೆ. ಈ ವಿಭಾಗಕ್ಕೆ ಸರಕಾರ ಪ್ರತ್ಯೇಕ ಕಾರ್ಯಾಚರಣಾ ಮಾರ್ಗಸೂಚಿಗಳನ್ನು ಪ್ರಕಟಿಸಲಿದೆ.

ಇದನ್ನೂ ಓದಿ: ಹೋಂ ಸ್ಟೇ ಎಂದರೆ ಹೀಗಿರಬೇಕು!

ಈ ಹೊಸ ನೀತಿಯಿಂದ ಪ್ರವಾಸಿಗರಿಗೆ ತಾವು ಆಯ್ಕೆ ಮಾಡುತ್ತಿರುವ ವಸತಿ ಮಾದರಿಯ ಬಗ್ಗೆ ಸ್ಪಷ್ಟ ಮಾಹಿತಿ ದೊರೆಯಲಿದ್ದು, ಸರಕಾರಕ್ಕೂ ಎರಡೂ ವಿಭಾಗಗಳನ್ನು ಪರಿಣಾಮಕಾರಿಯಾಗಿ ನಿಯಂತ್ರಿಸಲು ಅನುಕೂಲವಾಗಲಿದೆ. ಜತೆಗೆ, ಆಸ್ತಿ ಮಾಲೀಕರು ಮತ್ತು ಪ್ರವಾಸೋದ್ಯಮ ಉದ್ಯಮಿಗಳಿಗೆ ಹೊಸ ಅವಕಾಶಗಳು ಸೃಷ್ಟಿಯಾಗಲಿವೆ. ಪ್ರವಾಸೋದ್ಯಮ ವೇಗವಾಗಿ ಬೆಳೆಯುತ್ತಿರುವ ಹಿನ್ನೆಲೆಯಲ್ಲಿ, ಈ ಸುಧಾರಣೆ ರಾಜ್ಯದ ವಸತಿ ಮೂಲಸೌಕರ್ಯವನ್ನು ಬಲಪಡಿಸಿ, ಹೂಡಿಕೆದಾರರ ವಿಶ್ವಾಸ ಮತ್ತು ಪ್ರವಾಸಿಗರ ಅನುಭವವನ್ನು ಮತ್ತಷ್ಟು ಉತ್ತಮಗೊಳಿಸುತ್ತದೆ ಎಂದು ಹೇಳಿದ್ದಾರೆ.